Sot protesta qytetare hyn në ditën e saj të 40-të, duke u kthyer në një nga lëvizjet më të gjata qytetare që ka njohur Shqipëria në vitet e fundit.

Për 40 ditë me radhë, qytetarët janë mbledhur çdo mbrëmje para Kryeministrisë me të njëjtat thirrje që dëgjohen që prej ditës së parë: “Rama në burg, Berisha në burg”, “Rama jep dorëheqjen” dhe “Shqipëri e Re”.

Edhe mbrëmjen e djeshme, si në 38 ditët e tjera, pas tubimit para Kryeministrisë, protestuesit marshuan në rrugët e Tiranës, ndaluan para Kuvendit dhe më pas përpara selisë së Partisë Demokratike, ku brohoritën “Opozitë e shitur”, duke akuzuar opozitën se është bërë pjesë e të njëjtit sistem që qytetarët kërkojnë të rrëzojnë.

Në këto 40 ditë, podiumi i protestës është kthyer në një tribunë qytetare, ku çdo mbrëmje ngrihen shqetësime për korrupsionin, varfërinë, largimin masiv të të rinjve, gjendjen e shëndetësisë, arsimit dhe mënyrën se si përdoren paratë publike. Ditët e fundit, në qendër të kritikave ka qenë financimi me 4 milionë euro i koncertit të Kanye West, një vendim që protestuesit e kanë cilësuar simbol të shkëputjes së qeverisë nga problemet reale të qytetarëve.

Pavarësisht vapës, lodhjes dhe kalimit të javëve, pjesëmarrja në protestë nuk është ndërprerë asnjë ditë. Organizatorët këmbëngulin se kjo nuk është një protestë e partive politike, por një lëvizje qytetare që do të vazhdojë deri në arritjen e objektivave të saj.

Edhe sot, në ditën e 40-të, qytetarët pritet të rikthehen sërish para Kryeministrisë, me të njëjtin mesazh që ka shoqëruar protestën që prej 40 ditësh: Rama jep dorëheqjen! bw

“…dallimi mes shtetit dhe kaosit”, është pjesa e fundit që e kemi shkëputur nga një status i gjatë i Ministrit të Brendshëm Besfort Lamallari i cili gjatë një ceremonie të dorëzimit të 23 motoçikletave të reja që do të përdoren nga Policia Rrugore dhe forcat ‘Shqiponja’ kuptohet se është një qendrim tërësisht ideologjik, politizues dhe ushqyes i veprimeve të presionit apo të forcës që demonstron kjo forcë.

Përse është i tillë?

Këtë e tregon vetë titulli që përzgjedh ATSH-ja në propagandën zyrtare ku shënohet ;“Lamallari: Policia nuk duhet të përgjigjet me emocion, por me ligj”

Me ç’rast e thotë ai këtë.  Në fakt jo vetëm ai por e njëjta  ceremoni trefishohet në lajmin. Për 23 motoçikletat flet Drejtori i përgjithshëm i Policisë së Shtetit; “Hita: Motomjetet e reja forcojnë kapacitetet operacionale të forcës së posaçme ‘Shqiponja’ dhe Policisë Rrugore” dhe në një tjetër Krye-administratorja e Agjencia e Administrimit të Pasurive të Sekuestruara dhe të Konfiskuara  , Risena Xhaja titulli i ATSH-s është; “AAPSK financon 23 motoçikleta të reja për Policinë e Shtetit”. E përbashkëta e të tre lajmeve është se këto 23 mjete të motorizuara e kanë vlerën e tyre të përfshirë nga një fond prej 4,7 milion eurove që dalin nga Agjencia e Administrimit të Pasurive të Sekuestruara dhe të Konfiskuara për gjatë periudhës 2024–2026 dhe që cilësohen investime për Policinë e Shtetit.

