Sipas raportimit të korrespondentes së SYRI TV, Marsi Korreshi, nga Parku Olimpik ku po zhvillohet numërimi i votave të diasporës, deri tani janë hapur vetëm 87,032 zarfe nga gjithsej 194,889 që kanë mbërritur. Procesi po ecën me ritme të ngadalta dhe pritet të zgjasë për shkak të procedurave dhe ndërprerjeve gjatë natës. Deri tani raportohen 46940 vota për PS, dhe 24 771 vota për PD-ASHM.

Korreshi bën me dije se 53,000 vota të ardhura nga Greqia ende nuk janë hapur, pasi do të pritet përfundimi i numërimit të zarfave nga shtetet e tjera në të 12 qarqet e vendit. Sipas saj, Partia Demokratike ka paralajmëruar se do të kontestojë çdo votë të ardhur nga Greqia, për shkak të dyshimeve për manipulim, dhe kërkon që të vërtetohet nëse çdo votë i përket vërtet një qytetari të diasporës.

Ajo thekson gjithashtu se procesi nuk është i zakonshëm, pasi secila fletë votimi ndodhet brenda një zarfi A, i cili më pas është vendosur në një zarf B, duke e bërë numërimin më të ngadaltë. Sipas Korreshit, edhe fillimi i vonuar i numërimit në mëngjes, si dhe ndërprerja gjatë natës, kanë ndikuar në shtyrjen e afateve.

Deri tani, vetëm qarku i Kukësit ka përfunduar numërimin e votave për partitë politike, ndërkohë që në qarqet e tjera ende nuk është arritur as gjysma e zarfave të numëruara. Procesi për kandidatët nuk ka nisur ende.

Korreshi thekson rëndësinë e këtij procesi, pasi vota e diasporës mund të ndikojë në ndarjen e mandateve. Sipas saj, në qarkun e Tiranës, PD mund të marrë një mandat nga partia “Mundësia”, për shkak të rritjes së ndjeshme të votave të saj, ndërsa në Fier pritet një garë e ngushtë mes Partisë Socialiste dhe “Shqipëria Bëhet”, ku kjo e fundit mund të sigurojë një mandat nëse përforcohet nga votat e diasporës.

Marsi Korreshi:  Deri tani janë numëruar vetëm 87032 zarfe votimi nga diaspora, nga 194,889 zarfe që kanë ardhur gjithsej.

Vijohet me ritme të ulëta numërimi i tyre ndërkohë që, ashtu sikurse e thashë më herët, 53000 vota të Greqisë ende nuk janë hapur për t’u numëruar sepse do të pritet fillimisht përfundimi i të gjithë zarfave të ardhura nga shtete të tjera në 12 qarqe të vendit, dhe më pas do të vlerësohet se çfarë do të ndodhë pikërisht me votat e ardhura nga Greqia, nëse PD do të kontestojë çdo votë ashtu sikurse ka lajmëruar se për çdo votë të diasporës të ardhur nga Greqia, atje ku janë raportuar më së shumti probleme dhe ka dyshim për manipulim të procesit, do të kontestohet.
Dhe duhet, sipas Partisë Demokratike, që të vërtetohet nëse ajo votë i korrespondon pikërisht zgjedhësit nga jashtë dhe nuk ka dyshime që ajo mund të jetë manipuluar.

Mesa duket procesi i numërimit do të vazhdojë të zvarritet dhe të vonojë, duke marrë parasysh edhe ritmet e ngadalta.
I vetmi qark që ka përfunduar numërimin e votave për partitë politike pasi nuk ka nisur ende për kandidatët, është Kukësi, ndërkohë që në qarqe të tjera vijohet të numërohet dhe nuk kanë mbërritur as në gjysmën e numrit total të zarfave për çdo qark.
Gjithashtu, në të treja netët pa pasur një ndërprerje në mesnatë, për të filluar pastaj në orën 8, është numëruar, por numërimi ka filluar të paktën sot edhe dje në orën 10 të mëngjesit, kjo ka sjellë edhe vonesa.

Duke shtuar faktin se për votën e diasporës nuk është një numërim normal sepse duhet të hapen 2 zarfe, pasi fleta e votimit është e vendosur në zarf A, dhe zarf A i vendosur në zarfin B.

Po ndiqet mjaft me rëndësi pikërisht për faktin se vota e diasporës mund të ndryshojë edhe fatin e mandateve.

