VOAL

Maqedoni

Mbahet takimi mes partive shqiptare, nuk marrin pjesë BESA dhe PDSH

Në takimin e inicuar nga lideri i BDI-së, Ahmeti morën pjesë liderët e LR-PDSH Ziadin Sela, nga UNITET-i Gëzim Ostreni dhe nga RDK Vesel Memedi. Në takim nuk morën pjesë Lëvizja BESA dhe PDSH

SHKUP – Në Shkup sot u mbajt takimi i liderëve të partive politike shqiptare në Maqedoni. Në takimin e inicuar nga lideri i Bashkimit Demokratik për Integrim (BDI) Ali Ahmeti i shoqëruar nga zyrtarja e lartë e kësaj partie Teuta Arifi, morën pjesë liderët e partive politike pjesë e Aleancës për Shqiptarët, gjegjësisht nga LR-PDSH-ja Zijadin Sela, nga UNITET-i Gëzim Ostreni dhe nga Rilindja Demokratike Kombëtare (RDK) Vesel Memedi. Ndërsa në takim nuk morri pjesë asnjë zyrtarë i Lëvizjes BESA dhe Partisë Demokratike Shqiptare (PDSH).

Ahmeti pas takimit, në deklaratën për gazetarët, tha se kanë realizuar një takim duke patur vullnetin e mirë të shumicës së partive politike shqiptare.

Ai tha se dallimet janë shumë më të vogla se sa çështjet e mëdha të cilat i bashkojnë. “Ne si shqiptarë të dalim me një zë për çështje që kanë të bëjnë me gjithë shqiptarët në Republikën e Maqedonisë pa dallim se i cilës partie ose elektorati është, sepse gjërat që kanë të bëjnë me shqiptarët janë shumë të përbashkëta. Javën që pason ne sërish do të takohemi për të bërë një analizë mbi zhvillimet në vend dhe do ti harmonizojmë të gjitha qëndrimet si parti politike gjithmonë duke patur për bazë platformat dhe doktrinat tona. Gjithashtu do të hartohet një komunikatë me shkrim mbi takimin e cila do të shpërndahet për mediat më së voni deri nesër pas darke”, deklaroi Ahmeti.

Lidhur me mospjesëmarrjen e Lëvizjes BESA dhe PDSH-së, Ahmeti tha se “për këtë takim të gjtiha partitë politike janë thirrur, të gjitha janë dakorduar në një iniciativë të tillë”.

“Nuk më duket qëndrim i shëndetshëm edhe për vet BESA-n e cila nuk mori pjesë në këtë takim. Sa i takon PDSH-së ato me arsyetim të pranueshëm se janë në një proces tjetër dhe se shqyrtojnë kërkesën për një takim të përbashkët dhe ne mbetemi të hapur. Ky është një nga vlerësimet dhe vendimet unanime të bëra të subjekteve që përfaqësojnë që ftesa të mbetet e hapur edhe më tej për partitë politike si për BESA-n ashtu edhe për PDSH-në. Ftesa qëndron në takimin e radhës që ne do ta mbajmë javën që pason, janë të mirëseradhur”, thekson Ahmeti.

Ndërsa në lidhje me temën mbi të cilën është biseduar në këtë takim lideri i BDI-së, Ahmeti tha: “Kemi biseduar për të gjitha çështjet të cilat janë dhe po zhvillohen në vendin tonë. Kemi qenë shumë të hapur dhe analitik në të gjitha drejtimet. Për më konkretisht të gjitha gjëra do të pasqyrohen në vendimin e përbashkët, sepse presim edhe forca tjera politike që të na bashkohen për të nënshkruar një memorandum të përbashkët si shqiptarë”.

Ndërsa nga ana tjetër kryetari i LR-PDSH-së, Ziadin Sela, takimin e vlerësoi si të rëndësishëm për politikbërjen shqiptare dhe kuptimin që duhet të marrë politikbërja shqiptare.

Ai tha se çdo herë ka qenë pro qëndrimit që duhet të ketë ura komunikimi mes subjekteve politike shqiptare pa marrë parasysh nëse janë në opozitë ose në qeverisje. “Ne jemi këtu për të bashkuar veprimin politik dhe jo subjektet politike. Në këtë fazë mendojmë që ne duhet të kemi qëndrime të përbashkëta, në mënyrë që ta ndiejnë presionin blloku tjetër politik në mënyrë që njëherë e përgjithmonë të zgjidhen interesat e atyre të cilët ne i përfaqësojmë”, tha Sela. aa

Rezultati zgjedhor në duart e 700 votuesve në Tearcë të Tetovës

Pas vendimit të Gjykatës Administrative për të pranuar një ankesë të Lidhjes Social-demokrate, Komisioni Shtetëror i Zgjedhjeve ka shpallur rivotimin në një vendvotim në komunën e Tearcës, në rajonin e Tetovës.

Në fakt, KSHZ-ja kishte refuzuar ankesën e opozitës, por ishte Gjykata Administrative që anuloi vendimin e KSHZ-së dhe pranoi ankesën e LSDM-së për rivotim në këtë vendvotim, që mund të ndikojë në rezultatin zgjedhor, përkatësisht në mandate, që aktualisht janë 51 me 49 në favor të VMRO-DPMNE-së.

E pakënaqur me vendimin e Gjykatës, VMRO-ja, që drejtohet nga ish kryeministri, Nikolla Gruevski, ka bërë të ditur se nuk do të merr pjesë në rivotim, për shkak të, siç u shpreh, tendencës për vjedhjen e fitores së saj në zgjedhjet e 11 dhjetorit.

“LSDM-ja dhe urdhër dhënësit e tyre, në mënyrë të turpshme, po tentojnë që t’i vjedhin VMRO-së fitoren e pastër. Vendimi i gjykatës është antiligjor dhe i udhëhequr nga motive politike, pasi nuk ka asnjë bazë ligjore për rivotim. Në këtë rast , kemi të bëjmë me një skenar të qartë për vjedhjen e fitores tonë në zgjedhje”, ka deklaruar nënkryetari i VMRO-së, Nikolla Todorov, duke përsëritur qëndrimin partiak për mosmarrjen pjesë në rivotim dhe mosnjohjen e rezultatit zgjedhor.

Në vendvotimin në Tearcë ka rreth 700 votues dhe në rast të fitore së LSDM-së, me një dallim prej të paktën 300 vota, atëherë kjo parti do të këtë një deputet më shumë dhe numri i përgjithshëm i mandateve mes saj dhe VMRO-së do të jetë i barabartë, apo çdonjëra nga 50 deputetë.

VMRO-ja, nga ana tjetër, nuk ka sqaruar se kush po tenton t’i vjedhë asaj fitoren dhe kush janë urdhër dhënësit e LSDM-së, siç ka deklaruar Todorov, në paraqitjen para mediave lidhur me vendimin e Gjykatës Administrative.

Nga kjo parti, që nga mbajtja e zgjedhjeve më 11 dhjetor dhe shqyrtimi i ankesave nga ana e KSHZ-së, kanë dalë me akuza të shumta në adresë të diplomatëve perëndimorë, duke i akuzuar për përpjekje për t’i mohuar fitoren, ndërsa zyrtarët e saj kanë përdorur edhe një retorikë të ashpër nacionaliste në adresë të shqiptarëve. Disa nga protestuesit, zyrtarë të lartë të VMRO-DPMNE-së, i janë bashkangjitur turmës që brohoriste “Shqiptarët e mallkuar” dhe “Bejlli, larg duart nga Maqedonia”.

“Nuk është e lehtë t’i thuash ambasadorëve rrini anash dhe kjo të jetë e realizueshme. Edhe vet Gruevski është i vetëdijshëm për këtë, kur dihet fakti se pikërisht këta diplomatë këto dy vitet e fundit ishin të përfshirë aktivisht në rrjedhat politike në vend, për të ndihmuar nxjerrjen e Maqedonisë nga kriza e thellë politike. Politika e Gruevskit është mposhtu më, qoftë me 51 deputetë – nëse do të mbetet – apo edhe me 50. Ai më nuk e ka situatën nën kontroll”, thotë Nikolla Dujoski, njohës i çështjeve politike dhe profesor në Universitetin e Shkupit.

Retorika e tillë e zyrtarëve të VMRO-së, sipas ekspertëve, ka larguar si asnjëherë më parë kët parti nga shqiptarët, duke nxitur tensione të reja.

“Definitivisht duhet të qartësohet se në asnjë mënyrë, edhe sikur pas rezultateve përfundimtare parti fituese është VMRO-DPME-ja, partitë shqiptare nuk duhet t’i mundësojnë atij formimin e qeverisë, sepse në një situatë të tillë do të vazhdonte kriza politike, e cila mund të thellohet edhe më shumë”, thotë Ismet Ramadani, analist dhe drejtues i Këshillit Euroatlantik të Maqedonisë.

Pas rivotimit të së dielës në Tearcë, KSHZ-ja pritet të certifikojë rezultatin zgjedhor. Pastaj pritet konstituimi i përbërjes së re parlamentare dhe nisja e afateve për formimin e qeverisë së re. Në bazë të Kushtetutës, mandati do t’i jepet partisë më të madhe fituese, por në rast se rezultati del i barabartë, atëherë vendi do të përfshihet në paqartësi të reja politike, pa përjashtuar mundësinë edhe të zgjedhjeve të reja. (REL)

SHBA shprehin shqetësim për tensionimin e situatës në Maqedoni

Në Maqedoni, zgjedhjet e 11 dhjetorit, që synonin t’i jepnin fund krizës politike në vend, duket se e kanë thelluar atë edhe më tej.

Duke folur të martën në Uashington, zëdhënësi i Departamentit të Shtetit, John Kirby, shprehu shqetësimin e qeverisë amerikane për shtimin e tensioneve politike në Maqedoni.

Shtetet e Bashkuara, tha ai, dënojnë “retorikën provokuese nga disa udhëheqës politikë, që bëhet shkas për nxitjen e sulmeve ndaj institucioneve demokratike dhe ambasadorëve të akredituar në Maqedoni”.

Ditën e shtunë, ish kryeministri i Maqedonisë dhe kryetari i partisë VMRO-DPMNE, Nikolla Gruevski, duke folur para përkrahësve të tij, tha se “disa ambasadorë po përzihen në punë e brendshme të Maqedonisë”, ndërsa akuzoi Komisionin Shtetëror të Zgjedhjeve, organizatat jo-qeveritare dhe partitë opozitare se po përpiqen t’i rrëmbejnë fitoren partisë së tij.

Pa i përmendur me emër, por duke i nënkuptuar qartazi, zoti Gruevski akuzoi ambasadorët e Shteteve të Bashkuara dhe të vendeve të Bashkimit Evropian. “Kërkojmë që ata të qëndrojnë në kornizat e mandatit të tyre dhe të ndalojnë përzierjen në punët e brendshme të Maqedonisë”, tha zoti Gruevski.

Protestuesit e pranishëm gjatë fjalimit mbanin pankarta, në të cilat shkruhej: “Donald Trump ne të duam!” dhe “Ambasador Bejli, larg duart nga Maqedonia!”

Zëdhënësi i Departamentit të Shtetit Kirby, u bëri thirrje udhëheqësve politikë në Maqedoni të heqin dorë, siç u shpreh ai, “nga këto sulme të pajustifikuara, të respektojnë procesin demokratik dhe të lejojnë formimin e një qeverie të besueshme e të qëndrueshme, që respekton shtetin ligjor dhe liritë bazë. Shtetet e Bashkuara, tha zëdhënësi amerikan, janë të gatshme ta ndihmojnë një qeveri të tillë, që të realizojë synimet e Maqedonisë për integrimin euro-atlantik”.

Aktualisht, VMRO-DPMNE ka 51 mandate, ndërsa Lidhja Social Demokrate 49. Nga partitë shqiptare, BDI ka 10 mandate, Besa 5, Aleanca për Shqiptarët 3 dhe PDSh 2. Deri tani ato nuk janë shprehur publikisht lidhur me koalicionet e mundshme.

Gjykata Administrative vendosi të martën që të përsëriten zgjedhjet në Tearcë pranë Tetovës.

Në varësi të rezultatit, numri i vendeve të fituara në parlament mund të ndryshojë, duke i nxjerrë dy partitë maqedonase, VMRO-DPMNE dhe Lidhjen Social Demokrate, me numër të njëjtë ligjvënësisht, nga 50 secila.

Votimet në Tearcë, ku ka 714 votues të regjistruar, pritet të mbahen më 25 dhjetor.

Ishim dhe mbetëm popull të cilin, o e dëbojnë nga trojet e veta, o ai ikën nga vetvetja! – Nga Kim Mehmeti

Thuajse sa herë që nisem për në Kosovë, më rikujtohen tri ngjarje dhe tri fytyra, që do mund të qëndronin në ballinat e trinisë së stinëve të mia jetësore: fëmijërisë, rinisë dhe pjekurisë që jam duke e jetuar. Dhe në epiqendër të këtyre tri ngjarjeve, që për mua kanë domethënien e historishkrimit të Kosovës së shekullit të kaluar, qëndrojnë sytë e trishtuar të tre fëmijëve me bukuri engjëllore, por që kurrë nuk do i shënojë objektivi i historisë sonë kombëtare, edhe pse shikimi i tyre bartte fletshkrimin e pagabueshëm të tmerrit që gjatë shekujve kemi përjetuar ne shqiptarët.

Në fëmijërinë time të hershme, te ne erdhi një familje kosovare. Mes shumë vetave që mbushën shtëpinë tonë të varfër, ishte edhe një vogëlush sykaltër, më një bukuri engjëllore. Dhe nuk qëndruan gjatë, ngaqë disa ditë më vonë, dolëm t’i përcillnim te stacioni hekurudhor i Shkupit nga do niseshin drejtë Turqisë. Dhe nga ajo lotëderdhje e atyre që shkonin dhe atyre që i përcillnin shtegtarët që përgjithmonë e braktisnin vendlindjen, unë mbajë mend vetëm sytë e bukur të vocërrakut kosovar, ato sy që shikonin mizërinë e njerëzve ku qëndroja edhe unë, fëmija e atëhershëm, i cili asokohe nuk e dinte ku ndodhej Kosova, por ia doli ta kuptojë se ku banonte dhembja e një fëmije sykaltër kosovar.

Në vitet e rinisë sime ndodhi eksodi biblik i shqiptarëve nga Kosova, që i dëboi regjimi i Millosheviqit. Dhe gjatë bombardimeve të NATO-s, gropa e Bllacës pranë vendkalimit kufitar Maqedoni-Kosovë, u mbush me dhembjen e atyre që prisnin të kalojnë këtej, ku i priste dhembja jonë për ta. Për çdo ditë dilja aty dhe bëja atë që bënin të gjithë shqiptarët nga ana jonë e kufirit: e jetoja dhembjen e atij që përballet me pamundësinë t’i shpëtoj gjithë ata që vuanin në atë gropë përplot baltë. Dhe një ditë, mes turmës së fatkqinjve, pashë një palë sy të kaltër fëmije, që ma kujtuan shikim e sykaltrit të fëmijërisë sime që u shpërngul në Turqi. Bëra çmos që t’i afrohesha dhe së bashku me nënën e tij, t’i merrja me vete. Por as ky nuk mbeti shumë gjatë me ne: pas disa ditëve, dolëm te aeroporti i Shkupit nga e përcollëm për ne Gjermani, ku i priste daja i vogëlushit.

Shumi vite më vonë, kur kisha filluar të besoja se Kosova nuk kishte më sykaltrosh për t’ua dhënë vendeve të huaja, ndodhi e pabesueshmja: në vitin 2015, rastësish u gjeta te stacioni i autobusëve në Prishtinë. U ndjeva i tmerruar nga rrëmuja e njerëzve që shtynin njëri tjetrin për tu ngjitur nëpër autobusët që do i çonin drejt vendeve perëndimore. Dhe përnjëherë shikimi m’u përballë me atë të një fëmije sykaltër, të cilin e shtrëngonte në kraharor nëna e tij e përlotur. Bëra çmos që t’u afrohesha, e t’i lusja të mos shkonin atje ku ishin nisur, por mëkot: dera e autobusit u mbyll dhe pashë vetëm sytë e trishtuar të kaltër, që shikonin turmën që mbeti te stacioni i autobusëve në Prishtinë. Pastaj u nisa për në Shkup dhe që nga ajo natë, sa herë që dikush kërkon nga unë që shkurtimisht ta përshkruaj Kosovën, mua më faniten këto tri ngjarje me tre kryepersonazhët sykaltroshë në to.

