Aktori i shquar Viktor Zhusti mbrëmë u fotografua me protestuesin Adriatik Lapaj, i cili sot ka hyrë në ditën e natën e 15-të që proteston nën dritaren e kryeministrit.

Kur Adriatiku e vendosi foton në rrjetin social,  Zhusti reagoi publikisht duke e konsideruar përdorimin e fotos së tij një shpërdorim miqësie.

Pati reagime pa fund, që merrnin në mbrojtje Adriatikun, por edhe nga ata që merrnin rolin e avokatëve të mbronin integritetin e aktorit të shquar.

I nderuar Z.Zhusti:

Mos u trembni nga fotoja me Adriatik Lapajn.

Adriatik Lapaj nuk është as i akuzuar, as nën hetim, as për shpërdorim të parasë publike si grabitqar i tenderave, as për vjedhje të taksave tona, as për korrupsion, as për nepotizëm, as për klientelizëm, as si mashtrues i popullit.

Adriatik Lapaj proteston për arsye që edhe juve mund t’ju tërhiqnin të merrnit pjesë.

Nëse ju e keni zgjidhur pensionin me 1 milionë lekë të vjetra, me meritë padyshim, po për kolegët tuaj që vuajnë a mendoni ndonjëherë.

A nuk përbën ky fakt, që ju të dilni në protesta.

Po për pensionistët shqiptarë që paguhen për 45 vite punë sa tri shishe verë që kupola i pi gjatë një dreke, a ju bën ky fakt të vuani?!

Po për pacientët e Onkologjikut, që nuk kanë mundësi të kurohen,

Po për vajzat dhe djemtë e Shqipërisë, që në vend të bëhen aktorë si ju e ju t’ju mësoni artin aq të bukur të aktrimit,

rendin nga sytë këmbët, se shteti ua djeg tokën nën këmbë!

Po për prindërit që digjen nga malli për fëmijët e nipërit!

Tragjeditë e mëdha të Shekspirit duken sa të vogla përpara vuajtjeve sa të mëdha të shqiptarëve.

Elitat e një kombi dalin në ballë, jo në bisht.

Elitat në Shqipëri janë në bisht.

Ju jeni Aktor i shquar, pjesë e elitës kombëtare e fshehur pas kuintave.

Dilni në skenë Profesor Zhusti, mjaft pas kuintave!

Jeni Aktor i shquar.

Prandaj Adriatiku deshi të fotografohej me ju.

Për të frymëzuar njerëzit që kanë mbetur të zhgënjyer nga politika.

Ndërsa ju preferoni të heshtni ose tregoni trimëri duke denoncuar djalin e mikut tuaj,

që ndërkohë e uroj Gent Kamen për paroditë aq të bukura!

Nuk ta prish biografinë Adriatik Lapaj, z.Zhusti.

Përkundrazi ua ndreq në sytë e popullit, publikut!

Populli është si një plate e pafund spektatorësh.

Nuk është miqësi e rrugës, është miqësi e lirisë,

Do t’ju bënte nder juve, do t’ju nxirrte nga paskuintat.

Sepse roli pas kuintave është për suflerët, jo për Artistët e formatit tuaj,

që humbët një shans të bukur për të vërtetuar atë që thotë Albert Camus,

unë rebelohem, prandaj egzistoj!

unë protestoj, prandaj egzistoj!