VOAL

VOAL

Copyright © 2022

VOAL

Florida, kubano-amerikanët kundër ndryshimit të marrëdhënieve SHBA-Kubë

March 28, 2021
blank
Liliya Anisimova

Ndërsa administrata e Presidentit Biden rishikon politikën ndaj Kubës, sondazhi i fundit publik në Florida konfirmon anketat e mëparshme të opinionit publik që tregojnë se shumica e votuesve kubano-amerikanë janë kundër një ri-angazhimi me shtetin komunist. Qëndrimi në dukje më i ashpër ndaj Havanës tregon një zhvendosje nga koha e Presidentit Obama, gjë që u vu re në zgjedhjet e vitit 2020.

Pothuajse dy milionë kubano-amerikanë jetojnë në Shtetet e Bashkuara, kryesisht në Florida. Ata përbëjnë një forcë të madhe politike në shtetin e lëkundur dhe për dekada me radhë kanë mbështetur vijën e ashpër ndaj Kubës së Fidel Kastros. Scott Lucas është profesor i shkencave politike në Universietetin Birmingham.

“Historikisht, kubanët që shkuan në Florida pas revolucionit të vitit 1959, drejtoheshin nga ideja se çfarë duhet bërë për Kubën. Fillimisht, mbi mundësinë e kthimit dhe pastaj çfarë duhet bërë për regjimin dhe sistemin në Kubë? Kjo konkretizohej tek mbështetja për kandidatët kryesisht republikanë, që mbajtën qëndrim të ashpër ndaj Kubës.”

Por kjo pikëpamje filloi të ndryshonte gjatë administratës së Presidentit Obama.

“Me fitoren e Obamës në vitin 2009, ndodhi një nxitje mes popullsisë jo të bardhë, për shanse dhe mundësi të reja. Obama bëri për vete shumë njerëz, dhe këtu përfshihen edhe kubanët”, thotë profesori Lucas.

Gjatë dy mandateve, Presidenti Obama zbuti kufizimet e udhëtimit dhe hoqi Kubën nga lista e shteteve që sponsorizojnë terrorizmin. Në vitin 2016, ai u bë presidenti i parë amerikan që viziton këtë shtet-ishull që nga viti 1928. Në kohën e udhëtimit të tij, anketat tregonin se mbi gjysma e imigrantëve kubanë në Florida mbështesnin politikat e tij.

Por kur Donald Trump u bë president, Uashingtoni e ashpërsoi qëndrimin ndaj shtetit komunist. Në ditët e fundit të presidencës së tij, Kuba u rivendos në listën e shteteve sponsorizuese të terrorizmit, si dhe u rivendosën disa nga kufizimet. Vota kubano-amerikane po ashtu po ndryshonte.

“Arsyeja se pse kubano-amerikanët mbështetën Trump-in dhe republikanët, është se me polarizimin e politikës amerikane, edhe çështja për Kubën doli në krye të problemeve. Nuk kishte të bënte me ekonominë apo shëndetin, por ishte kartë specifike në interes të kubanëve që u luajt nga republikanët”, thotë profesori i shkencave politike Scott Lucas.

Sipas një sondazhi të publikuar në mars nga “Bendixen & Amandi International”, 66% e komunitetit kubano-amerikan tani mbështesin mbajtjen e embargos amerikane ndaj Kubës, krahasuar me vetëm 36% në vitin 2015.

Anketa e fundit po ashtu tregon se 56% e kubano-amerikanëve në Florida janë kundër zbutjes së ndalimit të udhëtimeve, qëndrim i pandryshuar nga anketat e një viti më parë. Më shumë kubanë po votojnë për republikanët për të mbajtur një politikë më të ashpër ndaj Havanës, thonë analistët. Gregory Koger është profesor i shkencave politike në Universitetin e Majamit.

“Fushata e Presidentit Trump dhe republikanët bënë një punë të jashtëzakonshme për të depërtuar tek votuesit kubano-amerikanë dhe komunitet e tjera hispanike në Florida. Ata e kuptuan më mirë se demokratët se shumë njerëz në Florida nuk identifikohen si latino apo hispanikë. Ata nuk e shohin veten si një grup i gjerë kulturor, por indetifikohen me vendin nga erdhën familjet e tyre.”

