Një qytetar ka reaguar pas incidentit të ndodhur para Kryeministrisë, ku një protestuese është përplasur me policinë.

Janë larguar nga shkallët e Kryeministrisë edhe këpucët, simbol i shpopullimit dhe largimit të rinisë në emigrim.

Ai u shpreh se policia ka hequr këpucët nga shkallët e Kryeministrisë, sipas tij për shkak të vizitës së eurodeputetëve në institucion.

“Policia hoqi këpucët nga shkallët sepse do të vijnë eurodeputetët në Kryeministri. Ne kishim një vajzë me vete, aktiviste që u lëndua pas rrëshqiti nga dhuna e policisë. Policia ndalonte rrugën pa pasur një efektive femër në kordonin e tyre policor.

Këto janë provokime, por ne do të përgjigjemi me paqe edhe në tubimin që do të mbahet në darkë. Nuk duhet thjeshtë të bëjmë xhiro, duhet të “pushtojmë” paqësisht kryeministrinë” bw

100 efektivë policie kanë shkuar para Kryeministrisë ku prej një jave protestuesit kanë kaluar natën si shenjë e revoltës qytetare, ku kërkohet largimi i qeverisë dhe dorëheqja e pa negociueshme e kryeministrit Edi Rama.

Pasi u larguan me forcë protestuesit, është bërë edhe sekuestrimi i stolave metalikë që përdoreshin nga ana e protestuesve në mbrëmje, si barrierë sigurie në zonën e podiumit të improvizuar, ku qytetarët shprehnin pakënaqësitë e tyre. Në zonë janë lënë vetëm pesë stola.

Sot do të mbahet protesta e 29-të kundër qeverisë, ku kërkesa kryesore e protestës mbetet dorëheqja e kryeministrit Edi Rama. Organizatorët kanë deklaruar se protestat do të vazhdojnë deri në përmbushjen e kësaj kërkese, duke ftuar qytetarët të marrin pjesë masivisht në atë që cilësohet si protesta e 29-të radhazi. bw

Policia ka larguar me forcë qytetarët që kanë kaluar mbrëmjen para Kryeministrisë, gjë që ndodh prej një jave tashmë.

Më pas është kryer mbledhja e këpucëve të lënë në shkallët e Kryeministrisë, si simbol i largimit të të rinjve jashtë vendit, në mungesë të shpresës për një jetë më të mirë në vendin e tyre.

Kjo ka shkaktuar reagim nga ana e qytetarëve, ku në një moment ka pasur “përplasje” mes një protestuesje dhe efektivëve, të cilët ishin bërë gardh para godinës.

“Mos i prekni këpucët, kjo është vjedhje e vullnetit popullor Mos i ngacmoni veprat artistike të vendosura nga popull. Ky është territor publik”, dëgjohet të artikulojë një protestues në megafon.

Sot do të mbahet protesta e 29-të kundër qeverisë, ku kërkesa kryesore e protestës mbetet dorëheqja e kryeministrit Edi Rama. Organizatorët kanë deklaruar se protestat do të vazhdojnë deri në përmbushjen e kësaj kërkese, duke ftuar qytetarët të marrin pjesë masivisht në atë që cilësohet si protesta e 29-të radhazi. bw

Aktivisti Andi Tepelena ka komentuar zhvillimet e protestës qytetare që prej javësh vijon në Tiranë, duke u shprehur se organizimi i saj po zhvillohet në mënyrë spontane dhe pa një drejtim të paracaktuar.

Sipas Tepelenës, grupimet pjesëmarrëse janë të ndërgjegjshme për nevojën që ky proces të vijojë, ndërsa qytetarët janë bashkuar rreth një qëllimi të përbashkët, largimin e kryeministrit Rama.

Ai u shpreh se qytetarët kanë krijuar një mënyrë të re komunikimi përmes rrjeteve sociale, duke anashkaluar sipas tij çdo tentativë për të penguar përhapjen e mesazhit të protestës nga qeveria, e cila siç tha ai, ka angazhuar një ushtri të tërë patronazhistësh.

“Regjimi ka angazhuar një ushtri të tërë patronazhistesh, por ne e kemi fituar këtë betejë, sepse janë influencuesit, qytetarët, ata të cilët përmes fotove, videove po tregojnë se janë një kanal komunikimi, si një media më vete. Ky mesazh po kalon çdo lloj censure apo mënyrë për ta mbytur zërin e protestës”, u shpreh Tepelena.

