Ka nisur protesta e 42 në Tiranë. Qytetarët janë organizuar në sheshin “Skënderbej”, dhe kërkojnë dorëheqjen e panegociueshme të kryeministrit Edi Rama.

Më pas pritet marshimi i qytetarëve drejt Kryeministrisë.

Organizatorët kanë njoftuar se në tubimin e sotëm do t’u bashkohen edhe shqiptarë nga diaspora, të cilët prej kohësh janë përfshirë në mbështetje të kësaj kauze.

Një ditë më parë, protestuesit marshuan në disa prej akseve kryesore të Tiranës, duke brohoritur slogane si: “Qeveri e krimit”, “Rama në burg, Berisha në burg”, “Shqipëria kërkon revolucion” dhe “Rama jep dorëheqjen”.

Unioni i Gazetarëve Shqiptarë Profesionistë të Diasporës solidarizohet me redaksinë e emisionit investigativ “Report” dhe gazetarin italian Sigfrido Ranucci.

Unioni i Gazetarëve Shqiptarë Profesionistë të Diasporës (UGSHPD) shpreh solidaritetin e tij të plotë me redaksinë e emisionit investigativ “Report” të Rai 3 dhe gazetarin investigativ Sigfrido Ranucci, pas reagimit të tyre ndaj vendimit të RAI-t për pezullimin e transmetimit të replikave verore të programit.

UGSHPD vlerëson se vendime të tilla që prekin një redaksi investigative me një histori të gjatë pune profesionale duhet të trajtohen me kujdes të madh, duke respektuar pavarësinë editoriale dhe rolin e medias së lirë në një shoqëri demokratike.

Emisioni “Report”, prej vitesh, ka qenë një pikë referimi për gazetarinë investigative në Itali, duke trajtuar çështje të korrupsionit, krimit të organizuar, përdorimit të fondeve publike, konflikteve të interesit dhe çështjeve të tjera me rëndësi të lartë publike.

Unioni i Gazetarëve Shqiptarë Profesionistë të Diasporës vlerëson në mënyrë të veçantë kontributin që emisioni “Report” ka dhënë ndër vite në trajtimin e çështjeve që lidhen me Shqipërinë, shqiptarët dhe marrëdhëniet shqiptaro-italiane.

Unioni i Gazetarëve Shqiptarë Profesionistë të Diasporës thekson se mbështetja ndaj redaksisë së “Report” nuk është vetëm solidaritet me një program televiziv, por është mbështetje për një parim themelor të demokracisë: të drejtën e gazetarit për të hetuar dhe të drejtën e qytetarëve për të njohur të vërtetën.

Atentati me bombë ndaj gazetarit Sigfrido Ranucci, drejtuesit të emisionit “Report”, përbën një nga sulmet më serioze ndaj një gazetari investigativ në Itali. Sulmi ndaj tij ishte një kërcënim ndaj lirisë së medias dhe ndaj të gjithë gazetarëve që punojnë për të nxjerrë në dritë fakte me interes publik.

UGSHPD dënon çdo formë presioni, kërcënimi apo intimidimi ndaj gazetarëve dhe vlerëson se siguria e tyre dhe pavarësia e redaksive investigative janë kushte themelore për funksionimin e demokracisë.

Përmes gazetarisë profesionale investigative, “Report” ka sjellë në vëmendjen e publikut italian dhe shqiptar tema që lidhen me transparencën institucionale, marrëdhëniet politikë–biznes, investimet strategjike, pronat, përdorimin e fondeve publike dhe çështje të tjera me interes të drejtpërdrejtë për qytetarët

Ndër investigimet konkrete të “Report” mbi Shqipërinë renditen:

“Un italiano a Tirana” – 10 maj 2015*, gazetar: Luca Chianca – Rai 3 “Report”

Një nga investigimet më të rëndësishme të “Report” mbi Shqipërinë ishte reportazhi *“Un italiano a Tirana”*, i transmetuar më 10 maj 2015.