Edhe kur nisem për në Tiranë, më ringjallen në kujtesë pamje që derdhen në njëra- tjetrën, si e vërteta në të trilluarën dhe, nuk arrij të dalloj se cilat ndodhi janë pjellë e imagjinatës, e cilat ngjarje të vërteta. Madje- madje, ato që me të vërtetë kanë ndodhur, më duken si të ardhura nga përtej imagjinatës. Dhe kështu, tre fëmijët e prindërve kyrbetçarë nga Elbasani, e të cilët, në plazhin e Pargës – nga frika se do mund t’i zbulonin se ishin shqiptarë – nuk flisnin shqip me fëmijët e mi, më kthehen në kujtesë së bashku me anijet e mbushur me përplotë shqiptarë, e të cilat e shpërndanin varfërinë shqiptare nëpër qytetet e Italisë. Po pra, shpeshherë, posa arrij në Tiranë, vetvetiu më vjen në kujtesë edhe viti 1997, viti kur bashkëkombësit e atjeshëm, e rrënuan shtetin vetëm pse së tepërmi u besonin dhe i donin partitë, me çka edhe njëherë dëshmuan se ne shqiptarët dimë të mbrojmë pushtet, por jo edhe shtet. Dhe kur arrij në Tiranë, shpeshherë më ndodh që e sotmja t’ma rikujtoj të kaluarën, ngaqë ka diçka që edhe sot, të bënë të ndjehesh njësoj si dje e pardje: të rinjtë që mezi presin ta braktisin vendlindjen dhe partiakët që flasin për sukseset e mëdha që i kanë arritur. Pra, sa herë që arrij në Tiranë, ndjehem si ai që qëndron përpara kopshtit të ëndërruar, por të lënë në duart e hajdutëve të pamëshirshëm, pra ndjehem si para lulishtes të mbetur pa kopshtarin që do kujdesej për të!

Edhe përderisa jam në Shkup, nuk më mungon ndjesia se jam duke jetuar në një nga kryeqendrat e shqiptarisë, ngaqë edhe këtu, si çdokund nëpër ‘Shqipëritë’ tona, i papenguar rrjedhë lumi i të rinjve shqiptarë, që e braktisin vendlindjen ngaqë ajo thuajse më edhe nuk i do. Dhe kur kësaj ndjenje ia shtojë pamjet që më rikujtohen thuajse sa herë që nisem për në Prishtinë, si dhe ato kur arrij në Tiranë, unë e dëgjojë një zë të molisur të brendshëm, që pandalë më thotë: ne shqiptarët ishim dhe mbetëm popull të cilin, ose të huajt e dëbojnë nga trojet e veta etnike, ose ai ikë nga vetvetja!

Gruevski nuk pranon rivotimin, kërcënon diplomatët e huaj

Kryetari i VMRO DPMNE-së, Nikolla Gruevski ka paralajmëruar se partia e tij nuk do të merr pjesë në rivotimin në dy vendvotime, nëse kjo vendoset nga KSHZ-ja dhe konfirmohet edhe nga Gjykata Administrative dhe as nuk do të pranojë rezultatin e dalë në rivotim, që sipas vlerësimeve të para, VMRO-së do t’i merret një mandat në favor të LSDM-së.

Në këtë rast rezultati në mandate do të ishte I barabartë, 50 për LSDM-në dhe 50 për VMRO-në. Në një paraqitje para ithtarëve të partisë së tij, që po protestojnë para Komisionit Shtetëror të Zgjedhjeve (KSHZ), Gruevski tha se ky institucion ka miratuar vendime kundër vullnetit të popullit.

“KSHZ-ja ka miratuar vendime anti-ligjore, me qëllim shkeljen e vullnetit të popullit. Puna e KSHZ-së është shndërruar në sfilatë. Kemi informacione për përzierjen e disa përfaqësuesve të huaj, me qëllim që të ndikojnë në falsifikimin e vullnetit të qytetarëve. Disa nga përfaqësuesit e pavarur nuk janë të pavarur. Vendimet joligjore të KSHZ-së mund t’i korrigjojë Gjykata Administrative, andaj edhe bëjmë thirrje që të mos bëhet asnjë presion ndaj asaj gjykate nga askush”, ka deklaruar Gruevski.

“VMRO-ja nuk do të lejojë përzirjen e mëtejmë në çështjet e brendshme politike të vendit dhe kërkojmë që të veprojnë në kuadër të mandateve dhe autorizimeve si diplomatë”, u shreh ai.

Fjalimi i Gruevskit nga të pranishmit u përcoll me brohoritje “Nikolla, Nikolla”, ndërsa ky siguroi të pranishmit se nuk do të lejojë formimin e qeverisë nga, siç u shpreh, “krimineli i amnistuar”, Zoran Zaev.

Protestuesit kanë brohoritur edhe kundër ambasadorit amerikan, Xhes Bejli, i cili mbrëmë vonë ka shkuar në selinë e VMRO-së, ku ka biseduar me kreun e partisë, Nikolla Gruevski.

“Bejli, largoi duart nga Maqedonia. Donald Tramp, Ne të duam”, ishte një nga parullat e shkruar që bartnin protestuesit.

KSHZ-ja deri më tani ka anuluar votimin në një vendvotim të ankimuar nga Lëvizja BESA, ndërsa së shpejti pritet të vendos edhe për ankesën tjetër të LSDM-së, që është edhe e fundit për procesin e së dielës.

KSHZ-ja mblidhet sërish, vazhdojnë protestat në Shkup

Komisioni Shtetëror i Zgjedhjeve do të vazhdojë gjatë ditës së shtunë shqyrtimin e ankesës së fundit të Partisë Social Demokrate në opozitë, për ta përmbyllur gjithë procesin zgjedhor. Komisioni gjatë natës së kaluar ka pranuar vetëm një ankesë të partisë shqiptare Besa.

Ndërkohë, përkrahësit e partisë së ish-kryeministrit Nikolla Gruevksi, VMRO DPMNE, kanë vazhduar protestat e tyre përpara selisë së KSHZ-së.

Komisioni tha se do të shqyrtojë ankesën e LSDM-së gjatë ditës së shtunë, ndërkohë që kryetari i Komisionit Aleksandar Cicakovski tha se “në këtë mbledhje do të përgatiten të gjitha vendimet për t’i dorëzuar ato”.

Ankesat e mbetura janë refuzuar nga anëtarët e komisionit, me përjashtim të dy që janë tërhequr nga LSDM-ja.

Përkrahësit e VMRO-DPMNE sërish, si edh enjë natë më herët, janë mbledhur përpara selisë së KSHZ-së për, siç thonë, të mos lejuar që të “vidhet fitorja e partisë në pushtet”.

Ata kanë kënduar këngë dhe kanë brohoritur slogane partiake dhe për Maqedoninë dhe kanë hedhur fishekzjarrë dhe gjësende të tjera mbi ndërtesën e Komisionit Shtetëror të Zgjedhjeve.

Me të përfunduar të mbledhjes së KSHZ-së, anëtari i VMRO-DPMNE, Dime Spasov tha se do të vazhdojnë të “qëndrojnë përpara KSHZ-së dhe se nuk do të ikin nga askush”.

Protestuesit thonë se do të vazhdojnë protestat deri sa KSHZ, të mos e verifikojë rezultatin zgjedhor.

Në bazë të një rezultati paraprak të publikuar partia e Gruevksit VMRO-DPMNE ka fituar dy vende në Parlament më shumë se ajo e Zoran Zaev, LSDM, në opozitë, respektivisht 51 deputetë me 49 syresh.

Tragjikja e elitës politike shqiptare në Maqedoni – Opinion nga Arben Llalla

Pas përfundimit të zgjedhjeve, kur u vu re se shqiptarët morën 20 deputetë duke humbur 7, filluan misionarët andej dhe këtej kufirit që paguhen rëndshëm nga partitë politike dhe organizatat e huaja, të çirren se fajin për uljen e numrit të deputetëve e kanë partitë e reja, të cilat përçanë votën shqiptare. Por, askush nga komentatorët e Tiranës dhe Prishtinës nuk duhet të fajësojë votuesit shqiptarë në Maqedoni për uljen e numrit të ligjvënësve shqiptarë dhe votën e dhënë për LSDM. Prej kaq vitesh “misionarët” e Tiranës dhe Prishtinës vetëm u kanë bërë dëm shqiptarëve në Maqedoni duke i shitur për pak euro. Shqiptarët e Maqedonisë votuan si fëmija që babai e harron dhe njerku kujdeset më shumë se i ati. Përderisa nuk e njihni shpirtin mikpritës, miqësor, paqedashës dhe atdhedashës të popullit të thjeshtë, askush se ka të drejtën t’i akuzojë për tradhti kombëtare. Tradhtare është klasa politike shqiptare si këtej dhe andej kufirit, e cila prej kaq motesh bën tregti me Çështjen Kombëtare.

Shqiptarët e Maqedonisë për ndryshim nga shqiptarët e Tiranës dhe Prishtinës nuk janë agresivë, luftënxitës apo të padëgjueshëm ndaj vëllezërve më të mëdhenj, atij tiranas dhe prishtinas. Këtë herë shqiptarët e Maqedonisë votuan kundër së keqes, kundër dhunës dhe kërcënimeve që prej shumë vitesh u ka bërë qeveria e poshtër VMRO-BDI dhe indiferentizmi i PDSH. Kuptohet që është vështirë të rrëzohet brenda natës BDI, partia e cila prej vitit 2002 është pjesë e qeverive të Maqedonisë në pushtetin qendror dhe vendor.

Me votën e tyre shqiptarët në drejtim të LSDM, treguan se ata mund të votojnë edhe partitë sllavo-maqedonë, nëse këto forca politike ofrojnë më shumë paqe, rritje të ekonomisë dhe stabilitet të shtetit për të ardhmen e qytetarëve. Dikush mund t’i akuzojë këta votues për “tradhëti kombëtare”, por askush nuk ka të drejtë të akuzojë votuesit shqiptarë të LSDM, kur shikon pas historinë tragjike të qeverisë VMRO-BDI, e cila ka vrarë, burgosur dhe rrënuar ekonomikisht shqiptarët. Skenari i Brodecit të gjithë e dinë se ishte skenar i VMRO-së, BDI-së dhe Beogradit. Këtë s’e them unë, por e ka thënë qysh në atë kohë kryeministri i Kosovës, Agim Çejku dhe kryetari i Shqipërisë, Bamir Topi. Botimi dhe ribotimi i Enciklopedisë së Akademisë së Shkencave të Maqedonisë që i nxirrte shqiptarët ardhacakë dhe njerëz të këqinj, është një tjetër vepër ogurzezë për t’u shënuar. Montimi i rastit të Mostrës, ku skenarin e bëri VMRO me dijeni të BDI-së. Vrasjet e pa zbardhura të Isa Likës, Harun Aliut e shumë shqiptarëve të tjerë rëndojnë mbi partinë shqiptare BDI. Skenari i Kumanovës ka për regjizor VMRO-BDI, sepse është vërtetuar nga shërbimet e huaja që kjo tragjedi u gatua nga dy partitë qeverisëse për të mbajtur sa më gjatë pushtetin, duke përhapur panik tek qytetarët. Por, për fatin e mirë falë shërbimeve të huaja, dobiçi u mbeti në derë. Për shumë vjet partia shqiptare në pushtet, BDI miratoi ligje antishqiptare qoftë kundër gjuhës shqipe, kundër Abetares, kundër flamurit kombëtar, të cilin e kanë shëmtuar dhe zvogëluar me ligj deri në 30 centimetër. Me kartonët e BDI-së u ngritën përmendoret Shkupi 2014, pa folur për tjetërsimin e historisë krenare shqiptare në Maqedoni.

Përgjimet e jashtëligjshme të bërë nga qeveria VMRO-BDI, tregojnë se jetët e qytetarëve në Maqedoni vëzhgoheshin në çdo aspekt të privatësisë. Këto përgjime nxorën në pah edhe jetën private të drejtuesve të lartë të BDI, ku vrima e çelësit rrëfen për epshet seksuale midis tyre, lesbike, homoseksuale e kështu me radhë. Nëse këto përgjime do i tregohen masës së gjerë të popullit do ishte një turp i madh për klasën politike shqiptare, sepse janë përgjuar edhe drejtues të lartë të Shqipërisë dhe Kosovës.

Për disa vjet bizneset, sidomos ata shqiptare u gjobitën rëndë nga inspektorët e shtetit për të mbushur arkën partiake. Kujtojmë gjobat nga 3.000-200 mijë euro. PDSH si parti opozitare me heshtjen e saj u bë palë me qeverisjen e keqe, ku fjalori i ferrarit të mbrapshtë çoji në tkurrjen historike të kësaj force politike.

Me pak fjalë të gjithë këto të zeza prodhuan formimin e partive të reja opozitare dhe e nisën votën shqiptare në drejtim të LSDM. Prandaj, nuk duhet faqësuar asnjë qytetar që votoi LSDM apo që nuk doli për të votuar a votoi BESA-n dhe “Aleancën për Shqiptarët”.

Vota e 11 dhjetorit e shqiptarëve në Maqedoni në humbjen e numrit të deputetëve shqiptarë dhe në forcimin e LSDM ka anët e saja pozitive, sepse i prish rehatinë pushtetit absolut afatgjatë të BDI-së dhe heshtjen e opozitës së PDSH-së. Tani partitë shqiptare BDI, BESA, “Aleanca Shqiptare” dhe PDSH, kanë mundësinë e artë që të tregohen të mençur dhe kombëtarë duke bashkuar votat e tyre për qeverinë e LSDM-së, por me kushtet si: realizimi i Marrëveshjes së Ohrit (dy gjuhësia, flamuri, të drejtat e barabarta kombëtare dhe qytetare), pension për familjet e dëshmorëve, rikthimi i librit të Abetares. Të gjitha këto të jetësohen brenda një viti. Më tej, ndërrimi i emrit kushtetues, flamuri dhe Kushtetuta e Maqedonisë, ku qytetarët do jenë të barabartë si sllavo-maqedonët, shqiptarët, serbët, turqit, vllehët, romët e të tjerët. Duhet ngulmuar patjetër në anëtarësimin e Maqedonisë në NATO brenda tre muajve dhe hapja e bisedimeve për anëtarësimin në BE. Fati i shqiptarëve të Maqedonisë nuk është më në duar tëpartive vasale shqiptare, por tek vota e tyre që ia garanton ligji, ndërsa fati i ekzistencës dhe përparimit të Maqedonisë ndodhet këtë herë në duart e partive shqiptare.

E pra, të shpresojmë që do të bëjnë historinë të gjithë bashkë këtë herë BDI, BESA, Aleanca dhe PDSH duke lënë mënjanë për pak kohë mëritë personale. Prandaj, askush s’e ka të drejtën të akuzojë shqiptarët në Maqedoni për “tradhti kombëtare”, nëse kanë votuar LSDM-në dhe është ulur numri i deputetëve shqiptarë në Kuvendin e Maqedonisë, sepse shqiptarët e Maqedonisë vërtetë janë të urtë e të heshtur përpara llafazanëve të Tiranës e Prishtinës, por janë të mençur dhe punëtorë. Ju rikujtojmë se ishin shqiptarët e Maqedonisë ata që kanë mbajtur peshën kombëtare që nga organizimi i Kongresit të Manastirit, Ministrinë e Mbrojtjes së qeverisë së parë të Ismail Qemal Vlorës, mbajtën peshën ekonomike të pas viteve 1990 në Shqipëri, si dhe të 1997 e luftën e Kosovës. Prandaj, kurkush nuk ka të drejtë të nënvlerësojë këtë popull me virtyte të larta morale, humane dhe kombëtare.

Opozita maqedonase nuk njeh rezultatin zyrtar të zgjedhjeve

Në Maqedoni, Lidhja Social Demokrate (LSDM) e opozitës nuk e njeh rezultatin e shpallur nga Komisioni Shtetëror i Zgjedhjeve, sipas të cilit ajo ka marrë 49 vende, kurse partia rivale VMRO-DPMNE, 51 vende në parlament.

Socialdemokratët pretendojnë të marrin një vend më shumë në zonën e gjashtë zgjedhore pas ankesave që do të paraqesin. Edhe Lëvizja Besa ka paralajmëruar ankesë për parregullsi në zgjedhjet e së dielës.

Rezultatet e zgjedhjeve parlamentare të së dielës duket se ua kanë shtuar shqetësimet partive më të mëdha në Maqedoni, ndërsa vështirë parashikohen variantet e partneritetit në një koalicion të ardhshëm qeveritar.

Partia VMRO-DPMNE, e cila ka dhjetë vjet në pushtet, fitoi me rezultat të ngushtë zgjedhjet e parakohshme, me gjithsej 51 vende në parlament.

Por, Lidhja Social Demokrate nuk e njeh rezultatin. Kryetari social-demokrat, Zoran Zaev foli sot para medias në lidhje me zhvillimet rreth zgjedhjeve të së dielës, duke thënë se duhet të respektohet vullneti i shumicës së votuesve, të cilët nuk dëshirojnë, siç tha, që vendi të drejtohet nga kriminelë. Qytetarët duan ndryshime; e mundëm regjimin me stilolaps dhe me votë, përsëriti zoti Zaev. Ai theksoi dëshirën e shumë qytetarëve për një Maqedoni shumë-etnike.

Zaev u shpreh me vendosmëri se Nikolla Gruevski nuk guxon, nuk mundet as nuk duhet të formojë qeveri. Ai tha se rezultatet e para të shpallura mbrëmë nga Komisioni Shtetëror i Zgjedhjeve i habiti qytetarët, ndërsa LSDM pretendon se mandatet e ligjvënësve të partisë së tij dhe të VMRO-DPMNE-së janë njësoj, 50 me 50.

Zoti Zaev paralajmëroi ankesë tek KSHZ për parregullsi në zonën e gjashtë zgjedhore (që përfshin Tetovën, Gostivarin, një pjesë të Dibrës dhe Kërçovës) ku pret të fitojë një post më shumë në parlament.

Ai u bëri thirrje të gjitha partive, përveç VMRO-së, që kanë fituar mandate deputetësh në parlament, që ta respektojnë vullnetin e shumicës. Por nga KSHZ nuk mendojnë të ketë pasur parregullsi të asaj natyre që do të ndikonte rezultatin.