Edhe pse administrata e Presidentit Biden po shqyrton politikën ndaj Kubës, zëdhënësja e Shtëpisë së Bardhë Jen Psaki tha për shtypin se marrëdhëniet me Kubën nuk janë përparësi kryesore.

Ndërsa sondazhet tregojnë se shumica e votuesve kubano-amerikanë janë kundër ngrohjes së marrëdhënieve me Havanën, demokratëve do t’u duhet të gjejnë një mënyrë për ta bërë për vete këtë grup votuesish.

  • twitter
  • facebook
  • linkedin
Fjalë kyçe:

Komentet

Lajme të ngjashëm

blank

DASH: Nuk mund të barazohet vrasja e policit me atë të sulmuesve

Shtetet e Bashkuara të Amerikës kundërshtojnë përpjekjet që të barazohet vrasja e rreshterit të Kosovës, Afrim Bunjaku, me sulmuesit “që ishin të përfshirë në vrasjen” e tij.

Kështu tha për Radion Evropa e Lirë zëdhënësi i Departamentit amerikan të Shtetit, Mathew Miller, në pyetjen lidhur me atë se si SHBA-ja i cilëson personat që sulmuan Policinë e Kosovës në Banjskë të Zveçanit më 24 shtator.

“Ne kemi qenë shumë të qartë: SHBA-ja dënon fuqishëm sulmet e koordinuara dhe të dhunshme ndaj Policisë së Kosovës më 24 shtator dhe ne shprehim ngushëllime për familjen e rreshterit të Policisë së Kosovës i cili u vra gjatë detyrës. Ne kundërshtojmë përpjekjet për të barazuar vdekjen tragjike të rreshterit të Policisë së Kosovës [Afrim] Bunjaku me vdekjen e individëve që ishin të përfshirë në vrasjen e një polici. Përgjegjësit duhet të dalin para drejtësisë përmes një procesi hetimor transparent. Ky hetim është duke u zhvilluar”, tha Miller.

Më 24 shtator, Policia e Kosovës u sulmua në Banjskë të Zveçanit, teksa po kryente një operacion për heqjen e një barrikade të vendosur në rrugë.

Si pasojë e sulmit mbeti i vrarë rreshteri Afrim Bunjaku dhe u plagosën disa policë të tjerë.

Sulmuesit e dyshuar – që sipas autoriteteve në Kosovë ishin rreth 30 – u strehuan në manastirin e Banjskës dhe prej aty vazhduan përleshjet me Policinë.

Tre sulmues të dyshuar mbetën të vrarë gjatë shkëmbimit të zjarrit, ndërkaq katër persona janë arrestuar për këtë sulm, që Kosova e konsideron terrorist dhe për të e fajëson Serbinë.

Beogradi ka mohuar se ka gisht në këtë ngjarje.

Më 27 shtator në Serbi u shpall ditë zie për tre serbët e vrarë në Banjskë. Ky vendim u kritikua edhe nga Bashkimi Evropian. Zëdhënësi i bllokut, Peter Stano, deklaroi se “nuk mund të barazohen viktimat e terrorizmit me terroristët”.

Presidenti i Serbisë, Aleksandar Vuçiq, tha më 27 shtator se ai kurrë nuk mund t’i cilësojë si “terroristë” pjesëtarët e grupit të armatosur që sulmuan Policinë e Kosovës.

Zyrtarët në Kosovë kanë thënë se nënkryetari i Listës Serbe, Millan Radoiçiq, ka udhëhequr dhe ka marrë pjesë në sulmin në veri.

Radoiçiq – që është nën sanksione amerikane – sipas presidentit serb do të merret në pyetje nga organet kompetente serbe.

blank

Hetimet ndaj Presidentit Biden, seancë dëgjimore në Kongres

VOA

Komisioni për Mbikëqyrje e Llogaridhënie i Dhomën së Përfaqësuesve po zhvillon sot seancën e parë, si pjesë e një hetimi që synon nisjen e procedurave për shkarkimin e Presidentit Joe Biden.

Në një deklaratë të Kryetarit të Komisionit, ligjvënësit republikan Jim Comer, përpara fillimit të seancës, thuhej se ajo do të përqendrohej në çështje kushtetuese dhe ligjore.