Investigimi u përqendrua te *Agon Channel*, televizioni i krijuar në Tiranë nga sipërmarrësi italian Francesco Becchetti.

“Report” analizoi investimin e madh në sektorin mediatik shqiptar, burimet financiare të projektit, aktivitetet ekonomike të lidhura me të dhe marrëdhëniet ndërmjet biznesit, medias dhe institucioneve.

Ky investigim hapi debat publik mbi transparencën e investimeve të huaja në Shqipëri dhe mbi mënyrën se si zhvillohen projekte të mëdha ekonomike në një vend në transformim.

“La campagna d’Albania” – prill 2024*, gazetar: Giorgio Mottola – Rai 3 “Report”

Një prej investigimeve më të rëndësishme të viteve të fundit ishte reportazhi *“La campagna d’Albania”*, i cili trajtoi marrëveshjen mes Italisë dhe Shqipërisë për ngritjen e qendrave të emigrantëve në territorin shqiptar.

Në këtë investigim u analizua konkretisht projekti për ngritjen e kampeve/qendrave të pritjes dhe përpunimit të emigrantëve në *Shëngjin dhe Gjadër*.

“Report” trajtoi mënyrën e ndërtimit dhe funksionimit të këtyre strukturave; kostot financiare të projektit; përdorimin e fondeve publike italiane; përgjegjësitë institucionale të palës italiane dhe shqiptare; aspektet ligjore dhe praktike të transferimit të emigrantëve në territorin shqiptar; ndikimin e projektit mbi Shqipërinë dhe marrëdhëniet mes dy vendeve.

Ky investigim ngriti pyetje mbi transparencën e një marrëveshjeje me rëndësi të madhe politike dhe sociale dhe solli në vëmendjen e publikut nevojën për kontroll demokratik mbi vendimmarrjet shtetërore.

Engjëll Agaçi, roli institucional dhe marrëveshja Itali–Shqipëri

Në kuadër të investigimit “La campagna d’Albania”, “Report” trajtoi figurën e *Engjëll Agaçit*, Sekretarit të Përgjithshëm të Këshillit të Ministrave të Shqipërisë.

Emisioni analizoi rolin e tij në procesin e marrëveshjes Itali–Shqipëri, si dhe periudhën e tij të mëparshme profesionale si avokat në Itali.

Në material u trajtuan marrëdhënie profesionale dhe kontakte të krijuara gjatë kësaj periudhe, duke ngritur pyetje mbi transparencën që duhet të shoqërojë funksionet e larta publike.

Engjëll Agaçi ka kundërshtuar interpretimet e bëra në investigim dhe ka dhënë sqarimet e tij publike lidhur me këto çështje.

Olsi Rama dhe çështja e Xibrakës

Në të njëjtin investigim, “Report” trajtoi edhe çështjen e *Olsi Ramës, vëllait të Kryeministrit të Shqipërisë Edi Rama, dhe debatin publik rreth dosjes së njohur si **laboratori i Xibrakës*.

Investigimi analizoi elementë të dosjes së mëparshme hetimore dhe ngriti pyetje mbi rrethana, kontakte dhe lidhje të pretenduara me persona të hetuar në atë çështje.
UGSHPD thekson se pikërisht ky është roli i gazetarisë investigative: të bëjë pyetje, të analizojë dokumente dhe të kërkojë transparencë, ndërsa përgjegjësia përfundimtare për çdo çështje penale i takon institucioneve të drejtësisë.

Çështja e pronës në bregdetin e Vlorës dhe transparenca mbi pasuritë strategjike

Në kuadër të investigimit “La campagna d’Albania”, “Report” trajtoi edhe një çështje që lidhej me një sipërfaqe prej rreth *30 mijë metrash katrorë tokë në zonën bregdetare të Vlorës*.

Investigimi u përqendrua te dokumentacioni i pronës, aktet e dhurimit, marrëdhëniet mes personave të përfshirë dhe nevoja për transparencë mbi pasuritë me vlerë të lartë në zonat strategjike të Shqipërisë.

