Gëzuar dhe me fat Vitin e Ri 2026 të gjithë shqiptarëve në atdheun tonë, në mbarë hapësirën tonë kombëtare në Shqipëri, Kosovë, Maqedoninë e Veriut, Malin e Zi, Luginën e Preshevës e tjerë, si dhe në mbarë Botën, kudo që ndodhen shqiptarët.

.

Më shumë se kurrë, në këtë fillimshekulli XXI, gjeopolitikat na kanë ndarë në Ballkan dhe fati na ka hedhur nëpër të gjitha paralelet dhe meridianet e globit, kudo në kërkim të një të sotmeje dhe të ardhmeje sa më të mirë, sa më paqësore, sa më të ndritshme për ne dhe për brezat.

.

Ndërrimi i viteve, kur urimet shkëmbehen pa përfillur largësitë, pa përfillur ndryshimet apo përkatësitë tona, na bën ne më të afërm në ndjeshmëritë tona. E përbashkëta e tyre është se ne shqiptarët e duam paqen ndoshta më shumë se të gjithë kombet e tjera, e duam përparimin, e duam harmoninë, prandaj trishtimin dhe gëzimin e kemi gjithnjë e më të përbashkët kudo që ndodhemi.

.

Pas një viti zgjedhor të paparë 2025, Kosova na solli një lajm tejet të gëzueshëm: falë votës së 28 dhjetorit, paraprirë nga një tjetër proces zgjedhor i përkryer, tashmë rruga është plotësisht e hapur që vendi të ndërtojë institucione të qëndrueshme dhe qeverisje sa më funksionale. Edhe një herë, me këto zgjedhje, Kosova e dëshmoi veten si shoqëria ndër më demokratiket në mbarë Evropën dhe Perëndimin. Ne shqiptarët, kudo që ndodhemi, kemi të drejtë të krenohemi për këtë.

.

Dhe kemi të drejtë të shpresojmë që shembulli i Kosovës të ndriçojë Shqipërinë, të ndriçojë shqiptarët e Shqipërisë, kudo që ndodhen, për të ndërtuar në vendin e tyre një shoqëri demokratike të denjë për integrimet evropiane dhe perëndimore.

.

Shpresojmë dhe i lutemi Zotit që Kosova më 2026 të bëjë një hap vendimtar të anëtarësimit në NATO. Shpresojmë dhe i lutemi Zotit që Shqipëria të përparojë drejt demokracisë dhe të bëjë një hap vendimtar të anëtarësimit në BE. Shpresojmë dhe i lutemi Zotit që shqiptarët në Maqedoninë e Veriut të përparojnë në afirmimin e mëtejshëm kombëtar shteformues. Shpresojmë dhe i lutemi Zotit që shqiptarët në Mal të Zi, Luginën e Preshevës e tjerë të fitojnë të drejtat e tyre kombëtare dhe njerëzore dhe t’iu jepet fund diskrimimineve kombëtare e njerëzore që ata përjetojnë. Shpresojmë dhe i lutemi Zotit që, nën shembullin e Diasporës së Kosovës, të gjithë shqiptarët në Botë të jenë shumë më të lidhur me fatet e Atdheut.

.

Këtë na e detyron të gjithëve trashëgimia që la viti 2025 në vendet tona, në rajon, në kontinent dhe në Botë. Vetëm duke qenë thellësisht të vetëdijësuar për gjithçka që po ndodh në Botë, veçanërisht në Evropë, ne do të jemi më 2026 e në vijim, më shumë se kurrë, në lartësinë e idealeve tona dhe të përmbushjeve tona si evropianë dhe si shqiptarë!

.

Edhe në shpresë, edhe në lutje, edhe në vendimet tona dhe veprimet tona ne shqiptarët të  jemi më të bashkuar dhe më të njëzëshëm se kurrë!

.

Kjo është lutja që ne, botuesit e VOAL, bashkë me ju ia bëjmë Zotit për këtë Vit të Ri 2026.

.

Gëzuar dhe me shumë fat, për herë më të bashkuar, të dashur bashkëkombas!

.

Elida Buçpapaj dhe Skënder Buçpapaj

.

Botuesit e Voal.ch