Po kështu zoti Comer tha se do të paraqiten ato që ai quajti ‘prova të zbuluara deri më sot dhedo të dëgjohen ekspertë ligjorë dhe financiarë lidhur me shkeljet e mundshme të familjes Biden”.

Presidenti Biden i ka hedhur poshtë akuzat e republikanëve.

Sekretarja e shtypit e Shtëpisë së Bardhë Karine Jean-Pierre, u tha gazetarëve se hetimet që po kryejnë republikanët e Dhomës së Përfaqësuesve, janë të pabaza.

“Nuk kanë prova dhe kjo është një lojë politike”, tha zonja Jean-Pierre.

Kryetari republikan i Dhomës së Përfaqësuesve Kevin McCarthy nisi këtë muaj hetimet që mund të çojnë tek ngritja e akuzave për shkarkimin e presidentit. Hetimet janë përqendruar tek marrëdhëniet e biznesit jashtë vendit të djalit të presidentit, Hunter Biden.

Republikanët pretendojnë se gjatë kohës që zoti Biden ishte nënpresident (gjatë administratës Obama), djali i tij Hunter Biden përdori emrin e familjes, për të përfituar në bizneset e tij me klientë të huaj. Republikanët thonë gjithashtu se edhe vetë presidenti ka përfituar nga bizneset e djalit të tij.

blank

Edward P. Joseph: Prita që Amb.Hill të ricicronte deklaratën e Amb.Hovenier – Sekretari Blinken të insistojë për një qendrim publik uniform –

 

Ky reagim në Twitter i analistit dhe ekspertit të Ballkanit Edward P. Joseph është bërë më 24 shtator, menjëherë pas vrasjes së Policit të Kosovës Afrim Bunjaku.

—————-

“Zhvillime jashtëzakonisht serioze në Kosovë – dhe provë e angazhimit të SHBA-së në Ballkan. Inkurajuar nga @USAmbKosovo Reagimi i shpejtë dhe i bazuar në fakte i Hovenier-it ndaj vrasjes së oficerit të Policisë së Kosovës. Pyetja ime: cili do të jetë qëndrimi i Ambasadës Amerikane në Beograd? Sugjerimi im: 1/

@USAmbSerbia duhet të ri-cicëroj menjëherë deklaratën e ambasadorit Hovenier. Hovenier ishte i kujdesshëm që të mos tregonte gishtin – vetëm për të këmbëngulur që “kryesit … të sillen para drejtësisë” për “këto akte të dhunshme kundër autoriteteve legjitime të Republikës së Kosovës”. 2/

Konteksti: Zyrtarët amerikanë e kanë kritikuar vazhdimisht Kurtin për veprime provokuese në veri; SHBA/BE kanë vendosur “masa” ndëshkuese ndaj Kosovës. Çështja: Ne e dimë se Prishtina do të mbajë përgjegjësi. Po Beogradi?3/

Vuçiq fitoi lavdërimet e SHBA-së edhe pas sulmeve brutale, të paramenduara të 29 majit ndaj KFOR-it. Kjo bëri, që përse policia serbe të mos shkojë përpara më 14 qershor dhe të arrestojë tre policë të Kosovës, duke i ndaluar ata “me akuza të rreme”?4/

Hill vlerësoi qëndrimin e Serbisë në bisedimet e fundit të Dialogut të Brukselit, edhe pse Beogradi vazhdon – duke përfshirë OKB-në – të heqë dorë nga detyrimet e tij sipas Marrëveshjes Bruksel-Ohër. Ministri i Jashtëm Daçiq ka zhvilluar edhe një takim të profilit të lartë me ministrin e jashtëm rus Lavrov të sanksionuar nga SHBA-ja. 5/

Më kujtohet personalisht që, në vitin 2011, tensionet në Kosovë u rritën në qiell me vrasjen e oficerit të policisë së Kosovës, Enver Zymberi. SHBA/BE/NATO e kaluan atë me një qëndrim të palëkundur dhe të unifikuar – duke mos u përkultu nga njëra anë, ndërsa pala tjetër ishte përgjegjëse.6/

Vrasja e oficerit të Policisë së Kosovës ka ngritur në mënyrë dramatike rrezikun. Është e domosdoshme që të gjithë aktorët, përfshirë presidentin Vuçiq, të shohin që misionet diplomatike amerikane të jenë të unifikuara.7/