Kjo çështje lidhet me një debat më të gjerë në Shqipëri mbi pronat, zhvillimin e territorit, turizmin dhe kontrollin publik mbi pasuritë e rëndësishme kombëtare.

Krimi i organizuar shqiptar dhe rrjetet ndërkombëtare*

“Report” ka trajtuar gjithashtu fenomenin e krimit të organizuar ndërkombëtar, trafikut të drogës dhe rrjeteve kriminale që veprojnë mes Shqipërisë dhe Italisë.

Këto investigime kanë ndihmuar në një debat më të gjerë mbi mënyrën se si funksionojnë organizatat kriminale transnacionale, pastrimin e parave dhe nevojën për bashkëpunim të institucioneve europiane.

UGSHPD thekson se këto tema nuk kanë të bëjnë me një komunitet apo kombësi të tërë, por me individë dhe organizata kriminale që dëmtojnë shoqërinë dhe cenojnë imazhin e qytetarëve shqiptarë që jetojnë e punojnë me integritet në Itali dhe Europë.

UGSHPD vlerëson se kontributi i emisionit “Report” tregon rëndësinë e gazetarisë investigative në një shoqëri demokratike.

Investigimet mbi Shqipërinë kanë sjellë në vëmendje çështje që kanë prekur drejtpërdrejt interesin publik shqiptar: transparencën e pushtetit, marrëdhëniet politikë–biznes, menaxhimin e pronave, projektet strategjike dhe luftën kundër krimit të organizuar.

Mbrojtja e redaksisë së “Report” është mbrojtje e një gazetarie që ka kërkuar përgjigje, ka hapur debate dhe ka kontribuar në të drejtën e qytetarëve për informacion.

Unioni i Gazetarëve Shqiptarë Profesionistë të Diasporës qëndron pranë Sigfrido Ranuccit, redaksisë së “Report” dhe të gjithë gazetarëve investigativë që ushtrojnë profesionin me guxim, pavarësi dhe përgjegjësi publike.

Mbrojtja e gazetarit është mbrojtje e së vërtetës.

Mbrojtja e gazetarisë investigative është mbrojtje e demokracisë.

Unioni i Gazetarëve Shqiptarë Profesionistë të Diasporës (UGSHPD)

Në mbështetje të gazetarisë së lirë, profesionale dhe të pavarur

Protesta masive e qytetarëve kundër qeverisë së kryeministrit Edi Rama ka hyrë sot në ditën e 42-të. Mijëra qytetarë pritet të dalin sërish në bulevardin përpara Kryeministrisë duke bërë thirrje për dorëheqje.

Atyre pritet t’ju bashkohen edhe shqiptarë nga diaspora, të cilët kanë treguar një mbështetje të madhe duke protestuar edhe në vendet ku jetojnë.

Kërkesa kryesore e protestuesve mbetet dorëheqja e kryeministrit Edi Rama. Në këto ditë qëndrimi në shesh, qytetarët kanë artikuluar problemet e ndryshme sociale dhe ekonomike me të cilat përballen përditë.

Protestuesit kanë kërkuar gjithashtu që të veprojë edhe drejtësia, ndërsa brohorasin sloganet “Qeveri e krimit”, “Rama në burg, Berisha në burg” etj.

Qeveria Rama është përballur së fundmi edhe me një tjetër skandal pasi dha 4 milionë euro nga fondi i rezervës për koncertin e Kanye West, që mbahet sot. Protestuesit e kanë cilësuar këtë veprim si të turpshëm në një kohë kur vendi ka nevojë për fonde në fusha të ndryshme që prekin njerëzit çdo ditë.

Një artikull për koncertin e Kanye West në Tiranë dhe financimin e qeverisë prej 4 milionë eurosh ka shkruar edhe media holandeze “De Telegraaf”.