Zoran Zaev pohoi se ka komunikim në nivel shtabesh zgjedhore me partitë shqiptare, ndërsa nuk saktësoi konkretisht nëse i ka bërë ftesë Bashkimit Demokratik për Integrim për formimin e një koalicioni të përbashkët qeveritar.

Edhe Lëvizja Besa ka paralajmëruar se do të paraqesë ankesë për parregullsi në zonën e dytë zgjedhore, ku shpreson t’ia marrë një mandat ligjvënësi VMRO-DPMNE-së, nëse miratohet ankesa.

LSD dhe BDI-ka kanë qenë një herë bashkë në qeveri, nga viti 2002 deri në 2006-ën. Kjo kohë, sipas njohësve të rrethanave ka qenë e qetë, sidomos në aspektin e marrëdhënieve ndëretnike, por edhe midis vetë partnerëve të koalicionit të atëhershëm qeverisës.

Nga ana tjetër, VMRO dhe BDI e kanë ndarë pushtetin për 9 vjet bashkë; në opinionin publik janë vërejtur tensione të herë-pas-hershme dhe mosdurim midis tyre.

Disa analistë mendojnë se një koalicion i ri midis këtyre dy partive është i pamundur. Sidoqoftë, një qeveri me shumicë të thjeshë votash në parlament, shikohet si jo e qëndrueshme, dhe për pasojë do ta çonte vendin në zgjedhje të reja.

BESA: Jemi të dëmtuar në dy njësi zgjedhore

Sejdiu përmendi disa raste të parregullsive, të tilla si votim familjar, prerje të fletëvotimeve në kundërshtim me ligjin, si dhe mosvulosje të fletëvotimeve

SHKUP – Lëvizja BESA ka paraqitur ankesë në Komisionin Shtetëror Zgjedhor (KSHZ), në lidhje me, siç thonë nga kjo parti, mospërputhjen e rezultateve reale nga terreni me të dhënat elektronike të KSHZ-së mbi numërimin e votave të zgjedhjeve të parakohshme parlamentare të 11 dhjetorit.

Ky subjekt politik konsideron se kontestues janë dy mandate nga Njësia e dytë dhe Njësia e gjashtë zgjedhore. Përfaqësuesi i Lëvizjes BESA, Blerim Sejdiu, përmendi disa raste të parregullsive, të tilla si votim familjar, prerje të fletëvotimeve në kundërshtim me ligjin duke u arsyetuar se nuk kanë gërshërë, si dhe mosvulosje të fletëvotimeve me qëllim që më vonë të shpallen të pavlefshme.

“Sipas analizave tona në disa vendvotime të njësisë zgjedhore 6 dhe të njësisë zgjedhore 6 ka pasur keqpërdorime në procesin zgjedhor. Në lidhje me këtë ne kemi konstatuar se parregullsitë kanë qenë të mëdha gjatë gjithë kohës nëpër korridoret e vendvotimeve, ku janë lëvizur persona të paautorizuar dhe kanë bërë presion ndaj votuesve”, deklaroi Sejdiu.

Sejdiu tha se këto raste të parregullsive kanë ndodhur në disa vendvotime në rrethinën e Likovës, në Haraçinë, në malësinë e Tetovës dhe vendvotime të tjera në të cilat siç theksoi ai, janë të dëmtuar me mbi një mijë vota nëpër vendvotime.

Ndërkohë, edhe lideri i partisë opozitare maqedonase, LSDM, Zoran Zaev, në një konferencë për media deklaroi se rezultatet paraprake i befasuan qytetarët, por shprehu bindje se në rezultatet përfundimtare do të ketë ndryshim të numrave.

Zaev theksoi se do të paraqesë ankesë në KSHZ, pasi që siç tha ai, partia që drejton ai ka mandate të barabarta me VMRO-DPMNE-në, përkatësisht nga 50 mandate.

Komisioni Shtetëror Zgjedhor (KSHZ), mbrëmë njoftoi se në zgjedhjet e parakohshme parlamentare të 11 dhjetorit, VMRO-DPMNE fitoi 51 mandate, LSDM 49 mandate, BDI 10 mandate, BESA 5 mandate, Aleanca për Shqiptarët 3 mandate dhe PDSH fitoi 2 mandate.

Në të këto zgjedhje ishin të regjistruar 1.784.416 qytetarë vendas, prej të cilëve të drejtën e votimit e kanë shfrytëzuar 1.190.491 ose 66.86 përqind e qytetarëve. aa

Analistët: Shqiptarët votuan opozitën maqedonase për të rrëzuar Gruevskin

Përkrahësit e LSDM-së, duke festuar pas rezultateve të zgjedhjeve në Maqedoni

Rezultatet e para zyrtare të publikuara nga Komisioni Shtetëror i Zgjedhjeve kanë treguar se të gjitha partitë politike shqiptare, në përbërjen e re parlamentare, (Bashkimi Demokratik për Integrim, Rilindja me Besë, Aleanca për Shqiptarët dhe Partia Demokratike Shqiptare) do të përfaqësohen me 20 deputetë gjithsej së bashku, rreth 9 ulëse në Parlament më pak se sa kishin në përbërjen e kaluar parlamentare.

Të gjitha partitë shqiptare së bashku kanë arritur që në zgjedhjet e 11 dhjetorit të marrin 212 mijë e 095 vota, mbi 25 mijë vota më pak se në zgjedhjet e kaluara parlamentare të prillt 2014.

Një pjesë të votave të shqiptarëve të Maqedonisë, në vendbanime të banuara kryesisht me popullatë shqiptare, i ka siguruar partia maqedonase në opozitë, Lidhja Social Demokrate e Maqedonisë.

Kjo parti, madje, ka marrë numrin më të madh të votave kundrejt partisë shqiptare Bashkimit Demokratik për Integrim, parti kjo e dalë nga lufta. Në Haraçinë të Shkupit, që ishte shpallur zonë e lirë nga Ushtria Çlirimtare Kombëtare gjatë konfliktit të armatosur 2001-shin, LSDM ka marrë 2,059 vota ndërsa BDI 1,456.

Lidhja Social Demokrate e Maqedonisë ka siguruar vota edhe në Malinë, Brezë dhe Tanushë, fshatrat e malësisë së Shkupit përgjatë vijës kufitare me Kosovën, prej ku për herë të parë u shfaq Ushtria Çlirimtare Kombëtare.

Duke komentuar këtë dukuri, Xhelal Neziri, drejtues i institutit për Gazetari Hulumtuese SCOOP, thotë se votuesit shqiptarë votuan për një opsion politik maqedonas, në mungesë të ofertave nga ana e partive politike shqiptare.

“Ky është rezultat i një politike të gabuar të partive politike shqiptare, si në përpilimin e ofertave apo programeve parazgjedhore, po ashtu edhe në politikbërjen e tyre në përgjithësi. Mund të shquhet një qasje e gabuar nga ana e partive politike ndaj votuesit shqiptar. Kjo qasje ka të bëjë si në imponimin e agjendave politike, po ashtu edhe të kuadrove të cilët janë imponuar me patjetërsim për t’u votuar, pa kaluar në filtrin e përmbushjes së kritereve”, thotë Neziri.

Besa Arifi, ligjëruese në Universitet Evropës Juglindore në Tetovë, thotë se mandatet e humbura nuk paraqesin delegjitimim të votës shqiptare, përkundrazi faktorizim, duke dënuar politikat nacionaliste të VMRO DPMNE-së të drejtuar nga Nikolla Gruevski, ish kryeministër.

“Të gjithë e dimë se cili ishte prioriteti kryesor i këtyre zgjedhjeve. Pra, ishte një luftë e hapur kundër politikës së VMRO DPMNE dhe Gruevskit që vazhdoi ta luajë jo vetëm gjatë kohës që ishte në krye të qeverisë, por e ritheksoi edhe gjatë fushatës zgjedhore.”

“Kështu që unë mendoj se shqiptarët të cilët votuan për LSDM-në vendosën një prioritet shumë të rëndësishëm gjatë përcaktimit se për kë do të votojnë. E ky prioritet ishte rrëzimi i Gruevskit dhe këtë e bënë në një mënyrë të organizuar shumë të vetëdijshme pa kompromise, për shkak se e vlerësuan këtë si formën direkte dhe më të fuqishme për t`i thënë atë JO-në vendimtare të politikave të udhëhequra nga Gruevski”, konsideron Besa Arifi.

Njohësit e çështjeve politike thonë se ulja e numrit të deputetëve shqiptarë, para së gjithash, është si rrjedhojë e mos balancimit të njësive zgjedhore, ku njësia zgjedhore 6, e cila përfshin vendbanimet shqiptare në Maqedoninë veriperëndimore (Tetovën, Gostivarin dhe një pjesë të Dibrës), ka numrin më të madh të votuesve, madje 30 mijë votues më shumë se sa ka njësia e 3 zgjedhore, e cila nxjerrë numrin e njëjtë të deputetëve, përkatësisht 20.

“Në zgjedhjet parlamentare të 2014 shqiptarët morën maksimumin e mandateve për deputetë, por nuk bënë shumë me ato mandate. Pavarësisht se tani ka rënë numri i deputetëve, pesha e votës shqiptare është shtuar, sepse nuk është se ka humbur ajo popullatë shqiptare brenda Maqedonisë. Por, me votën e vet ka kontribuar në afrimin e opozitës dhe pozitës nga tabori maqedonas, duke u thënë ndal politikave stagnuese në më shumë dimensione”, thotë Besa Arifi.

Një element tjetër që ka çuar në uljen e deputetëve shqiptarë në njësinë zgjedhore 6, vlerëson Xhelal Neziri, është dhe shpërndarja e votës në më shumë parti politike shqiptare.

“Shpërndarja e votës në 4 parti shqiptare ka bërë të mos efektohet vota duke u konvertuar në deputetë”, thotë Neziri.

Sa i përket partive politike, humbje drastike të deputetëve ka pësuar partia shqiptare Bashkimi Demokratik për Integrim, e cila në zgjedhjet e kaluara kishte 19 deputetë, kurse tani ka siguruar vetëm 10 deputetë, ndërkohë që sërish është radhitur e para me numrin e deputetëve të fituar në zgjedhjet e 11 dhjetorit.

Partia Demokratike Shqiptare, e cila ishte në opozitë në përbërjen e kaluar, ishte e përfaqësuar me 7 deputetë, përderisa tani ka siguruar vetëm 2 deputetë.

Befasi paraqet Rilindja me BESË, e cila për herë të parë garon në këto zgjedhje dhe ka siguruar 5 deputetë, si dhe Aleanca për Shqiptarët, duke siguruar tre ulëse në përbërjen e re parlamentare. (REL)

Zaevi fton shqiptarët në koalicion kundër Gruevskit

Zoran Zaev, lider i Partisë Social Demokrate

Kryetari i Lidhjes Social Demokrate, Zoran Zaev i ka bërë thirrje të gjitha partive politike shqiptare, që fituan mandate në zgjedhjet e së dielës, që t’i bashkohen partisë së tij për formimin e qeverisë së re dhe ta refuzojnë Nikolla Gruevskin.

“Regjimi nuk guxon të formojë qeverinë e Maqedonisë. Të gjitha partitë, përveç VMRO DPMNE-në nuk duhet të mendojnë për të shkelur vullnetin e shprehur në zgjedhje për formimin e qeverisë në koalicion me Nikolla Gruevskin. Rezultatet e para kanë hutuar qytetarët”.

“Rezultatet zyrtare ende nuk kanë dalë. Nëse korrigjohen një pjesë e numrave, LSDM do të ketë më shumë mandate në njësinë e gjashtë zgjedhore dhe me këtë rezultati do të jetë 50 me 50 në deputetë”, ka deklaruar Zaev në paraqitjen e parë pas publikimit të rezultateve të para nga KSHZ-ja sipas të cilave VMRO-ja e Gruevskit ka fituar dy mandate më shumë se partia që drejtohet prej tij, LSDM.

Ai tha se në zgjedhjet e së dielës kishte një fitore historike nga ana e qytetarëve të Maqedonisë, që nuk guxon sipas tij, në asnjë mënyrë të shuhet.

“Së bashku rrëzuan regjimin, qytetarët zgjodhën jetën në Maqedoni. Dua ta respektoni vullnetin e qytetarëve. Shumica e qytetarëve votuan për ndryshime. Arritëm të bashkojmë Maqedoninë etnike”, tha Zaev duke iu referuar votimeve ku shumë shqiptarë dhe pjesëtarët të bashkësive tjera etnike votuan për partinë e tij.

Formimi i qeverisë së re është në duart e partive shqiptare pasi as VMRO-ja e as LSDM-ja nuk do të jenë në gjendje të formojnë qeverinë e re.

Partitë shqiptare kanë fituar 20 mandate; 10 BDI-ja, 5 Lëvizja BESA, 3 Aleanca për Shqiptarët dhe 2 PDSH-ja.

BDI ende nuk është deklaruar për pozicionin e saj, ndërsa Lëvizja Besa ka bërë thirrje për një qeveri të gjerë ose reformatore, por edhe kjo pjesëmarrjen do ta kushtëzojë me kërkesat për çështjet shqiptare, njëjtë sikur edhe Aleanca për Shqiptarët.

Pavarësisht kësaj, kryetari i VMRO-DPMNE-së, Nikolla Gruevski ka thënë se qeverinë do ta formoj partia e tij sa më shpejtë që të jetë e mundur.

Shpallen rezultatet përfundimtare të zgjedhjeve në Maqedoni

Komisioni Shtetëror i Zgjedhjeve në Maqedoni i deklaroi rezultatet e zgjedhjeve të djeshme parlamentare dhe ndarjen e mandateve, në bazë të procesverbaleve origjinale.

KSHZ njofton se VMRO-DPMNE ka fituar 51 mandate, ndërkaq LSDM 49, njofton Portalb.

Në bllokun shqiptar, BDI ka fituar 10 mandate, Lëvizja BESA 5, Aleanca për Shqiptarët 3 dhe PDSH 2.

Shqiptarët e Maqedonisë me 20 deputetë, nga 27 sa kishin në mandatin e kaluar

Komisioni Shtetëror i Zgjedhjeve në Maqedoni ende nuk ka shpallur rezultatet zyrtare të zgjedhjeve mbi numrin e ligjvënësve që kanë fituar partitë në garën e djeshme zgjedhore. Kjo gjë po krijon shqetësim tek një pjesë e partive. Ndërkohë, partitë shqiptare sipas të gjitha gjasave, do të mbeten me njëzet deputetë në parlamention e vendit, nga 27 sa ç’kishin mandatin e kaluar.

KSHZ pothuaj në të gjitha ciklet zgjedhore ka qenë i shpejtë dhe ka reektuar afatet ligjore për shpalljen e rezultateve.

Zgjedhjet e së dielës nuk sollën një fitues të qartë që do të mund ta formonte lehtësisht qeverinë e re të Maqedonisë. Komisioni Shtetëror i Zgjedhjeve po mba në pasiguri gjendjen e posteve të ligjvënësve të ri që duhet të dalin nga zgjedhjet e parakohëshme parlamentare. Ndërkaq, dy partitë mëtë mëdha maqedonase e ndiejnë veten fitimtarë në garë. VMRO-DPMNE thotë se ka marrë 51 vendeve në parlamenat ndërsa sipas saj, Lidhja Social demokrate të ketë narrë 49. Por kjo e fundit pret fjalën e fundit nga Komisioni Shtetëror të Zgjedhjeve. Sipas votës popullore, VMRO-DPMNE ka marrë rreth 17 mijë vota më shumë se socialdemokratët, në shkallë vendi. Por Maqedonia ka 67 zona zdhjedhore dhe secila dërgon nga 20 deputetë në parlament.

Nëse mandati i jepet VMRO-DPMNE-së, asaj i duhen votat e BDI-së për ta formuar qeverinë. Dhe nëse mandatin e merr Lidhja Social Demokrate, asaj do t’i duhen të tre partitë tjera shqiptare në koalicionin qeveritar.

Në këtë garë, duket se dy partitë më të mëdha shqiptare BDI dhe PDSH kanë dalur të humbura. BDI, nëse nuk ka ndonjë ndryshim eventual të rezultatit, do të ketë 10 deputetë, ndërsa PDSH – vetëm 2 deputetë. Lëvizja Besa ka rezultuar me sukses duke fituar 5 vende deputetësh dhe Aleanca për Shqiptarët ku përfshihen Lëvizja për Reforma, Uniteti dhe një pjesë e Rilindjes Demokratike ka marrë 3 deputetë. Shqiptarët të gjithë së bashku do të kenë 20 deputetë, nëse nuk ka ndonjë ndryshim prej ankimeve të mundshme. Në mandatin e kaluar ishin 27 ligjvënës shqiptarë.

Drejtuesit e partive shqiptare ia hedhin fajin njëri tjetrit për rezultatin e këtillë.

Pas zyrtarizimit të rezultatit zgjedhor nga Komisioni Shtetëror i Zgjedhjeve fillojnë të rrjedhin afatet për formimin e qeverisë së re. Me që nga diaspora nuk pritet të ketë tre deputetë për shkak të pjesëmarrjes së vogël në votime atje, parlamenti i ri do të ketë 120 vende dhe mandatarit të ri i duhen 61 vota në parlament. Analistët nuk janë shumë optimistë se një qeveri e tillë do të jetë stabile dhe të sjellë ligje cilësore.