Tepelena theksoi se protesta nuk synon përmbysjen e sistemit politik, por ndryshimin e tij dhe se partitë kanë mundësinë e madhe të ndryshojnë. Po aashtu, ai theksoi se kërkesa kryesore e protestës ka mbetur e njëjtë që nga dita e parë, dorëheqja e kryeministrit Edi Rama.

Andi Tepelena: “Vendimet” në protestë merren në mënyrë natyrale, nuk ka ndonjë filozofi që të thotë se do bëhen këto gjëra. Grupimet janë të ndërgjegjshme se duhet çuar përpara ky proces, jemi të gjithë në të njëjtën gjatësi vale. Kjo po frymëzon të gjithë.  Është një mënyrë për të shmangur edhe presionin që po bën regjimi, i cili ka angazhuar një ushtri të tërë patronazhistesh, por ne e kemi fituar këtë betejë, sepse janë influencuesit, qytetarët, ata të cilët përmes fotove, videove po tregojnë se janë një kanal komunikimi, si një media më vete. Ky mesazh po kalon çdo lloj censure apo mënyrë për ta mbytur zërin e protestës.

Bashkimi ka ardhur gradualisht, sepse aty natyrisht ka edhe grupime që mendojnë ndryshe për të ardhmen e vendit, por një gjë është që i bashkon, që duhet të marrë fund një herë e mirë kjo qeverisje, duhet të largohet. Nuk po flas për përmbysjen e një sistemi politik, por për ta çliruar këtë sistem. Duket se ka një mendje nga të gjithë. Duhet të vijë një epokë e re. Ata tani kanë shansin të riformohen, nëse nuk e bëjnë, do përfundojnë në koshin e historisë.

Protesta është një frymë e cila i qëndron që në fillim parimit, që është kërkesa për dorëheqjen e Edi Ramës. Sheshi është për të gjithë, si një festival demokracie, por që ka brenda një revoltë popullore.

Paralajmërimi i Presidentit serb, Aleksandër Vuçiç se do të japë dorëheqjen brenda pak javësh u komentua edhe në protestën e qytetarëve shqiptarë, të cilët mblidhen prej tre javësh kundër kryeministrit Edi Rama.

Protestuesja dhe banorja e Rrjollit, Luçiana Kokaj deklaroi se presidenti serb duhet të marrë edhe mikun e tij, Edi Rama me vete.

“Sot na takon shumë sepse serbët sapo përcollën Vuçiç dhe ne do ta përcjellim Ramën. Kemi thënë Rama jep dorëheqjen. Berisha në burg, Rama në burg. Kemi thënë Rama jep dorëheqjen, merr edhe Saliun me vete. Ndërsa sot i themi Vuçiç merre edhe mikun tënd me vete. “, u shpreh ajo. gsh

Pjesë e protestës së 28 qytetare ishte edhe aktori i njohur, Mehdi Malkaj, i cili në fjalën e tij kritikoi kryeministrin Rama.

“Këta parafolësit e mi pasuruan gjuhen shqipe. Se psh Edi Rama, ai maskarai, do thuhet jo Edi Eama, maskarai, qelbësira, ndyrësira, haleja. Se emri i tij na bën pis gjuhën dhe ne duhet ta mbajmë të pastër gjuhen tonë.

Miq të dashur dëgjova që kanë marrë disa djem të protestës, i ka marrë policia. Shumë turp. Po tani kushtetuta thotë që jemi të barabartë para ligjit. Po pse nuk fusin këtë maskarain në burg?! Pse nuk e fusin këtë edepsëzin që të kalbet atij? Sepse ka hequr Butrintin, ka hequr 12 milje det, ka hequr Vlorë, Sazanin. Nuk i kemi më, i ka shitur”, tha aktori, duke deklaruar se “nuk ka gjë më të bukur se Shqipëria”. gsh

Aktivisti dhe eksperti Gent Progni ironizoi teksa tha se kryeministri Edi Rama ka bërë blerjen e re të korrupsionit, duke theksuar se ka kthyer në vend Endri Fugën. 