Media prestigjioze shkruan se kryeministri shqiptar është vënë nën kritika për financimin nga paratë publike, duke theksuar se këto vijnë në një kohë kur pozita e tij politike është e rënduar për shkak të protestave kundër tij.

“Rama e mbron investimin duke deklaruar se koncerti do t’i japë një nxitje të konsiderueshme turizmit dhe ekonomisë. Kryeministri thotë se pret dhjetëra mijëra vizitorë të huaj dhe miliona euro të ardhura shtesë për hotelet, restorantet dhe bizneset e tjera lokale.”, thuhet në artikull.

Gazeta vë gjithashtu theksin edhe tek fakti se reperi ka shkaktuar polemika për shkak të qëndrimeve të tij antisemite. Në artikull përmendet kundërshtimi i komunitetit hebraik shqiptar, të cilët thonë se nuk po bëhet vetëm një koncert, por po legjitimohet një figurë me qëndrime antisemire.

“Megjithatë, vendimi çon në një stuhi protestash. Reagimet kritike po bien në mediat sociale, dhe komuniteti hebraik shqiptar gjithashtu dënon mbërritjen e artistit. Sipas organizatës, ky nuk është “vetëm një koncert”, por legjitimimi i një figure që ka përhapur vazhdimisht pikëpamje antisemite.”, thuhet më tej.

Artikulli i plotë:

Kryeministri i Shqipërisë Edi Rama po përballet me kritika të ashpra pasi qeveria e tij ndau 4 milionë euro fonde publike për një koncert të reperit kontrovers amerikan Kanye ‘Ye’ West.

Performanca do të zhvillohet këtë fundjavë pranë kryeqytetit, Tiranës. Sipas kundërshtarëve, është e papranueshme që paratë e taksapaguesve të përdoren për një artist që ka shkaktuar vazhdimisht polemika vitet e fundit me deklarata antisemite dhe lëvdata për Adolf Hitlerin.

Shqipëria është një nga vendet e pakta evropiane ku West mund të performojë ende këtë verë. Disa vende dhe organizatorë të tjerë më parë kanë anuluar koncertet për shkak të komenteve të tij kontroverse. Sipas qeverisë shqiptare, mbështetja financiare është e nevojshme për ta bërë të mundur një ngjarje për të cilën mijëra bileta ishin shitur tashmë.

Nxitje për ekonominë dhe turizmin

Rama e mbron investimin duke deklaruar se koncerti do t’i japë një nxitje të konsiderueshme turizmit dhe ekonomisë. Kryeministri thotë se pret dhjetëra mijëra vizitorë të huaj dhe miliona euro të ardhura shtesë për hotelet, restorantet dhe bizneset e tjera lokale.

Megjithatë, vendimi çon në një stuhi protestash. Reagimet kritike po bien në mediat sociale, dhe komuniteti hebraik shqiptar gjithashtu dënon mbërritjen e artistit. Sipas organizatës, ky nuk është “vetëm një koncert”, por legjitimimi i një figure që ka përhapur vazhdimisht pikëpamje antisemite.

Polemika vjen në një kohë të vështirë për Ramën, i cili ka qenë nën presion për javë të tëra për shkak të protestave kundër politikave të tij dhe akuzave se ai u jep shumë përparësi investitorëve të huaj. GSH

Pas fjalimeve para kryeministrisë, mijëra qytetarë marshuan në kryeqytet në ditën e 41-të të protestave kundër qeverisë së Edi Ramës.

Qytetarët u larguan nga kryeministria për t’u drejtuar Bashkisë së Tiranës, e më tej drejt kryqëzimit të 9-katsheve.

Në ecjen e tyre ata shigjetuan parlamentin e Shqipërisë duke e quajtur në kor “analfabet”. Sakaq, bëm dhe thirrje që qytetarët t’u bashkohen në ecje.

Edhe sot mijëra qytetarë u mblodhën për të vijuar me revoltën e tyre kundër qeverisë Rama.