@SecBlinken duhet të insistojë në një qëndrim Amerikan publik uniform mbështetur në principet e SHBA-së  në Beograd dhe Prishtinë. Tani dhe në të ardhmen. Përmbajtja e kësaj krize – dhe stabilizimi i Ballkanit – e kërkon atë. 8/

blank

Gjen.Wesley Clark: Milan Radoiçiq dëshmi e përfshirjes së qeverisë serbe – Incidenti tregues se Asosacioni përbën rrezik

Thekse nga Intervista e Gjen.Wesley Clark tek Zëri i Amerikës

Zëri i Amerikës: Autoritetet e Kosovës pretendojnë se një nga sulmuesit është Milan Radoiçiq, nënkryetar i partisë më të madhe dhe më me ndikim të serbëve të Kosovës, që ka lidhje të ngushta me partinë serbe në pushtet. Ai është gjithashtu nën sanksionet e SHBA-së dhe Britanisë së Madhe. Si e shihni këtë?

 

Wesley Clark: Kjo është një dëshmi e mëtejshme e përfshirjes së qeverisë serbe. Incidenti tregon për rrezikshmërinë që mund të ketë zbatimi i marrëveshjes për Asociacionin, të mbështetur nga Shtetet e Bashkuara dhe Bashkimi Evropian. Incidenti është tregues i një lidhje me Serbinë, vendosjen e një shteti policor ushtarak që mund të përbëjë një rrezik të konsiderueshëm shkatërrimi brenda Kosovës.

Intervista Zëri i Amerikës- Gjenerali Wesley Clark: NATO-ja duhet të forcojë aftësitë e saj për qenë më efikase kudo në Kosovë

 

blank

Gjen.Wesley Clark: KFOR të insistojë që këto manastire të inspektohen & arsenalet të konfiskohen – Shqetësuese grumbullimi i armëve në manastirin serb –

Thekse nga Intervista e Gjen.Wesley Clark tek Zëri i Amerikës

 

Zëri i Amerikës: Si i komentoni ngjarjet që ndodhën të dielën e kaluar në veri të Kosovës afër fshatit Banjskë?

 

Wesley Clark: Para së gjithash, është një tragjedi për të gjitha palët dhe është një problem real për qendrueshmërinë në Ballkan. Duhet të përbëjë shqetësim për Bashkimin Evropian dhe NATO-n, ndërsa dalin në pah detajet e incidentit. Ajo që është më shqetësuese për mua është se pas incidentit, rezultoi se kishte një grumbullim të madh armësh në manastirin serb. Kjo ka ndodhur edhe më parë.

 

Ne e dimë nga përvoja e mëparshme në Ballkan në vitet 1990, dhe që atëherë se manastiret serbe kanë qenë strehë e nacionalizmit serb. Dhe kjo nuk e përjashton përdorimin e tyre si arsenale. Ndaj kjo është gjëja më shqetësuese.

 

Shpresoj që KFOR të insistojë që këto manastire të inspektohen dhe arsenalet të konfiskohen, sepse nuk ka vend për këtë në mes të përpjekjeve për të arritur marrëveshjen e autonomisë për qytetarët serbë të Kosovës. Është kundërproduktive dhe nuk ka vend për kërcënime me dhunë dhe armë.

Intervista Zëri i Amerikës- Gjenerali Wesley Clark: NATO-ja duhet të forcojë aftësitë e saj për qenë më efikase kudo në Kosovë

 

blank

Gjen.Wesley Clark: Nuk ka shtypje dhe ky rajon (Veriu i Mitrovicës) është pjesë e Kosovës – sistemi i taksave duhet të jetë pjesë e qeverisë së Kosovës!

Thekse nga Intervista e Gjen.Wesley Clark tek Zëri i Amerikës

Zëri i Amerikës: Presidenti serb pretendoi se sulmuesit ishin serbë të zonës të cilët nuk mund ta përballonin represionin nga qeveria e Kryeministrit Kurti. Çfarë mendoni për këtë?

