Gazetari Mentor Kikia sjell një analizë mbi rolin e LaCivita-s në fushatën elektorale të Partisë Demokratike në Shqipëri, duke vënë në dukje jo vetëm aspektin simbolik të pranisë së tij në krah të Berishës, por edhe atë strategjik.

I ftuar në emisionin e mëngjesit ‘Kafe Shqeto’ në SYRI TV, Kikia tha se në një kohë kur marrëdhëniet e Berishës me SHBA-të kanë qenë të tensionuara, prania e LaCivita-s bëri që ky koncept i thurur nga kundërshtarët e liderit të opozitës, ta rikthejë figurën e tij në një dritë më të favorshme ndërkombëtare.

Megjithatë, Kikia thotë se në vijim do të shohim rezultatet e LaCivita-s në zgjedhjet e 11 Majit, I cili pritet të sjellë realisht një frymë të re në fushatën elektorale shqiptare.

Mentor Kikia:  

LaCivita padyshim që është ftuar për të qenë strategu i fushatës. Të paduruar për të parë rezultatet ne në Shqipëri, mund të them që deri tani e kemi parë si partner politik edhe pse vetë LaCivita është kujdesur të pastrojë misionin e tij duke mos lënë keqkuptime sikur është i dërguari i qeverisë. Kjo nuk do të ishte e lejuar me ligj të ndërhynte në fushatën e një vendi tjetër, por është një konsulent. Në përgjithësi, konsulentët qëndrojnë në hije sepse partitë shqiptare kanë patur gjithmonë konsulent. Edhe qeveria ka patur konsulentë të vazhdueshëm të huaj, por ata qëndrojnë në hije dhe lëvizin fijet duke ndërtuar linjat, idetë, strategjitë sesi do të përparohet.

LaCivita është ngjitur në skenë bashkë me Berishën për shkak të një momenti specifik të Berishës vetë dhe Partisë Demokratike. Pas një marrëdhënie shumë të vështirë me administratën e Biden, Berisha kishte nevojë të rehabilitohej si figurë politike në raport me SHBA-të, ndaj i duhej me patjetër një figurë politike që jo thjesht të rrinte në hije por t’i dilte në ballë, siç LaCivita pranoi të ishte pjesë e tubimit, apo hapjes së fushatës, siç e shoqëroi atë në Itali apo në takimet e tjera elektorale e me gjasa do ta shoqërojë ende. Por, nuk e kemi parë ende si strateg, sepse në fushatën e PD deri më tani nuk kemi ende një element që mund të përbëjë ndryshimin e madh, madje edhe hapja e fushatës ishte një tubim klasik.

Deri tani kemi një fushatë tradicionale, nuk dimë nëse do të kemi surpriza për të parë qasje të reja inovative në një fushatë elektorale. Deri më tani, LaCivita i ka shërbyer si aleat politik Berishës për të hequr nga fjalori i mazhorancës shprehjen non-grata. Rama nuk e përdor më atë shprehje dhe gjithë lidershipi i PS nuk e ka në menunë e akuzave politike ndaj zotit Berisha. Pres të shikoj qasjet e reja.   sn