“Në këtë biznes ndihem si peshkatar, ndonjëherë kap shpejt, ndonjëherë nuk ka peshk”, i shkruante Daniel Siad, një rekrutues modelesh, Jeffrey Epstein në korrik 2014, duke përshkruar vështirësitë e punës së tij në kërkim të fytyrave të reja në mbarë botën.

Në këtë shkëmbim mesazhesh, të publikuar në paketën më të fundit të dokumenteve të Departamentit amerikan të Drejtësisë, Siad shprehte pakënaqësi ndaj Epstein-it, i cili nuk ishte paraqitur në një takim të planifikuar.

“Kisha 2 vajza nga Suedia, një sllovake, 2 franceze dhe rusen, me të cilën fole, si dhe një kineze shumë të bukur me emrin…”, shkruante ai. Epstein u përpoq ta qetësonte duke i thënë: “Sigurisht që do të të rimbursoj për çdo shpenzim.”

Analiza e mesazheve mes Epstein-it dhe një prej bashkëpunëtorëve të tij tregon punën e detajuar që bëhej për organizimin e takimeve me një rrjedhë të vazhdueshme vajzash të reja, në dekadën pas lirimit të tij nga burgu për akuza që lidhen me shfrytëzimin seksual të të miturve.

Në atë rast, Siad nuk donte të prishte marrëdhënien me Epstein-in dhe theksonte: “Doja të të bëja një surprizë të madhe.” Ai raportonte me entuziazëm se një udhëtim i fundit në Skandinavi kishte qenë shumë produktiv: të paktën pesë nga vajzat që kishte takuar ishin 16 ose 17 vjeç, ndërsa kishte edhe një 15-vjeçare nga Franca, prindërit e së cilës ishin dakord që ajo të niste karrierën si modele. “Ka miliona të tilla atje jashtë”, shkruante ai.

Industria e modës rezulton të ketë qenë një kanal i dobishëm për Epstein-in për të njohur gra të reja. Dokumentet tregojnë se ai interesohej në mënyrë të vazhdueshme për procesin e përzgjedhjes së fytyrave të reja, ndërkohë që kultivonte marrëdhënie me figura të rëndësishme të industrisë, shkruan “The Guardian”.

Dosjet e paraqesin Siad si një nga korrespondentët më të rregullt të Epstein-it, duke mbetur në kontakt me të deri disa muaj para vdekjes së financierit. Ai merrte transferta bankare nga Epstein, që duket se mbulonin shpenzimet e krijuara gjatë kërkimeve.

Gjatë një dekade, Siad dërgonte përditësime nga vizitat e tij në fshatra të Europës Lindore, ishuj në Suedi apo në Havanën qendrore, ku kërkonte vajza të reja për t’ia prezantuar Epstein-it.

Edhe pse pak i njohur jashtë botës së modës, ai kishte lidhje të forta në industri. Punonte si rekrutues me komision për Jean-Luc Brunel, një agjent i njohur në Paris, Nju Jork dhe Majami për më shumë se katër dekada, si dhe kishte bashkëpunuar me Gérald Marie, ish-drejtues i Elite.

Edhe Epstein kishte bashkëpunim të ngushtë me Brunel. Në fillim të viteve 2000, ai e mbështeti financiarisht në krijimin e agjencisë MC2 Model Management dhe mbeti i përfshirë për vite me radhë.

Brunel i dha fund jetës në burg në shkurt 2022, pas 14 muajsh në paraburgim në pritje të gjyqit për akuza për përdhunim të të miturve dhe ngacmim seksual, të cilat ai i kishte mohuar, ashtu si edhe çdo përfshirje në trafikimin seksual të lidhur me Epstein-in.

Në email-et e tij, Siad e nxiste shpesh Epstein-in të komunikonte për “zbulimet” e reja. “Më telefono nëse ke kohë, jam në Barcelonë. Me një bukuri të mahnitshme”, shkruante në nëntor 2016. Një vit më pas, nga Maroku, raportonte: “Shumë bukuri të mahnitshme! Dhe shumë të sjellshme.”