Turizmi, parandalimi i aksidenteve në rrugë, goditja e krimit vendosen në qendër të justifikimit të domosdoshëm për veprimtarinë e policisë, por mes kësaj propagande sinjali për t’i bërë presion protestës së pandërprerë të qytetarëve për dorëheqjen e panegociueshme të kryeministrit që ka hyrë në muajin e dytë është i hapur dhe i pa maskuar:- “Ju dhe kolegët tuaj keni kaluar një periudhë të ngarkuar dhe sfiduese, jo vetëm në terren, por edhe në sheshin e pamëshirshëm të opinionit publik. Keni përballuar provokime, akuza dhe gjykime të nxituara, aty ku shpesh rrjetet sociale flasin para se të flasin vetë faktet dhe të shpallin dhe gjyqet publike. Mendoni se çfarë do të thotë të përballesh me një urrejtje të pafiltruar, ku ‘heroi’ apo deliranti revolucionar, ju akuzon publikisht për dhunë, një teatro-realitet të inskenuar, me qëllimin  e vetëm për t’u bërë viral. Në skena të tilla, të vetmit pa faj mbeten dy palë, punonjësi i policisë, i cili duhet të ruajë me çdo kusht dinjitetin me durim, sepse kështu e kërkon pozicioni i tij, dhe vetë akuzuesi, në disa raste, i cili, në çdo rast që kemi dëshmuar së fundmi, ka më shumë nevojë për kujdes, ekzaminime dhe mundësisht për trajtim sesa për përgjegjësi ligjore. Vazhdoni kështu, pa e humbur kurrë durimin dhe pa rënë kurrë pre e provokimeve. Uniforma që mbani kërkon vetëpërmbajtje përballë atyre që nuk respektojnë as ligjin dhe as institucionet. Policia nuk duhet të përgjigjet me emocion, ajo përgjigjet me ligj. Ky është dallimi mes shtetit dhe kaosit.”*

Por le ta shohim në thelb këtë politizim dhe mburojë të pushtetit me protestën tërësisht paqësore të qytetarëve. Janë ata që u kanë dhënë ujë policëve të pakët në numër në shesh dhe ndoshta lule, apo dhe vezë e miell politikanëve dhe kanë marrë në shkëmbim, shtytje, goditje, shkop gome, spërkatje lotuese dhe djegëse, tymues, top-uji dhe ndalime apo arrestime, deri diku e kanë zvogëluar numrin e pjesëmarrësve, por që nuk është ndërprerë.

Mesazhi ose kuptimi i dytë se çfarë ka në dorë pushteti del i qartë kur kupton se çfarë propaganda e quan investimin për policinë, kur këto fonde dalin nga pasuritë e sekuestruara dhe të konfiskuara. Jo vetëm një pikëpyetje e madhe, por edhe një problem i madh që tregon për milionat që kriminaliteti në ekonomi ka gjetur terren dhe nuk ka mundur të parandalohet prej një periudhe 13-14 vjeçare që kjo qeverisje sundon. E shprehur në vlera sipas ngjarjeve ditore këto 4,7 milion euro a janë këto vetëm një pjesë e vogël e vlerave nga konfiskimi i parave të korrupsionit.

Po në qoftë se do ta shtronim ndryshe pyetjen Ku i gjen Rama 4.5 milion për një koncert “privat” dhe i ndërton stadiumin sikurse i siguron edhe me polici perimetrin  e shfaqjes një ditore dhe si nuk gjen mënyra ekonomike apo edhe nga sekuestrimet e veprave të korrupsionit atë normë 5% të GDP-së  deri në 2035 për të kontribuar financiarisht në NATO?

Këtë na e shpjegon ’emocioni’ i protestës për t’i thënë ndal korrupsionit ekonomik dhe politik si dhe kuptimi i forcës së ligjit për ta ndaluar rënien e vetë drejtimit të shtetit në kaos, qe e mbron jetëgjatësinë me forma represive.

________

*ATSH-7 Korrik, 2026 “Lamallari: Policia nuk duhet të përgjigjet me emocion, por me ligj”

Revolta qytetare hyn sot në ditën e saj të 39. Edhe këtë pasdite, qytetarët do të rikthehen para Kryeministrisë, të vendosur për të vijuar protestën që prej më shumë se një muaji kërkon largimin e Edi Ramës dhe fundin e modelit politik që, sipas tyre, ka mbajtur peng vendin.

Ajo që nisi si një reagim kundër projektit në Zvërnec është kthyer në një revoltë të gjerë kundër kastës politike, me kërkesën për largimin e kryeministrit Edi Rama dhe ndërtimin e një sistemi të ri politik.

