SHBA thuhet se u ka kërkuar aleatëve të saj në Paqësor të përgatiten për një konflikt të mundshëm me Kinën për shkak të Tajvanit, ndërsa Japonia paralajmëron për një ‘epokë të re krize’ dhe Pekini duket se po rrit ndjeshëm investimet në teknologjitë ushtarake.

Kina e sheh Tajvanin si një provincë të shkëputur dhe pretendon sovranitet mbi të, pavarësisht se ishulli ka një qeveri demokratike të pavarur, e njohur gjerësisht në botë.

Tensionet janë rritur që nga fundi i vitit 2020 për shkak të asaj që quhet “taktika gri” nga Kina, përfshirë stërvitje ushtarake të intensifikuara pranë Tajvanit dhe shtim të pranisë së aeroplanëve dhe anijeve luftarake kineze në atë zonë. Ndërkohë, një hartë tronditëse ka treguar 10 vendet më të sigurta për të ikur në rast të një Lufte të Tretë Botërore bërthamore.

Ndërsa SHBA tradicionalisht ka mbështetur Tajvanin në mënyrë ushtarake, ekonomike dhe diplomatike, ky qëndrim është luhatur gjatë presidencës së Donald Trump-it.

Një raport i fundit nga Financial Times sugjeron se SHBA mbetet e përkushtuar për ta mbrojtur Tajvanin, por tani pret që aleatët rajonalë si Japonia dhe Australia të jenë të gatshëm të ndajnë barrën në rast konflikti, shkruan Mirror US.

SHBA po i nxit këto shtete të rrisin shpenzimet ushtarake si kundërpeshë ndaj çdo veprimi agresiv të mundshëm nga Kina.

Një zyrtar amerikan i paidentifikuar theksoi: “Ne nuk kërkojmë luftë. As nuk synojmë të dominojmë vetë Kinën. Ajo që po bëjmë është të sigurojmë që SHBA dhe aleatët e saj të kenë forcën e duhur ushtarake për të mbështetur diplomacinë dhe garantuar paqen.

“Po u drejtohemi aleatëve tanë në Indo-Paqësor, në mënyrë të ngjashme me atë që presidenti bëri në Europë, dhe po themi: kjo është situata e kërcënimit.

“Sigurisht, disa prej këtyre bisedave janë të vështira, përfshirë ato për shpenzimet e mbrojtjes. Por ne besojmë se do të na çojë të gjithëve në një pozitë më të mirë.”

Këtë javë, Japonia dha paralajmërime të ashpra për shkak të përshkallëzimit të shpejtë të veprimeve ushtarake kineze në territore të gjera që shtrihen nga brigjet jugperëndimore të saj deri në Paqësor, duke i cilësuar këto veprime si sfidën strategjike më të madhe.

Bashkëpunimi në rritje mes Pekinit dhe Rusisë gjithashtu përbën një rrezik serioz sigurie për Japoninë, përveç tensioneve në rritje për Tajvanin dhe kërcënimeve nga Koreja e Veriut, sipas raportit vjetor të Ministrisë së Mbrojtjes që iu paraqit Kabinetit të martën.

“Shoqëria ndërkombëtare ndodhet në një epokë të re krize, duke u përballur me sfidat më të mëdha që nga fundi i Luftës së Dytë Botërore,” thuhet në dokument, që thekson ndryshime të mëdha në strukturën e fuqisë globale dhe shpreh shqetësim për konkurrencën në rritje mes SHBA-së dhe Kinës. / The Express – Syri.net

Mes paralajmërimeve për një konflikt të mundshëm të madh me Rusinë, Gjermania do të presë një nga stërvitjet ushtarake më të rëndësishme të NATO-s në vitet e fundit, në fund të shtatorit.

Hamburgu do të presë “Red Storm Bravo” nga 25 deri më 27 shtator, një stërvitje tre-ditore, ditë e natë, që simulon reagimin e shpejtë të Aleancës ndaj një sulmi të mundshëm rus në krahun lindor të NATO-s.

Disa vlerësime thonë se deri në 800,000 njerëz do të marrin pjesë në stërvitje. Ushtarët do të praktikojnë lëvizjen e trupave nëpër qytet, duke ofruar ndihmë mjekësore dhe duke evakuuar të plagosurit në kushte reale. Rrugët e Hamburgut do të mbushen me konvoje ushtarake, automjete transporti, spitale të lëvizshme dhe helikopterë, ndërsa qyteti do të luajë një rol kyç si një qendër logjistike në rast të një konflikti.