 

Wesley Clark: Do të më duhej të kuptoja më mirë se cilat janë ankesat e tyre për shtypjen. Shtypja nuk filloi pas futjes së KFOR-it në vitin 1999 nën udhëheqjen franceze. Në thelb, në atë zonë ishte eliminuar autoriteti shqiptar dhe shqiptarët ishin spastruar nga detyrat në spitale apo vende të tjera ku mund t’i shërbenin komunitetit. Që nga atëherë, zona ka qënë relativisht e ndarë.

 

Ka qenë një tranzicion i vështirë për qeverinë e Kosovës që të merret me separatizmin serb në veri, kështu që unë mendoj se këto pretendime për shtypje janë të pakuptimta. Është thjesht një deklaratë. Nuk ka asnjë tregues për ndonjë shtypje.

 

Në fakt, të dhënat tregojnë se ky rajon po i paguan taksa Beogradit dhe fondet vijnë nga Beogradi sikurse ky rajon (Veriu i Mitrovicës – shënim Voal.ch) të ishte një shtet më vete. Por nuk është. Është pjesë e Kosovës. Duhet të jetë pjesë e sistemit të taksave të qeverisë së Kosovës. Por nuk është. Pra, atje ka një problem të vërtetë.

Intervista Zëri i Amerikës- Gjenerali Wesley Clark: NATO-ja duhet të forcojë aftësitë e saj për qenë më efikase kudo në Kosovë

blank

Gjen. Wesley Clark: Serbët,që ndërmorën sulmin ishin rebelë, terroristë. Dhe ata nuk meritojnë asnjë njohje zyrtare

Thekse nga Intervista e Gjen.Wesley Clark tek Zëri i Amerikës

Zëri i Amerikës: Për serbët e vrarë u mbajtën përkujtimore dhe ditë zie, një lloj nderimi për autorët. Çfarë mesazhi dërgon kjo?

 

Wesley Clark: E kuptoj kur bëhet fjalë për anëtarët e familjes. Por si çështje e politikës shtetërore, jo, këta njerëz janë të jashtëligjshëm. Ata shkelën sundimin e ligjit në Kosovë. Dhe ata që morën pjesë duhet të ndëshkohen dhe të mos njihen si heronj. Por unë e di se në Serbi dhe në këtë rajon, trashëgimitë e konfliktit që datojnë më shumë se një shekull janë përplasjet etnike, përplasjet fetare, Lufta e Parë Botërore, Lufta e Dytë Botërore e deri në epokën e Titos, përpjekja për të shtypur nacionalizmin shqiptar dhe ardhja e Milosheviçit në pushtet, gjithçka është shoqëruar me dhunë, me urrejtje, me tensione ndëretnike. Dhe është koha për ta ndaluar atë dhe për të ecur përpara në shekullin e 21-të. Është një tragjedi e vërtetë. Më vjen shumë keq për familjen e këtyre njerëzve të vrarë nga të dyja anët. Dhe polici shqiptar që u vra, polici i Kosovës po bënte detyrën.

 

Ai po mbështeste sundimin e ligjit. Serbët (që ndërmorën sulmin) ishin rebelë, terroristë. Dhe ata nuk meritojnë asnjë njohje zyrtare. Por, sigurisht, është një tragjedi për ta dhe familjet e tyre. Dhe na vjen keq për të gjitha humbjet e jetëve në zonë.

Intervista Zëri i Amerikës- Gjenerali Wesley Clark: NATO-ja duhet të forcojë aftësitë e saj për qenë më efikase kudo në Kosovë

 

blank

Ivana Stradner: Diplomatët Amerikanë duhet të paketojnë gjërat e tyre e të kthehen në SHBA, nëse nuk e parandalojnë përshkallëzimin

Ekspertja amerikane e sigurisë Ivana Stradner reagon në Twitter rreth dështimit të diplomacisë:

“NËSE gjërat përshkallëzohen në Ballkan, të cilat diplomatët Amerikanë mund t’i parandalojnë, ata do të paketojnë gjërat e tyre dhe do të kthehen në SHBA për të shijuar problemet e tyre të para botërore. Zyrtarët e korruptuar të qeverisë dhe mafia në Ballkan do të dërgojnë paratë ($$$) dhe fëmijët e tyre në Perëndim. Por njerëzit e zakonshëm do të dërgohen të luftojnë dhe të vriten. Skenari i Milosheviqit nga vitet ’90. E turpshme.”