Edhe sot pritet të dëgjohen thirrjet që kanë shoqëruar protestën prej javësh, si “Rama jepe dorëheqjen”, “Rama ik”, “Rama në burg, Berisha në burg”, “Ju erdhi fundi”, “Revolucion”, “Shqipëri e re” dhe “Atdheu është i yni”, ndërsa organizatorët kanë përsëritur se protesta do të mbetet paqësore.

Gjatë ditës së djeshme, protestuesit ritheksuan kërkesat që i konsiderojnë të panegociueshme: dorëheqjen e kryeministrit dhe të qeverisë, krijimin e një qeverie teknike tranzitore, reformimin e sistemit politik dhe shfuqizimin e ligjeve që, sipas tyre, favorizojnë interesat klienteliste.

Në podium u bënë edhe akuza për përdorimin e fondeve publike për koncertin e Kanye West, ndërsa u njoftua një protestë kombëtare më 11 korrik, në ditën kur është planifikuar zhvillimi i koncertit në Tiranë.

Organizatorët kanë theksuar se mobilizimi nuk do të ndalet, duke argumentuar se pas 38 ditësh pjesëmarrja e qytetarëve tregon se pakënaqësia mbetet e lartë dhe se protesta ka hyrë në një fazë të re qëndrese.

Edhe sot, pasditja pritet ta gjejë sërish bulevardin përballë Kryeministrisë të mbushur me qytetarë, të cilët kanë paralajmëruar se do të vijojnë protestat deri në realizimin e kërkesave të tyre.

Teksa vendi është përfshirë prej më shumë se një muaji nga një valë protestash masive që kërkojnë largimin e kryeministrit Edi Rama në mënyrë të pangeociueshme, kreu i qeverisë ka zgjedhur të sulmojë dhe akuzojë protestuesit, madje duke i cilësuar edhe si të nxitur nga shtete e agjentura të huaja. Vite më parë, kur Rama ishte në opozitë, shprehej vetë se populli e ka kontratën me ata që qeverisin, dhe kur kjo kontratë cenohet qytetarët reagojnë.

“Ata që qeverisin duhet të japin përgjigje një më një për çdo pikë të shkelur të kontratës. Kjo qeveri e ka grisur kontratën me popullin dhe për këtë arsye populli duhet ta flakë”, shprehej Rama.bw

(Arroganca tjetër e Ramës-“Nga qeverisja te besimi”)

Nuk duket normal ky vetëbesim, por arroganca e kryeministrit shqiptar, nuk u ndalka (?!)

Dhuna policore mbi protestuesit dhe kërkesa e kryeministrit gjoja për dialog, janë qoshja e fundit ku i paralajmëruari për dorëheqje Rama, është ngjeshur. Në 36 ditë protestë konstantja e lajmeve të propagandës e thjeshtëzuar në shumicën e tyre si një renditje, vetëm me cilësinë si një grumbullim njerëzish ka titullin e përsëritur si; “Protesta për investimin në Zvërnec në Ditën e… të saj”. Ky ka qenë synimi kryesor i qeverisë për t’i ulur vlerat kërkesave legjitime të qytetarëve si dhe ka mbetur një tentativë e mediave pranë qeverisë për të zvogëluar gjithçka, numrin e protestuesve, kohëzgjatjen e saj si dhe duke fshehur veprime të qëllimshme për të demoralizuar rininë. Por mes gjithë këtyre duhet pohuar se falë shterpësisë së ideve të pushtetit dhe të politikës mbi këtë situatë dalja me kërkesa të vakëta e të ndrojtura pa e kuptuar thelbin e protestës po tregon pafuqishmërinë shtetit dhe paaftësinë e një sistemi në tranzicionin e gjatë 36 vjeçar. Pafuqishmërinë e tyre po e tregojnë konkretisht me heshtjen çdo ditë “zyrat” e përfaqësuesve të shtetit që nga presidenca, kryeministria, ministritë, kuvendi etj. si dhe sistemi i drejtësisë që e kontrollon disi ndryshe protestën duke “liruar çka kap policia”. Një lojë e lodhshme si ‘macja me miun’, pikërisht për ta dobësuar pjesëmarrjen e protestuesve çdo ditë.