Gruevski: VMRO-DPMNE është fituese e zgjedhjeve në Maqedoni

Lideri i VMRO-DPMNE-së, Nikolla Gruevski, deklaroi se në zgjedhjet e parakohshme parlamentare në Maqedoni, partia e tij është fituese

SHKUP – Lideri i VMRO-DPMNE-së, Nikolla Gruevski, deklaroi se në zgjedhjet e parakohshme parlamentare në Maqedoni, partia e tij është fitues, si dhe shtoi se në Maqedoni përsëri u mbajtën zgjedhje të drejta, demokratike dhe kredibile në të cilat qytetarët në mënyrë të lirë votuan dhanë besimin e tyre.

Gruevski duke uruar qytetarët të cilët shfrytëzuan të drejtën e tyre të votës, shtoi se sipas rezultateve nga 88.61 përqind e votave të përpunuara, mbështetje partisë së tij i kanë dhënë gjithsej 434.051 qytetarë, ndërsa openentit LSDM mbështetje i kanë dhënë 415.258 qytetarë.

“Falënderojmë të gjithë votuesit, te ato komuna ku fituam, por edhe te ato ku humbëm zgjedhjet. Pa ata dhe pa votën e tyre nuk do të arrinim këtë fitore”, u shpreh ai.

Gruevski shtoi se në këto zgjedhje një befasi kishte te blloku shqiptar, duke theksuar se LSDM ka marrë një mbështetje të qartë nga komuniteti shqiptar në vend.

“Është koha e formimit të koalicionit dhe e formimit të Qeverisë në Maqedoni. Kriza patjetër duhet të përfundojë dhe Maqedonia të ecë përpara. Ky do të jetë qëllimi ynë kryesor në ditët dhe javët e ardhshme, kriza në Maqedoni të përfundojë me këto zgjedhje dhe vendi të ecë përpara”, tha Gruevski. aa

LSDM kremton para Qeverisë

Zëdhënësi i LSDM-së Petre Shilegov tha se partia udhëheq ose fiton në Shkup, por edhe në Kumanovë, Kavadar, Strugë, Strumicë, Gostivar, Dibër

SHKUP – Simpatizantë dhe aktivistë të LSDM-së janë mbledhur para ndërtesës së Qeverisë për të kremtuar fitoren. Zëdhënësi i LISDM-së Petre Shilegov tha se partia udhëheq ose fiton në Shkup, por edhe në Kumanovë, Kavadar, Strugë, Strumicë, Gostivar, Dibër.

Edhe Lideri i Lidhjes Socialdemokrate të Maqedonisë Zoran Zaev para Qeverisë së Maqedonisë iu drejtua aktivistëve dhe tha se ka një mandat më tepër se oponenti i tij politik VMRO-DPMNE.

Ai tha se atë që ka bërë populli sot do të shkruhet në histori, duke shtuar se LSDM ka një deputet më tepër.

Ndërkohë Komisioni Shtetëror Zgjedhor vazhdon të përpunojë dhe publikojë rezultatet nga votimi i sotëm nga zgjedhjet e parakohshme. aa

Maqedoni: VMRO-DPMNE kryeson me rezultat të ngushtë

Rezultatet e zgjedhjeve në Maqedoni pas numërimit të 95 për qind të votave

Në Maqedoni u mbajtën zgjedhjet e parakohshme parlamentare që pasuan një krizë politike që pasoi pohimet për korrupsion qeveritar, gjë që çoi në dorëheqjen e kryeministrit Nikolla Gruevski në muajin janar të këtij viti.

Sipas të dhënave të Komisionit të Zgjedhjeve në bazë të 99 për qind të votave të numëruara, VMRO-DPMNE e Nikolla Gruevskit ka fituar 38.06 për qind të votave, ndërsa Lidhja Social Demokratike e Zoran Zaevit, ka fituar 36.69 për qind.

Në vend të tretë është Bashkimi Demokratik për Integrim i Ali Ahmetit që ka fituar 7.30 për qind i pasuar nga Lëvizja Besa me 4.87 për qind.

Zyrtari i lartë i VMRO-DOPMNE-së Vlatko Gjorgjev shpalli fitoren, ndërsa theksoi se Lidhja Social-demokratike ka fituar më shumë në zonat e banuara me shqiptarë.

Por, udhëheqësi i LSD-së, Zoran Zaev, tha se koalicioni opozitar ka një mandat më shumë sesa VMRO DPMNE.

Zgjedhjet e së dielës në Maqedoni pasuan një krizë politike për shkak të pohimeve për korrupsion qeveritar, gjë që çoi në dorëheqjen e kryeministrit Nikola Gruevski në muajin janar të këtij viti.

Vendi është drejtuar më pas nga një qeveri teknike.

Njëmbëdhjetë parti politike dhe koalicione konkurruan për të zënë vend në parlamentin me 123 deputetë. Maqedonia është e ndarë në gjashtë zona zgjedhore dhe secila dërgon nga njëzet deputetë në parlament, si dhe zona e shtatë që përfshin diasporën, prej nga zgjidhen tre deputetë.

Në zgjedhje morën pjesë rreth 66 për qind e mbi 1 milion e 700 mijë votuesve me të drejtë vote. Zgjedhjet u vëzhguan nga 667 vëzhgues ndërkombëtarë dhe 7 mijë e 585 vendës. Vetëm ODIHR kishte dërguar 360 vëzhgues.

Nikola Gruevski, udhëheqës i partisë së qendrës së djathtë, VMRO-DPMNE, e cila ka qeverisur me ish republikën jugosllave në koalicione të ndryshme për gati një dekadë, synon të vazhdojë qeverisjen.

Ai është sfiduar nga Lidhja Social-demokratike e udhëhequr nga Zoran Zaev, i cili nxiti krizën politike duke akuzuar qeverinë për përgjime të paligjshme të dhjetëra mijëra qytetarëve dhe publikoi regjistrime për përfshirjen e qeverisë në korrupsion.

Katër parti politike që përfaqësojnë shqiptarët, morrën pjesë në zgjedhje por duket se kësaj radhe kanë humbur vende. Tradicionalisht një parti shqiptare i bashkohet koalicionit qeverisës.

Votimet e së dielës shihen si sprovë për strategjinë e Bashkimit Evropian për të nxitur reforma të dhimbshme në shkëmbim të ndihmës.

BE-ja ka kritikuar për një kohë të gjatë qasjen e Gruevskit ndaj demokracisë dhe sundimit të ligjit, por ka nevojë për Maqedoninë që ndodhet në pozicion të rëndësishëm të së ashtuquajturës rrugë ballkanike të emigrantëve që synojnë Evropën perëndimore.

Mesazhi prekës i vogëlushes shqiptare për votuesit shqiptarë në Maqedoni

VOAL – Një vogëlushe shqiptare ua ka dërguar një mesazh prekës votuesve shqiptarë në Maqedoni.

“Mos e shit votën. TË LUTEM. Për hatrin tonë!” – shkruan vogëlushja shqiptare në një letër format.

Maqedonia po zhvillon sot zgjedhjet e katërta të parakokshme parlamentare. Në këto zgjedhje marrin pjesë 6 parti dhe 5 koalicione, do të votohet për 1092 kandidatë.

Nikolla Gruevski dha dorëheqjen në janar. Tani ai po kërkon rikthimin në detyrën që e mban prej vitit 2006.

Maqedonia po voton

Pamje nga votimet e 11 dhjetorit

Në orën 7 të mëngjesit në Maqedoni ka nisur procesi zgjedhor për zgjedhjet e jashtëzakonshme parlamentare.

Sipas të dhënave të para të Komisionit Shtetëror të Zgjedhjeve, të gjitha 3,480 qendrat e votimit janë hapur me kohë dhe për momentin nuk janë regjistruar parregullsi.

Edhe organizatat që po vëzhgojnë procesin zgjedhor, përveç disa aspekteve të vogla teknike, nuk kanë raportuar për parregullsi. Të drejtë vote kanë rreth 1.8 milionë shtetas, të cilët duhet të zgjedhin përbërjen e re parlamentare prej 120 deputetësh.

Zgjedhjet e jashtëzakonshme parlamentare në Maqedoni erdhën si pasojë e krizës së thellë politike, në të cilën ndodhet vendi që nga zgjedhjet e vitit 2014, e në veçanti pas asaj që njihet si aferë e përgjimeve që lëkundi stabilitetin e vendit me trazirat më të mëdha që nga pavarësia e saj, 25 vjet më parë.

Në garë për mandate janë 11 lista të partive dhe koalicioneve partiake, katër prej të cilave janë të subjekteve politike shqiptare. Beteja kryesore zhvillohet mes VMRO DPMNE-së, LSDM-së, BDI-së, PDSH-së, Lëvizjes Besa dhe Aleancës për Shqiptarët.

Zgjedhjet mbahen sipas sistemit proporcional me lista të mbyllura dhe ato po zhvillohen në gjashtë njësi zgjedhore ku çdonjëra prej tyre nxjerr nga 20 deputetë.

Një ditë më parë, të shtunën, votimet janë mbajtur në diasporë, ku nga dalja në votime do të varet nëse do të ketë edhe tre apo më pak deputetë shtesë në institucionin e ri ligjvënës.

Nga Komisioni Shtetëror i Zgjedhjeve thanë se fletët e votimit dhe materiali tjetër i nevojshëm për realizimin e procesit zgjedhor,është shpërndarë me kohë dhe presin që zgjedhjet të kalojnë në atmosferë demokratike.

Procesi i votimit po monitorohet nga rreth 5 mijë vëzhgues vendorë dhe ndërkombëtarë.

“Komisioni Shtetëror i Zgjedhjeve ka akredituar 4,047 vëzhgues nga gjashtë organizata vendore, rreth 650 vëzhgues të huaj, 60 gazetarë, përkthyes dhe personel tjetër që do të jetë pjesë e procesit të vëzhgimit të procesit zgjedhor”, deklaroi Lupka Guguçevska, zëdhënëse e KSHZ-së.

Numrin më të madh të vëzhguesve të huaj e ka misioni i OSBE-ODIHR, pastaj Këshilli i Evropës dhe Parlamenti Evropian. Përfaqësuesit e ambasadave dhe misioneve të huaja diplomatike në vazhdimësi kanë bërë thirrje për zgjedhje të lira dhe demokratike si kusht kryesor për kthimin e Maqedonisë në normalitet.

Për mbarëvajtjen e procesit zgjedhor janë angazhuar edhe forca të shumta policore të pranishme në të gjitha vendvotimet. Për prishjen apo pengimin e procesit zgjedhor në bazë të ndryshimeve të reja të Kodit Zgjedhor parashihen dënime të ashpra që nga gjobat që sillen deri në 5 mijë euro e deri në dënime prej 3 deri më 5 vjet burg në rast të mbushjes së kutive të votimit apo mashtrimeve zgjedhore.(REL)

Skandal: Gruevski kërcënoi Zaevin me atentat (foto)

Opinioni në Maqedoni është i skandalizuar nga kërcënimi, indirekt por i qartë, me atentatin që i bëri lideri i VMRO-DPMNE-së, ish-kryeministri Nikolla Gruevski, oponentit të tij politik, liderit të Lidhjes Socialdemokrate të Maqedonisë, Zoran Zaevit.

Duke folur në mitingun në Dellçevë, Gruevski iu referua fjalimit të Zaevit në të njëjtin qytet, kur tha se “ç’do të thoshte Goce Dellçevi (themeluesi i VMRO-së historike në fillim të shekullit XX, v.j.) po ta shihte këtë qeveri të sotme të VMRO-DPMNE-së”.

“Ai paska gjetur ta citojë Dellçevin. Ia tregoj unë. Po të ishte Dellçevi sot gjallë, ai as që do të mund të përshëndetej me të, atij do t’i dërgohej vetëm Qosja për ta kryer muhabetin me një njeri të tillë”, porositi Gruevski Zaevin.

qosja-kasapi_1481100979-2110329

Andon Lazov Janev, i njohur si Qosja apo Kasapi (1855 – 10 shtator 1953) është revolucionar maqedonas, i cili nofkën Kasapi e ka marrë pikërisht për shkak të atentateve që ka kryer në emër të VMRO-së. Busti i tij është pjesë e projektit Shkupi 2014 dhe sipas qeverisë së Gruevskit llogaritet për hero, kurse simbolikisht është vendosur para pallatit të drejtësisë.

Komentet në publik pas kërcënimit të këtillë të Gruevskit janë të shumta dhe kryesisht thonë se mënyra e këtillë e qërimit të hesapeve me kundërshtarët politikë nuk do të ishte asgjë e re, duke marrë parasysh disa vdekje të dyshimta, burgosjet dhe dënimet në procese të montuara, hakmarrjet me shkatërrimin e bizneseve, e ngjashëm.

Ali Ahmeti shkon me antiplumb në Kumanovë (foto)

Bashkimi Demokratik për Integrim në kuadër të fushatës për zgjedhjet e 11 dhjetorit mbrëmë mbajti tubim në Kumanovë, pas të cilit në disa media shqiptare u publikua një foto e liderit partiak Ali Ahmetit, ku thuhet se shihet se ai mban jelek antiplumb.

Fotografinë e publikoi portali Almakos, ndërsa e transmetuan edhe një numër mediash tjera, duke shtuar: “Parashtrohet pyetja se nga kush u frikësua Ali Ahmeti, sakaq nuk i mjaftuan forcat e mëdha të sigurisë derisa u fut në sallë, por edhe brenda saj ishte i mbështjellur me pancir?!”.

ahmeti-pancir_14

Mbrëmë nëpër Kumanovë u vërejtën forca të mëdha policore, ndër të cilat edhe autoblinda, që shoqëruan delegacionin e BDI-së gjatë hyrjes dhe daljes nga Shtëpia e Kulturës ku u mbajt tubimi parazgjedhor.

Masat e shtuara të sigurisë për këtë tubim elektoral ishin si rezultat i incidenti që ndodhi javë më parë kur disa qytetarë të revoltuar të Kumanovës dhe familjarët e komandant Shqiponjës qëlluan me gurë eskortën në të cilën udhëtonte lideri Ahmeti, gjatë një tubimi në fshatin Çerkes të Kumanovës.

Friedrich Eber: Në Maqedoni 52.9 përqind e të rinjve janë të papunë

Në Maqedoni shkalla e papunësisë tek të rinjtë është 52.9 përqind duke u radhitur në vendin e tretë në listën botërore, ndërkohë që në vend të parë është Bosnjë e Hercegovina dhe në vend të dytë Greqia

SHKUP – Sipas hulumtimit të kryer nga Fondacioni “Friedrich Eber”, zyra në Shkup, mbi papunësinë tek të rinjtë në Republikën e Maqedonisë për vitin 2016, thuhet se “në Maqedoni padyshim që shkalla e papunësisë tek të rinjtë, e cila është 52.9 përqind është alarmante, duke u radhitur në vendin e tretë në listën botërore, ndërkohë që në vend të parë është Bosnjë e Hercegovina dhe në vend të dytë Greqia”.

Nina Starova, autore dhe prezantuese e hulumtimit të këtij fondacioni në debatin e mbajtur në Shkup, ku u diskutuan sfidat dhe rekomandimet për uljen e shkallës së papunësisë tek të rinjtë, theksoi se mbi 60 përqind e të rinjve në këtë vend mendojnë se është vështirë të gjendet punë. Ajo shtoi se këto hulumtime tregojnë faktori kryesor për punësim është lidhjet personale dhe politike.

“Fatkeqësisht për shkak të mungesës së këshillimit të karrierës shpresat e tyre nga tregu i punës janë joreale dhe nuk kanë njohuri për tregun e punës”, u shpreh Starova, si dhe shtoi se 50 përqind e të rinjve në vend preferojnë të punojnë në administratë publike, ndërsa 50 përqind mendojnë ose përgatitet të lëshojnë vendin.

Profesor universitar, pjesëmarrës në debat, Dragan Tevdovski, tha se kjo normë e papunësisë tregon se pse të rinjtë emigrojnë nga Maqedonia, duke shtuar se edhe politikat aktuale në vend nuk japin rezultate të mira për motivimin e të rinjve.

“Absolutisht që nevojiten reforma në të gjitha nivelet e arsimit në Maqedoni, nëse me të vërtetë duam një ndryshim serioz, kryesisht për të përmirësuar produktivitetin, për rritjen e pagave dhe për mundësi më të mëdha për punësim. Mirëpo, duhet të jemi të vetëdijshëm se këta reforma duhet të mos vonohen dhe të realizohen sa më shpejtë”, deklaroi Tevdovski.

Fondacioni “Friedrich Eber”, i cili u themelua në vitin 1925, si një trashëgimi politike e presidenti të parë gjerman Friedrich Eber, është një institucion jo fitimprurës, politik me interes publik, i angazhuar në parimet dhe vlerat bazë të demokracisë sociale në punën e tij edukuese dhe të orientuar nga politika. aa

Tetovë, mbahet festivali tradicional i këngës qytetare “Teuta”

TETOVË – Në kuadër të manifestimit “Tetova feston Nëntorin” Qendra për Kulturë-Tetovë dhe Komuna e Tetovës organizuan edicionin e 7-të të Festivalit të këngës qytetare “Teuta”, ku me një program të pasur artistik nga të gjitha trojet shqiptare pjesëmarrësit performuan para publikut tetovar.