Para protestuesve, ai tha se kryeministri e solli Fugën nga larg për të ndikuar në algoritëm, ndërsa shtoi se do ta çojnë edhe atë në burg.

“Flas për blerjen e re të merkatos së korrupsionit që është Endri Fuga, e solli nga larg për të prishur algoritmin. Por ka bërë gabimin e jetës se do ta fusim edhe Fugën në burg, se kemi informacion edhe për korrupsionin e tij.”, tha Progni. 

Më pas, Progni foli edhe për një takim me influencuesit që janë kundër prorestës, teksa i paralajmëroi se do t’u nxjerrë fondet që kanë marrë nga pushteti.

“Dje ka bërë një takim edhe me influencerët që nuk e duan protestën. Iu them se secili nga ata që do të dalin kundër protestës, do t’ju nxjerrim fondet që kanë marrë nga qeveria dhe do t’i çojmë edhe ata me dosje në burg.”, shtoi ai.  gsh

Gazetari Osman Stafa foli për gjendjen e rëndë në sistemin shëndetësor në Shqipëri, teksa mori fjalën në protestën masive të qytetarëve kundër qeverisë së kryeministrit Edi Rama.

Ai theksoi se në Spitalin Onkologjik mungojnë ilaçet dhe pajisjet për trajtimin e pacientëve me kancer, ndërsa ironizoi edhe retorikën e kryeministrit se agjentët e huaj po ndikojnë protestën.

Gazetari ngriti pyetjen nëse janë “agjenturat e huaja” ato që kanë lënë spitalet pa ilaçe dhe pajisje, kanë rritur çmimet dhe kanë detyruar mijëra shqiptarë të largohen nga vendi.

Në fund, ai u bëri thirrje qytetarëve të mos heqin dorë nga protestat, duke theksuar se tubimet nuk organizohen nga partitë politike, por nga nevoja e shqiptarëve për të kërkuar zgjidhje për problemet ekonomike dhe sociale.

“Pas datës 20 të çdo muaji, në spitalet ndërpriten analizat. Kanë nisur dje se për dy muaj nuk u ndërprenë analizat për shkak të presionit publik. E imagjinoni dot të shtrohesh në spital dhe të ndërpresin analizat rutinë. Sot në Onkologjik nuk ke ilaçe.

Nuk ka pajisje për të trajtuar kancerin dhe këta na thonë janë agjenturat e huaja që organizojnë protestat. Agjenturat e huaja i lanë spitalet pa ilaçe e pajisje, shpopulluan këtë vend, i ngritën çmimet e ushqimeve, i lanë pensionet aq të ulëta? A është kjo e vërteta jonë? Prandaj ky shesh është qëndresa më e bukur që i ka ndodhu këtij vendi.

Këtë popull s’e ka thirrur partia, por Shqipëria për hallet e shumta, me të cilat ndeshemi përditë. Forca jonë është rezistenca në këtë shesh. Të mos lodhemi, sepse këta nuk lodhen duke vjedhur me koncesione, te paratë që duhet të shkonin te spitalet.

E kanë lënë spitalin pa ilaçe. Një shtet që nuk punon për të siguruar trajtim për pacientin. Ka rënë sistemi. Kush nga ju ka shkuar në spital dhe ka dhënë lekë për shërbimin të ngrejë dorën? Nuk mund të vijojmë më kështu sepse do ta paguajmë ne.

Shqipëria nuk ka protokolle. Shkon në spital, bën ekzaminim, shkon në shtëpi dhe vdes. E kanë kopshtin Eden 4.3 mln euro. Kanë para për qejfet e tyre, dhe nuk kanë për ilaçe.

A ia dilni dot me ato rroga që merrni për t’ia dalë në Shqipëri, për të ndërtuar të ardhmen e fëmijët? E vërteta jonë duhet të mbledhë në shesh këdo sepse është për ne. Më 4 korrik është lajmëruar një protestë e madhe. Diaspora përsëri duhet të jetë këtu.”, tha ai. gsh

Aktivisti Erion Murataj ka komentuar vijimësinë e protestave qytetare që prej 28 ditësh po zhvillohen në Tiranë, duke u ndalur te kërkesa kryesore e protestuesve, dorëheqja e kryeministrit Edi Rama.