Por krejt ndryshe nga sa më lart shfaqet rinia e cila është e vendosur dhe e kujdesshme, me plot energji që nuk e ndërpret protestën ‘pa dalë e keqja. ‘

Rinia ka gjetur çdo pasdite jo thjeshtë si “punën e dytë të saj” protestën në Tiranë, por ajo e ka kthyer atë në qëllimin kryesor duke investuar kohë dhe energji. Prej andej rrezaton shpesë, ngrihet humori dhe jepen me plot thjeshtësi kërkesat e arsyetohet se përse duhen sjellë ndryshimet. Edhe pse disa pika të rëndësishme që gjatë këtyre ditëve vërtetë do të përbënin lajme në përcjelljen e të rejave, gazetarisë së tulatur* i ka mbetur fryma dhe ende po mendohet se:- A i shërben kjo stabilitetit (?),… A i shërben apo jo kjo protestë “ujit të ndenjur” të qeverisë (?).

Ndoshta do të ishte mirë që media të ishte ajo që do ta kishte ndërtuar me kohë dialogun. Në qoftë se këto 35-36 ditë u pa “the big picture” (pamja e plotë), nuk ka se si çdo ditë të jetë dhe të mbetet vetëm një konstatim ngjarjeve dhe i vendosjes së kamerave live thjeshtë në shesh. Nuk ka se si studiot që ndërmjet reklamave dhe programeve të paravendosura ta thyejnë heshtjen me ndonjë “breaking news”, vetëm atëherë kur diçka që qeveria bëhet e ndjeshme apo edhe se një zile e pushtetit, një telefon i tijë i kujton orientimet ekraneve. Nuk ka se si që për të njëjtin objekt, protestën, studiot televizive të synojnë vetëm duke gjetur pikat e forta dhe të dobëta të protestës. Të japin argumente me filozofinë e vjetruar se si kryhet rotacioni, sikurse edhe të gjejnë shtrembërime të qëllimshme e t’i kapin gjërat nga fundi i listës etj. në një kohë kur rinia protestuese ka paralajmëruar herë pas here se; 1- Po kërkohet e vërteta për korrupsionin, 2- Po distancohet kjo protestë në çdo rast nga provokimet e dhuna dhe, 3- Po kërkon bojkotin e atyre mediave dhe analistëve pro qeverisë që nuk e përcjellin të vërtetën.

Pra së fundmi, në këto 36-37 ditë rinia po tregon atë që e ka kuptuar më së miri, propagandën e pushtetit 13-14 vjeçar si edhe të gjithë politikën së tranzicionit që ndodhet në një krizë të thellë. Ky muaj proteste ishte koha e mjaftueshme e përballjes dhe në vijim po tregon se po mbeten ditë të numëruara për makinerinë e propagandës e cila po përpiqet të pengojë në çdo rast dhe në çdo mënyrë realitetin. Në këtë betejë mes propagandës dhe komunikimit të mediave sociale që rinia po përdor, shteti ka treguar anën e errët të vet ku ka gjurmuar dhe e ka etiketuar këtë protestë si një veprimtari që frymëzohet nga elementë armiq, që bashkëpunojnë me agjentura të huaja, etj. Por si ndodh dhe nuk faktohet dot kjo kur në një kohë jo të largët shteti pretendon dhe ka deklaruar se ndodhet në top-listën e luftës kibernetike botërore. Si mundet që nga kjo cilësi e inteligjencës ky shtet nuk jep dot një fakt të argumentuar dhe shterues, përveç se sa censuron dhe merr masa represive përmes institucioneve dhe agjencive që i ka ngritur mbi kriterin e kontrollit politik. Madje qeverisja bën të kundërtën, bën më ndryshe dhe me hamendjen e goditjes i ka shndërruar tani edhe ministrat dhe deputetët në shënjestrues të rrjeteve sociale që e kanë ‘rritur cilësinë‘ dhe orientimin e ideve të patronazhimit. Jemi pra në kohën kur nga java në javë edhe forumet politike të partisë në pushtet nuk thirren dot. Kryetari i Rilindjes Socialiste i cili  harxhoi dy javë më parë këshillat mes GPS për t’i gjetur të çara protestës, sot nuk e gjen as rastin që betejën ta zhvillojë në kuvend, madje ka humbur dhe qetësinë e përjavshme me podkastin ‘Flasim’ të cilin gjatë fundjavës e prodhoi si nxjerrje mësimesh nga protestat. Pra gjithçka në ngërç. Edhe sulmi verbal apo përdorimi i forcës dhe i dhunës nuk shmanget, por si zakonisht janë të gatshme për t’u përdorin në rastin më të parë.