Kryetare e Komunës së Tetovës, Teuta Arifi, tha se këtë manifestim, tashmë tradicional, jo vetëm që e përkrahin, por edhe konceptualisht e kanë ndërtuar. Ajo theksoi se ky manifestim flet për vlerat e bashkëpunimit mes shqiptarëve të Maqedonisë, Shqipërisë dhe Kosovës.

“Këtë vit me të vërtetë kishte mjaftë risi. Kombinimi i pjesëmarrësve prej të gjitha trojeve shqiptare është edhe tendenca e këtij manifestimi. Mirëpo, përfshirja edhe e një kori që interpreton në gjuhën turke, i cili u mirëprit nga publiku, edhe njëherë flet për vlerat e tolerancës që shqiptarët i kanë në këto rajone”, deklaroi Arifi.

Në këtë edicion mori pjesë edhe kori “Sevim Baki”, i cili për herë të parë performoi në gjuhën turke, ndryshe nga herët tjera kur koret performonin vetëm në gjuhën shqipe. Ardhja e këtij kori bashkë me dy kore tjera nga Kosova është mbështetur nga Qendra Kulturore “Yunus Emre” – Prishtinë.

Drejtor i Qendrës Kulturore Turke “Yunus Emre” – Prishtinë, Mehmet Ülker, bëri të ditur se koret e ardhur nga Kosova përbëhen prej rreth 80 personash.

“Instituti ‘Yunus Emre’ zbaton punime për promovimin e kulturës, artit turk dhe zgjerimin e fushës së veprimit të tij. Jemi një institucion që synon ndërtimin e urave të miqësisë me vendin në të cilin ndodhemi. Ne synojmë të ndërtojmë ura të vëllazërisë mes shqiptarëve, maqedonasve, turqve dhe kosovarëve”, u shpreh Ülker.

Këtë vit me një program të pasur artistik performuan Kori i grave “Teuta”, si nikoqire e manifestimit, Ansambli “Isuf Myzyri”, Kori “Zërina – Prishtinë”, Kori “Sevim Baki”, Kori i grave të Pejës, si dhe SHKA “Agimi”. aa

Shehapi: “Rregullimi i jashtëm i Muzeut të Alfabetit në Manastir fillon më 2017”

“Sa i përket rregullimit të eksterierit të kësaj godine që ka rëndësi të pakontestueshme për historinë dhe kulturën e shqiptarëve, është miratuar projekti, i cili do të realizohet me ndihmën e fondeve IPA të BE-së”

SHKUP – Nga dita e diel, 13 nëntor, me një koncert të organizuar nga SHKA “Kongresi i Manastirit” filloi axhenda e shënimit të manifestimit “Manastiri feston”, kushtuar 22 Nëntorit – Ditës së Alfabetit Shqip, ndërsa manifestimi kryesor do të jetë më 22 nëntor me hapjen solemne të Dhomës Përkujtimore të Komisionit të Alfabetit dhe figurave prej silikoni të anëtarëve të Komisionit të Kongresit të Manastirit.

Siç theksoi Sekretari shtetëror në Ministrinë e Kulturës të Republikës së Maqedonisë, Behixhudin Shehapi, qëllimi është që në mënyrë sa më madhështore të shënohet kjo ngjarje e rëndësishme e historisë dhe kulturës së popullit shqiptar.

“Projekti i Dhomës Përkujtimore të Komisionit të Alfabetit dhe figurat prej silikoni të tyre në të është një projekt i paraparë me Programin e Qeverisë së Maqedonisë për periudhën 2014-2018 dhe është realizuar nga Ministria e Kulturës. Vlera e përgjithshme e projektit, përfundimi i të cilit i ka dhënë pamjen e duhur kësaj dhome, ka arritur shumën e 7.9 milionë denarëve”, theksoi Shehapi.

Shehapi njoftoi se në hapjen e Dhomës Përkujtimore të Komisionit të Alfabetit në Muzeun e Alfabetit Shqip, i cili ndodhet në Manastir, do të marrë pjesë zv/kryeministri i Qeverisë së Maqedonisë për zbatimin e Marrëveshjes së Ohrit, si dhe përfaqësues të institucioneve të vendit dhe përfaqësues të lartë nga Shqipëria.

Për shqiptarët e Maqedonisë kjo ditë është ditë feste dhe nuk punohet, ndërsa me vendim të Qeverisë së Maqedoni që nga viti 2008 është themeluar “Muzeu i Alfabetit Shqip” në vendin ku u tubuan dijetarët shqiptarë në Manastir. Mirëpo, ky muze vazhdimisht është përballur me probleme mbi rinovimin dhe pronësinë e të njëjtës.

“Sa i përket rregullimit të eksterierit të kësaj godine që ka rëndësi të pakontestueshme për historinë dhe kulturën e shqiptarëve, tanimë është miratuar projekti, i cili do të realizohet me ndihmën e fondeve IPA të Bashkimit Evropian. Nëse nuk paraqitet ndonjë problem i paparashikuar, realizimi i projektit për rregullimin e jashtëm të godinës së Muzeut të Alfabetit do të duhet të fillojë në fillim të vitit 2017”, deklaroi Shehapi.

Ai shtoi se çështja e pronësisë është rregulluar, por kontestuese janë dy dyqanet që ndodhen në hapësirat e muzeut, për të cilat siç tha ai, për një kohë shumë të shkurtër do të rregullohet edhe çështja e dyqaneve.

Manifestimi “Manastiri feston” do të mbyllet me gala koncertin që do të mbahet në Qendrën e Kulturës në Manastir. Koncerti i përgatitur nga Orkestra e Filarmonisë së Universitetit të Arteve të Shqipërisë “Ibrahim Madhi”, do të dirigjohet nga Olsi Qinani dhe me interpretim solistik të violinistit shqiptar me famë botërore, anëtarit të Filarmonisë së Vjenës, Shkëlzen Doli. Mysafir special në këtë mbrëmje do të jetë njëri nga aktorët e gjithanshëm dhe më të adhuruar nga dashamirët e këtij arti suprem, Çun Lajçi.

Ndryshe, Dita e Alfabetit Shqip apo “Kongresi i Manastirit” shënon mbledhjen e dhjetëra dijetarëve shqiptarë më 14-22 nëntor të vitit 1908 në Manastir, me synimin e përcaktimit të alfabetit të gjuhës shqipe. Në këtë kongres delegatë të ardhur nga anët e Shqipërisë, si dhe nga shoqata dhe klube shqiptare nga mbarë bota, miratuan vendimin e pranimit të alfabetit latin me disa ndryshime të shkronjave duke i adaptuar në 36 shkronja të gjuhës shqipe.

Për popullin shqiptar “Kongresi i Manastirit” ishte ngjarja më e rëndësishme në fillim të shekullit XX, ku me rezultatet e tij më 28 nëntor të vitit 1912 u shpall edhe pavarësia e Shqipërisë. Me këtë, 22 nëntori mbetet ditë përkujtimore për popullin shqiptar si “Dita e Alfabetit”. aa

Zëvendësministri shkakton aksident, thotë se po sulmohej nga disa shqiptarë

Një aksident trafiku – i shkaktuar nga një zyrtar i lartë i qeverisë maqedonase – ka ngritur debate të shumta mbi mos përgjegjësinë e funksionarëve shtetëror në rast të shkeljes së ligjit.

Në fakt, zëvendësministri i Punës dhe Politikës Sociale, Dime Spasov, ka shkaktuar një aksident, duke goditur – në gjendje të dehur – disa makina, gjatë drejtimit të një makine zyrtare dhe pas incidentit ka ikur nga vendi i ngjarjes.

Të dhënat janë konfirmuar nga Ministria e Punëve të Brendshme dhe nga dëshmitarë, edhe pse nga partia e tij, VMRO DPMNE, kanë thënë se Spasov ka shkaktuar aksident në ikje nga një grup kriminelësh që ishin lëshuar pas makinës së tij.

Nga partia e Gruevskit kanë thënë se rasti duhet t’i lihet organeve kompetente dhe se partitë nuk duhet të sjellin vendime apo të ndërmarrin hetime lidhur me këtë, por edhe raste tjera.

Këto pretendimet janë hedhur poshtë, si përpjekje për të ruajtur zyrtarin e qeverisë. Madje, vet ministrja e punës, Frosina Remenski nga LSDM-ja opozitare, e cila merr pjesë në qeverinë kalimtare për organizimin e zgjedhjeve, ka kërkuar dorëheqjen e zëvendësit të saj.

“Dime Spasov duhet të tërhiqet nga pozicioni i zëvendësministrit, për shkak të veprimit të tij të papërgjegjshëm. Për qëllime dhe interesa private, ai ka drejtuar automjetin zyrtar, pasi nuk ka asnjë dëshmi se vetura është përdorur për shërbime qeveritare, ndërsa veç kësaj ai ka rrezikuar edhe sigurinë e udhëtarëve në komunikacion, andaj ai duhet të dorëhiqet”, ka thënë ministrja Remenski.

Njohësit e çështjeve juridike thonë se në rastin konkret – të paktën zyrtari që ka shkaktuar aksidentin, edhe pse pa pasoja në njerëz – do të duhej të jepte dorëheqje, por, sipas profesorit Bashkim Selmani, një veprim i tillë nuk ndodh në Maqedoni, pasi institucionet janë mbi ligjin.

“Ata që i bëjnë ligjet dhe që i detyrojnë qytetarët për t’i respektuar ato, në fakt ata janë shkelësit më të mëdhenj, që realisht nuk kanë asnjë përgjegjësi. Pra, në këtë rast, ne kemi argumente se në Maqedoni nuk funksionon shteti i së drejtës dhe ligjet që miratohen bëjnë përjashtime”, thotë Bashkim Selmani, profesor i së drejtës penale në Universitetit e Tetovës.

Reagime ka pasur edhe nga sektori civil, i cili gjithashtu kërkon përgjegjësi, jo vetëm nga Dime Spasov, por edhe nga çdo zyrtar tjetër që mund të shkaktojë aksidente apo të shkel ligjin. Pohimet se Spasov ka qenë i sulmuar nga grupe kriminale, aktivistët i vlerësojnë si qesharake.

“Ne kishim mundësi të dëgjojmë gënjeshtrën më të mëdhe nga radhët e tyre se gjoja Dime Spasov, në fakt, ka qenë i sulmuar nga disa shqiptarë që, sipas tyre, kanë të kaluar kriminale…pra, gjoja ai ka qenë i detyruar të ikë që të shpëtojë kokën. Kjo është gënjeshtër e pa dëgjuar ndonjëherë.”

“Ne kërkojmë përgjegjësi nga ky zyrtar i papërgjegjshëm. Vazhdojmë të kërkojmë nga organet e ndjekjes penale dhe të sigurisë që të mos e kursejnë këtë zyrtar – por edhe për të – të vlejë ligji ashtu siç vlen edhe për qytetarët e tjerë”, thotë Pavle Bogoevski, aktivist i shoqërisë civile dhe përfaqësues i Komitetit të Helsinkit.

Aksidente komunikacioni nga zyrtarët kanë ndodhur edhe më parë në Maqedoni, por edhe shkelje tjera, si: kërcënime e sulme fizike ndaj gazetarëve e personave të tjerë, mirëpo deri më tani asnjë prej tyre nuk paraqitur dorëheqje apo të jetë ndjekur nga institucionet kompetente. (REL)

SHQIPTARËT DUHET TË KENË NJË ATDHE, JO DISA ATDHE – Nga Thanas L. GJIKA

(Vlerësime për librin “Në strofullën e djallit” të Shpëtim Pollozhanit)

Ne Foto: Z. Shpetim Pollozhani me bashkeshorten dhe miq ne oborrin e shtepise

Shoqata e të Burgosurve dhe të Dëmtuarve Politikë Shqiptarë të Maqedonisë me qendër në Shkup, botoi në vitin 2015 librin “Në strofullën e djallit” të ish të burgosurit politik Shpëtim Pollozhani. Ai ka vite që është kryetar i Shoqatës së ish të përndjekurve të Maqedonisë (The association of former political prisoners).

Ishte një fat për mua dhe bashkëshorten time Julia, që në gusht të këtij viti gjatë udhëtimit për të shpërndarë në Kosovë e Maqedoni, librin tim “Mosdënimi i krimit është krim i ri” (OMSCA-1 Tiranë 2016), u ndalëm dhe në Strugë, ku miqtë tanë Agim Vinca dhe Ferid Abdullahu na njohën me z. Pollozhani, një nga veprimtarët më të shquar të lëvizjes kombëtare shqiptare të Maqedonisë. Pasi u njohëm me të në lokalet e bukura të shqiptarëve anës lumit Drin, ai na dhuroi këtë libër dhe na vuri në dijeni se së shpejti do të botojë dhe dy vëllime të tjera si vijim, ku do të trajtojë lëvizjen kombëtar të shqiptarëve të Maqedonisë pas shkërmoqjes së Jugosllavisë së Titosin, pra veprimtarinë e tij e të bashkëpunëtorëve të tij të pas vitit 1991.
“Në strofullën e djallit” autori ka përmbledhur në 380 faqe të formatit të madh, ngjarje, kujtime, mbresa nga vitet 1980-1989 kur ai vuajti dënimet në burgjet e RSF të Maqedonisë, në burgjet e Strugës, Manastirit, Ohrit, Idrizovës dhe së fundi në burgun e Kotorit të Malit të Zi.
Ngjarjet dhe personat historikë që përshkruhen aty janë autentikë, pa zbukurime letrareske. Tipar kryesor i këtij libri është besnikëria në riprodhimin e ngjarjeve dhe në përshkrimin e jetës në ato burgje ku nëpunësit, policët, rojet dhe shërbëtorët e tyre, këto qenie çnjerëzore, ua bënin jetën të burgosurve shqiptarë shumë shumë të rëndë derisa disa binin në depresion e vrisnin veten.
Që në faqet e para ndjehet se autori është një penë e talentuar dhe me kulturë (ka mbaruar shkollën e lartë dhe ka marrë formim të mëtejshëm përmes leximit të shumë veprave në disa gjuhë të huaja). Ai ia ka arritur që përmes përshkrimit me stil letrar, mbushur shpesh me sentenca popullore e me thënie nga shkrimtarë e filozofë të njohur, të bëjë tërheqës përshkrimin e jetës në atë ferr, gjë që e tërheq lexuesin derisa e mbaron veprën. Ai nuk mjaftohet vetëm me rrëfimin e jetës së rëndë plot mungesa e vuajtje dhe të torurave që i bëheshin atij dhe të burgosurve të tjerë, por e mbush veprën me gjithçka nga jeta brenda burgjeve, jetë e cila nuk ishte thjesht një nënshtrim a vegjetim, por e mbushur me aktivitete të ndryshme të fshehta nën hundën e policëve, rojeve dhe spiunëve. Të paharrueshëm janë dhe shokët e tij me të cilët ai bashkëvuante e bashkëpunonte në ato kushte aq të vështira. Midis tyre përmenden Zaim Beqiri, Esat Abduramani, Destan Aliu, Bashkim Mashkulli, Kastriot Haxhirexha, Muadin Bajrami, Halit Naxhaku, Bejtulla Ademi, Fadil Bajrami, imam Kadri Pollozhani, etj, etj, të cilët ai i përmend me mirënjohje për veprimtarinë e përbashkët. Veprimtari që shpuri në ndërgjegjësimin e shumë të burgosurve, në kthimin e tyre nga katundarë indiferentë në të përvuajtur që e kuptonin se kush ishin fajtorët e vëtetë të vuajteve të tyre dhe të dinin si të silleshin me ta me dinjitet. Përmes kësaj pune të kujdesshme, vitet e burgimit për shumë fshatarë me origjinë nga zona të thella rurale ktheheshin në një shkollë të vërtetë…
Për të ndihmuar të dënuarit, autori tregon se si arriti të krijonte brenda burgut një bibliotekë të fshehtë me libra, një farmaci me disa barna të urgjencës, thika e çelsa për nevoja të të burgosurve. E gjithë kjo prapavijë e fshehtë, por shumë e dobishme për jetën e të dënuarve u krijua prej Shpëtimit përmes familjarëve të tij, të cilët me sakrifica arrinin të siguronin e të sillnin gjatë takimeve sendet që ai ua porosiste. Përshkrimet e takimeve shpalosin jetën familjare të autorit, ndjenjat fisnike dhe karakterin burrnor të tij dhe të familjarëve si bashkëshortja Xhevahire, nëna Ikbale, vëllai farmacist Bashkimi, vajzat Vjosa, Leza dhe Luleza, rritjen e të cilave babai i burgosur e vërente gjatë takimeve, kur ato i recitonin vargje të shkruara për të.
Marrëdhëniet e popullit shqiptar me qeveritarët maqedonë autori i ka përshkruar përmes skenave ku ai tregon momente nga gjyqet e tij, nga kontaktet me nëpunësit e burgut. Në të tilla marrëdhënie jepet mendësia atavike antishqiptare e të tillëve njerëz, të cilët përfaqësonin pushtetin e kohës. Pushtet hipokrit, i cili në botë e propagandonte Jugosllavinë si etalon të “bashkim-vllazërimit” të popujve, por që në praktikë vlonte antishqiptarizmi i shfrenuar.
Ky antishqiptarizëm, thotë autori në bisedat gojore me ne, u ka hyrë kaqe shumë në gjak maqedonëve, sa edhe sot ata na shikojnë dhe na trajtojnë ne shqiptarëve si popull të dorës së dytë. Nuk mund ta pranojnë popullin shqiptar si popull i barabartë edhe pse sot është krijuar një brez i ri i shkolluar në universitetet e Maqedonisë, Shqipërisë dhe Kosovës. Dhe kjo urrejtje do ta shpjerë Maqedoninë drejt shkatërimit si shtet, sepse krahas ne shqiptarëve të pakënaqur janë edhe shumë banorë të viseve lindore të Maqedonisë të cilët janë shpallur si bullgarë dhe kërkojnë të njihen si minoritet kombëtar bullgar. Kështu kombi maqedon sot përben një pakicë në shtetin e shpallur si Maqedoni. Pra si mund të ekzistojë ky shtet ku të quajturat pakica kombëtare shqiptare dhe ajo bullgare, të cilat përbëjnë shumicën, nuk kanë të drejta të barabarta me maqedonët, që përbëjnë pakicën. Ky shtet me këtë politikë nuk mund të shkojë përpara dhe nuk ka si të hyjë në Bashkimin Europian.
Ne shqiptarëve nuk na janë dashur dhe nuk na duhen disa atdhe, na është dashur dhe na duhet vetëm një atdhe dhe atë e kemi, Shqipërinë. Këtë e kam thënë dhe në vepër. Pra vetë sjellja antishqiptare e maqedonëve dhe e sërbëve, na ka ndihmuar dhe na ndihmon të kuptojmë se e ardhmja jonë më e mirë është bashkimi në një shtet shqiptar…” Të tilla vlerësime të veprimtarit dhe politikanit Pollozhani nuk mund t’i kundërshtojë asnjë politikan shqiptar.
Vepra shquhet dhe për aspektin e saj letrar, të cilin e pasurojnë mjaft përshkrime plot lirizëm për disa qenie të gjalla sado të vogla, si merimanga, milingona ose një çift trumcakësh, që i bëhen pjesëtarë të jetës autorit në kohën e izoluar të burgut. Në po këtë funksion janë dhe përshkrimet me dramacitet të disa ngjarjeve njerëzore. Të tillë pasazhe janë përshkrimet e kontrolleve të befasishme, puna e fshehtë për krijimin e mjeteve të ndryshme për të ndihmuar bashkëvuajtësit, riprodhimi i takimeve të shumëpritura me familjarët, sidomos ai në burgun e Kotorit. Ky takim, ndryshe nga takimet në burgun e Idrizovës, kërkonte që familjarët të kryenin qindra kilometra rrugë, dy netë fjetje nëpër hotele dhe plus këtyre një herë ndodhi dhe një aksident automobilistik gjatë të cilit u plagosën nëna e bashkëshortja, etj.
Jo rallë autori riprodhon vargje të disa poetëve tanë të shquar si At Gjergj Fishta, Faik Konica, etj, ose vargje nga krijimtaria popullore, etj. Pollozhani e pëlqen shumë frymën kritike të Faik Konicës ndaj shqptarëve, prandaj ai për të kritikuar politikanët shqiptarë të RFJ të Maqedonisë citon vargjet:
“Sot kanë dalë ca zuazarë.
Që u lintnë shqipëtarë
E punojnë natë e ditë
Që të mbetemi pa dritë.
Eshtë turp prej kësi krimbash
Të mundohet një komb trimash.” (f.329)