“Kërcënimi është real. Ne tashmë po shohim sulme ndaj infrastrukturës sonë”, paralajmëron Kapiteni i Bundesehr-it Kurt Leonards, duke përmendur raste të sabotimit industrial, spiunazhit dhe vrasjeve të planifikuara.

I vendosur në Gjermaninë veriore, Hamburgu ka një nga portet më të mëdha në Evropë, një infrastrukturë të zhvilluar transporti dhe qasje të drejtpërdrejtë në rrugët baltike. Në rast lufte, ai do të bëhej porta kryesore për furnizimet dhe vendosjen e forcave aleate në Poloni dhe shtetet Baltike. Afërsia e tij me Skandinavinë dhe Evropën Lindore e bën atë një pikë kyçe për reagimin e shpejtë ushtarak të NATO-s.

Një raport i ri i Bundesehr-it thotë konkretisht se Rusia nën Vladimir Putinin po përgatitet për luftë kundër NATO-s. Presidenti lituanez Gitanas Nausëda paralajmëron se një sulm i ri rus mund të ndodhë brenda 4-5 vitesh, ndërsa komuniteti i inteligjencës lituaneze vlerëson se Rusia përfaqëson një kërcënim afatgjatë për sigurinë e të gjithë Aleancës së Atlantikut të Veriut.

Në të njëjtën kohë, jeta e përditshme në Gjermani po ndryshon. Industria ushtarake po shënon të ardhura rekord, me Rheinmetall që pritet të gjenerojë një xhiro prej 10 miliardë eurosh në vitin 2024. Gjithnjë e më shumë studime shkencore po shqyrtojnë skenarë për shpërthimin e Luftës së Tretë Botërore, ndërsa qytetarët po përjetojnë një ndjenjë gjithnjë e më të theksuar pasigurie dhe frike, raporton Spiegel.

Thirrjet në linjën e ndihmës psikologjike të Gjermanisë arritën në 1.3 milion vitin e kaluar, shumë prej të cilave përmendën luftën dhe paqëndrueshmërinë globale si burim ankthi. Disa po përgatiten për më të keqen, të tjerë po ikin nga vendi dhe të tjerë po u kërkojnë politikanëve të sigurojnë paqen ndërsa ka ende kohë.

Hamburgu do të bëhet skena e ushtrimeve ushtarake në vjeshtë, por edhe një simbol i një realiteti të ri në të cilin Gjermania duket gjithnjë e më shumë si një vend që beson se lufta është një e kaluar e largët. Kolonat ushtarake, paralajmërimet për kërcënime dhe frika midis qytetarëve thonë një gjë: koha e sigurisë që merrej si e mirëqenë po kalon ngadalë në histori. sn

Zyra e Kombeve të Bashkuara për të drejtat e njeriut tha të premten se i ka regjistruar të paktën 798 vrasje gjatë gjashtë javëve të fundit në pikat e shpërndarjes së ndihmave në Rripin e Gazës.

Ajo tha se vrasjet kanë ndodhur në pikat që menaxhohen nga Fondacioni Humanitar i Gazës (GHF), i mbështetur nga SHBA dhe Izraeli, si dhe pranë autokolonave të drejtuara nga organizata të tjera ndihmash.

GHF-ja përdor kompani private amerikane të sigurisë dhe logjistikës për të sjellë furnizime në Gazë, duke anashkaluar sistemin e udhëhequr nga OKB-ja, për të cilin Izraeli pretendon se është shfrytëzuar nga militantët e udhëhequr nga Hamasi për t’i plaçkitur ndihmat e destinuara për civilët.

Hamasi – i cili është i shpallur organizatë terroriste nga SHBA dhe BE – i mohon akuzat e Izraelit.

Pas vrasjes së qindra civilëve palestinezë që përpiqeshin të arrinin te pikat e ndihmës së GHF-së në zona ku operojnë forcat izraelite, Kombet e Bashkuara e cilësuan këtë model ndihme “thellësisht të pasigurt” dhe në kundërshtim me standardet e paanshmërisë humanitare.

“(Nga 27 maji) deri më 7 korrik, kemi regjistruar 798 vrasje, përfshirë 615 pranë pikave të Fondacionit Humanitar të Gazës dhe 183, me shumë gjasë, përgjatë rrugëve të autokolonave të ndihmës”, tha zëdhënësja e zyrës së OKB-së (OHCHR), Ravina Shamdasani, në një konferencë për shtyp në Gjenevë.