Por për sa kohë që kjo luftë po bëhet interesante mes dy kampeve Rini dhe Qeveri, le të rendisim disa prirje që ngecin në raport me propagandën dhe si mund ta shohë media atë;

Së pari, turistët. Ishin 12-14 milion pritshmëritë në vitin elektoral dhe në vitin pas zgjedhjeve. Askush nuk i po e bën sot shumatoren nga qeveria. Numri i turistëve që e frekuentojnë Shqipërinë në muajt e verës gjatë viteve të shkuara i hapte edicionet e lajmeve dhe kryesonte me titujt mediat online. Sot fjala turist mezi po përmendet sepse Bulevardi “Dëshmorët e Kombit” është një pikë tërheqëse e re për turizmin. Kjo ka tejkaluar moton propagandistike të Rilindjes Socialiste ‘Albania: All Senses’ (Shqipëria: E gjithë shqisave), tek kjo protestë gjen shqisat edhe shembullin për të ndjerë energjinë e një bashkimi paqësor që kërkon ndryshim. Një qëndresë jo vetëm ditore, por e pandalshme po të jetë nevoja derisa dorëheqja e padiskutueshme të realizohet. Kjo protestë ka pikësynimin jo vetëm të të gjitha shqisave dhe në të 365 ditët e vitit dhe në se filloi me Zvërnecin, me mbrojtjen e natyrës, me mbrojtjen e pronës si pasuri dhe trashëgimi për brezat e sotëm dhe të ardhshëm të shqiptarëve në tokën e tyre dhe mirëqenia e popullsisë nuk mund të nëpërkëmben. Kjo shkallë e korrupsionit ishte dhe pika e fundit.

Së dyti, këmbimi i euros dhe dollarit. Askush nuk po e përmend se po shënohen rekordet më të ulëta të valutës këto ditë. (1 € blihet me 93,4 lekë, 1$ blihet me 81,3 lekë, £ BM blihet me 108.5 lekë, S.Fr blihet me 101,2 lekë, dollari kanadez blihet me 57 lekë etj.). Disa nga pyetjet që shtrohen sa më poshtë janë:

A është kaq i fortë leku shqiptar kundrejt prodhimit në vend dhe i veprimtarisë ekonomike të orientuar me bazë prodhimin bujqësor e blegtoral si dhe peshkimin që ta mbështesin turizmin? 

A janë arsimi dhe shkollat profesionale ato që në 13 vite do të kishin nxjerrë një brez të punësuarish të specializuar dhe të mirëpaguar në këto shërbime apo në ekonomi?

A janë cilësore dhe të pa shpërdoruara fondet në bujqësi, infrastrukturë dhe energji ato që do të mundësonin një zhvillim të qëndrueshëm në ekonomi, apo ato përvetësohen nga shteti dhe klientët afër me të?

Po të kishim një qeverisje që mendonte për qytetarët, sigurisht që PO.

Por disa nga pyetjet e ngritura sikurse edhe shumë të tjera për fat të keq marrin përgjigje negative sikurse edhe ato ku shëndetësia, arsimi, kultura dhe trashëgimia, natyra dhe burimet natyrore përdoren sipas nevojave klienteliste apo shpenzimeve që të ardhurat e shtetasve nuk i përballojnë. Le të kujtojmë këtu vlerën e dobësuar të remitancave për familjet shqiptare, të cilat në të kundërt vlerësohen si të ardhura për shtetin. Dhe në qoftë se këto çështje nuk janë të mjaftueshme, qeveria dhe politikanët këto do të dëgjojnë nga sheshi i i protestës në se do t’i shërbenin qytetarëve.

Së treti, temperaturat e larta. Ato nuk janë dëshpërim dhe as pengesa pasi protesta motivohet nga përgjegjësitë dhe jo nga shpërblimi patronazhist. Kujtoni përplasjen e parë. Protestën në ditën e 11 dhe festën e 35 vjetorit të PS. 

I njëjti shesh. 

E njëjta ‘mikroklimë’. 