 

blank

Chollet: Kosova dhe Serbia të ulin tensionet dhe t’u kthehen bisedimeve për normalizimin e marrëdhënieve

VOA

Këshilltari i lartë i Departamentit amerikan të Shtetit, Derek Chollet, u bëri thirrje të martën Kosovës dhe Serbisë për uljen e tensioneve dhe kthimin në tryezën e bisedimeve për normalizimin e marrëdhënieve. Ai i bëri këto komente në rrjetin X, të njohur deri vonë si Twitter pas bisedave me kryeministrin e Kosovës, Albin Kurti dhe presidentin e Serbisë, Aleksandar Vuçiç lidhur me situatën e krijuar pas sulmit të së dielës mbi policinë e Kosovës në veri, nga një grup i armatosur që vrau një oficer policie.

“Bisedova me kryeministrin Albin Kurti për sulmin e tmerrshëm të së dielës në Kosovë. Dënoj ashpër dhunën kundër policisë së Kosovës dhe shpreha ngushëllime për humbjen e rreshterit Afrim Bunjaku. Të dyja palët duhet të kthehen në dialogun e ndërmjetësuar nga Bashkimi Evropian dhe të zbatojnë përkushtimet (e marrëveshjes) së Ohrit”, shkroi ai.

Ndërsa me presidentin serb Vuçic, shkroi ai, “fola për rëndësinë e shtensionimit të menjëhershëm në veri të Kosovës dhe shmangien e veprimeve që mund të nxisin më tej tensionet. Humbja tragjike e jetës nënvizon nevojën urgjente për të rivendosur qetësinë dhe për t’u kthyer në dialogun e lehtësuar nga BE-ja”, shkroi zoti Chollet.

Vrasja e policit të Kosovës në sulmin e së dielës nga një grup i armatosur që çoi në përleshje në të cilat u vranë tre pjesëtarë të grupit, ka nxitur shqetësime të reja ndërkombëtare për qëndrueshmërinë e rajonit.

Sulmi ndodhi në një periudhë përpjekjesh të vështira për ripërtëritjen e bisedimeve Kosovë – Serbi, raundi i fundit i të cilave që u mbajt më 14 shtator në Bruksel, nuk shënoi ndonjë përparim.

Bashkimi Evropian me mbështetjen e Shteteve të Bashkuara ndërmjetësoi në muajin shkurt në Bruksel dhe më pas në muajin mars në Ohër një marrëveshje për normalizimin e marrëdhënieve mes palëve, por nuk pati asnjë hap domethënës për zbatimin e saj.

blank

Ivana Stradner: Kjo që ngjau në Kosovë ishte paralajmëruar nga Rusia

Ekspertja amerikane e sigurisë Ivana Stradner reagon në Twitter se kjo që ngjau në Kosovë ishte paralajmëruar nga Rusia:

“Ministria e Mbrojtjes e Rusisë deklaroi hapur në korrik se një luftë në Kosovë do të fillojë këtë vjeshtë.

Me të vërtetë.

Dita e dytë e vjeshtës 2023, Serbët e armatosur etnikë sulmuan policinë në veri të Kosovës.

Besoni 🇷🇺 kur ta thonë.”

 

blank

SHBA-ja do ta furnizojë Ukrainën me raketa me rreze të gjatë

Presidenti amerikan, Joe Biden, planifikon të dërgojë në Ukrainë raketa me rreze të gjatë, për t’i ndihmuar Kievit në kundërofensivën kundër ushtrisë ruse, kanë raportuar mediat amerikane.

Ato i kanë cituar disa zyrtarë amerikanë, të familjarizuar me këtë çështje, të kenë thënë se Ukraina do t’i marrë disa raketa ATACMS me rreze deri në 300 kilometra.

Diçka e tillë do t’ia mundësonte Kievit sulmin në shënjestrat ruse në zona shumë më të thella sesa linja e frontit.

Të paktën një raketë ukrainase e ka goditur flotën e Rusisë në Detin e Zi të premten, përkatësisht në Krime, gadishullin ukrainas të aneksuar nga Moska më 2014.

Një burim brenda ushtrisë ukrainase i ka thënë transmetuesit britanik BBC se sulmi në portin në Sevastopol është kryer duke përdorur raketa Storm Shadow, të cilat janë dërguar në Ukrainë nga Britania dhe Franca, duke e vënë në pah rëndësinë e armatimit perëndimor në këtë luftë.

