Avokatja Adriana Kalaja deklaroi sot se Prokuroria e Përgjithshme ka konfirmuar zyrtarisht vërtetësinë e dokumenteve që provojnë dënimin penal dhe dëbimin nga Greqia të gjyqtares së GJKKO, Irena Gjoka.

Sipas avokates Kalaja, e cila i referohet një komunikimi zyrtar me Prokurorinë e Përgjithshme, autoritetet shqiptare në bashkëpunim me ato greke kanë verifikuar se vendimi i dënimit penal në shtetin fqinj për gjyqtaren që ajo e cilëson si “gjyqtarja me disa mbiemra”, është autentik.

Ky konfirmim, vërteton akuzat e ngritura prej kohësh se gjyqtarja Gjoka nuk plotëson kriteret ligjore për të ushtruar funksionin e saj, pasi dyshohet se ka fshehur këtë dënim dhe dëbim duke përdorur identitete të ndryshme në formularët e dekriminalizimit dhe vetingut.

Kalaja theksoi se pavarësisht konfirmimit të dënimit, institucionet e drejtësisë si Prokuroria e Përgjithshme dhe SPAK po tentojnë të mbyllin çështjen ose të shmangin hetimin e thelluar.

Ajo ngriti alarmin se hetimet për figurën e gjyqtares janë mbyllur pa u vënë në dijeni ajo si kallëzuese, duke e cilësuar këtë si një përpjekje për të amnistuar gjyqtaren për shkak të shërbimeve politike ndaj mazhorancës, veçanërisht në proceset kundër liderëve të opozitës.

Avokatja paralajmëroi se disponon prova për dy dëbime të Irena Gjokës nga Greqia dhe se gjyqtarja ka autorizuar një avokat grek për t’i fshirë këto dënime, fakt që sipas Kalasë tregon se ajo ishte në dijeni të plotë të statusit të saj ligjor.

Kalaja bëri të ditur se ka depozituar kallëzime penale shtesë, përfshirë edhe ndaj Ministrit të Drejtësisë, Ulsi Manja, për shkak të veprimeve që ajo i konsideron si shpërdorim detyre në këtë proces.

Në përfundim, avokatja u shpreh se nëse institucionet vendase si KLGJ dhe SPAK nuk do të veprojnë për shkarkimin dhe dënimin penal të gjyqtares, dosja do të dërgohet deri në Gjykatën e Strasburgut për të kërkuar drejtësi.

Deklarata për media:

“Në fakt edhe unë u surprizova që lajmin e mora vesh nga media, ndërkohë që nga dhjetori i vitit 2024 kam qenë në një komunikim të vijueshëm me Prokurorinë e Përgjithshme. Ky komunikim ka përfunduar me dokumentin e datës 3 shtator 2025, ku Prokuroria e Përgjithshme më konfirmonte se, sipas komunikimeve me Ministrinë e Drejtësisë dhe autoritetet greke, vendimi i dënimit penal në shtetin grek i gjyqtares me disa mbiemra ishte autentik, duke konfirmuar kësisoj të gjitha akuzat tona ndaj saj.

Megjithatë, sot vihem në dijeni nga media se Prokuroria e Përgjithshme ka mbyllur hetimet ose verifikimin e thelluar lidhur me figurën e gjyqtares Irena me disa mbiemra, pa më vënë në dijeni, ndonëse unë jam personi që kam vënë në lëvizje këtë proces bashkë me Këshillin e Lartë Gjyqësor.

Dua të bëj me dije publikun se janë marrë katër vendime nga Prokuroria e Përgjithshme lidhur me afatin e hetimeve, të cilat janë pezulluar dhe shtyrë për shkak të pritjes së dokumentacionit nga Ministria e Drejtësisë. Pavarësisht kësaj, në këndvështrimin tim, ka një shmangie për të dalë tek e vërteta lidhur me situatën e gjyqtares Irena me disa mbiemra.

Ne kemi depozituar prova autentike, të konfirmuara nga autoritetet greke, për dënimin penal dhe dëbimet nga shteti grek, të cilat nuk janë hetuar. Po ashtu, ekziston një prokurë e lëshuar nga vetë gjyqtarja, që vërteton se ajo ka qenë në dijeni të këtyre dëbimeve dhe ka autorizuar një avokat grek për heqjen e tyre.

Kjo situatë tregon se jemi përpara jo vetëm një vendimi penal ndaj gjyqtares Irena Gjoka Shpata Maneku, por edhe përpara falsifikimit në deklarim dhe mosdeklarimit të të dhënave, për të cilat institucione të tjera kanë dhënë vendime shumë më të rënda për raste më të lehta.

Ne jemi në pritje të vendimmarrjes së KLGJ-së, e cila duhet të çojë drejt shkarkimit. Në të kundërt, do të ndërmarrim hapat ligjorë përkatës, pasi nëse nuk kërkohet shkarkimi, jemi përpara shpërdorimit të detyrës dhe veprave të tjera të rënda penale.

Unë kam depozituar tetë kërkesa për informacion, tre kallëzime penale, përfshirë edhe kallëzim ndaj ministrit të Drejtësisë Ulsi Manja. Të tre kallëzimet janë bashkuar në një procedim të vetëm nga SPAK. Vendimi penal është depozituar edhe në Inspektoratin e Lartë të Drejtësisë, ku ka nisur verifikimi i figurës së kësaj gjyqtareje.

Të gjitha akuzat tona janë të mbështetura në fakte dhe prova dhe është vërtetuar se kjo gjyqtare është përdorur për të dëmtuar opozitën dhe krerët e saj. Reforma në Drejtësi nuk është përdorur për drejtësi për qytetarët, por për të goditur opozitën.

Nëse institucionet nuk veprojnë sipas ligjit dhe Kushtetutës, unë do t’i ndjek këto çështje deri në fund, përfshirë edhe dërgimin e tyre në Gjykatën e Strasburgut”.