Një rezistencë e pakrahasueshme dhe qytetari aty ku ‘patronazhisti më i gjatë’ e duroi garën vetëm në një orë apo mos më pak. Protesta qytetare paqësore qëndroi e paprovokuar dhe thirri edhe diasporën edhe për ditët e pandërprera më pas. Një mobilizim dhe energji që e ndërkombëtarizoi çështjen për mbrojtjen e natyrës dhe për luftën ndaj korrupsionit në një nivel të ri që përfaqëson tashmë politikën e inkriminuar në një betejë të pashmangshme me ligjin dhe drejtësinë.

Së katërti, diaspora. Do të përmblidhej përmes një shpjegimi situate se; Kush mund ta bëjë bashkë diasporën? Kjo përgjigje del vetiu nga mënyra se si u përdor ajo nga zgjedhjet e shkuara. Kush qëndroi në pushtet përmes manipulimit është vetëm njëri aspekt i dëmit. Por përgjigjes se kush do ta bëjë atë bashkë veç çështjes kombëtare, familjes, besimit nuk mund t’ja japë dot asnjë forcë politike sot. Asnjë parti politike nuk do të ishte e suksesshme në reputacionin e vet sikur sot po të shpalleshin zgjedhjet dhe të kërkonte tubime në diasporë. Kombi ka dalë mbi partitë, ndaj çështja është ndërkombëtarizuar sa edhe ndihma e botës së qytetëruar pritet të vijë e të veprojë për të ndryshuar gjendjen dhe për t’i hapur rrugë të resë.

Së pesti, provokimi. Ka treguar se ai kapet dhe dështon në çdo rast. Është përcaktuar si një zgjim i forcës së dhunës që është i gatshëm ta përdorë pushteti dhe mungesa e tolerancës edhe për një të drejtë që është protesta. Një protestë e vendosur dhe që nuk ndërpritet deri në dorëheqjen e kryeministrit Rama.

Së gjashti, anti-bullizimi. Kryeministri në rezistencë ose në ikje, siç protesta e përsërit çdo ditë e më shumë, e ka humbur qetësinë, bën gabime, largohet jashtë shtetit për t’ju shmangur përballjes me protestën, gjen mënyra të thumbojë deri aty sa e ka shteruar fjalorin duke rënë në nivelin e CV-së së anëtarëve të mazhorancës së Kuvendit të cilët vetë i ka përzgjedhur në shërbim të vetin. Ndaj sheshi i protestës ka plot material. Çdo ditë ka edhe të reja që nuk janë të papritura, por aty ata po tregojnë se gjinden shumë pjesë të kalbura të një sistemi të cilat duhen pastruar pasi më nuk funksionojnë.

Së shtati, kjo është protestë që kryeministri ende nuk di si ta quaj. Edhe në ditën e Ditëlindjes së Vet, me qënë se punët e shtetit i shkojnë vaj, ndodhi që kryeministri nga larg t’i drejtohej protestës me fjalët “Të dashur Flamingo”. Përpos halleve dhe vuajtjeve që ta çojë sa më shpejtë Shqipërinë në BE, Rama ende ka kohë e nge të shkruajë të gjitha etiketimet për protestën një muaj pasi zhvillimit të saj. Ky është rekordi i mbërritur dhe që çdo ditë do të thyhet duke shënuar një më të ri, sepse kryeministri i vendit dhe kryetari i një partie politike me përfaqësimin më të madh as në parlament nuk e kupton marrëzinë e vet. Pushtetin absolut që i ka dhënë korrupsioni.

Titujt e mediave zyrtare shkruajnë “Protesta e investimeve në Zvërnec në ditën e …” , pra vetëm duke i ndryshuar numrin. Ky është thjeshtë një formalitet nga ana e qeverisë që shtiret se ishte e shqetësuar për gjendjen apo edhe mburrej me zhvillimin e protestave si një e drejtë e shtetasve. Për më tepër qeveria ishte e interesuar që kjo gjendje dhe kjo fasadë pikërisht kështu të mbetej. E pa zëshme dhe monotone deri në një krisje apo në një përçarje. Në krye të lajmeve të propagandës kur nga njëra anë shkruani se “Ajo protestë nuk është më e juaja të dashur flamingo!” dhe nga ana tjetër po “kërkoni ujin e kulluar”, kjo e jep plotësisht thelbin dhe nivelin e dëshpërimit që ka pushteti nga provokimi i protestës paqësore.