Megjithatë, asnjëri prej liderëve nuk i kanë konfirmuar raportimet e mediave amerikane.

Ajo çka dihet është se tanket amerikane Abrams do të arrijnë në Kiev në javën e ardhshme.

Kur presidenti rus, Vladimir Putin e ka nisur luftën në Ukrainë, në shkurt të vitit 2022, administrata e Bidenit ka hezituar që ta furnizojë Ukrainën me armë moderne.

Mirëpo qëndrimi i saj ka ndryshuar me kalimin e kohës, pasi Kievi tani ka sisteme raketore të avancuara Himars, dhe sistem raketor për mbrojtje ajrore Patriot.

Biden deri më tani ka hezituar për armët me rreze të gjata, duke thënë se raketa të tilla mund ta përballin SHBA-në drejtpërdrejt me Rusinë, shtet që posedon armë bërthamore.rel

blank

Zelensky thotë se kishte bisedime konstruktive me ligjvënësit amerikanë

Presidenti i Ukrainës, Volodymyr Zelenskyi, dhe sekretari i Mbrojtjes i Shteteve të Bashkuara, Lloyd Austin (djathtas) në Pentagon, 21 shtator 2023.

Presidenti i Ukrainës, Volodymyr Zelensky, tha të enjten se mbajti bisedime konstruktive me ligjvënësit amerikanë dhe se mezi pret të flasë me presidentin Joe Biden për nevojat e ushtrisë ukrainase dhe mbrojtjes së saj ajrore.

Ai tha se mori premtim “të rëndësishëm” për armë të reja të mbrojtjes ajrore nga Shtëpia e Bardhë, por paralajmëroi se Kievi mund ta humbë luftën me Rusinë, nëse ligjvënësit republikanë nuk e mbështesin pakon e miliarda dollarëve ndihmë ushtarake që Ukraina po e kërkon nga SHBA-ja.

Zelensky u prit nga presidenti i Shteteve të Bashkuara, Joe Biden, në Shtëpinë e Bardhë të enjten vonë, me të cilin do të bisedojë rreth mbështetjes amerikane për përpjekjet e Ukrainës në luftë kundër Rusisë.

I pyetur për rëndësinë e ndihmës që po e kërkon Ukraina, Zelensky tha se “është shumë e rëndësishme”, pasi i shtrëngoi duart me Bidenin.

Republikanët McCarthy dhe Scalise janë nën presion nga krahu konservator i partisë së tyre për t’i dhënë fund mbështetjes së Ukrainës. Demokratët, të udhëhequr nga presidenti Biden, janë më të bashkuar në dëshirën për ta vazhduar përkrahjen për Ukrainën.

Kjo është hera e dytë gjatë kohës së luftës që Zelensky e viziton Uashingtonin.

Në Kongres, liderët republikanë dhe demokratë kanë mospajtime të thella rreth shpenzimeve, si pasojë e të cilave mund të mbyllet Qeveria amerikane, dhe kështu të vihet në rrezik pakoja me ndihma për Ukrainën në vlerë prej 24 miliardë dollarëve.

Fraksioni i ekstremit të djathtë, i cili e dominon Partinë Republikane, ngul këmbë se duhet të ndërpriten ndihmat për Ukrainën, duke qenë se Kongresi i ka aprovuar deri më sot 100 miliardë dollarë ndihma për të, përfshirë 43 miliardë dollarë vetëm për armatim.

“Për të fituar, ne duhet patjetër të qëndrojmë të bashkuar dhe të punojmë së bashku”, tha Zelensky në rrjetet sociale, duke shtuar se llogarit në mbështetjen e vazhdueshme të Shteteve të Bashkuara kundër Rusisë.

Lideri ukrainas mbërriti në SHBA pas një vale tjetër sulmues ruse me raketa. Sulmet, në qytetet e ndryshme të vendit, vranë së paku tre persona në Herson dhe i plagosën shuam të tjerë në zona të tjera të enjten.

Lajmet me interesante

Lajmet e fundit

ARKIVA E LAJMEVE

blank

Kliko këtu për të parë arkivën e lajmeve

Send this to a friend