I ftuar në emisionin “News24 Fundjavë”, Murataj tha se realizimi i kësaj kërkese do të sillte një ndryshim të rëndësishëm politik dhe do të kishte efekt edhe në Partinë Demokratike dhe Sali Berishën.

“Kërkesa e kërkesave është dorëheqja e Ramës. Kjo do të krijonte një efekt domino dhe për Berishën. Kjo do t’u jepte mesazh edhe shqiptarëve që do të ishte i prekshëm realiteti politik, kthimi te vullneti i qytetarëve”, u shpreh ai.

Sipas Muratajt, brenda protestës ekzistojnë disa kërkesa dhe zëra të ndryshëm, por realizimi i një prej tyre do të konsiderohej si një arritje.

Ai komentoi edhe reagimet ndaj protestës, duke thënë se pavarësisht luhatjeve në pjesëmarrje, ajo nuk është dobësuar në mënyrë drastike.

“Propaganda dhe reaksioni që ka krijuar jo vetëm te pushteti, por dhe te opozita, që e kanë sulmuar protestën, kanë harruar një detaj, pavarësisht numrave në shesh, nuk kanë rënë në mënyrë eksponenciale. Ka luhatje patjetër, ishte edhe dita me shi para dy ditësh. Është normale kjo”, u shpreh ai, ndërsa shtoi se “këta individë që janë zëra kundër, iu përgjigjem se lëpirja nuk është pjesë e kulturës. Më mirë të jem arrogant se sa të lëpihen”.

Analisti Murataj: Kërkesa e kërkesave, është dorëheqja e Ramës. Kjo do të krijonte një efekt domino dhe për Berishën. Kjo do u jepte mesazh dhe shqiptarëve që do të ishte i prekshëm realitet politik, kthimi te vullneti i qytetarëve. Brenda protestës ka disa vokacione.

Realizimi i një kërkese do të quhej si fitore e vogël. Por duhet të kujtojmë se kockat e vogla kanë shuar protestat e tjera më parë. Do të shuhej nga kockat e vogla. Propaganda dhe reaksioni që ka krijuar jo vetëm te pushteti, por dhe te opozita, që e kanë sulmuar protestën, kanë harruar një detaj, që pavarësisht numrave në shesh, nuk kanë rënë në mënyrë eksponenciale.

Ka luhatje patjetër, që ishte dita me shi para dy ditësh. Është normale kjo. Mendoj se numrat janë aty, fryma është mbarëkombëtare. Për këta individë, që janë zëra kundër, iu përgjigjem se lëpirja nuk është pjesë e kulturës. Më mirë të jem arrogant se sa të lëpihen.

Ka reaguar në rrjet Gent Progni, njëri nga organizatorët e protestës të Revolucionit Flamingo, ndaj sulmeve shpifëse sikur “ai është nga SPAK nën hetim”.

Gent Progni ka sjellë dokumentin e firmosur nga kreu i SPAK, ku thuhet se nuk është nën hetim.

Voal.ch po sjell edhe reagimin e Gent Prognit, edhe dokumentin nga SPAK firmosur nga Klodian Spaho si më poshtë:

Gent Progni:

Teksa sot do të mbahet protesta e 28, aktivistja e shoqërisë civile Edlira Çepani pohoi se tashmë ka nisur një lëvizje qytetare, ku kërkohet dorëheqja e Ramës dhe një qeveri teknike. Ajo tha për emisionin ‘News24 Fundjavë’ se ka rëndësi fakti që po thyhen barrierat.

Mes të tjerash Çepani tha se nuk është zgjidhje bullizmi politik, duke iu adresuar dhe reagimeve të kryeministrit Edi Rama për protestën.

“Askush nuk delegon asgjë, pasi nuk ka lidershipin. Kur një sistem funksion më mënyrë horizontale, dhe secili merr përsipër që të japë atje ku mundet, kjo është arritje e madhe. Kjo sjell bashkim, pasi secili sjell atë pjesë ku është i aftë. Është formë organizmi, ku bukuria e të cilës vjen me këmbëngulje nga vetë protestuesit. Organizmi nga poshtë, është ndër më të fuqishmit. Ka nisur të lëvizë dhe ndodh kjo lëvizje, siç është grupimi që përfaqëson protestën. Protesta është politike. Aktivizimi dhe protesta është politik. Nuk jam nga ata njerëzit që nga ky grupim të dalë një grupim politik. Të gjithë duhet ta kenë lirinë që të krijojnë një grupim të tillë. Protestat kanë detyrat e veta për të reaguar mbi situatat. Nëse arrihet që ato që kërkon protesta, të ndodhin, ideja është se në një sistem me një kod të barabartë zgjedhor, aty i jepet mundësia që cilido që të krijojë një forcë të re, apo të garojë si qytetar i pavarur, kjo është gara e vërtetë.