Marrëzinë e keni shkaktuar vetë Z. kryeministër, e keni ushqyer edhe si kryetar i partisë pikërisht me po atë mënyrë që e morët pushtetin politik dhe ekzekutiv. Protesta duke ju referuar titujve zyrtarë të propagandës tregon për atë pandjeshmërinë ose edhe atë tinëzi të pushtetit për të topitur* mediat dhe gazetarët brenda dhe jashtë vendit, pikërisht për të mbuluar dhe vonuar të vërtetën.

Fakti që qytetarët i dolën në mbrojtje Zvërnecit, ky lajm shënoi një rekord. Në qoftë se këtë do ta kishte mirëpritur vetë qeveria dhe ta përcillte çështjen si një dialog pa i dalur në mbrojtje korrupsionit që po shkatërronte natyrën, pra vetëm disa ditë më parë se sa doli vlerësimi i Evropës për nismën e mbylljes së grup-kapitujve që po afronte, kjo pikërisht tregoi atë se Rama nuk ishte në anën e duhur. Nuk ishte për integrimin evropian. Rama nuk ishte as në kohën dhe as në vendin e duhur. Ai tregoi se ishte në anën e gabuar të interesave të shtetasve shqiptarë dhe po ashtu edhe të marrëveshjeve ndërkombëtare. Rama si një kryeministër i një vendi anëtar të NATO-s dhe kandidat për anëtarësimin në BE po tregon hapur se po favorizon korrupsionin dhe larjen e parave nga narkotrafiku për të zgjatur jetën e tij në pushtet.

________

*tulatje/tulatur- i strukur prej frikës, heshtje, pozicion prite.

*topitur/topitje- gjendje e mpirjes, e çmprehtësisë.

Për të 38-ën ditë radhazi, qytetarë do te mblidhen në bulevardin përpara Kryeministrisë, duke vijuar protestën e tyre me kërkesën për dorëheqjen e kryeministrit Edi Rama.

Ashtu si në ditët e mëparshme, grumbullimi nis në orën 19:00 në Sheshin “Skënderbej”, për të vijuar më pas me marshimin drejt godinës së Kryeministrisë.

Organizatorët u kanë bërë thirrje të gjithë shqiptarëve, si brenda vendit ashtu edhe në diasporë, t’i bashkohen protestës, duke theksuar se synimi i tyre mbetet i pandryshuar, dorëheqja e kryeministrit.

Sipas tyre, protestat do të vazhdojnë pa ndërprerje deri në arritjen e këtij objektivi.

Me sloganin “Ju erdhi fundi”, organizatorët ftojnë qytetarët të marrin pjesë masivisht, duke argumentuar se qeveria ka humbur legjitimitetin dhe se protestat do të vijojnë deri në realizimin e kërkesave të tyre.

Rezistenca popullore kundër kryeministrit Edi Rama nuk njeh të ndalur. Ditën e sotme, në orën 19:00, do të mbahet protesta e 37-të masive, ku qytetarët do të mbushin sërish sheshin me kërkesën e panegociueshme për largimin e menjëhershëm të kreut të qeverisë.

Koordinatorët e tubimit u kanë bërë një thirrje të fortë të gjithë shqiptarëve, jo vetëm atyre brenda kufijve nga çdo cep i vendit, por edhe mbështetësve të shumtë të diasporës që kanë udhëtuar drejt Tiranës, që t’i bashkohen këtij marshimi vendimtar.

Sipas planit të organizimit grumbullimi i parë i dallgës së protestuesve do të nisë në sheshin “Skënderbej”.

Më pas, marshimi madhështor do të zhvendoset drejt godinës së Kryeministrisë, aty ku do të kulmojë edhe revolta qytetare.

Kërkesa kryesore e kësaj lëvizjeje të pandalshme mbetet vetëm një: rrëzimi i Edi Ramës. Organizatorët kanë bërë të qartë se sheshet nuk do të braktisen dhe askush nuk do të tërhiqet pas deri në përmbushjen e plotë të këtij qëllimi. Përmes mesazhit të prerë dhe të qartë “Ju erdhi fundi”, qytetarët janë ftuar të marrin pjesë masivisht në këtë përballje radhazi për të treguar se legjitimitetit të kësaj qeverie i ka ardhur fundi.