Për pasurinë e madhe jetësore të përfshirë në këtë vepër, z. Remzi Zeqja, hartuesi i parathënies së kësaj vepre, me të drejtë, thekson se ky libër mund të cilësohet si “një enciklopedi e vuajtjes gjer në mbijetesë.” (f. 5).
Besnikëria e rrefimit të ngjarjeve përmes një stili të këndshëm letrar na shtyjnë që këtë vepër ta fusim në radhën e veprave më të mira të letërsisë dokumentare shqipe me tematikë nga burgologjia shqiptare.
Propaganda zyrtare e Jugosllavisë së Titos e të Milosheviçit, si thamë e më lart, e paraqiste jetën e atij shteti si një parajsë të bashkim-vllazërimit të popujve. Mirëpo shqiptarët e Kosovës, ata të Maqedonisë, të Malit të Zi e të Sërbisë jugore, vuanin një shtypje të pabesueshme, sepse antishqiptarizmi dhe urrejtja ndaj shqiptarëve ushqehej si virtut tek sërbët, maqedonët e malazestë prej atij regjimi që shitej si regjim liberal komunist. E pikërisht këtë atmosferë poshtëruese e torturuese të shqiptarëve kanë në qendër disa vepra të Adem Demaçit për shqiptarët e Kosovës dhe kjo vepër e Shpëtim Pollozhanit për shqiptarët e Maqedonisë.
Veprimtaria atdhetare dhe vuajtjet e autorit të këtij libri nëpër burgjet e ish Jugosllavisë, na kujtojnë vuajtjet e shumë atdhetarëve të tjerë të përmendur në librin e z. Myrteza Bajraktari “Një vështrim tjetër i historisë” (WESTPRINT, Tiranë, 2011, 276 f.).
Mbas leximit të vëmendshëm të këtij libri, bindesh se populli shqiptar i Maqedonisë, që në kohën e Jugosllavisë së Titos e të Miloshevicit, ka ecur drejt forcimit të ndërgjegjes së tij kombëtare. Ai e meriton atë vlerësimin që i pati bërë njëzet e ca vjet më parë, studiuesi, poeti, kritiku, analisti, profesori Agim Vinca, i cili e quajti “Popull i pandalur”, në përmbledhjen e tij me analiza e polemika me këtë titull.

Debat i ashpër në Parlament: VMRO DPMNE kërkon dorëheqjen e Prokurores Speciale

Deputetët e partisë maqedonase në pushtet VMRO DPMNE gjatë debatit tri ditësh në komisionin për sistem politik në kuadër të parlamentit të Maqedonisë, gjatë prezantimit të prokurores speciale publike Katica Janeva për punën e saj gjashtë mujore, kanë theksuar se puna e saj “është shumë larg pritjeve”.

Ata thanë se “ajo nuk ka kapacitet për të realizuar detyrën për të cilën është zgjedhur” dhe e kritikuan prokuroren speciale “për anshmëri, duke punuar për interesat e partisë maqedonase në opozitë”. Gjithashtu deputetët e VMRO-DPMNE thanë se “ajo nuk është objektive”.

Deputeti i VMRO-DPMNE-së Kërste Mukoski, ka kërkuar dorëheqjen e prokurores speciale Katica Janeva, me arsyetimin se po “tallet me institucionin më të lartë ligjvënës në vend duke punuar në favor të opozitës”.

“E dini se çka do të thotë pozita e Prokurores speciale publike? E shihni se sa shumë kamera televizive u janë drejtuar? Të gjithë presin nga ju që të zgjidhet kriza e jo që t’i ndihmoni opozitës të vijë në pushtet. Opozitën as Zoti nuk mund ta ndihmojë të vijë në pushtet” ,ka theksuar deputeti i VMRO DPMNE-së Kërste Mukoski.

Përderisa zonja Janeva shkurt u është përgjigjur deputetëve se Institucionit të Prokurorisë Speciale, në vazhdimësi i bëhet obstruksione nga gjykatat e vendit duke i bërë shumë pengesa në realizimin e detyrës për të cilën është përgjegjëse.

“U humbën më shumë se gjashtë muaj në labirintet gjyqësore. Kohë që duhej të përfundojë lënda “puç” ku do të bëhej shumë e qartë se kush ka përgjuar. Pyetem nëse parlamenti ka ndërmend të kërkojë përgjegjësi nga kryetarja e këshillit gjyqësor dhe se kush është fajtor për prolongimet e shumta që kanë të bëjnë me marrjen e dëshmivetë kësaj lënde”, ka theksuar Katica Janeva Prokurore Speciale Publike e Maqedonisë.

Ajo tha se i janë “humbur tri ditë në vend që kohën ta shfrytëzojë për punë”.

Njohësit e çështjeve politike thonë se debati i ashpër i cili zhvillohet tanimë tri ditë në Parlamentin e Maqedonisë gjatë prezantimit të prokurores speciale publike për punën e saj gjashtë mujore, ka të bëjë me “goditje të ulëta nga ana e deputetëve të pushtetit” si rrjedhojë e frikës që kanë nga hetimet që zhvillon ky institucion dhe aspak s`kanë të bëjnë me analizën profesionale të punës së këtij institucioni.

“Mendoj se këta deputetë nuk përfaqësojnë atë që e kërkojnë qytetarët e Republikës së Maqedonisë prandaj prej gjithë këtij debati na servohet një cirk qëllimi final I të cilit është që të poshtërohet puna e zonjës Janeva duke e vendosur atë në një pozitë të pafavorshme duke krijuar para opinionit një pasqyrë se ajo nuk është serioze gjatë kryerjes së detyrës”, thekson Arsim Sinani komunikolog.

Nga ana tjetër avokati Zvonko Davitkoviq vlerëson se për tri ditë gjatë raportimit të zonjës Katica Janeva – prokure speciale Publike para deputetëvetë parlamentit pothuajse nuk është dëgjuar asnjë pyetje lidhur me përmbajtjen e raportit që duhet ta mbrojë ajo.

“I shoh deputetët të cilët më shumë janë të interesuar për kapacitetin e saj profesional, përvojën dhe gjëra të këtilla. Harrojnë se pikërisht ata me votën e tyre e zgjodhën në krye të institucionit Prokurore Speciale Publike. Kishte më shumë propozime po në fund katër liderët e partive kryesore politike Nikolla Gruevski, Zoran Zaev, Ali Ahmeti dhe Menduh Thaçi thanë se Katica Janeva është si kuadër nga më të mirët për të realizuar këtë detyrë”, nënvizon avokati Zvonko Davitkoviq.

Debati në parlament për raportin gashtë mujor të punës së Prokurores speciale të Maqedonisë vazhdon. (REL)

Edhe 15 vjet nga Marrëveshja e Ohrit, gjuha shqipe e padefinuar

Edhe 15 vjet nga nënshkrimi i Marrëveshjes së Ohrit, ende nuk ka një zgjidhje të plotë të përdorimit zyrtar të gjuhës shqipe në Maqedoni, gjë që në vazhdimësi ka shkaktuar debate e polemika të shumta, nëse përdorimi i saj është ose jo i garantuar me Kushtetutë.

Në nenin 7 të aktit më të lartë juridik thuhet: “Në tërë territorin e Republikës së Maqedonisë dhe në marrëdhëniet e saj ndërkombëtare gjuhë zyrtare është gjuha maqedonase dhe shkrimi i saj. Gjuhë tjetër të cilën e flasin së paku 20% e shtetasve, gjithashtu, është gjuhë zyrtare”.

Nga ky përkufizim i Kushtetutës nuk theksohet prerazi se zyrtare është edhe gjuha shqipe, por ajo përkufizohet, si gjuhë që e flasin mbi 20 për qind e shtetasve. Edhe si e tillë, përkufizimi që i bëhet në vazhdim ka lë hapësirë për interpretime të ndryshme pasi vazhdim të nenit 7 ajo përkufizohet si zyrtare vetëm se në njësitë e pushtetit lokal, ku pjesëtarët e bashkësive etnike që janë mbi 20 për qind, do të mund të përdorin gjuhën e tyre në komunë, si dhe në komunikimin me pushtetin qendror.

Mospërkufizimi i qartë dhe interpretimet e ndryshme, kanë shkaktuar në vazhdimësi polemika edhe për përdorimin e saj në nivel qendror.

Deputetët shqiptarë kanë të drejtë të përdorin gjuhën shqipe gjatë fjalimeve, por nëse njëri prej tyre udhëheq me seancat, atëherë kjo e drejtë u mohohet.

Ngjashëm është edhe me ministrat shqiptarë, të cilët shqipen mund ta përdorin në ndonjë manifestim rasti, por jo edhe në komunikim zyrtar, madje as në komunikim me deputetët shqiptarë në Kuvend. Partitë në pushtet, disa herë kanë ndërhyrë me zgjidhje ligjore, por pa një zgjidhje përfundimtare.

“Rregullimi me ligj i përdorimit të gjuhës shqipe nuk është në përputhje me Kushtetutën dhe Marrëveshjen e Ohrit, që do të thotë se përdorimi i gjuhës shqipe, edhe pse ka avancime, ka ngelur i hapur dhe duhet që në një të ardhme të afërt ky problem duhet të zgjidhet. Rregullimi i statusit të gjuhës shqipe do të reflektonte pozitivisht në marrëdhëniet ndëretnike në Maqedoni”, thotë Rafis Haliti, nënkryetar i Kuvendit të Maqedonisë.

Ai që nga emërimi në këtë post, para dy viteve, asnjëherë nuk ka udhëhequr me seancat e Kuvendit, pikërisht për shkak të pamundësisë së drejtimit të tyre në gjuhën shqipe.

Lidhur me këtë çështje të pazgjidhur, së fundi është prononcuar edhe lideri i opozitës maqedonase, Zoran Zaev, i cili për herë të parë ka theksuar nevojën për zgjidhjen e drejtë të këtij problemi.

Zaev ka thënë se askush nuk duhet të frikësohet nga përdorimi i zyrtar i gjuhës shqipe, edhe në nivel të Republikës. Me këtë ai ka lë për të kuptuar se Lidhja Social- demokrate angazhohet për një përkufizim të ri të përdorimit të gjuhës shqipe.

“Maqedonasit nuk humbin asgjë nëse dikush fiton të drejtën që në mënyrë të barabartë integrohet në sistemin tonë… Qytetarët nuk humbin asgjë nëse dikush fiton ndonjë të drejtë më shumë. Pra, nuk është aspak e vërtetë se maqedonasit do të humbin nëse shqiptarët fitojnë diçka më shumë… Unë jam i vetëdijshëm për rreziqet nga një qëndrim i këtillë, shumë rreziqe kam ndërmarrë këtë periudhë, por kam vendosur ta ndërmarr edhe këtë rrezik”, ka thënë Zaev.

Deklarata e Zaevit ka nxitur reagime të shumta në opinion. Nga VMRO-ja e ish- kryeministrit Nikolla Gruevski ka thënë se një gjë e tillë nuk do të kalonte asnjëherë.

“Një politikë e këtillë anti-maqedonase nuk do t’ju kaloj…Ju jeni të gatshëm të hiqni dorë nga idealet dhe ëndrrat e gjeneratave maqedonase, vetëm që të vini në pushtet. Ne shumë mirë e dimë se numri më i madh i mbështetësve të LSDM-së nuk mbështesin politikat e tuaja humbëse dhe antikombëtare. Prandaj, ata nuk do të rrinë duarkryq, por do ta dënojnë politikën tuaj, e cila ka për qëllim ri-definimin e Maqedonisë”, ka thënë Ilija Dimovski, kryetar i Grupit Parlamentar të VMRO-së.

Përveç VMRO-së, reagime ka pasur edhe nga intelektualë maqedonas, të cilët e zyrtarizimin e shqipes e shohin si humbje të sovranitetit dhe rrënim të themeleve të shtetit maqedonas.

Bashkim Selmani, njohës i çështjeve juridike dhe profesor në Universitetin e Tetovës, thotë për Radion Evropa e Lirë se çështjet ndëretnike, gjithmonë janë ngritur apo u kanë shërbyer partive për qëllime politike. Ai uron që deklarata e Zaevit, të mos jetë vetëm për qëllim të përfitimit të votave të shqiptarëve, pasi çështja e gjuhës duhet mbyllur njëherë e përgjithmonë.

Për moszgjidhjen e këtij problemi, Selmani fajëson, para së gjithash partitë shqiptare të cilat, sipas tij, edhe 25 vjet demokraci nuk arritën të imponojnë zgjidhjen e drejtë të çështjeve shqiptare.

“Mendimi im është se Zaevi nuk e ka thënë për shkak se i vlerëson apo i do shqiptarët, por më tepër e ka menduar si një të drejtë që e respektojnë shumë shtete. Mendimi i tij ka kahe perëndimore, pasi e sheh se pengesë për shtetin mostrajtimin e duhur të të drejtave të shqiptarëve. Ai me këtë jep sinjal se duhet të respektohen të drejtat që na takojnë me konventat dhe me ligjet”, thotë Selmani.

Ai shton se modeli më i mirë i mbylljes së çështjes së përdorimit të gjuhës shqipe në Maqedoni, duhet të jetë Kosova, ku në gjithë territorin e saj, përveç gjuhës shqipe, zyrtare është edhe gjuha serbe.(REL)

Dy tërmete në Shkup, ekspertët thonë se nuk ka vend për panik

Pamje nga një pjesë e Shkupit

Në Shkup sot në mëngjes janë hetuar dy tërmete.

Sipas Qendrës evopiane të Mesdheut, intensiteti i tyre ishte 4.4 dhe 2.8 shkallë, por Observatori sizmik i Fakultetit matematiko-natyror në Shkup ka kumtuar se dridhja më e fortë ishte me intensitet 3.9 shkallë.

Dridhjet janë hetuar në mëngjes në orën 6.58 dhe 6.59, tre kilometra në verilindje të Shkupit, raporton agjencia Beta.

Mediat lokale kanë raportuar se këto dridhje e kanë shqetësuar popullatën, por ekspertët e sizmologjisë thonë se nuk ka vend për panik.