Duhet që përfaqësimi të jetë i mirëfilltë përmes garës së barabartë. Nuk është problemi se kush do të marrë lidershipin, por që sistemi të largojë barrierat. Qytetarët të jenë pjesë e zgjidhjes. Ne kemi profesionistë të mirë në Shqipëri. Ata fatkeqësisht nuk janë dëgjuar. Qeveria teknike që kërkohet, bën dhe propozimet për ndryshimin e kodit zgjedhor. Pastaj ky kod zgjedhor i jep mundësi partive të reja, apo të vjetra. Aty garantohet dhe përfaqësimi i duhur. Bullizmi politik nuk është zgjidhje për problematikat. Nuk zgjidhen gjërat duke u tallur apo kërcënuar. Institucionet paguhen me taksat e qytetarëve. Mendoj se ka vend për t’u përmirësuar në pjesën e kthimit të përgjigjeve për këto protesta. Hajde ti diskutojmë këto kërkesa që vinë nga protesta, çështje që duhet të trajtohen në Kuvend.”, tha ajo.

Lëvizja qytetare që prej 27 ditësh organizon protesta të përditshme kundër qeverisë dhe kryeministrit Edi Rama, ka ndërmarrë një hap të ri, duke e ndërkombëtarizuar aksionin e saj.

Grupi Koordinator i Protestës i është drejtuar me një letër zyrtare ambasadorëve dhe shefave të misioneve të vendeve të akredituar në Shqipëri, ku i informon mbi kërkesat e protestës dhe situatën politike në vend.

Në letër, koordinatorët shprehen se përfaqësojnë një lëvizje të gjerë qytetare dhe paqësore, e cila prej 27 ditësh ka mobilizuar qytetarë në mbrojtje të demokracisë, shtetit të së drejtës dhe dinjitetit njerëzor.

“Shqipëria ndodhet në një moment përcaktues të zhvillimit të saj demokratik. Qytetarët e mbledhur në mënyrë paqësore në sheshet publike në mbarë vendin po ushtrojnë të drejtën e tyre themelore për t’u shprehur qytetarisht, të udhëhequr nga një angazhim i thellë ndaj shtetit të së drejtës, qeverisjes demokratike dhe dinjitetit njerëzor.”, thuhet në letër.

Grupi Koordinator paraqet pesë kërkesa që, sipas tij, përfaqësojnë vullnetin e protestuesve, duke nisur nga dorëheqja e panegociueshme e kryeministrit dhe të qeverisë, krijimin e një qeverie teknike tranzitore, jopartiake, me mandat 12-mujor,  ndryshime kushtetuese të miratuara me referendum popullor, që përfshijnë reformimin e Kodit Zgjedhor, ligjit për financimin e partive politike dhe kufizimin e mandatit të kryeministrit në jo më shumë se dy mandate gjatë jetës politike.

Po ashtu ata kërkojë edhe anulimin e ndryshimeve në ligjin për zonat e mbrojtura, ligjin për trashëgiminë kulturore, shfuqizimin e Paketës së Maleve dhe të kuadrit ligjor për investimet strategjike.

Pika e pestë është hartimi i një kontrate të re sociale mes qytetarëve dhe shtetit, përmes konsultimeve me intelektualë, ekspertë dhe përfaqësues të shoqërisë civile jopartiake.

Në përfundim të letrës, Grupi Koordinator u bën thirrje ambasadorëve të marrin në konsideratë seriozitetin e protestës dhe të mbështesin një zgjidhje paqësore, demokratike dhe gjithëpërfshirëse të situatës politike në Shqipëri.