GHF-ja, që filloi të shpërndante paketa ushqimore në Gazë në fund të majit pasi Izraeli hoqi një bllokadë 11-javore të ndihmës, i tha Reutersit se shifrat e OKB-së janë “të rrejshme dhe çorientuese”.

Ajo e mohon se incidente vdekjeprurëse kanë ndodhur në pikat e saj shpërndarëse.

“Fakti është se sulmet më vdekjeprurëse në vendet e ndihmës kanë qenë të lidhura me autokolona të OKB-së”, tha një zëdhënës i GHF-së.

“Zgjidhja përfundimtare është më shumë ndihma. Nëse OKB-ja dhe organizata të tjera humanitare do të bashkëpunonin me ne, ne mund t’i ndalonim ose t’i pakësonim ndjeshëm këto incidente të dhunshme”, tha ai.

Ushtria izraelite i tha Reutersit se është duke e hetuar numrin e madh të viktimave dhe se ka ndërmarrë hapa për t’i minimizuar përplasjet mes palestinezëve dhe Forcave të Mbrojtjes së Izraelit (IDF), duke vendosur gardhe, tabela paralajmëruese dhe hapur rrugë shtesë.

OHCHR-ja tha se shifrat e saj bazohen në burime si informacione nga spitalet në Gazë, varrezat, familjet, autoritetet shëndetësore palestineze, OJQ-të dhe partnerët e saj në terren.

Shumica e plagëve të palestinezëve pranë pikave të shpërndarjes së ndihmës të regjistruara nga OHCHR që nga 27 maji ishin plagë nga armë zjarri, tha Shamdasani.

“Ne kemi ngritur shqetësime për krime mizore që mund të jenë kryer dhe për rrezikun që krime të tjera mizore të ndodhin aty ku njerëzit po presin në radhë për ndihma jetike si ushqimi”, tha ajo.

Izraeli ka deklaruar se forcat e tij veprojnë pranë vendeve të ndihmës për të parandaluar që furnizimet të bien në duart e militantëve me të cilët është në luftë që nga sulmi i udhëhequr nga Hamasi më 7 tetor 2023.

Një sulm ajror izraelit ka goditur palestinezë pranë një qendre mjekësore në Rripin e Gazës të enjten, duke i vrarë 10 fëmijë dhe gjashtë të rritur, sipas zyrtarëve shëndetësorë.

Sulmi ndodhi në një kohë kur nuk duket se do të arrihet së shpejti ndonjë marrëveshje në bisedimet për armëpushim që janë duke u zhvilluar.

Pamjet e verifikuara nga sulmi në Deir al-Balah, në pjesën qendrore të Rripit të Gazës, shfaqin trupat e grave dhe fëmijëve të shtrirë në pellgje gjaku, raporton Reuters.

Një video tjetër shfaq disa fëmijë të palëvizshëm të shtrirë mbi një karrocë gomari.

“Ajo nuk bëri asgjë, ishte e pafajshme, betohem. Ëndrra e saj ishte që lufta të përfundonte dhe që ata të njoftonin sot, në mënyrë që ajo të kthehej në shkollë”, tha Samah al-Nouri, duke qëndruar pranë trupit të vajzës së saj që u vra në sulm.

“Ajo thjesht po merrte trajtim në një qendër mjekësore. Pse i vranë?” tha ajo.

Ushtria izraelite tha se e goditi një militant që kishte marrë pjesë në sulmin e udhëhequr nga Hamasi më 7 tetor 2023 në Izrael, i cili e shkaktoi fillimin e luftës në Gazë.

Hamasi është organizatë e shpallur terroriste nga Shtetet e Bashkuara dhe fuqitë e tjera.

Ushtria izraelite shtoi se është në dijeni të raportimeve për kalimtarë të plagosur dhe theksoi se po e heton këtë incident.

Sulmi me raketë në Deir al-Balah ndodhi ndërsa negociatorët izraelitë dhe të Hamasit po zhvillonin bisedime me ndërmjetësit në Katar për një marrëveshje të propozuar për armëpushim 60-ditor dhe për lirimin e pengjeve.

Një zyrtar i lartë izraelit tha të mërkurën se nuk pritej arritja e ndonjë marrëveshjeje për të paktën një ose dy javë, megjithatë sekretari amerikan i Shtetit, Marco Rubio, tha të enjten se është shpresëplotë për një marrëveshje.

“Mendoj se jemi më pranë, ndoshta më afër se sa kemi qenë prej kohësh”, tha Rubio për gazetarët në samitin e ASEAN-it në Malajzi.