Vijoi edhe në ditën e 36-të protesta madhështore qytetare kundër qeverisë Rama.

Protestuesi: Na quan dështakë. Kam një pyetje. E nisi me shëndetësia falas, arsim cilësor. Rend dhe siguri. 300 mijë vende pune. Dhe nuk mbaronte liste nëse do i thonim se janë të pafundme dështimet e këtij njeriut. Kam një thirrje për deputetët e PS dhe të PD. ata pak që kanë një fije dinjitet. Ju e dini se rënia e Ramës është dhe fikja e karrierës suaj. 6 deputetë të PS kanë shprehur dëshirën për të hequr dorë dhe për ta çuar qeverinë në votëbesim. Po vjen ora. Ju Edi Rama dhe Sali Berisha keni vjedhur ëndrrat e këtij vendi. Ky është fundi jot. Ju dua shumë, jeni fantastik. Jemi liria, po bëjmë histori, jemi këtu për vlera. Jemi këtu për republikë që i takon njerëzve dhe jo një parlament noter të një kryeministri të korruptuar. gsh

Gjykata ka dhënë pasditen e sotme vendimin për 19 qytetarët dhe djemtë e arrestuar gjatë protestës masive kundër qeverisë. Pas një seance të gjatë dhe me debate të ashpra mes palëve, togave të zeza kanë rrëzuar kërkesat e prokurorisë për izolim në qeli, duke lënë të lirë pjesën dërrmuese të të ndaluarve.

Në një prononcim për mediat menjëherë pas përfundimit të seancës, një prej avokatëve mbrojtës ka zbardhur skemën e masave të sigurisë, duke e konsideruar një fitore të pjesshme, ndonëse insiston se arrestimet në flagrancë ishin tërësisht politike dhe të paligjshme.

“Për 19 personat e arrestuar nga protesta, prokuroria fillimisht kërkoi ‘arrest me burg’ për 3 prej tyre, dhe më pas ndryshoi qëndrim duke kërkuar ‘arrest në shtëpi’ për njërin. Për të gjithë të tjerët u kërkua masa ‘detyrim paraqitje’. Pas debateve të gjata, gjykata vendosi që vetëm dy persona të qëndrojnë në masën ‘arrest shtëpie’, konkretisht shtetasit me mbiemrat Bardhi dhe Gega,” deklaroi avokati.

Të gjithë të tjerët u lanë në masën “detyrim paraqitje” (disa me detyrim paraqitje një herë në muaj dhe disa një herë në dy muaj).

Ndonëse gjykata e vlerësoi ligjor arrestimin në parim për të vijuar procedurat, mbrojtja ka shfaqur kundërshti të forta me argumentimin e gjykatës, duke thënë se policia ka vepruar pa kritere ligjore dhe në mënyrë joproporcionale në shesh.

“Gjykata e konsideroi arrestimin të ligjshëm në parim për efekt procedure, por në këndvështrimin tonë profesional dhe kushtetues, për shumicën dërrmuese të këtyre djemve arrestimi ishte plotësisht i paligjshëm dhe pa asnjë provë konkrete,” përfundoi avokati përpara gazetarëve. bw

Rezistenca popullore kundër kryeministrit Edi Rama nuk njeh të ndalur. Ditën e sotme, në orën 19:00, do të mbahet protesta e 36-të masive, ku qytetarët do të derdhen sërish në shesh me kërkesën e panegociueshme për largimin e menjëhershëm të kreut të qeverisë.

Sipas planit të organizimit grumbullimi i parë i dallgës së protestuesve do të nisë në sheshin “Skënderbej”.

Më pas, marshimi madhështor do të zhvendoset drejt godinës së Kryeministrisë, aty ku do të kulmojë edhe revolta qytetare.

Kërkesa kryesore e kësaj lëvizjeje të pandalshme mbetet vetëm një: rrëzimi i Edi Ramës. Organizatorët kanë bërë të qartë se sheshet nuk do të braktisen dhe askush nuk do të tërhiqet pas deri në përmbushjen e plotë të këtij qëllimi. Përmes mesazhit të prerë dhe të qartë “Ju erdhi fundi”, qytetarët janë ftuar të marrin pjesë masivisht në këtë përballje radhazi për të treguar se legjitimitetit të kësaj qeverie i ka ardhur fundi. bw