Teksa shënohet dita e 41-të e rezistencës, protestuesit u mblodhën fillimisht te sheshi Skënderbej për të vijuar marshimin drejt Kryeministrisë.

Shumë prej tyre kishin marrë edhe pankarta me vete, ku shprehin revoltën e tyre. Në disa prej pankartave, protestuesit i bëjnë thirrje Ramës se përveç kapitujve që po mbyllen në Bruksel për Shqipërinë do mbyllet edhe kapitulli i Ramës.

Për më shumë se tri dekada, Liga Qytetare Shqiptaro-Amerikane (LQShA), nën udhëheqjen e Joe DioGuardi dhe Shirley Cloyes DioGuardi – mbrojtës të kahershëm të të drejtave njerëzore dhe kombëtare të popullit shqiptar – ka qëndruar e palëkundur në misionin e saj për të promovuar demokracinë, për të mbrojtur të drejtat e njeriut dhe për të avancuar interesat e shqiptarëve kudo që jetojnë.

LQShA qëndron fuqimisht në mbështetje të udhëheqësve dhe zyrtarëve publikë që mbrojnë interesat kombëtare shqiptare dhe kundërshton ata, veprimet e të cilëve i dëmtojnë këto interesa. Gjatë gjithë historisë sonë, ne kemi mbrojtur vazhdimisht sundimin e ligjit, lirinë e shprehjes dhe të drejtën e qytetarëve për të përcaktuar të ardhmen e vendit të tyre përmes mjeteve paqësore dhe demokratike.

Liga Qytetare po ndjek nga afër demonstratat paqësore dhe patriotike që po zhvillohen në mbarë Shqipërinë, ku qytetarët po kërkojnë dorëheqjen e Kryeministrit Edi Rama, duke kërkuar njëkohësisht më shumë llogaridhënie qeveritare, transparencë dhe reforma demokratike. Këto protesta nuk janë të drejtuara kundër investimeve legjitime amerikane apo të vendeve të tjera.

Bazuar në shumë raportime të besueshme, gjatë dymbëdhjetë viteve të fundit qeveria e Kryeministrit Rama ka funksionuar përmes një sistemi të korruptuar dhe jotransparent, i cili ka përdorur burimet e vendit për të përfituar vetëm oligarkë të caktuar vendas dhe ndërkombëtarë. Në të njëjtën kohë, një numër i madh i të rinjve shqiptarë janë detyruar të largohen nga vendi në kërkim të mundësive më të mira. Për më tepër, qeveria ka dështuar të mbrojë dhe të avancojë interesat kombëtare të Shqipërisë në rajon, duke nënshtruar elemente të politikës së saj të jashtme ndaj interesave të regjimit hegjemonist serb të udhëhequr nga Aleksandar Vučić.

Për më shumë se një muaj, rinia dhe shumica e popullit të Shqipërisë e kanë bërë të qartë se Shqipëria nuk është në shitje. Ata kanë humbur besimin te qeveria aktuale dhe nuk besojnë më se të njëjtët zyrtarë përgjegjës për gjendjen e tanishme janë në gjendje të sjellin reforma domethënëse. Ata po kërkojnë krijimin e një qeverie teknike të përkohshme, të përbërë nga profesionistë të respektuar dhe jopartiakë, e cila të udhëheqë vendin dhe ta përgatisë atë për zgjedhje të jashtëzakonshme brenda një viti.

Po ashtu, u bëjmë thirrje të gjitha palëve të refuzojnë dhunën dhe ekstremizmin në çdo formë, në mënyrë që kjo lëvizje të mbetet ajo që ka qenë që nga fillimi: një shprehje paqësore dhe demokratike e vullnetit të popullit. Gjithashtu, u kërkojmë me forcë organizatorëve të këtyre protestave të refuzojnë dhe të largojnë menjëherë çdo individ ose grup që ndjek agjenda të huaja ose ekstremiste dhe që mund të përpiqet të shfrytëzojë situatën për interesat e veta.
Së fundi, Liga Qytetare Shqiptaro-Amerikane i bën thirrje komunitetit ndërkombëtar të njohë shqetësimet legjitime të popullit të Shqipërisë dhe të mbështesë të drejtën e tij për të protestuar në mënyrë paqësore dhe për të kërkuar ndryshim demokratik përmes mjeteve të ligjshme dhe jodhunshme.