Për shembull në Tiranë PD mund t’i rrëmbejë një mandat partisë Mundësia, duke parë edhe qëndrimin e deritanishëm të paktën në qarkun e Tiranës, ku Partia Demokratike po rritet dhe po siguron më shumë vota, dhe kjo mund të sigurojë një mandat tjetër të PD, ndërkohë që në Fier kemi një përballje mes PS dhe Shqipëria Bëhet, ku Shqipëria Bëhet mund të marrë atje mandatin nëse do të sigurojë votat.

Përfaqësuesi ligjor i Partisë Demokratike, Marash Logu, në një deklaratë për mediat ditën e sotme, ka denoncuar një sërë shkeljesh të rënda të kryera nga ana e qeverisë dhe operatorit postar DHL, në lidhje me administrimin e zarfeve të ardhura nga Greqia për zgjedhjet.

Sipas tij, ky proces ka nisur me një shkelje flagrante të kushteve të kontratës mes KQZ-së dhe DHL-së, ku në kundërshtim të hapur me protokollin e sigurisë dhe klauzolat kontraktuale, shpërndarja dhe marrja në dorëzim e zarfeve është kryer nëpërmjet nënkontraktimit, një praktikë që kontrata ndalonte qartësisht.

Për më tepër, Logu denoncoi një rritje të papritur dhe të pajustifikueshme të numrit të zarfeve nga Greqia, duke ngritur dyshime serioze për manipulimin e votës së emigrantëve shqiptarë në këtë shtet.

Ai kërkoi transparencë të plotë nga KQZ-ja dhe verifikimin e çdo nënshkrimi për secilin prej 53 mijë zarfeve të ardhura nga Greqia, duke theksuar se çdo zarf që nuk është dorëzuar dhe marrë personalisht nga zgjedhësi, nuk duhet të përfshihet në procesin e numërimit apo vlerësimit të votës.

Deklarata:

Ajo që dua të theksoj fillimisht lidhet me zarfat e ardhur nga Greqia. Ka dy fakte që i dimë tashmë. Fakti i parë ka të bëjë me një shkelje flagrante nga ana e operatorit të shërbimit postar DHL, i cili kishte një kontratë me KQZ-në. Ky operator nuk ka kryer vetë procedurën e shpërndarjes dhe marrjes në dorëzim të zarfeve që vinin nga Greqia, por e ka bërë këtë nëpërmjet nënkontraktimit. Ndërkohë, në kontratë thuhet shprehimisht se nënkontraktimi nuk lejohet. Pra, i gjithë ky proces ka nisur me një shkelje të rëndë të kushteve kontraktuale nga ana e shërbimit postar.

Elementi i dytë, të cilit mund t’i referoheni edhe me shifra zyrtare të KQZ-së, është fakti se nga data 17.04.2025 deri më 04.05.2025 nga Greqia kanë ardhur vetëm 17 mijë zarfe, me një mesatare ditore prej rreth 100 zarfe në ditë. Më datë 04.05.2025, ka një deklaratë të z. Rama në Gjirokastër, ku ai shprehet se procesi i shpërndarjes së fletëve të votimit në Greqi ishte “mishmash”.

Pas kësaj deklarate, drejtuesi politik i PS-së, së bashku me grupe patronazhistësh, janë nisur drejt Greqisë. Ju i keni parë pamjet: në pika dhe qendra të caktuara të DHL-së në të gjithë Greqinë, patronazhistët e PS-së janë angazhuar në mënyrë të paautorizuar për marrjen e zarfeve që kishin shkuar për zgjedhësit shqiptarë. Këto zarfe janë marrë, janë plotësuar dhe janë dërguar më pas në Shqipëri.

Nga data 5 maj deri më 11 maj, pra për vetëm 6 ditë, kemi pasur 36 mijë zarfe të ardhur nga Greqia. Kjo anomali, në vlerësimin tonë, nuk mund të shpjegohet ndryshe veçse si rezultat i një manipulimi të votës së shtetasve shqiptarë që ndodhen në Greqi.

Sipas protokollit të sigurisë, çdo zarf duhet të merret personalisht nga zgjedhësi, të nënshkruhet dhe të dorëzohet me një dokument identifikimi të vlefshëm. Kjo nuk ka ndodhur. Ka video ku duket qartë se i njëjti person merrte qindra zarfe, i plotësonte, i dorëzonte dhe nuk identifikohej në asnjë moment.