Maqedoni – Borxhet vazhdojnë të rriten, standardi jetësor të bjerë

Borxhi i Maqedonisë vazhdon të rritet pavarësisht kritikave të shumta, jo vetëm nga opozita, por edhe nga ekspertët dhe opinioni më i gjerë në vend. Pas marrjes së 450 milionë eurove borxh në muajin korrik, Qeveria e Maqedonisë ka njoftuar për marrjen e një borxhi të ri prej 30 milionë eurosh nga shitja e letrave me vlerë.

Sipas ekzekutivit, këto para që pritet të sigurohen nga kreditorët vendorë, do të shpenzohen për shlyerjen e detyrimeve financiare, por pa saktësuar nëse bëhet fjalë për paga apo shlyerje të borxheve të vjetra.

Nga Ministria e Financave kanë thënë se “gjendja me borxhet nuk është aq kritike sa që raportohet në media, pasi Maqedonia nuk bie në grupin e shteteve me borxhe të larta”.

Enti Shtetëror i Statistikës ka njoftuar se në tremujorin e dytë, rritja ekonomike ka arritur në 2.2 për qind, por nga Lidhja Social-Demokrate e Maqedonisë, vlerësojnë se kjo rritje nuk e përmirëson aspak gjendjen e rëndë ekonomike.

“Që të ketë rritje të standardit jetësor rritja duhet të jetë më së paku mbi 5 për qind”, thonë nga LSDM-ja.

Ekspertët thonë se gjendja e këtillë është pasojë e marrjes pa kriter të borxheve dhe shpenzimit të parave të marra në projekte joproduktive. Se gjendja nuk është e volitshme, flet edhe fakti se brenda vitit kemi dy rishikime të buxhetit, thotë Fatmir Bytyçi, ekspert i ekonomisë dhe drejtor i Odës Ekonomike të Maqedonisë Veriperëndimore.

“Në mënyrë konstante kemi projektime të buxheteve me një deficit prej 3.7 për qind të Bruto Prodhimit Vendor. Edhe më parë dihej se ky ritëm nuk do të sjellë një rritje ekonomike të dëshiruar që qytetarët ta ndjenin në mënyrë pozitive”.

“Ne kemi një situatë kur në një periudhë 9 mujore miratojmë dy rishikime të buxhetit. Me këtë qytetarëve çdo ditë e më shumë iu rritet borxhi që shteti e merr në emër të tyre. Vlerësoj se vitin 2016 do ta mbyllim me huamarrje ende më të madhe”, vlerëson Bytyçi.

Ndërkohë, nga qeveria në vazhdimësi janë lavdëruar me investime të huaja, por duke heshtur rastet e largimit të disa kompanive të kishin vendosur të investojnë në sektorin e elektronikës, por edhe në sfera tjera.

Profesori i ekonomisë, Vanço Uzunov, nuk pret jo vetëm investime, por edhe zhvillim ekonomik, për shkak të politikave jo të mira qeveritare, por edhe për shkak të mungesës së stabilitetit të përgjithshëm për shkak të krizës politike.

Ai thotë se të gjitha premtimet që bëhen kanë për qëllim pikët politike, tani në prag të zgjedhjeve të dhjetorit.

“Kjo tani më është dëshmuar se premtimet e dhënë në kohë të zgjedhjeve nuk do të thotë se janë të vërteta. Nuk pres që të keni investime deri në fund të vitit. Ato mund të paraqiten, por vetëm nga vera e ardhshme, kur pritet të ketë një pasqyrë më të qartë të gjendjes politike pasi duhet të kihet parasysh se edhe në pranverë kemi zgjedhje lokale. Pra në aspektin ekonomik, nuk pres ndonjë ndryshim të gjendjes momentale”, thekson Uzunov.

Nga ana tjetër, Fatmir Bytyçi nga Oda Ekonomike e Maqedonisë Veriperëndimore, thotë se gjendja ekonomike, në të cilën ndodhet Maqedonia, nuk mund të zgjasë edhe shumë për shkak të uljes së standardit jetësor të qytetarëve.

“Kjo politikë nuk mundet të vazhdojë, politika tjetër do të jetë ajo e tkurrjes së investimeve, tkurrje të shpenzimeve që tradicionalisht nuk janë pranueshme si masë stimuluese sociale. Atëherë mendoj se qytetarët do ta ndiejnë në lëkurën e vet këtë gjendje të rëndë pasi me të ardhurat që marrin, e kanë vështirë të mbyllin 10 ditë të muajit, e jo më një muaj të tërë”, shton Bytyçi.

Borxhi i përgjithshëm i Maqedonisë ka arritur në rreth 5 miliardë euro dhe prej tyre 1.8 miliardë euro në gjashtë vitet e fundit. Politikat ekonomike të Maqedonisë në vazhdimësi janë kritikuar nga institucionet relevante financiare ndërkombëtare.

Ljubço Georgievski: Maqedonia s’ka asnjë rrënjë që lidhet me historinë antike

SHKUP– “Maqedonia s’ka asnjë rrënjë dhe gjurmë, që ndërlidhet me historinë antike”, ka thënë ish-kryeministri i Maqedonisë, Ljubço Georgievski, në një intervistë për të përditshmen “Utrinski Vesnik”, duke shtuar se “rrënjët e popullit maqedon, janë sllave”, duke e akuzuar qeverinë për propagandë dhe për antikuizim, shkruan Zhurnal.

“Argumenti kryesor i pushtetit aktual është se nëse do t’i vëmë një parashtresë emrit të shtetit, të tipit “e epërme” ose “veriore”, do ta ndrysojmë identitetin e popullit maqedonas. Nuk ka ndryshim më të madh për identitetin e njeriut, nga ky që i është bërë popullit maqedonas nga ana e OBRM-PDUKM-së. Ndrryshimi i parë i identitetit u bë me ndërhyrjen e parë në historinë për antikuizicion që u bë pakurrfarë baze… As që ka gjurmë dhe rrënjë që ndërlidhen me historinë antike. Momenti i dytë për ndryshimin e identitetit është invazioni masiv nëpërmjet mediave që tërësisht kontrollohen nga OBRM-PDUKM të cilat emitojnë program paradoksal që e ndryshon kodin e identitetit”, thotë ish-kryeministri dhe ish-lideri i partisë OBRM-PDUKM, Ljubço Georgievski.

Shkup: Akademikët shqiptarë të ASHAM-it distancohen deklarata e kryetarit për Nënën Terezë

Anëtarët shqiptarë të Akademisë së Shkencave dhe Arteve të Maqedonisë (ASHAM) distancohen nga fjalimi i kryetarit, Taki Fiti, i cili në kuadër të akademisë solemne kushtuar shenjtërimit të Nënës Terezë, tha se Gonxhe Bojaxhiu rrjedh nga një familje e përzier etnike.

“Ne, anëtarët e Akademisë së Shkencave dhe të Arteve të Maqedonisë; Luan Starova nënkryetar, Alajdin Abazi anëtar i kryesisë, Abdylmenaf Bexheti anëtar i rregullt dhe Izet Zeqiri anëtar korrespondent, në mënyrë kategorike distancohemi nga fjalimi i Kryetarit të Akademisë së Shkencave dhe Arteve të Maqedonisë Taki Fiti në tendencën e kontestimit të përkatësisë kombëtare të Shën Terezës si dhe vazhdimësinë e tendencës për përvetësimin e figurës së saj”, thuhet në deklaratën e përbashkët të dërguar në redaksinë e Portalb.

Sipas tyre, askush nuk mundet të paracaktojë përkatësinë etnike të kujtdo qoftë, e “aq më pak të figurës së Shën Terezës kur ajo vetë në testamentin e saj përcakton për nga gjaku përkatësinë shqiptare”.

“Fatkeqësisht nuk është hera e parë që ASHAM vihet në shërbim të politikës ditore”, shkruajnë akademikët shqiptarë.

Dy vëllezër me mbiemrin Begaj viktima nga rrëzimi i aeroplanit në afërsi të Shkupit

Dy vëllezër me mbiemrin Begaj, kanë vdekur nga rrëzimi i aeroplanit në afërsi të Shkupit, raporton Alsat.

Dy vëllezërit kanë humbur jetën së bashku me katër shtetas italianë. Sipas të dhënave të siguruara deri më tani, njëri prej vëllezërve quhet Visar Begaj, dhe të dy janë investitorë.

Qëllimi i udhëtimit, ka qenë iniciativa e dy vëllezërve investitorë kosovarë, të cilët kanë dashur të hapnin një klub për fluturime në Istog.

Mediat italiane raportojnë se Aeroplani ishte destinuar të ulej në Shkup, për të bërë një kontroll teknik.

Nga kontrolli i fluturimeve vlerësojnë se avioni mund të jetë humbur për shkak të motit të keq, megjithatë ende nuk është konfirmuar arsyeja e vërtetë e humbjes së avionit.

Për momentin sipas informatave jozyrtare bëhet fjalë për avion me mbishkrim gjerman i cili është dashur të ulet në Shkup për të marr lëndë djegëse. Ende nuk ka informata nëse është gjetur avioni dhe ku ka qenë destincioni final i fluturimit.

Shkup: Avioni i zhdukur është rrëzuar – në bord dyshohet se ishin edhe dy kosovarë

Prokuroria publike në Maqedoni, në një njoftim për media, ka bërë të ditur nisjen e hetimeve për zbardhjen e tragjedisë ajrore që ndodhi në afërsi të Shkupit.

“Pas informave të marra, Prokuroria publike, në koordinim me institucionet kompetente ka ndërmarrë masa për përcaktimin e vendit të fatkeqësisë, sigurimin e lokalitetit dhe nisjen e hetimeve. Po grumbullohen informata dhe fakte relevante për të përcaktuar shkaqet e fatkeqësisë”, thuhet në komunikatën e Prokurorisë Publike të Maqedonisë.

Një avion italian me gjashtë pasagjerë në bord, që u zhduk nga radarët, njoftohet të jetë rrëzuar afër Katllanovës në jug të Shkupit.

Sipas informatave jozyrtare policore, në bordin e avionit të vogël gjendeshin katër shtetas italian dhe dy shtetas të Kosovës.

Ekipet e shpëtimit kanë njoftuar për gjetjen e një trupi të djegur, ndërsa janë në kërkim edhe të personave të tjerë që gjendeshin në bord.

Avion u zhduk nga radarët e kontrollit të fluturimeve të aeroportit të Shkupit rreth orës 17 e 40.

Banorët e një lokaliteti rreth10 kilometra në jug të Shkupit kishin njoftuar qendrën e fluturimeve se kanë dëgjuar shpërthime të fuqishme dhe zjarr, duke pretenduar se bëhet fjalë për një avion të rrëzuar.

Sipas të dhënave zyrtare, avioni i zhdukur fluturonte nga Trevizo e Italisë, që ishte zhdukur nga radarët menjëherë pasi kishte njoftuar drejtuesit e aeroportit se do të ulej për t’u furnizuar me kerozinë.

Destinacioni i fundit i avionit supozohet të ketë qenë Prishtina. (REL)

Humbja në Shkodër e tërbon gazetarin maqedonas: shqiptarëve do t’ua bëjmë si më 2001

Gazetarit maqedonas, Milenko Nedellkovski, i ka djegur fort humbja e kombëtares së tij nga Shqipëria në “Loro Boriçi”. Nedellovski i cili njihet për gjuhën e tij të urrejtjes ndaj shqiptarëve, e ka quajtur stadiumin e Shkodrës “Arena e Sllobodan Millosheviçit”, ndërsa i ka paralajmëruar shqiptarët për vazhdimin e konfliktit armatosur të vitit 2001.

“Arena Sllobodan Millosheviç na solli fat dhe federata e Shqipërisë sonte dha një propozim që arena të riemërohet te Stojançe Angellov. Shiu i rrëmbyeshëm e detyroi arbitrin që ta ndërpresë lojën në 20 minutat e fundit për të vazhduar loja sot, ku edhe fitoi Shqipëria ndaj Maqedonisë me rezultat 2:1. Ajo e natës së fundit do të luhet sot. Ajo e vitit 2001 do të luhet së shpejti…’, ka shkruar gazetari maqedonas.

Si duket me gjasë këto statuse ndoshta janë si ‘hakmarrje’ ndaj gazetarit të SuperSport dhe Digitalb, Dritan Shakohoxha, për shkak se arenën ”Filipi i Dytë” (“Filip Vtori”) në Shkup e ka quajtur si arena ”Adem Jashari”./Syri.net/

Akademia e Maqedonisë: Nënë Tereza nuk është shqiptare

Akademia e Shkencave dhe Arteve e Maqedonisë konteston prejardhjen shqiptare të Nënë Terezës. Gjatë një eventi përkujtimor të ASHAM-it kushtuar shenjtërimit të Terezës nga Vatikani, kryetari i saj Taki Fiti deklaroi se Nënë Tereza rrjedh nga një familje me prejardhje të përzier etnike.

“Ngjarja e jetës së Nënë Terezës, dëshmon se në hapësirat tona kanë jetuar në paqe, tolerancë dhe mirëkuptim të ndërsjellë, njerëzit me përkatësi të ndryshme fetare dhe etnike. Ajo rrjedh nga një familje me prejardhje të përzier nacionale. Mesazhet e thella humane nga vepra dhe angazhimi i Nënë Terezës sot duhet të jenë të thurura në të gjitha segmentet dhe poret e jetës sonë, në jetën e zakonshme, në shkencë, kulturë, politikë e kështu me radhë”, deklaroi Fiti.

Ministrja e Kulturës Elizabeta Kancevska–Milevska theksoi se të gjithë popujt në Maqedoni janë trashëgimtarë të Nënë Terezës dhe duhet ndjekur shembullin e saj për t’u bërë njerëz më të mirë.

“Sot lirisht mund të themi se të gjithë ne jemi trashëgimtarë krenarë të Nënë Terëzës dhe kemi detyrë historike që ta vazhdojmë veprën e saj, misionin e saj për paqe dhe dashuri për vendin dhe barazi në mes popujve në mbarë botën”, deklaroi ministrja e Kulturës, Elizabeta Kançevska–Milevska, shkruan Alsat-M.

Ndërkaq, Anton Sereçi, studiues i jetës dhe veprës së Nënë Terezës ka shfaqur revoltën e tij që edhe pas kanonizimit të saj si e shenjtë nga Vatikani, në Maqedoni shfaqen akoma dilema se kush ishte Nënë Tereza. Vetë Papa Francesku gjatë ceremonisë së shenjtërimit e potencoi prejardhjen e saj etnike.

“Kur vij nga Vatikani dhe dëgjoj fjalët që u thanë në gjuhën shqipe, thanë se Nënë Tereza është Gonxhe Agneze Bojaxhiu, e lindur në Shkup në familje shqiptare. Vetë Papa Francesku i thotë ato fjalë. Dhe vij këtu në Akademinë e Shkencave të Maqedonisë, i dëgjoj personat të cilët nuk dinë as vetë për atë se kush është Nënë Tereza, çfarë ka qenë dhe çfarë ka bërë dhe e potencojnë tërë kohën Nënë Tereza shkupjania. Përkatësia kombëtare askund nuk përmendet askund nuk përmendet sepse ajo i takon mbi të gjitha botës, por të gjithë e din se ajo është shqiptare, këtë nuk e konteston askush. Vetëm në këtë shtet ku jetojmë mjerisht merremi me ato gjëra t’i shtrembërojmë gjërat, jo vetëm rastin e Nënë Terezës por edhe shumë gjëra të tjera”, deklaroi Anton Sereçi, studijues i jetës dhe veprës së Nënë Terezës.

Vetë Nënë Tereza në deklaratën e saj të dhënë për mediat globale pati thënë:
Me gjak jam shqiptare,
Me shtetësi jam indiane,
Nga besimi jam murgeshë katolike,
Nga thirrja i përkas botës,
Me zemër i përkas plotësisht Zemrës së Krishtit!

Sipas Sereçit, as në Muzeun e Nënë Terezës në Shkup nuk ka të punësuar asnjë shqiptar ndërsa ato të punësuar që janë maqedonas dhe serb, nuk thonë asnjëherë se Nënë Tereza ka prejardhje shqiptare. Por për këtë ai akuzon partitë politike shqiptare që lejojnë të ndodhin këto lëshime në sy të tyre. Në akademinë e sotme përkujtimore të ASHAM-it kushtuar figurës së Nënë Terezës, nuk pati asnjë politikan shqiptar, as nga pushteti e as nga opozita. Alsat kërkoi sqarim nga BDI se a kanë pasur ftesë apo jo për pjesëmarrje në këtë eveniment, por nuk morëm përgjigje.

Ja pse s’morën pjesë liderët e shqiptarëve të Maqedonisë në shenjtërimin e Nënë Terezës

Asnjë nga liderët e partive politike shqiptare në Maqedoni nuk mori pjesë në ceremoninë e sotme të shenjtërimit të humanistes shqiptare Nënë Tereza në Vatikan.

Presidenti maqedonas Gjorge Ivanov ka ftuar kryetarin e BDI-së Ali Ahmeti dhe ate të PDSHçsë Menduh Thaçi në këtë ceremoni, por Ahmeti nuk ka shkuar me arsyen se nuk e njeh Ivanovin si president, ndërsa në PDSH nuk ka asnjë përgjigje.

LSDM e udhëhequr nga Zoran Zaev dhe anëtari i kryesisë së saj shqiptari katolik Bartolomej Kajtazi janë pjesë e delegacionit në Vatikan.

Në Vatikan nuk kanë udhëtuar as edhe liderët e partive më të vogla politike.