Bordi Ekzekutiv i Ligës Qytetare Shqiptaro-Amerikane

Sot mbahet protesta e 41-të qytetare kundër qeverisë, ku mijëra qytetarë pritet të mblidhen sërish në Tiranë për të kërkuar dorëheqjen e kryeministrit Edi Rama dhe ndryshimin e klasës së vjetër politike. Ashtu si në ditët e mëparshme, pjesëmarrësit do të grumbullohen fillimisht në Sheshin “Skënderbej”, për të marshuar më pas drejt godinës së Kryeministrisë, ku do të zhvillohet tubimi kryesor.

Protestuesit kërkojnë gjithashtu ndryshim të klasës politike shqiptare. Mes thirrjeve të dëgjuara gjatë marshimit kanë qenë edhe “Rama në burg, Berisha në burg”, duke shprehur pakënaqësi ndaj figurave kryesore të politikës.

Protesta cilësohet si më e madhe, më jetëgjatë dhe më e qëndrueshme që është zhvilluar në Shqipëri që pas rënies së regjimit komunist.

Tubimi nisi fillimisht si kundërshtim ndaj ndërtimit të një resorti në zonën e Zvernecit, por me kalimin e ditëve është zgjeruar, duke përfshirë edhe kërkesa më të gjera politike dhe sociale. Pjesëmarrësit kanë shprehur pakënaqësinë ndaj qeverisë, të cilën e akuzojnë për korrupsion. bw

Në ditën e 40-të të qëndresës qytetare përpara Kryeministrisë, eksperti i IT-së dhe aktivisti Genti Progni ka mbajtur një fjalim mjaft të ashpër dhe me tone të forta ironie ndaj reagimit të strukturave shtetërore përballë revoltës virtuale të qytetarëve.

Progni ka folur në lidhje me konferencën e fundit të Policisë së Shtetit, e cila sipas tij u mblodh në mënyrë qesharake vetëm sepse protestuesit po u ulin vlerësimet në Google (reviews) disa bizneseve të caktuara.

“Për herë të parë sot u ula në kompjuter të punoja, se kisha me merak review-t e këtyre hajdutëve që kanë vjedhur lekët tona dhe na shesin mend me hotele luksi. Po punoja për ato reviews me nga një yll. Dhe më dërguan mesazh, më thanë ka konferencë drejtori i policisë. Thashë shyqyr u arrestua Balluku, shyqyr kanë kapur Ergys Agasin, Ermal Beqirajn. Thashë shyqyr kanë kapur Ulsi Manjën, shyqyr kapën Mirlinda Karçajan… por çfarë të shihja, patronazhisti ishte merakosur për review në Google! Nuk e ndau, a është e dënueshme me një yll apo me dy yje? Ta dimë sa review t’iu japim”, ironizoi Progni mes të qeshurave dhe duartrokitjeve të turmës.

Në pjesën e dytë të fjalës së tij, aktivisti ka lëshuar një apel të fortë për të gjithë ata intelektualë apo figura që zgjedhin të flasin nëpër ekrane televizive, duke i ftuar të zbresin në rrugë pranë popullit dhe duke akuzuar hapur pronarë mediash për fshehje taksash dhe tendera korruptivë.

“Kam edhe një sugjerim. I shoh shumë intelektualë që flasin nëpër media, por ne nuk i shohim mediat. I shoh që flasin për kuvende, e takime, por ne nuk i shohim mediat. Hajdeni këtu në sheshin e burrave, t’iu dëgjojë populli. Nëse doni të na përfaqësoni hajdeni këtu”, u shpreh ai. bw