Siad përmendet në më shumë se 1,000 dokumente në paketën e fundit të deklasifikuar. Mesazhet ofrojnë një pasqyrë të detajuar mbi përpjekjet për të orkestruar takime mes Epstein-it dhe aspiranteve për modele.

“Slovakia është vendi ku duhet të jesh”, i shkruante ai në vitin 2009, duke përmendur se kishte 45 gra për të takuar. Ai planifikonte të kalonte verën duke “vëzhguar fshatra të vegjël” në Sllovaki, Republikën Çeke, Poloni dhe Hungari. Më vonë atë ditë, Epstein pyeti: “sa $?”

“Duhet t’i ftoj prindërit për drekë ose kafe… kam disa vajza që më presin, si në Poloni, kështu që duhet t’u jap disa para”, shkruante Siad, duke shtuar se shpenzimet do të arrinin të paktën 4,000 euro. “Do të të bëj një surprizë të madhe kur të vish në Paris”, premtonte ai.

Shumë email-e përmbanin pyetje të shkurtra nga Epstein si: “çfarë ka për vajza të reja?”, “ndonjë lajm?”, “diçka që ia vlen të vij në Paris?” apo “ndonjë interesante?”. Gratë shpesh identifikoheshin sipas kombësisë, jo emrit.

Siad ka deklaruar se i prezantonte gratë për seanca të ligjshme prezantimi modelesh në Paris. “Ai kishte një apartament të madh ku organizonte takime, përfshirë eventet për modele që rekrutoja, për Victoria’s Secret dhe MC2”, ka thënë ai në një deklaratë për mediat. “Kohëzgjatja e kastingu-t nuk zgjaste më shumë se 10 minuta. Unë largohesha gjithmonë menjëherë me modelet.”

Një modele suedeze, Ebba Karlsson, ka pretenduar se Siad e kishte rekrutuar në Stokholm në vitin 1990, kur ajo ishte 20 vjeçe, dhe më pas e kishte çuar në Francë ku, sipas saj, e kishte përdhunuar. Ajo ka deklaruar se për dekada është përpjekur ta identifikojë, gjë që arriti vetëm pas publikimit të dokumenteve të fundit.

“Ishte diçka në mënyrën se si u bë, njerëzit që ai Siadi njihte… ai më kërcënoi të më vriste dhe më tha se e njihte kreun e policisë në Paris. Është shumë e lehtë të mendosh se je askush, por tani e di që kjo ishte pjesë e diçkaje më të madhe. Jam e lehtësuar që intuita ime ishte e drejtë”, tha ajo.

Karlsson ka paraqitur kallëzim penal në Paris për përdhunim dhe trafikim njerëzor. Siad i ka mohuar akuzat, ndërsa avokatja e tij ka deklaruar se klienti i saj nuk e njeh paditësen dhe se çështja bie për shkak të parashkrimit.

Sipas raportimeve të medias franceze Le Parisien, një tjetër grua ka deklaruar në vitin 2022 se Siad i kishte siguruar gra Epstein-it për qëllime seksuale. Ajo pretendon se ishte prezantuar me të në Paris dhe më pas ishte punësuar si masazhere në apartamentin e tij. Policia franceze nuk ndërmori asnjë veprim, tha gruaja në intervistën me Le Parisien.

Avokati i Siadit tha se ai nuk e kishte prezantuar Epsteinin. “Gjëja më e keqe në lidhje me këto dosje është se ai dhe Epstein flasin në një gjuhë që ne si gra nuk e pëlqejmë”, tha Arab-Tigrine. “Nuk ka prova për ndonjë krim. Ai punonte si një rekurtues modelesh dhe i dërgonte detaje Epsteinit për gratë.”