“Mbetemi në dispozicionin tuaj për çdo komunikim të mëtejshëm dhe besojmë në angazhimin tuaj të vazhdueshëm për demokracinë dhe dinjitetin njerëzor në Shqipëri, si pjesë e vlerave tona të përbashkëta evropiane”, përfundon letra.

LETRA E PLOTË

26 qershor 2026

Drejtuar Shkëlqesive të Tyre,
Ambasadorëve dhe Shefave të Misioneve të vendeve perëndimore të akredituara në Republikën e Shqipërisë

Lënda: Njoftim mbi kërkesat e protestuesve

Shkëlqesi,

Në emër të Grupit Koordinator të Protestës, që përfaqëson një lëvizje të gjerë dhe paqësore qytetare, e cila ka mobilizuar qytetarët shqiptarë për njëzet e shtatë ditë radhazi, kemi nderin t’ju drejtohemi në frymën e transparencës, përgjegjësisë demokratike dhe respektit për vlerat që bashkojnë vendin tonë me komunitetin euroatlantik.

Shqipëria ndodhet në një moment përcaktues të zhvillimit të saj demokratik. Qytetarët e mbledhur në mënyrë paqësore në sheshet publike në mbarë vendin po ushtrojnë të drejtën e tyre themelore për t’u shprehur qytetarisht, të udhëhequr nga një angazhim i thellë ndaj shtetit të së drejtës, qeverisjes demokratike dhe dinjitetit njerëzor.

Në këtë kontekst, Grupi Koordinator i Protestës paraqet me respekt kërkesat e mëposhtme, të cilat pasqyrojnë vullnetin e popullit sovran:

1. Dorëheqjen e kryeministrit dhe të qeverisë aktuale, si një hap thelbësor dhe i panegociueshëm drejt një ripërtëritjeje demokratike.
2. Krijimin e një qeverie teknike tranzitore, jopartiake, me mandat dymbëdhjetëmujor, për të mbikëqyrur një proces reformash të besueshëm dhe të paanshëm.
3. Një reformë të gjithanshme kushtetuese, të bazuar në parimin e barazisë së plotë të të gjithë qytetarëve shqiptarë përpara ligjit dhe që do të miratohet përmes një referendumi popullor.

Kjo reformë duhet të përfshijë, ndër të tjera:

• Reformimin e Kodit Zgjedhor;
• Reformimin e legjislacionit që rregullon financimin e partive politike dhe organizatave të shoqërisë civile;
• Vendosjen e kufizimit të mandateve për postin e Kryeministrit, duke mos lejuar që asnjë individ të ushtrojë këtë detyrë për më shumë se dy mandate, të plota ose të pjesshme, gjatë gjithë karrierës së tij politike.

4. Korrigjime të menjëhershme ligjore, duke përfshirë:

• Shfuqizimin e ndryshimeve në Ligjin për Zonat e Mbrojtura (Ligji nr. 21/2024);
• Shfuqizimin e ndryshimeve në Ligjin për Trashëgiminë Kulturore;
• Shfuqizimin e paketës ligjore të njohur si “Paketa e Maleve”;
• Shfuqizimin e kuadrit ligjor që rregullon Investimet Strategjike.

5. Hartimin e një kontrate të re sociale ndërmjet qytetarëve dhe shtetit, e cila do të përgatitet përmes konsultimeve të gjera me intelektualë të pavarur, ekspertë teknikë dhe përfaqësues jopartiakë të shoqërisë civile, në përputhje me propozimet e lëvizjes qytetare.

Këto kërkesa përfaqësojnë shprehjen e qartë dhe legjitime të një populli sovran, të përkushtuar ndaj vlerave demokratike dhe shtetit të së drejtës.

Me respekt, ju bëjmë thirrje që të merrni në konsideratë seriozitetin dhe sinqeritetin e kësaj lëvizjeje qytetare dhe të mbështesni një zgjidhje paqësore, demokratike dhe gjithëpërfshirëse të krizës aktuale politike në Shqipëri.

Mbetemi në dispozicionin tuaj për çdo komunikim të mëtejshëm dhe besojmë në angazhimin tuaj të vazhdueshëm për demokracinë dhe dinjitetin njerëzor në Shqipëri, si pjesë e vlerave tona të përbashkëta evropiane.

Ju lutemi pranoni shprehjen e konsideratës sonë më të lartë.

Në emër të Grupit Koordinator të Protestës