Në disa runde bisedimesh indirekte mes Izraelit dhe grupit militant palestinez Hamas nuk është arritur ndonjë përparim që nga rifillimi i fushatës ushtarake izraelite në mars, pas një armëpushimi të mëparshëm.

Sulmet e përsëritura nga forcat izraelite javët e fundit kanë vrarë qindra banorë të Gazës, shumë prej tyre civilë, dhe kanë plagosur mijëra të tjerë, sipas autoriteteve lokale shëndetësore.

Presidenti amerikan, Donald Trump, u takua këtë javë me kryeministrin izraelit, Benjamin Netanyahu, për të diskutuar situatën në Gazë.

Zyrtari izraelit që ishte në Uashington me Netanyahun tha se, nëse të dyja palët pajtohen për planin e armëpushimit, Izraeli do ta përdorte atë periudhë për të ofruar një marrëveshje për paqe të përhershme që do të kërkonte çarmatosjen e Hamasit.

Nëse Hamasi refuzon, “ne do të vazhdojmë” me operacionet ushtarake në Gazë, tha zyrtari në kushte anonimiteti.

Një zyrtar palestinez tha se bisedimet në Katar janë në krizë dhe se çështjet e diskutueshme, përfshirë nëse Izraeli do të vazhdojë të pushtojë pjesë të Gazës pas një armëpushimi, nuk janë zgjidhur ende.

Lufta nisi pasi Hamasi sulmoi Izraelin më 7 tetor 2023, duke vrarë rreth 1.200 njerëz dhe duke marrë peng 251 të tjerë.

Shumica e pengjeve janë liruar gjatë armëpushimeve të mëparshme.

Ofensiva e Izraelit në Gazë ka vrarë më shumë se 57.000 palestinezë, mbi gjysma e tyre gra dhe fëmijë, sipas Ministrisë së Shëndetësisë në Gazë.

BILD

Zbulim spektakolar në SHBA: Stacioni televiziv amerikan CNN publikoi një regjistrim audio ku Donald Trump tregon sesi i kishte kërcënuar diktatorin rus Vladimir Putin se do ta bombardonte Moskën.

Trump thuhet ta ketë thënë këtë gjatë një takimi me donatorë në fushatën zgjedhore për 2024.

Në regjistrim, Trump thotë: “Putinit i thashë: ‘Nëse ti pushton Ukrainën, do të bombardoj Moskën deri në themel. Po të them, nuk kam tjetër zgjidhje.’”

Trump vijon: “Dhe pastaj [Putin] tha diçka si: ‘Nuk të besoj.’ Por më besoi për 10 përqind.”

Gjithashtu, Trump tha se kishte paralajmëruar me fjalë të ngjashme edhe presidentin e Kinës, Xi Jinping, për një pushtim në Tajvan. Ai kërcënoi se, në atë rast, do të bombardonte Pekinin. “Ai më konsideronte të çmendur,” tha Trump për Xi, dhe shtoi: “Por ne nuk patëm kurrë ndonjë problem.”

“Ai pyeti: ‘Pekinin?’ Unë i thashë: ‘Nuk kam zgjidhje. Duhet t’ju bombardoj,’” tregoi Trump për bisedën me Xi.

Ai theksoi se mjafton që kërcënimet të jenë besueshme vetëm 5 apo 10 përqind për të parandaluar luftërat.

Regjistrimet u bënë në vitin 2024, kur Donald Trump, atëherë ish-president dhe kandidat i republikanëve në zgjedhjet presidenciale, ishte në fushatë. Ato duket se i referohen bisedave që Trump pati si president gjatë mandatit të tij të parë (2017-2021) me udhëheqës të tjerë shtetërorë.

Trump përsërit shpesh se Putini nuk do të kishte pushtuar Ukrainën nëse ai do të ishte president, dhe i bën fajtor paraardhësin e tij, Joe Biden, për luftën.

Përpjekjet e Trump për të arritur një armëpushim apo paqe midis agresorit Rusi dhe Ukrainës deri tani kanë dështuar. Ai gjithashtu refuzon të ashpërsojë sanksionet ndaj Rusisë apo të ushtrojë presion tjetër.

Së fundmi, Trump është shprehur gjithnjë e më i frustruar ndaj diktatorit rus Vladimir Putin. Kremlini po i shërben SHBA-së “një tufë gënjeshtrash”, tha presidenti amerikan. “Nuk jam i kënaqur me Putinin,” tha ai gjatë një mbledhjeje të kabinetit. “Jam shumë i pakënaqur me të.” sn

Sekretari i Jashtëm Britanik, David Lammy, tha të martën se Mbretëria e Bashkuar është e gatshme të vendosë sanksione shtesë ndaj Izraelit nëse një armëpushim në Rripin e Gazës nuk sigurohet brenda disa javësh.

Lammy i tha Komitetit të Punëve të Jashtme të Dhomës së Komunave se qeveria do të “shkojë më tej” në ndërmarrjen e veprimeve kundër Izraelit nëse situata humanitare në Gaza vazhdon të përkeqësohet.

“Nëse nuk e arrijmë armëpushimin për të cilin të gjithë lutemi në javët e ardhshme… a do të shkojë qeveria më tej për të marrë masa kundër Izraelit?” pyeti deputeti laburist Alex Ballinger.

“Po, do ta bëjmë,” u përgjigj Lammy.

Komentet e Lammy-t vijnë pas një lëvizjeje të koordinuar sanksionesh muajin e kaluar nga Mbretëria e Bashkuar, Australia, Kanadaja, Zelanda e Re dhe Norvegjia, që shënjestruan ministrat izraelitë Itamar Ben-Gvir dhe Bezalel Smotrich për atë që Londra e përshkroi si “shkelje të shëmtuara” të të drejtave të njeriut në Gaza, raportoi The Independent.

Sanksionet përfshinin ndalime udhëtimi dhe ngrirje të aseteve.

Ndërsa Mbretëria e Bashkuar është vënë nën presion në rritje, përfshirë nga figura të larta të Partisë Laburiste dhe sindikata, për të njohur zyrtarisht shtetësinë palestineze, Lammy nuk pranoi të zotohej për një afat kohor specifik.

“Nuk do ta lidh veten me një kalendar sepse është i përshtatshëm për një fragment kronik”, tha ai, duke shtuar se negociatat për armëpushim janë delikate dhe çdo veprim njohjeje duhet të vlerësohet në bazë të faktit nëse sjell ndryshime domethënëse në terren.

Ai vuri në dukje se pavarësisht njohjes ndërkombëtare në rritje të Palestinës, përfshirë nga vende të tilla si Irlanda, Spanja dhe Norvegjia, “ajo që kemi parë është aneksim i mëtejshëm në Bregun Perëndimor”, duke sugjeruar se vetëm njohja nuk ka çuar përpara përpjekjet për paqe.SN

BILD

Sulm kinez ndaj avionit gjerman! Qeveria gjermane thërret ambasadorin kinez në Ministrinë e Jashtme!

“Ushtarakët kinezë kanë përdorur lazer ndaj një avioni gjerman në operacionin ASPIDES të BE,” shkruan Ministria e Jashtme në X. “Kërcënimi i jetës së stafit gjerman dhe ndërprerja e misionit janë krejtësisht të papranueshme. Ambasadori kinez është thirrur sot në Ministrinë e Jashtme”.

BILD mësoi nga burime të sigurisë: Nuk është sulmi i parë i Kinës. Ushtria kineze ka përdorur herë pas here lazer ndaj avionëve perëndimorë, duke verbuar pilotët dhe duke prishur elektronikën në avionë.

Që në vitin 2018, nga një bazë ushtarake kineze në Xhibuti dyshohet se janë përdorur lazerë ndaj avionëve ushtarakë amerikanë – disa pilotë u lënduan lehtë. SHBA protestoi zyrtarisht, ndërsa Kina mohoi akuzat.

Këta lazerë “verbues” nuk përdoren për kapjen e objektivit dhe për të lëshuar raketa më pas. Sipas burimeve të sigurisë, ata shërbejnë vetëm për të penguar avionët.

Nga burime diplomatike gjermane, BILD mësoi se takimi me ambasadorin kinez në Berlin u zhvillua të martën në mëngjes.

“Nuk pranojmë që ushtarët gjermanë të rrezikohen. Veprimi kinez ishte krejtësisht i papranueshëm”, thanë për BILD. Kjo i është bërë “krejtësisht e qartë ambasadorit sot”.

Operacioni ASPIDES (nga greqishtja “Mburoja”) është një mision ushtarak detar i BE-së që prej vitit 2024.

Qëllimi: sigurimi i rrugëve të lira detare për anijet – në Detin e Kuq, Gjirin e Adenit, Detin Arabik, Gjirin e Omanit dhe Gjirin Persik.

Forcat e Armatosura gjermane marrin pjesë në këtë mision të BE-së në Detin e Kuq, përfshirë fluturime të rregullta për mbikëqyrje ajrore të hapësirës detare. sn