Siad i tha France TV këtë muaj se ai kishte punuar thjesht si një rekrutues modelësh, Epstein kishte abuzuar me besimin e tij dhe nuk kishte qenë “në gjendje të dinte që ky njeri ishte i rrezikshëm”.

“Me kalimin e kohës, zbulohet se ky individ ka kryer mizori, për fat të mirë, unë nuk e kam prezantuar kurrë me ndonjë të mitur ose jo të mitur që është abuzuar. Nuk kam asgjë për të cilën të qortoj veten”, tha ai në komentet e transmetuara në televizionin francez.

Dokumentet sugjerojnë se edhe FBI ishte informuar për aktivitetin e Siad që në vitin 2016. Ndërkohë, prokurorët francezë kanë njoftuar krijimin e një ekipi magjistratësh për të analizuar provat që dalin nga dosjet, ku përmenden disa shtetas francezë.

Siad, i cili e përshkruan veten si të lindur në Francë, me origjinë algjeriane dhe shtetësi suedeze, pohoi në përgjigjen e tij në televizionin francez se marrëdhëniet e tij me modelet që ai vëzhgonte ishin thjesht profesionale. Disa nga emailet e tij drejtuar Epstein përmendnin planet për organizimin e takimeve me agjentë, por nuk është e qartë pse Epstein kishte një rol kaq praktik në verifikimin e modeleve aspirante gjatë një periudhe kur ai vetë nuk kishte asnjë rol formal me asnjë agjenci modelesh.

Emailet e Siadit zbulojnë se Epstein ishte shumë kërkues. Në qershor 2011, Siadi i dërgoi Epsteinit një fotografi të një gruaje 19-vjeçare, duke shënuar: “Matja 80C – 60 – 90 1m74. Vajzë shumë e mirë.” Epstein u përgjigj dy ditë më vonë: “jo shumë interesante, më vjen keq”.

Ndonjëherë Epstein përgjigjej vetëm me një fjalë: “mosha?”. Siadi i pëlqente të theksonte se gratë që kishte gjetur për Epsteinin dukeshin të reja. Ai shkruante: “26 vjeç, por ajo duket 18 vjeç”. Ose, duke përshkruar një 20-vjeçare, ai shkruante: “ajo është shumë e ëmbël dhe e turpshme”.

Herë pas here, Siadi e paralajmëronte Epsteinin e një nga vajzat që ai kishte rekrutuar ishte “paksa e çmendur” ose se ato mund të kishin nevojë për kirurgji plastike për t’u bërë më tërheqëse.

Në vitin 2017, Siad u lidh nga Barcelona me lajmin për një grua “shumë të sjellshme” që shpresonte ta punësonte në një agjenci modelesh. Epstein kërkoi një foto të plotë të trupit dhe u përgjigj: “nuk duket e lumtur”. Më vonë, ai shtoi: “Është e mirë, gjoksi i saj është i tmerrshëm. Do të duhet të ribëhet.”

Epstein miratonte rregullisht pagesat për kontabilistët e Siadit. Në vitin 2018, Epstein ia përcolli të dhënat bankare të Siadit kontabilistit të tij, duke shënuar: “kredi 5-vjeçare për 25 mijë dollarë”.

Puna nuk ishte gjithmonë e thjeshtë. Në vitin 2014, Siad la të kuptohej se hunda e tij ishte thyer nga babai i një gruaje që ai po përpiqej ta rekrutonte si modele.

Ndonjëherë, Epstein nuk donte të kishte më të bënte me gratë me të cilat ishte prezantuar dhe i ankohej Siadit. Në maj 2014, Epstein i dërgoi një email Siadit: “[emri nuk është i redaktuar në dosje] më dërgoi një mesazh, nuk dua të flas me të, nëse paguan për biletën e saj për në Letoni, do të të rimbursoj.”

Siadi u përgjigj: “Unë do të kujdesem për të… do ta zgjidh vetë këtë, mos u shqetëso.”/The Guardian