Ndërkohë, shumë shoqata dhe aktivistë nga Maqedoni, përfshirë edhe një delegacion të diasporës nga SHBA sot po morën pjesë në ceremoninë në Vatikan, shkruan INA.

Më 13 gusht 2001 u nënshkrua Marrëveshja e Ohrit – Çfarë është Marrëveshja e Ohrit?

Marrëveshja Kornizë e Ohrit, që u nënshkrua më 13 gusht 2001, është një kontratë shqiptaro-maqedonase për raportet e reja shoqëroro-politike dhe ndërtimin e mëtutjeshëm të shtetit të quajtur, Ish-Republika Jugosllave e Maqedonisë.

Kjo kontratë e të dy popujve u bë e mundshme pas konfliktit të armatosur, që ndodhi në vitin 2001. Marrëveshja u realizua me ndihmën e Bashkësisë ndërkombëtare, e cila dha kontributin e vet për zgjidhje politike të krizës ndëretnike në IRJM.

Roli i Bashkësisë Ndërkombëtare për ndërprerjen e konfliktit dhe arritjen e marrëveshjes politike ishte i pazëvendësueshëm. Qysh gjatë zhvillimeve luftarake në IRJM, Unioni Evropian dhe SHBA, dërguan përfaqësuesit e tyre: Francois Leotard dhe James Perdew, si ndërmjetësues për arritjen e paqes.

Pas negociatave të mundimshme me palët e konfrontuara, ata përgatitën dokumentin e ashtuquajtur “Versioni Draft i Dokumentit Kornizë”, të cilin më 7 korrik, 2001, ua dorëzuan katër liderëve, pjesëmarrës në Qeverinë e Ish Republikës Jugosllave të Maqedonisë dhe presidentit Trajkovski.

Gjatë zhvillimit të negociatave në Ohër, faktori politik shqiptar startoi me pozicione euro-perëndimore. Ai nuk doli me kërkesa për ndarje territoriale, por për barazi të plotë etnike, që ishte në harmoni me parimet europerëndimore. Në fakt, kërkohej që karakteri multietnik i shoqërisë maqedonase të pasqyrohet në rregullimin shtetëror.

Ndërkaq, pala maqedonase mbante pozicion ekskluziv duke refuzuar kërkesën që pasqyronte diversitetin objektiv të shoqërisë në konceptin e shtetit. Ose me fjalë tjera, përderisa pala maqedonase synonte të kontrollojë të drejtat kombëtare të shqiptarëve, pala shqiptare nuk ndërhynte në korpusin e të drejtave të maqedonasve. Fundi i negociatave shqiptaro-maqedonase ishte Marrëveshja Kornizë e Ohrit.

Në momentin kur pritej që negociatat e Ohrit të marrin fund, qarqe të caktuara nacionaliste, qeveritare dhe joqeveritare maqedonase filluan të japin deklarata të pamatura, të cilat shkaktuan reagime të ashpra të përfaqësuesve ndërkombëtarë.

Këto deklarata përpiqeshin të minojnë procesin politik dhe projektin e marrëveshjes të hartuar nga ekspertët ndërkombëtarë. Por, qendrat e vendosjes ndërkombëtare ia bënë me dije palës maqedonase, se: “Rrugëdalje më të mirë, pos pajtimit dhe nënshkrimit të këtij dokumenti nuk ka”.

Negociatat shqiptaro-maqedonase, në Ohër, zgjatën rreth dhjetë ditë dhe përfunduan më 13, gusht, 2001. Nën trysninë ndërkombëtare, konflikti shqiptaro-maqedonas u mbyll me Marrëveshjen Kornizë të Ohrit.

Ajo u nënshkrua në Shkup, nga përfaqësuesit shqiptarë dhe maqedonas, që merrnin pjesë në koalicionin e zgjeruar qeveritar: Lupço Georgievski, Arbën Xhaferi, Branko Cërvenkovski dhe Imer Imeri. Këtë marrëveshje e nënshkroi edhe kryetari i shtetit, Boris Trajkovski dhe ndërmjetësuesit evro-amerikanë, Leotard dhe Perdew.

Por çfarë përmban kjo marrëveshje, që edhe 14 vjet më pas sa herë flitet për situaten në Maqedoni, referimi është pikërisht tek ky akt?

Marrëveshja është e ndërtuar mbi 5 parimet themelore, të cilat u bashkëshoqeruan me ndryshimet kushtetuese, të cilat konfirmuan shoqërinë shumë-etnike maqedonase dhe ku u sanksionua se shqiptarët janë etni shtetformuese.

Marrëveshja kornizë synonte zhvillimin e qetë dhe harmonik të shoqërisë maqedonase duke respektuar njëkohësisht identitetin etnik dhe interesat e të gjithë qytetarëve të Maqedonisë.

Kjo garantohej përmes përmbajtjes së saj, ku decentralizimi ishte ndër pikat kryesore, pasi siguronte qeverisjen e tyre nga bashkësia më e madhe e popullatës që e përbën .

“Marrëveshja e Ohrit detyron autoritetet e qeverisjes qendrore të garantojnë përfaqësimin e drejtë dhe mosdiskriminimin.” E reflektuar në ligj kjo pikë e marrëveshjes kërkonte që në punësimet në administratën publike të sigurohej përfaqësimi i drejtë i bashkësive në të gjitha organet qendrore dhe lokale publike dhe në të gjitha nivelet e punësimit në këto organe.

Përfaqësimi në Gjykatën Kushtetuese kërkohet të bëhet mbi propocionin e përfaqësimit në Kuvend sipas etnive. Shqiptarët që përbëjnë mbi 30 % të popullsisë maqedonase përmes Marrëveshjes së Ohrit iu garantohej e drejta e përdorimit si gjuhë zyrtare, krahas gjuhës maqedonase edhe ajo shqip. Simbolet kombëtare gjithashtu.

Ndërsa Marrëveshja e Ohrit ishte një kontratë juridike, kapitujt e të cilës parashihnin afate konkrete, shqiptarët atje, faktori politik shqiptar, raportet ndërkombëtare, përfaqësuesit e vendeve perëndimore, mediat në mënyrë të vazhdueshme kanë denoncuar se asnjë prej angazhimeve të ndërmarra 14 vjet më parë nuk është realizuar plotësisht.

Punësimet, përfaqësimi në institucione, pushteti vendor, gjuha dhe simbolet kombëtare dhe aq më pak ndalimi i diskriminit nuk u arritën as në mënyrë të kënaqëshme, shkaqe për të cilat shqiptarët janë shpesh në rrugën e protestës, pasi Marrëveshja e Ohrit nuk iu siguroi atë që synonte, qytetarë të barabartë me maqedonasit.

Parimet themelore te Marreveshjes se Ohrit

1. Nderrimi i pushteteve vetem permes zgjedhjeve te lira dhe demokratike

2. Garantohet sovraniteti dhe integriteti territorial i Maqedonise.

3. Konfirmohet karakteri shumetnik i shoqërisë maqedonase

4. Ndertim i shtetit demokratik

5. Zhvillimi i pushtetit vendor

Permbajtja e Marreveshjes se Ohrit

1. Ndërprerja e armiqësive

2. Zhvillimi i pushtetit të decentralizuar

3. Mosdiskriminimi dhe përfaqësimi i drejtë

4. Perfaqesim ne gjyqesor ne propocion me popullsine

5 Gjuhe zyrtare eshte edhe gjuha amtare kur popullata eshte mbi 20%

6 Shprehja e identitetit (perdorimi i simboleve te bashkesise ne zonat ku ata perbejne shumicen). /Top Channel/

‘Rasti i Kumanova’, keqtrajtimi i të akuzuarve alarmon ndërkombëtarët

Njoftimet për keqtrajtimin e të akuzuarve në rastin e Kumanovës kanë tërhequr vëmendjen edhe të faktorit ndërkombëtar. Avokati mbrojtës Naser Raufi konfirmoi se ambasadat e huaja në vend, veçanërisht ajo amerikane e kontaktojnë shpesh herë për të mësuar të vërtetën rreth informatave për brutalitetin policor që ushtrohet ndaj të akuzuarve në këtë rast, njofton Alsat M.

Raufi njoftoi se një ditë më parë kishte kërkuar edhe ndërrimin e trupit gjyqësor pasi e kishte penguar që ti parashtronte pyetje dëshmitarit të koduar. Sipas Raufit, mënyra e vetme për zbardhjen në tërësi të këtij rasti është kalimi i tij te Prokuroria Speciale.

Nga ana tjetër Prokuroria Speciale, nuk e ka konfirmuar, por as e mohoi mundësinë që ky Institucion të hetojë rastin e Kumanovës.

Komiteti i Helsinkit: Para zgjedhjeve shtohet dhuna dhe urrejtja nacionale në Maqedoni

Numri i rasteve të dhunës nga urrejtja është në rënie por mbetet dominues numri i rasteve të dhunës sipas përfaqësimit etnik. Sipas raportit të ri të Komitetit të Helsinkit, vitin e kaluar është regjistruar ulje e rasteve të dhunës nga urrejtja, por praktika ka treguar se ato janë në rritje gjatë periudhës para zgjedhjeve.

“Së këndejmi ne vlerësojmë se partitë politike në luftën për vota si nga pala maqedonase po ashtu edhe nga ajo shqiptare, qëllimisht nxisin vepra të këtilla penale nga urrejtja, që më pastaj të tregohen si mbrojtjes të popullit të tyre, gjegjësisht bashkësisë etnike dhe kështu, ata fitojnë pikë dhe vota gjatë kohës së zgjedhjeve”, ka deklaruar Vojislav Stojanovski nga Komiteti i Helsinkit për të drejtat e njeriut.

Statistikë zyrtare për vepra penale të iniciuara nga urrejtja nuk ka. Ndërsa hulumtimet e Komitetit bazohen në komunikim me policinë dhe informimin e mediave për këto vepra. Sipas këtyre të dhënave në vitin 2013 ka pasur 110 vepra kriminale nga urrejtja, në vitin 2014 – 80 vepra, ndërsa në vitin 2015 vetëm 44.

Sipas Komitetit të Helsinkit, vitin e kaluar numri më i madh i dhunës nga urrejtja është regjistruar ndaj emigrantëve. Si shembull më pozitiv ku jetojnë grupe të ndryshme etnike e që deri më tani nuk ka pasur vepër penale që është iniciuar nga urrejtja përmendet qyteti i Dibrës.

Polici maqedonas e pranon se Mirsad Ndrecaj u kap i gjallë

Rryma elektrike nuk ka qenë shkaku i vërtetë për ndërprerjen e seancës së djeshme gjyqësore për “Grupin e Kumanovës”, mëson ekskluzivisht Gazeta Lajm nga burime të afërta me mbrojtjen e të akuzuarve.

Edhe pse zyrtarisht rryma dhe defektet teknike u përmendën si shkak për ndërprerje, burimet tona thonë se shkaku i vërtetë ka qenë dëshmia e një polici pjesëmarrës në aksionin te “Lagja e Trimave”, i cili para gjykatës ka dhënë një dëshmi tronditëse. Ai ka pranuar para gjykatës se Mirsad Ndrecaj është arrestuar i gjallë prej policisë.

“Gjatë marrjes së kryqëzuar në pyetje, njëri prej avokatëve i bëri dëshmitarit të mbrojtur një pyetje me ‘sherr’. Avokati e pyeti policin se a e ka arrestuar ai Mirsad Ndrecajn, apo kolegu i tij, polici u përgjigje se Mirsadin e ka arrestuar një kolegë i tij. Kjo shkaktoi tollovi në gjykatë, reagoi trupi gjykues, duke kërkuar që të ndërpritet seanca dhe të fshihet dëshmia e policit”, thonë burimet e gazetës “Lajm”.

Sipas tyre, kjo dëshmi e policit (dëshmitar i mbrojtur), konfirmon dyshimet që ekzistonin në opinion që nga 10 maji.

“Dal ngadalë po del në shesh e vërteta se Mirsad Ndrcaj, por ndoshta edhe ndonjë pjesëtar tjetër i Grupit të Kumanovës është likudiar pasi është arrestuar”, thonë burimet e Gazetës Lajm.

Gazeta Lajm kontaktoi edhe me avokatët mbrojtës të pjesëtarëve të Grupit të Kumanovës, mirëpo ata zyrtarisht as nuk e konfirmuan e as e demantuan informacionin tonë. Marrim vesh se ditët në vijim ata do të dalin dhe do të flasin publikisht për shkaqet e vërteta për ndërprerjen e seancës së ditës së premte gjyqësore.

Ndryshe dëshmia e policit (dëshmitar i mbrojtur), përputhet edhe me audio-dëshminë e Sulejman Osmanit i cili në një bisedë të incizuar me Xhezair Shaqirin, ka thënë se me sytë e tij ka pa duke u arrestuar të gjallë Mirsad Ndrecaj dhe Beg Rizaj. Sulejman Osmani në këtë dëshmi mes tjerash ka thënë se përmes një bisede telefonike, pjesëtarët e Grupit të Kuanovës kanë marrë garanci nga kryetari i BDI-së Ali Ahmeti, se nëse dorëzohen, nuk do të arrestohen prej policisë, por se do të pranohen nga ekipe të OSBE-së por se janë tradhtuar, duke rënë në dorë të policisë maqedonase.

Miëpo kjo dëshmi e policit, tani i jep një dimension të ri dhe shumë më të bazuar akuzave për “Tradhtinë e madhe në Kumanovë”, si dhe jep një profil më të qartë të atyre që kanë tradhtuar.

Ndryshe, zyrtarisht seanca u ndërpre për shkak të problemeve me korrentin në Gjykatë,. Deri në ndërprerjen e seancës kishte dëshmuar vetëm një dëshmitar i mbrojtur. Pala mbrojtëse beson se në pesë seancat e ardhshme pritet të përfundojnë të gjithë dëshmitarët e mbrojtur. Avokatët thanë se sot asnjëri nga pjesëtarët e grupit të Kumanovës nuk është ankuar për keqtrajtim nga ana e policisë. Për keqtrajtimin e deritanishëm të pjesëtarëve të grupit të Kumanovës kanë reaguar edhe nga Komiteti i Helsinkit. “Ne menjëherë kërkuam t’i vizitojmë këta të paraburgosur, për të cilët kishte pohime se kishin qenë të lënduar, madje lëndime serioze si p.sh: thyerje e nofullës , njolla nëpër trup e të ngjashme. Kërkuam leje për vizitë në burg, në kushte normale Gjyqi çdo herë na ka lejuar t’i vizitojmë të burgosurit , por në këtë rast nuk na u lejua një gjë e tillë. Me këtë nuk mundëm të vërtetojmë se çfarë ka ndodhur në të vërtetë , por duke i lexuar raportet e Avokatit të popullit , ne mendojmë se ka pasur sulme ndaj atyre njerëzve”, deklaroi Voislav Stojanovski, Komiteti i Helsinkit. Deri tani më të keqtrajtuar nga ana e policisë, sipas avokatëve kanë qenë Andi Krasniqi, i njohur si komandant Malisheva, Demë Shehu e Ekrem Arifi. Për keqtrajtimin e pjesëtarëve të grupit të Kumanovës së fundmi u përplasën ministri i brendshëm Çavkov i cili hodhi poshtë pohimet e avokatëve dhe zëvendësi i tij Agim Nihiu i cili pohonte të kundërtën. Seanca e radhës për Kumanovën mbahet më 28 korrik

Faqja 19 prej 28« Fillimi ‹ Prapa 15 16 17 181920 21 22 23 Para ›Fundi »

Komisioni Shtetëror i Zgjedhjeve në Maqedoni i deklaroi rezultatet e zgjedhjeve të djeshme parlamentare dhe ndarjen e mandateve, në bazë të procesverbaleve origjinale.

Opinioni në Maqedoni është i skandalizuar nga kërcënimi, indirekt por i qartë, me atentatin që i bëri lideri i VMRO-DPMNE-së, ish-kryeministri Nikolla Gruevski, oponentit të tij politik, liderit të Lidhjes Socialdemokrate të Maqedonisë, Zoran Zaevit.

Anëtarët shqiptarë të Akademisë së Shkencave dhe Arteve të Maqedonisë (ASHAM) distancohen nga fjalimi i kryetarit, Taki Fiti, i cili në kuadër të akademisë solemne kushtuar shenjtërimit të Nënës Terezë, tha se Gonxhe Bojaxhiu rrjedh nga një familje e përzier etnike.

Dy vëllezër me mbiemrin Begaj, kanë vdekur nga rrëzimi i aeroplanit në afërsi të Shkupit, raporton Alsat.

Asnjë nga liderët e partive politike shqiptare në Maqedoni nuk mori pjesë në ceremoninë e sotme të shenjtërimit të humanistes shqiptare Nënë Tereza në Vatikan.

Marrëveshja Kornizë e Ohrit, që u nënshkrua më 13 gusht 2001, është një kontratë shqiptaro-maqedonase për raportet e reja shoqëroro-politike dhe ndërtimin e mëtutjeshëm të shtetit të quajtur, Ish-Republika Jugosllave e Maqedonisë.

Rryma elektrike nuk ka qenë shkaku i vërtetë për ndërprerjen e seancës së djeshme gjyqësore për “Grupin e Kumanovës”, mëson ekskluzivisht Gazeta Lajm nga burime të afërta me mbrojtjen e të akuzuarve.

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL