Në kohën kur u largua nga Rusia në shtator të vitit 2022, Aleksandr Menyukov ishte dëshmitar i një hetimi penal që kishte për shënjestër një mik të tij të ngushtë: një poet, recitimet në rrugë të vargjeve kundër luftës konsideroheshin krim.

Qindra mijëra rusë u larguan nga vendi pasi presidenti rus, Vladimir Putin, urdhëroi po atë muaj mobilizim ushtarak për të forcuar radhët për pushtimin e Ukrainës. Por, për Menyukovin, i cili ofronte këshilla ligjore për rusët që kundërshtonin luftën, kupa u mbush kur ai u rrah keq gjatë një bastisjeje që policia kreu në banesën e tij në Moskë.

Në Kazakistan, ai ngarendi që ta nxirrte një pasaportë të re para se t’i skadonte afati, një situatë që u përkeqësua nga fluksi i rusëve të tjerë që po nxitonin të rregullonin dokumentet e tyre. Disa muaj më vonë, ai përfundoi në Poloni me një vizë humanitare.

Tani, jeta e Menyukovit – dhe potencialisht e mijëra, në mos dhjetëra mijëra, rusëve që jetojnë jashtë vendit – mund të bëhet shumë më e vështirë.

Sipas një ligji të nënshkruar nga Putini më 4 gusht, shtetasve rusë që jetojnë jashtë vendit dhe që janë dënuar nga autoritetet ruse për një vepër administrative ose për një vepër penale, do t’u ndalohet të kryejnë veprime të zakonshme si nxjerrja e pasaportës së re apo noterizimi i dokumenteve, siç është certifikata e martesës.

Kjo mund të përfshijë aktivistë që kanë punuar për organizata të financuara nga jashtë, qytetarë të zakonshëm rusë që komunikojnë me të ashtuquajturat organizata “të padëshirueshme”, apo njerëz që thjesht vënë në dyshim humbjet astronomike që ushtria ruse ka pësuar në Ukrainë.

Masa e re është quajtur “vdekje civile” nga juristët, aktivistët për të drejtat e njeriut dhe rusët që jetojnë jashtë vendit, të cilët druhen se ajo do t’i fusë në një ngërç ligjor dhe burokratik, nga i cili do të kenë pak mundësi të dalin.

“Nëse do të kisha qenë në Poloni kur më skadoi pasaporta [ruse] dhe këto kufizime do të kishin qenë në fuqi në atë kohë, do të më mohohej e drejta për të aplikuar për një pasaportë të re”, tha Menyukovi në një intervistë nga Varshava. “Kështu funksionon. Dhe tani, kjo do të bëhet një problem i madh për rusët”.

“Në aspektin teknik, shtetasit rusë nuk do ta humbin shtetësinë e tyre”, tha Tanya Lokshina, hulumtuese ruse në organizatën amerikane për të drejtat e njeriut, Human Rights Watch. “Ata do të mbeten shtetas rusë, por pa qasje në shërbime ligjore. De-facto kjo është si të jesh pa shtetësi”.

Qëllimi “është të dërgohet një mesazh dhe të krijohet një efekt frikësues në shoqëri, si tek ata që janë larguar nga vendi, ashtu edhe tel ata që kanë mbetur”, tha Gleb Bogush, një avokat rus që tani jeton në Berlin.

Zyrtarët rusë shfaqin hapur qëllimet e tyre.

“Të gjithë ata që kanë ikur jashtë vendit dhe po i bëjnë dëm shtetit nuk janë opozitë; ata janë tradhtarë, janë kriminelë”, tha javën e kaluar Vyacheslav Volodin, kryetar i Dhomës së Ulët të Parlamentit të kontrolluar nga Kremlini, teksa ligjvënësit miratuan projektligjin.

“Sistem aparteidi”
Gjatë më shumë se dy dekadave, autoritetet ruse kanë zgjeruar gradualisht arsenalin ligjor që përdoret për të ndëshkuar disdencën, për të censuruar mediat e pavarura, për të mbyllur organizatat e shoqërisë civile dhe për të heshtur ligjvënësit e opozitës.

Këto masa përfshijnë ligje si ai për “agjentët e huaj”, që ndëshkon individët dhe grupet që marrin financim nga jashtë, si dhe ligjin për “organizatat e padëshirueshme”, i cili ndalon organizatat e huaja që konsiderohen kërcënim për sigurinë kombëtare dhe kriminalizon personat që punojnë për to, bashkëpunojnë me to ose u japin donacione.

Që nga fillimi i pushtimit në shkallë të plotë të Ukrainës në vitin 2022, autoritetet ruse kanë miratuar masa edhe më të ashpra.

Personat që publikojnë shifra për humbjet në njerëz ose informacione për krime të dyshuara lufte të kryera nga Rusia në Ukrainë mund të ndiqen penalisht për “diskreditim të forcave të armatosura ruse”. Një shtetas rus që i referohet rajoneve të Ukrainës, të cilat Moska pretendon se i ka aneksuar, si territore ukrainase, mund të akuzohet për minim të integritetit territorial të Rusisë.

Tani, nëse je dënuar për një nga gjashtë veprat e ndryshme penale dhe jeton jashtë Rusisë, mund të të hiqet në praktikë ajo që ekspertët ligjorë e konsiderojnë një të drejtë themelore sipas së drejtës ndërkombëtare: e drejta e një qytetari për shërbime konsullore.

“Strategjia nuk është t’u hiqet [qytetarëve rusë] shtetësia, t’i zhveshë ata nga ajo. Strategjia është që të përdoret shtetësia si armë”, tha Bogush. “Është edhe një tullë tjetër në ndërtimin e një sistemi të aparteidit të pjesshëm: për të veçuar një grup të caktuar njerëzish, të cilët sistemi i konsideron armiq, ‘të padëshirueshëm’”.

“Një person që është larguar [nga vendi] për arsye politike dhe cilësohet si ‘shmangës’ do të marrë statusin e një ‘qytetari të anuluar’ brenda vendit”, tha First Department, një grup i aktivistëve ligjorë rusë.

Nëse një rusi i duhet, për shembull, një certifikatë martese ose një certifikatë lindjeje nga Rusia, kjo do të jetë e pamundur. E njëjta gjë vlen edhe nëse dikush ka nevojë për një vërtetim se nuk ka të kaluar kriminale në Rusi, të cilën do të duhet t’ia dëshmojë një autoriteti të huaj.

Masat gjithashtu u japin zyrtarëve të drejtën të ngrijnë llogaritë bankare të njerëzve, si dhe t’i pengojnë ata të shesin pasuri të paluajtshme, si apartamente apo shtëpi pushimi, madje edhe t’ua transferojnë pronësinë të afërmve të tyre.

“Luftë ndaj qytetarëve të vet”
Ligji u jep zyrtarëve autorizim që të hapin llogari bankare në emër të një personi që thonë se ka shkelur ligjet dhe më pas ta menaxhojnë atë llogari në mënyrë efektive: të marrin, për shembull, fondet nga pensioni shtetëror që i takojnë shtetasit rus dhe të kryejnë pagesa për detyrime, sikurse gjobat e vendosura nga gjykata.

“Ky është vërtet një ligj për vdekjen civile”, tha Lokshina, punëdhënësi i së cilës, Human Rights Watch, u shpall organizatë e padëshirueshme vitin e kaluar. “Nëse nuk e mbyllni gojën, por flisni hapur, herët a vonë do të ndiqeni penalisht”.

Pasigurisë ligjore me të cilën përballen rusët në mërgim i shtohet edhe fakti se në shumë vende, brenda ose jashtë Bashkimit Evropian, autoritetet po e bëjnë më të vështirë për shtetasit rusë marrjen e dokumenteve si lejet e qëndrimit apo të punës, ose aplikimin për shtetësi.

“Për shumë prej tyre, ata gjithashtu nuk kanë asnjë mbështetje reale në vendet ku ndodhen. Njerëzit që përndiqen nga Qeveria ruse, në rastin më të mirë, përballen edhe me dyshime kolektive në vendet ku jetojnë”, tha Bogush.

Miratimi i këtij ligji vjen në një kohë kur Kremlini po përpiqet ta mbajë me intensitet të plotë luftën në Ukrainë, teksa njëkohësisht minimizon përmasat e humbjeve që kanë pësuar forcat ruse. Edhe ekonomia po shfaq shenja dobësimi, duke nxitur pakënaqësi.

Ekspertët e Kremlinit thonë se autoritetet janë gjithashtu të shqetësuara për zgjedhjet parlamentare të muajit të ardhshëm, në të cilat një fitore jo bindëse e kandidatëve të partisë në pushtet, Rusia e Bashkuar, do ta dobësonte narrativin e unitetit kombëtar.

“Putini nuk po e përshkallëzon vetëm luftën kundër Ukrainës, ai po e përshkallëzon edhe luftën kundër qytetarëve të tij”, tha Bogush./REL

Pentagoni po zhvillon një strategji bërthamore që do t’i jepte presidentit amerikan një gamë më të gjerë opsionesh bërthamore në një konflikt të mundshëm me Rusinë ose Kinën, raportoi NBC të mërkurën, duke cituar burime të njohura me planet.

Qasja e propozuar thuhet se do t’i kushtonte më shumë rëndësi armëve bërthamore taktike me rreze të shkurtër veprimi në konfliktet rajonale, në vend që të mbështetej kryesisht në armët bërthamore strategjike me rreze të gjatë veprimi.

Sipas NBC, shqyrtimi i klasifikuar synon të adresojë skenarët e mundshëm në të cilët aleatët e SHBA-së sulmohen nga Rusia ose Kina në një konflikt rajonal. Raportohet se ai mbikëqyret nga shefi i politikave të Pentagonit, Elbridge Colby.

Zyrtarët e mbrojtjes amerikane i thanë NBC-së se qëllimi është t’i ofrohet presidentit opsione bërthamore më “realiste dhe të besueshme” , duke argumentuar se një gamë më e gjerë zgjedhjesh do të “forconte parandalimin”.

Rishikimi i raportuar vjen rreth gjashtë muaj pas skadimit të traktatit të Ri START, marrëveshja e fundit dypalëshe e mbetur që kufizon arsenalet bërthamore strategjike të SHBA-së dhe Rusisë. I nënshkruar në vitin 2010 dhe i zgjatur në vitin 2021, traktati i kufizoi secilën palë në 1,550 koka bërthamore strategjike të vendosura dhe 700 sisteme shpërndarjeje të vendosura, ndërsa parashikonte transparencë dhe masa verifikimi në vend. Ai skadoi në shkurt pa një zëvendësim.

Pavarësisht skadimit të traktatit, Moska tha se nuk kishte ndërmend të ishte “e para që do të ndërmerrte hapa drejt përshkallëzimit” duke rritur numrin e kokave bërthamore, me kusht që SHBA-të të ndiqnin të njëjtën qasje.

Përpara se traktati të skadonte, Presidenti rus Vladimir Putin kishte propozuar që Moska dhe Uashingtoni të vazhdonin të respektonin kufijtë e tij për një vit tjetër, ndërsa negocionin një zëvendësim. Presidenti i SHBA-së, Donald Trump, tha se donte një marrëveshje “më të mirë” që përfshinte Kinën. Pekini, arsenali bërthamor i të cilit vlerësohet në rreth 600 koka bërthamore, refuzoi t’u bashkohej bisedimeve të tilla, duke thënë se vendet me arsenalet më të mëdha bërthamore duhet të mbajnë përgjegjësinë kryesore për çarmatimin bërthamor.

Moska tha më pas se çdo marrëveshje e zgjeruar duhet të mbulojë edhe anëtarët e NATO-s të armatosur me armë bërthamore, Francën dhe Mbretërinë e Bashkuar.

Rusia e përditësoi doktrinën e saj bërthamore në vitin 2024, duke deklaruar se agresioni nga një shtet jo-bërthamor i mbështetur nga një fuqi bërthamore do të trajtohej si një sulm i përbashkët dhe se armët bërthamore mund të përdoren nëse agresioni konvencional përbën një kërcënim kritik për sovranitetin ose integritetin territorial të Rusisë ose aleatit të saj, Bjellorusisë.

Moska ka kritikuar vazhdimisht vendosjen e armëve bërthamore amerikane në Evropë si pjesë e marrëveshjeve të NATO-s për ndarjen e armëve bërthamore. Ndërsa ka deklaruar se nuk ka ndërmend të sulmojë ndonjë vend të NATO-s, ajo ka paralajmëruar se do të synojë arsenalin e saj bërthamor në vendet që strehojnë armë të tilla që synojnë Rusinë. bw

Guvernatori Mike Braun ka shpallur një emergjencë të re energjetike në shtetin amerikan të Indianës, duke përmendur sulmet ndaj anijeve të lidhura me konfliktin Rusi-Ukrainë.

Në një postim në X të mërkurën, Braun tha se kishte nënshkruar një urdhër ekzekutiv që zgjat pezullimin e përdorimit të benzinës dhe taksave të akcizës në shtet, të cilat duhej të rivendoseshin të premten, deri më 5 shtator.

“Kjo emergjencë e re energjetike është shkaktuar nga ndërprerjet e reja në korridoret globale të transportit detar të naftës në javët e fundit, në Ngushticën e Detit të Zi/Kerç, ndërsa konflikti Rusi-Ukrainë është përshkallëzuar në beteja detare me dronë dhe ndërprerje të Rajonit të Rërave të Naftës të Albertës nga zjarret kanadeze”, tha zyra e guvernatorit në një deklaratë.

Ai shtoi se ndërprerjet kishin çuar çmimet e karburantit në “nivele të panatyrshme jashtë normës së kushteve standarde ekonomike”.

Sipas Indiana Capital Chronicle, Braun fillimisht pezulloi pjesërisht taksat e benzinës në fillim të prillit, pasi çmimet u rritën për shkak të bllokadës së Ngushticës së Hormuzit gjatë luftës SHBA-Izrael kundër Iranit.

Rusia dhe Ukraina kanë intensifikuar sulmet ndaj anijeve dhe infrastrukturës portuale në javët e fundit, në një përpjekje për të prishur logjistikën e njëra-tjetrës. Në raportin e saj të fundit ditor të mërkurën, Ministria Ruse e Mbrojtjes tha se kishte goditur tre anije mallrash në brigjet e Rajonit të Odesës të Ukrainës, të cilat, sipas saj, transportonin pajisje ushtarake.

Më 25 qershor, presidenti ukrainas Volodymyyr Zelensky njoftoi atë që ai e quajti një fushatë 40-ditore për të ushtruar presion mbi Kremlinin që “t’i japë fund luftës”. Njoftimi përkoi me sulme sistematike me dronë mbi objektet dhe depot ruse të energjisë që i përkisnin Wildberries, ekuivalenti rus i Amazon. Moska u përgjigj duke shtuar sulmet e veta ndaj porteve dhe anijeve ukrainase.

Rusia ka paralajmëruar vazhdimisht se ndihma e vazhdueshme për Ukrainën vetëm sa do ta zgjasë konfliktin dhe se sanksionet e vendosura ndaj Moskës po dëmtojnë gjithashtu vendet perëndimore dhe po ndihmojnë në rritjen e çmimeve të naftës. Ministria e Jashtme ruse dënoi në mënyrë të ngjashme sulmin SHBA-Izrael ndaj Iranit, duke paralajmëruar në mars se konflikti në Lindjen e Mesme po “kërcënonte drejtpërdrejt sigurinë globale të energjisë”. bw

Një “El Niño” i fuqishëm mund të godasë planetin deri në fund të vitit, duke sjellë tronditje ekonomike botërore, mot ekstrem dhe rritje të çmimeve të ushqimeve.

Një “super” El Niño mund të rrisë kostot e jetesës në mbarë botën. Ekspertët paralajmërojnë se deri në fund të vitit mund të shfaqet një nga fenomenet më të forta El Niño të regjistruara në 140 vitet e fundit. Ky fenomen natyror nuk ndikon vetëm te kushtet e motit, por mund të ketë pasoja të mëdha edhe për ekonominë globale dhe kostot e jetesës.

Dëme ekonomike prej triliona dollarësh
Sipas Christopher Callahan, ekspert i klimës, ngjarjet e mëparshme të El Niños kanë shkaktuar humbje të jashtëzakonshme ekonomike. “El Niño i viteve 1982-1983 shkaktoi mbi 4 trilionë dollarë humbje ekonomike globale, të cilat u ndjenë deri në pesë vite pas fenomenit. Ndërsa ngjarja e viteve 1997-1998 solli rreth 5.7 trilionë dollarë humbje ekonomike”, thotë ai për DW.

Çfarë është El Niño?
El Niño është një fenomen klimatik që ndodh zakonisht çdo 2 deri në 4 vjet. Ai shoqërohet me temperatura më të larta të ujërave në Oqeanin Paqësor dhe shkakton: thatësira të forta, reshje intensive, përmbytje, valë të nxehti ekstreme.

Pasojat ndihen në shumë rajone të botës, duke dëmtuar infrastrukturën, prodhimin bujqësor dhe zinxhirët e furnizimit.

Rreziku për ushqimin dhe bujqësinë
Ndryshimet klimatike të lidhura me El Niñon mund të ndikojnë drejtpërdrejt në prodhimin e ushqimeve. India po përballet me temperatura ekstreme dhe rrezikon thatësirë për shkak të ndryshimeve në ciklet e erërave. Ndërkohë, Vietnami ka paralajmëruar për valë të forta të të nxehtit, rritje të reshjeve deri në 50% dhe përmbytje masive. Këto zhvillime mund të reduktojnë prodhimin bujqësor dhe të çojnë në rritje të çmimeve të ushqimeve në tregjet ndërkombëtare.

Problemet me ujin dhe tregtinë globale
El Niño mund të ndikojë edhe në rrugët ujore strategjike. Në Panama, nivelet e ulëta të ujit kufizuan numrin e anijeve që mund të kalonin përmes Kanalit të Panamasë. Si rezultat, tregtia globale u ngadalësua dhe u shkaktuan humbje prej miliona dollarësh.

Kjo tregon se ndikimi i fenomenit nuk kufizohet vetëm te moti, por prek drejtpërdrejt ekonominë botërore dhe zinxhirët e furnizimit.

Çokollata mund të bëhet më e shtrenjtë
Pasojat e El Niños po ndihen edhe në tregun global të kakaos. Bregu i Fildishtë, prodhuesi më i madh i kakaos në botë, ka ngadalësuar shitjet dhe ka rritur çmimet për shkak të frikës se thatësira mund të dëmtojë të korrat e ardhshme.

Rezultati mund të jetë i prekshëm për konsumatorët: çmime më të larta të çokollatës në mbarë botën.

Goditje edhe për industrinë e peshkimit
Në Peru, pasojat e El Niños janë veçanërisht të dukshme në sektorin e peshkimit.

“Një nga mënyrat konkrete se si preket Peruja është mbyllja e aktivitetit të peshkimit që varet nga ujërat e pasura me lëndë ushqyese që ngjiten nga thellësitë e Oqeanit Paqësor gjatë kushteve normale”, shpjegon Callahan.

Kjo sjell pasoja të konsiderueshme ekonomike për rajonin dhe komunitetet që varen nga peshkimi.

Pasojat mund të zgjasin për vite
Sipas ekspertëve, efektet ekonomike të El Niños nuk shfaqen gjithmonë menjëherë.

Ekonomitë mund të rikuperohen përkohësisht duke rindërtuar infrastrukturën dhe duke rikthyer prodhimin bujqësor. Megjithatë, studimet tregojnë se shumë vende përballen me ngadalësim ekonomik dhe mungesë rimëkëmbjeje për 5 deri në 10 vjet pas ngjarjeve ekstreme klimatike.

Si po përgatiten qeveritë?
Shumë vende kanë nisur masa paraprake për të reduktuar pasojat. Panamaja ka përgatitur plane për racionimin e ujit, me qëllim shmangien e një bllokimi tjetër të Kanalit të Panamasë. Bangladeshi ka investuar në kërkime shkencore dhe sisteme paralajmërimi të hershëm për fatkeqësitë natyrore. Sipas Paul Roundy, profesor në Universitetin e Albany në SHBA, këto masa kanë dhënë rezultate konkrete. “Numri i njerëzve që humbin jetën nga stuhitë është ulur ndjeshëm. Nga qindra mijëra viktima në të kaluarën, sot në shumë raste flitet vetëm për dhjetëra”, thekson ai.

El Niño mbetet një nga fenomenet klimatike më të fuqishme në botë. Përveç ndikimit në mot, ai mund të rrisë çmimet e ushqimeve, të pengojë tregtinë ndërkombëtare, të dëmtojë bujqësinë dhe të ngadalësojë rritjen ekonomike për shumë vite. Për këtë arsye, ekspertët theksojnë se përgatitja dhe investimet në sisteme paralajmëruese janë thelbësore për të zbutur pasojat e tij./DW

Ushtria amerikane praktikisht ka mbetur pa raketa taktike me precizion të lartë me bazë tokësore për shkak të fushatës së saj kundër Iranit, raportoi Reuters, duke cituar burime të njohura me çështjen.

Raportime të shumta mediatike dhe vlerësime të pavarura kanë sinjalizuar mungesa të municioneve kritike të sofistikuara në inventarin e SHBA-së që nga një raport i Qendrës për Strategji dhe Ndërkombëtare (CSIS) i publikuar në prill. Përveç shterimit të aftësive sulmuese të Pentagonit, besohet se konflikti ka lënë një dëm të madh në stokun e raketave anti-ajrore të SHBA-së. Udhëheqja e vendit i ka mohuar vazhdimisht pohime të tilla, duke këmbëngulur se ende ka shumë municione.

Sipas burimeve të Reuters, konflikti me Iranin ka varfëruar stokun e raketave tokë-tokë të Ushtrisë Amerikane, përkatësisht Sistemet e Raketave Taktike të Ushtrisë (ATACMS) dhe Raketat me Sulm Preciz (PrSM), me dy burime që i thanë agjencisë se ushtria ka përdorur “pothuajse të gjitha” këto armë.

Ndërsa shkalla në të cilën ushtria amerikane i shterroi stoqet e saj të ATACMS nuk dihej më parë, shterimi i dukshëm i stokut të PrSM është raportuar vazhdimisht që nga mesi i prillit. Municioni, i planifikuar të zëvendësonte ATACMS-in e vjetër, nuk ishte i bollshëm që në fillim – Pentagoni kishte porositur 130 para vitit fiskal 2024 dhe 250 të tjera në vitin 2025, dhe nuk ishte menjëherë e qartë se sa njësi ishin dorëzuar në të vërtetë. Raketat e reja përfunduan duke u përdorur kundër Iranit pa iu nënshtruar një cikli të duhur testimi.

Sekretari i Luftës i SHBA-së, Pete Hegseth, i hodhi poshtë raportet si “lajme të rreme”. Në X, ai veçoi një segment të CNN që citonte një burim të thoshte se SHBA-të kishin përdorur gati 80% të “interceptorëve të tyre kryesorë të raketave”. BW

Tym ngrihet pas një sulmi me dron ukrainas ndaj një depoje të kompanisë Wildberries në rajonin rus të Samarës, më 2 gusht.

Enklava spanjolle e Ceutës është përballur me një nga valët më të mëdha të emigracionit të parregullt në historinë e saj, pasi më shumë se 50 mijë emigrantë kaluan kufirin nga Maroku brenda vetëm 24 orëve.

Sipas autoriteteve spanjolle, 67 persona kanë humbur jetën gjatë përpjekjeve për të hyrë në territorin spanjoll, ndërsa shumica e migrantëve janë kthyer menjëherë në Marok. Fluksi i regjistruar është i barabartë me më shumë se dy të tretat e popullsisë së Ceutës, duke ushtruar presion të jashtëzakonshëm mbi strukturat e sigurisë dhe shërbimet humanitare.

Ceuta, së bashku me Melillan, përbën kufirin e vetëm tokësor të Bashkimit Evropian me Afrikën. Edhe pse ndodhet në bregun verior të kontinentit afrikan, territori administrohet nga Spanja prej shekujsh, ndërsa Maroku vazhdon ta konsiderojë atë territor të pushtuar.

Për shkak të pozicionit të saj strategjik, Ceuta mbetet një nga pikat kryesore të hyrjes në Evropë për migrantët që largohen nga varfëria, konfliktet dhe pasiguria. Shumë prej tyre tentojnë të arrijnë në territorin spanjoll duke notuar nga brigjet marokene ose duke kaluar gardhet kufitare.

Autoritetet marokene nuk kanë dhënë ende një shpjegim zyrtar për kalimin masiv të kufirit, ndërsa analistët e lidhin situatën me tensionet diplomatike në rajon. Ekspertët vlerësojnë se një lëvizje e përmasave të tilla nuk mund të ndodhë spontanisht dhe dyshojnë se faktorët politikë kanë luajtur rol në zhvillimet e fundit.

Në reagimin e saj, qeveria spanjolle ka dislokuar ushtrinë dhe forca shtesë policore për të rimarrë kontrollin e kufirit. Kryeministri Pedro Sanchez e ka cilësuar situatën si një “shkelje të integritetit territorial të Spanjës”, ndërsa ka akuzuar rrjetet e trafikimit të migrantëve për përhapjen e informacioneve të rreme që nxitën valën e kalimeve.

Kriza ka shkaktuar debat edhe në Bashkimin Evropian. Disa vende dhe forca politike kanë kërkuar masa më të ashpra për mbrojtjen e kufijve të jashtëm të BE-së, ndërsa Franca ka forcuar kontrollet në kufirin me Spanjën, në përpjekje për të frenuar lëvizjet dytësore të migrantëve. bw

VOAL- Një natë e tensionuar në Ceuta, ku një emigrant maroken u godit me thikë në ijë nga një tjetër maroken gjatë një grindjeje pranë shkollës Andres Manjon. Sulmuesi iku para se të mbërrinte policia, ndërsa i plagosuri u dërgua në spital, raporton Europa Press. Në të njëjtën kohë, disa dhjetëra emigrantë që kishin kampuar jashtë Qendrës së Përkohshme të Paraburgimit të Imigracionit (CETI), tashmë të mbushur plot, u përpoqën të hynin me forcë në objekt, duke shembur një pjesë të gardhit perimetrik. Policia kombëtare ndërhyri me një vendosje të konsiderueshme, duke vendosur një kordon sigurie rreth qendrës dhe duke e vënë situatën nën kontroll. Një emigrant shtrihet në tokë pranë një ushtari spanjoll që mban një shkop gome.

Sipas burimeve policore të raportuara nga media, më shumë se 500 persona presin të pranohen jashtë CETI-t, ndërsa vetëm gratë dhe fëmijët janë lejuar të hyjnë për arsye humanitare. Burime të Ministrisë së Brendshme i thanë ANSA-s se nata në qytetin autonom kaloi në paqe. Ardhjet e emigrantëve “u ndaluan plotësisht dhe nisjet drejt Marokut vazhduan, pa incidente të rëndësishme”. Nga afërsisht 50 000 persona që hynë në qytetin spanjoll në Marok në pak më shumë se 24 orë, pothuajse të gjithë – sipas autoriteteve spanjolle – janë kthyer në territorin maroken.

Kriza më e keqe e migracionit në Spanjë në vite

Qyteti autonom i Ceutës u godit nga kriza më serioze e emigracionit në vitet e fundit, me një fluks të paparë prej afërsisht 50 000 personash (kryesisht të rinj dhe adoleshentë, por duke përfshirë të paktën 7 000 të mitur) që arritën të kalonin kufirin nga toka dhe deti në vetëm 24 orë, shpesh duke notuar nëpër valëpritësin Tarajal. Vala e jashtëzakonshme, e përshkruar nga kryeministri spanjoll Pedro Sánchez si një “sulm i vërtetë ndaj sovranitetit territorial të Spanjës”, u shkaktua nga organizatat kriminale që shfrytëzuan një vendim të kohëve të fundit të Gjykatës Supreme spanjolle mbi kthimet. Kalimi dramatik, për fat të keq, rezultoi në një numër shumë të madh viktimash, me të paktën 67 vdekje në det.

Përballë emergjencës dhe shembjes së qendrave të pritjes, Madridi vendosi ushtrinë dhe nisi një plan masiv riatdhesimi në marrëveshje me Marokun, i cili u zotua të merrte mbrapsht të gjithë migrantët e parregullt. Operacionet e riatdhesimit vazhduan me një ritëm të shpejtë (deri në 150 persona në minutë), duke lejuar – siç u përmend – kthimin në territorin maroken të shumicës së atyre që mbërrinin në enklavë. Ndërkohë, situata e shtyu Italinë të kërkonte pezullimin e përkohshëm të Marrëveshjes së Shengenit me Spanjën. Spanja nuk ishte e kënaqur me këtë vendim.

Ceuta është në Afrikën e Veriut

Ceuta është e vendosur gjeografikisht në Afrikën e Veriut, por politikisht është një qytet autonom i Spanjës. Është një territor i vogël me 84,000 banorë të vendosur në majën veriore të Marokut, në kufi me Ngushticën e Gjibraltarit. Përbën një nga dy kufijtë tokësorë midis Afrikës dhe Evropës (së bashku me enklavën tjetër spanjolle, Melillën). Agjencitë

Shërbimi Federal i Sigurisë së Rusisë (FSB) ka ngritur akuza ndaj themeluesit të Telegramit, Pavel Durov, duke e fajësuar për lehtësim të aktiviteteve terroriste, ndërsa ka lëshuar një urdhër arresti ndërkombëtar ndaj tij. Sipas FSB-së, platforma “Telegram: nuk ka hequr përmbajtje që, sipas autoriteteve ruse, është përdorur nga shërbimet speciale ukrainase dhe organizata të shpallura terroriste apo ekstremiste për të koordinuar sulme, sabotime dhe aktivitete kibernetike në territorin rus. Durov ka lindur në Rusi, por mban pasaportë franceze dhe të Emirateve të Bashkuara Arabe.

Ai është përplasur shpesh me autoritetet ruse, pasi “Telegram” është një nga platformat kryesore të komunikimit në Rusi dhe zyrtarët vendas janë përpjekur vazhdimisht të bllokojnë aksesin ose të pengojnë përdorimin e tij duke ushtruar presion mbi Durovin që të dorëzojë të dhënat e përdoruesve ose në të kundër rusët duhet të përdorin një tjetër platformë mesazhesh të mbështetur nga shteti.

41-vjeçari aktualisht jeton në Francë, ku po përballet gjithashtu me hetime lidhur me pretendimet se “Telegram” nuk ka ndërmarrë masa të mjaftueshme kundër aktiviteteve kriminale në platformë dhe nuk ka bashkëpunuar sa duhet me autoritetet. Pavel Durov u bë i njohur në vitin 2010 si themeluesi i “VKontakte” i njohur gjerësisht si “Facebook-u i Rusisë”, por u largua nga vendi pasi presionit nga autoritetet për të marrë kontrollin e platformës.

Aplikacioni i mesazheve Telegram, i krijuar në vitin 2013, me mbi një miliard përdorues në mbarë botën, është bërë një nga burimet kryesore të informacionit gjatë luftës në Ukrainë, si për autoritetet e atij vendi ashtu edhe për ato ruse. gsh

Ukraina kreu gjatë natës një sulm me dronë ndaj zonës së Shën Petersburgut, duke shkaktuar zjarre në disa objekte biznesi dhe duke vënë në alarm autoritetet ruse. Sipas zyrtarëve rusë dhe mediave lokale, sulmet u shtrinë edhe në rajonin e Tverit dhe në Krime.

Guvernatori i Shën Petersburgut, Alexander Beglov, konfirmoi se dronët kishin goditur objekte të infrastrukturës civile përgjatë autostradës Moskovskoye, pa dhënë detaje mbi dëmet. Ndërkohë, guvernatori i rajonit të Leningradit, Alexander Drozdenko, deklaroi se mbrojtja ajrore ruse kishte rrëzuar rreth 60 dronë ukrainas gjatë natës. Një zjarr i madh shpërtheu në një objekt të kompanisë Wildberries në parkun e biznesit Utkin Zavod, në fshatin Novosaratovka, në jug të Shën Petersburgut. Pamjet e publikuara në rrjetet sociale tregojnë shtëllunga të mëdha tymi të zi që ngrihen mbi zonë. Kanali i pavarur rus në Telegram, ASTRA, raportoi se edhe një depo e dytë e Wildberries në lagjen Susari u përfshi nga flakët. Kompania konfirmoi se dy depot e saj në qytet kanë pezulluar përkohësisht aktivitetin, pa sqaruar arsyet.

Shën Petersburgu, vendlindja e presidentit rus Vladimir Putin dhe qyteti i dytë më i madh i Rusisë, ndodhet rreth 1,100 kilometra nga kufiri me Ukrainën dhe konsiderohet një nga zonat më të mbrojtura nga sistemet e mbrojtjes ajrore. Megjithatë, muajt e fundit, sulmet me dronë ukrainas kanë depërtuar gjithnjë e më shpesh në mbrojtjen ruse, duke goditur objektiva në qytete të rëndësishme, përfshirë Moskën dhe Shën Petersburgun. Deri tani, autoritetet ruse nuk kanë raportuar për viktima, ndërsa vlerësimi i dëmeve është ende në vijim. bw

VOAL- Ukraina nisi një valë tjetër sulmesh me dronë me rreze të gjatë veprimi në të gjithë Rusinë të enjten. Sulmet thuhet se synuan disa objekte nafte dhe infrastrukturë kyçe të tubacioneve, si dhe një qendër tjetër për gjigantin e tregtisë elektronike Wildberries. Kanalet ruse të monitorimit raportuan një seri shpërthimesh mbi Voronezh në orët e para të së enjtes.

“Voronezh është nën një sulm masiv nga mjete ajrore pa pilot (UAV). Një nga objektivat e mundshëm mund të jetë qendra logjistike e Wildberries,” raportoi kanali ukrainas i monitorimit Telegram Exilenova+. Guvernatori i Voronezhit Alexander Gusev konfirmoi se sulmi i natës shkaktoi viktima dhe atë që ai e quajti “pasoja serioze”, por nuk specifikoi se cilat objekte u goditën. Në një përditësim të mëvonshëm, guvernatori deklaroi se forcat e mbrojtjes ajrore rrëzuan 36 UAV mbi Voronezh dhe gjashtë rrethe të rajonit gjatë natës.

“Pas rrëzimit të një droni pa pilot (UAV) në një periferi të Voronezhit, një zjarr shpërtheu në një shtëpi private, ku, për fat të keq, një fëmijë trevjeçar humbi jetën. Prindërit e tij pësuan lëndime me ashpërsi të ndryshme”, shkroi guvernatori. Gusev shtoi se një djalë 19-vjeçar nga e njëjta komunë pësoi lëndime të lehta, por nuk kërkoi shtrim në spital. Ai gjithashtu vuri në dukje se shrapneli dëmtoi rreth një duzinë automjetesh. “Çatia e një depoje tregu dhe fasada e një depoje tjetër u dëmtuan. Dritaret në nëntë shtëpi private u thyen, ndërsa çatitë dhe ndërtesat ndihmëse u dëmtuan gjithashtu. Pesëmbëdhjetë apartamente në pesë ndërtesa banimi do të kërkojnë zëvendësim të dritareve dhe riparime elektrike.”

Sulmi i raportuar vjen pasi Wildberries kishte pezulluar tashmë operacionet e natës në depon e saj në Voronezh, nga mesnata deri në orën 6:00 të mëngjesit, pas sulmeve të mëparshme ukrainase në rrjetin logjistik të kompanisë. Wildberries zakonisht quhet një “treg i zakonshëm online”, por dronët, kabllot me fibra optike për dronë operativë, pajisjet taktike dhe produkte të tjera të nivelit ushtarak janë hapur në shitje në platformë.

Gjithashtu të enjten, sipas komunitetit OSINT Exilenova+, dronë sulmues goditën kompleksin e rafinerisë NS-Oil në rajonin Ulyanovsk të Rusisë, duke shkaktuar një zjarr të madh të dukshëm në të gjithë qytetin përreth. Sulmi kishte në shënjestër objektet e Novospasskoye, ku pamjet e marra nga banorët vendas tregonin rezervuarë magazinimi që digjeshin dhe tym të zi të dendur që ngrihej mbi vendin industrial. Guvernatori rajonal Alexey Russkikh më vonë konfirmoi një sulm me dronë në atë që ai e përshkroi si një objekt të lidhur me sektorin e karburantit dhe energjisë. Exilenova+ raportoi se sulmi mund të ketë goditur si rafinerinë NS-Oil ashtu edhe një vend të afërt për magazinimin e karburantit, duke përfshirë një bazë gazi të lëngshëm të operuar nga kompania. Agjencitë