Ne i kërkojmë KQZ-së që të vërë në dispozicion të gjitha nënshkrimet për 53 mijë zarfat e ardhur nga Greqia. Sepse, nëse nuk provohet që këta zgjedhës i kanë marrë personalisht dhe i kanë kthyer po ashtu personalisht përmes DHL-së, atëherë, në këtë rast, këto zarfe nuk mund t’i nënshtrohen as numërimit dhe as vlerësimit. sn

Kreu i KQZ, Ilirjan Celibashi e pranoi në daljen e sotme për mediat se procesi i shpërndarjes së fletëve të votimit për emigrantët shqiptarë, kryesisht në Greqi, nuk ka shkuar në mënyrën më të mirë të mundshme, edhe pse shërbimi postar u ofrua nga DHL.

Edhe pse pranoi se 21 mijë zarfe ende nuk kanë mbërritur në adresën e zgjedhësve për shkak se adresat kanë qenë të pasakta ose votuesit nuk janë paraqitur për t’i tërhequr pranë zyrave të DHL, Celibashi nënvizoi se është bërë një punë shumë e mirë në përgjithësi.

I pyetur nëse rrezikohet legjitimiteti i procesit të votimit të diasporës me problematikat e shfaqura, Celibashi tha se “nuk mund të vihet në dyshim integriteti”.

“Kemi një marrëdhënie kontraktuale me DHL, ashtu siç do marrëdhënie do të vlerësojmë në përfundim dhe do të ulemi me palën tjetër dhe do të shohim se sa e si e ka përmbushur atë shërbim. Është ekzaktësisht njësoj si çdo marrëdhënie tjetër kontraktuale. Është herët për të dhënë gjykime se si DHL ka kryer shërbimin kemi shënuar çdo gjë sipas problemit tonë dhe do diskutojmë kur të vijë momenti me kontraktorin. Kemi ndjekur me vëmendje të gjitha shqetësimet. Kemi marrë informacion edhe përmes rrjeteve sociale, ua kemi bërë me dije. Jam i bindur 100% dhe jashtë çdo lloj interesi që më së pari lidhet me atë se çka është bërë për realizimin e këtij procesi, por në mënyrë kategorike në vlerësimin dhe në gjykimin tim nuk mund të vihet në dyshim integriteti i procesit të votimit nga jashtë. Është proces tej modestisë, që nuk është realizuar në mënyrë prefekte dhe jo për shkaqe që lidhen me KQZ, por është një proces i realizuar, pa hezituar mund ta them, shumë mirë. Gjykuar nga numrat, gjithmonë. Pastaj gjithsecili mund të bëjë gjykimin e vetë. Ndoshta ne nuk jemi në terren, por nga ajo çka vjen këtu tek ne qoftë përmes partive politike, qoftë përmes zgjedhësve, assesi ky proces nuk mund të vihet në diskutim”, theksoi ai.

Celibashi po ashtu bëri me dije se deri më tani janë nisur nga KQZ mbi 240 mijë zarfe për votuesit jashtë vendit dhe janë shpërndarë në adresa mbi 220 mijë, ndërsa mbrapsht janë kthyer mbi 144 mijë zarfe. sn

Diaspora shqiptare ka qenë gjithmonë një pjesë jetike e shoqërisë dhe ekonomisë shqiptare, por në vitet e fundit, emigrantët kanë shfaqur një ndjenjë të fortë zhgënjimi dhe pakënaqësie ndaj qeverisjes së Edi Ramës, duke e shprehur këtë më së shumti në rrjetet sociale, sidomos në platformën TikTok.

Një valë e madhe reagimesh ka mbushur platformat e mediave sociale, ku emigrantët kanë shprehur hapur zemërimin për fjalët dhe sjelljen e kryeministrit Edi Rama ndaj tyre.

Emigrantët kanë shprehur hapur mbështetje për PD-në, duke parë tek ajo një mundësi për ndryshim dhe një alternativë më të mirë për Shqipërinë dhe për ata që kanë mbetur jashtë.

Përdorimi i gjuhës fyese dhe denigruese nga ana e tij ka shkaktuar një valë të madhe pakënaqësie. Edi Rama dhe qeveria e tij akuzohen si shkaktarë për largimin e tyre, gjuhën denigruese që po e përdor në këtë fushatë.

Në videot e publikuara, ata i bëjnë thirrje diasporës dhe qytetarëve shqiptar që të votojnë numrin ‘Një’, në 11-maji për një Shqipëri Madhështore. sn

Në rrjetet sociale ka nisur një valë e gjerë reagimi nga diaspora, të cilën kanë nisur procesin e votimit për 11-Majin, kundër Edi Ramës.

Në videot që po bëhen virale në rrjet, diaspora përveçse nuk ia ka harruar Ramës përzënien jashtë Shqipërisë, ka shprehur zemëratën edhe ndaj gjuhës vulgare e fyese që po përdor Rama në fushatën elektorale.
Në video vihet re qartë se diaspora ka regjistruar një pjesëmarrje të lartë dhe ka dhënë mbështetje të fuqishme për opozitën. Sipas videove që po bëhen virale në rrjet, shumica e shqiptarëve që jetojnë jashtë vendit kanë votuar për PD, dhe kjo tregon pakënaqësinë e tyre me qeverisjen aktuale. sn

Kandidati i PD në Qarkun e Dibrës që garon në zgjedhjet parlamentare të 11 majit, Përparim Spahiu ka denoncuar presionesh që, sipas tij, po ushtrohen mbi emigrantët dhe punonjësit në sektorin publik, për t’i detyruar të votojnë për partinë në pushtet. Në një postim në Facebook. Spahiu shkruan se qeveria po përdor frikën dhe varësinë ekonomike për të kontrolluar votën e qytetarëve.

Kandidati për deputet akuzon pushtetin aktual për krijimin e një “ushtrie të tërë të punësuarish” që, sipas tij, jo vetëm detyrohen të votojnë për partinë, por edhe të fotografojnë votën e tyre si provë bindjeje.

“Fotografimi i votës nuk ndihmon askënd, as atë që ta kërkon, as vendin. Ai që e bën këtë, bëhet skllav i një rroge të mjerë, shpesh vetëm 40 mijë lekë në muaj”, shkruan Spahiu.

Sipas tij, kjo praktikë është jo vetëm shkelje e parimeve demokratike, por edhe një formë moderne e shantazhit dhe nënshtrimit. Ai paralajmëroi se Shqipëria rrezikon të mbetet peng i një shteti që shtyp më të dobëtit dhe mban pushtetin përmes frikës.

“Frika se ‘do të na heqin pensionin’ nuk është demokraci. Është shantazh,” thekson ai.

Spahiu bën thirrje për votë të lirë dhe të ndërgjegjshme, duke theksuar se vetëm një ndryshim i vërtetë, me një ekonomi që vlerëson punën dhe dinjitetin, mund të nxjerrë vendin nga kjo situatë e zymtë.

“Vota e lirë është themeli i çdo shteti të drejtë. Pa të, nuk ka demokraci”, thotë ai.

Postimi i plotë në FB:
Emigrantët po votojnë!
Partia në pushtet ka vënë nën presion një ushtri të tërë të punësuarish, duke u kërkuar jo vetëm votën, por edhe provën e saj përmes fotografimit atyre.
Ju them se fotografimi i votës nuk ndihmon askënd — as atë që ta kërkon, as vendin. Ai që e bën këtë, bëhet skllav i një rroge të mjerë, shpesh vetëm 40 mijë lekë në muaj. Ky nuk është thjesht çmimi i një muaji, por çmimi i së ardhmes së Shqipërisë.
Të fotografosh votën nuk është ndihmë. Është dorëzim. Është mbështetje për ata që sot të shtrëngojnë dorën dhe nesër të harrojnë.
Kur vota jepet nga frika, shpresa shuhet. Dhe sa herë ndodh kjo, Shqipëria mbetet peng i një shteti me paga të ulëta, me pak mundësi dhe me presion të vazhdueshëm mbi më të dobëtit – ata që marrin ndihmë ekonomike apo pensionistët. Frika se “do të na heqin pensionin” nuk është demokraci. Është shantazh.
Shqipërisë i duhet një ndryshim i vërtetë. Një ekonomi që vlerëson punën, jo nënshtrimin. Paga me dinjitet dhe investime që sjellin zhvillim – jo thjesht mënyra për të mbajtur një pushtet të kalbur në këmbë.
Votoni të lirë. Votoni sipas ndërgjegjes. Votoni për të ndryshuar këtë realitet të zymtë që e ka zënë Shqipërinë për fyti.
Vota e lirë është themeli i çdo shteti të drejtë. Pa të, nuk ka demokraci. sn

Kryetar i PD-së, Sali Berisha i ka bërë thirrje diasporës që të refuzojë fotografimin e votës për zgjedhjet e 11 majit.

‘Refuzoni fotografimin e votës. Votoni ndryshimin për tu ndarë nga e keqja që po zbraz Shqipërinë’, theksoi Berisha në fund të fjalës së tij me banorët e Njësisë Nr. 15 në Tiranë.

Berisha: Klani i tij, rrethi i tij familjar, është një rreth hajdutësh. Baxhanaku i tij ka fituar 80-100 tendera që ai që quhet AKSH-i. Është një agjenci që merret me digjitalizimin dhe ka zhdukur qindra milionë euro.

Del tjetri duke folur, jo Linda po ndërhyn tek AKSH, për kunatin ajo. Prokurori e ka, guxon ai të thërrasë Lindën? Në asnjë mënyrë se janë paratë e familjes.

Pra, nëse vidhet në këtë mënyrë nuk ngelet gjë për fshatin, për pensionistët, për të sëmurët.

A e dini se në     ç’gjendje e rëndë është problemi i ilaçeve sot. Sot farmacitë tona janë të mbushura me ilaçe të skaduara dhe të vjen keq se, shumica e atyre që kanë një mundësi, gjënë e parë që u kërkojnë njerëzve të tyre jashtë, janë ilaçet.

Kjo do marrë fund.

Tom Doshit dhe Vilma Nushit, dy vampirëve të vërtetë të shëndetit të shqiptarëve do u vihet dylli dhe do bëhen përgjegjës për të gjithë atë që kanë krijuar në shëndetin e njerëzve.

Ne e kuptojmë se ‘Shqipëria Madhështore’ nuk është vetëm dëshmia e dhembshurisë.

Është Shqipëria që prodhon dhe ky prodhim, ju jeni njerëzit që prodhoni. Do bëjmë gjithçka që ju të prodhoni sa më shumë dhe sa më mirë.

Do bëjmë të gjitha kushtet, ekstensionin do e keni falas. Do zgjidhim çdo problem që e keni me pronësinë. Të gjitha lejet e legalizimeve do shndërrohen në tapi legalizimi njëherë e përgjithmonë.

Ju bëj thirrje në emër tuaj, të gjithë vëllezërve në diasporë, të cilët po nisin votimin, të votojnë për ndryshimin, të votojnë këtë vit, që është viti i tyre për tu ndarë me këtë të keqe të madhe, që po e zbraz dhe po e shkreton Shqipërinë.

Ju bëj thirrje, refuzoni dhe mos bëni asnjë fotografi të votës tuaja, sepse ju duhet të jeni qytetarë të mirë të vendeve ku jetoni. Dhe në vendet ku jetoni dënohet me ligj fotografimi i votës.

Prandaj mos zbatoni kodin dhe kërkesën e këtyre mafiozëve të cilët duan të ju kontrollojnë vullnetin tuaj, qëndroni njerëz të lirë, shqiptarë dinjitozë dhe votoni për ndryshimin.

Votoni me 11 maj për të përmbushur atë mision historik që u ka rënë gjeneratës tuaj, përmbysjen e një diktature të dytë.

Miqtë e mi!

Që të gjithë ne në këtë fushatë, mbi të gjitha jemi misionarë.

Secili prej jush me votën tuaj, jeni misionarë për të shpëtuar Shqipërinë nga ky rrënim, nga ky pakësim i frikshëm, nga ky shpopullim dhe varfërim

Sali Berisha është një misionar, është njëri prej jush.

Kam marrë këtë mision me vendosmërinë më të madhe, jo për pushtet, absolutisht, as për para. Por kam marrë këtë mision së bashku me ju, për të patur një të ardhme tjetër të re, për ata djem e vajza që janë këtu, që ata të qëndrojnë këtu. Që këta të qëndrojnë këtu.

Ëndërrën e tyre shqiptare ta ndërtojnë në Shqipëri dhe të mos e eksportojnë në dhena të tjera.

Shqipëria është vendi më i bekuar, ka pasuritë më të mëdha, ka potencialet më të mëdha, ndaj le të firmosim me 11 maj ndryshimin në mënyrë që të hapim një kohë tjetër, kohë shprese, besimi, mirëqënie punësimi.

Ju garantoj ju, se rritja e rrogave dhe pensioneve, dalja jonë në krye për rroga e pensione mes vendeve të rajonit, është qëllimi i parë dhe kryesor që do realizohet.

Faleminderit shumë.

sn