Artisti i shquar Osman Mula mbron kauzën opotizare dhe shtypi i opozites nuk e përfill dhe e censuron!

Hyrje

Në Shqipëri, në vijim të konvertimit të elitës në një dordolec të Vëllait të Madh, Bashkia Shkodër pushoi nga puna dy aktorë të Teatrit Migjeni. Ata janë Simon Shkreli dhe Vladimir Doda. Shkreli ka bashkëshorte kryetaren e PD në Shkodër, ndërsa Vladimir Doda, i shkolluar dhe kulturuar në Perëndim, kthehet para 6 vjetësh në Atdhe. Ai njihet si njëri nga kritikët kundër prishjes së Teatrit Kombëtar.

Një nga zërat e fuqishëm që i mori në mbrojtje, jo vetëm si individë por si fenomen, ishte Artisti i shquar Osman Mula, i cili apeloi dhe vuri alarmin e luftës së klasave.

Ata artistët që dalin e bëjnë fushatë për PS gratifikohen me role dhe projekte?

Ndërsa ata që Vëllai i Madh i sheh si dele të zeza, regjisori i le pa role dhe bashkia i pushon?

Janë pyetje që mbështeten në dyshime konkrete! Pyetje e parë lidhet me favoritizëm të artistëve, e dyta me persekutimin e tyre.

Kur Artistët kthehen në shërbëtorë të Vëllait të Madh, i ka ardhur fundi i lirisë së individit!

Prandaj me të drejtë Mjeshtri i Madh vuri alarmin!

Kujtova se apeli i tij do të botohej në shtypin shqiptar! Kështu do të duhej! Por mjerisht mediat shqiptare janë të mbushura me trushplarës.

Të paktën do të duhej ta botonte Syri.net apelin e Artistit të shquar Osman Mula!

Mirë mediat trushpëlarëse, por edhe syri.net qenka shoqja e tyre?!

***

Pas turit të Foltoreve që përfunduan me zgjedhjet në PD dhe rikthimin e Berishës si lider, duke parë se Syri.net, që presupozohet se është medium i opozitës, e bëri personazh të ekranit të vogël Baton Haxhiun, i cili ishte një nga emrat që denonconte më së shumti nëpër Foltore Sali Berisha, dola disa herë publikisht. Po kështu iu drejtova edhe privatisht Çim Pekës kur i jepte vendin qendror një ish censori të PPSH. Edhe po të shohësh rrethin vicioz të Çim Pekës apo kolegëve të tij vë re se ata janë të majtë – pra nuk përfaqësojnë idealet e një partie të qendrës që pretendon të mbajë profil konservator. Por gjithësesi opozitarizmi është bashkues brënda shinave të parimeve të demokracisë.

Kur në prag të 11 Majit, Baton Haxhiu doli me një sondazh aspak profesional dhe manipulator, që i jepte fitoren Edi Ramës, Çim Peka u duk se u zgjua nga gjumi. Por dukja nga realiteti janë dy gjëra krejtësisht të kundërta. Edhe dukja shpesh është manipulatore po aq sa sondazhi i Baton Haxhiut më 10 maj 2025.

Pasi kaluan rreth dy muaj pas zgjedhjeve të 11 majit 2025, Çim Peka u shfaq me një status programatik si të Mao Ce Dunit: “Mos te genjejme veten, “Rithemelimi” nuk ka ndodhur! Ajo që e konsideruam “Rithemelim” ishte “Rikthim”. Dhe ishte zhvillimi politik sovranist më brilant pas pluralizmit në këto 35 vjet. Por vetem kaq! “Rithemelimi” duhet të ndodhë tani pas raportit final te OSBE/ODHIR. Ose PD hapet si asnjehere tjeter, ose mbyllet perfundimisht!” –

Ky status shpreh një të vërtetë të madhe – por Syri.net duhej të niste me Mea culpa.

Syri.net ka mbajtur një peshë të madhe politike padyshim, por me status quonë – ka krijuar grupin e opinionistëve që na vënë në gjumë çdo natë.

***

“Mos të gënjejmë veten se “Rithemelimi” ka ndodhur”.

Dmth “Rithemelimi” nuk ka ndodhur!

Kjo është e vërteta!

Natyrisht ishte një luftë për jetë a vdekje – a do të mbetej PD apo do të zhdukej – dhe kjo dilemë ka mbetur edhe sot.

Shihni si është katandisur LDK – e krijuar nga Ibrahim Rugova.

Shihni ish deputetët e PD me në krye Lulzim Bashën ku janë katandisur, me gjithë mbështetjen e pakursyer të Vëllait të Madh, Edi Ramës, që ka uzurpuar çdo pushtet, që ka hyrë në çdo shtëpi shqiptare, që i ka kushtëzuar rrogat me vota, me punësime, me projekte, me role në Teatro, me luftë klasash, me depersonalizim,  me elitë lejfene, me Batona që na jepnin mend në një medium që presupozohet se i takon opozitës!

Baton Haxhiu emëruesi i përbashkët i Vëllait të Madh dhe Syri.net.

Që Vëllai i Madh synon të shfarosë rebelizmin dhe ndërgjegjen kombëtare përmes luftës së klasave kjo nuk është diçka e re. Të zhdukë kulturën dhe emrat që e përfaqësojnë e t’i zëvendësojë me zuzarë.  Prandaj po shpopullohet ai vend.

“Ose PD të hapet si asnjëherë – ose të mbyllet perfundimisht”, shkruan Çim Peka.

Po syri.net çfarë duhet të bëjë!

Ky rrezik që i kanoset sot Shqipërisë, kur çdokush që nuk mendon si Vëllai i Madh humb vendin e punës, do të jetë pa rrugëdalje e shpëtim, nëse nuk do të mbijetojë shtypi i lirë, nëse nuk do të mbeten burime të fjalës së lirë!

Çdo të ndodhë nëse Syri.net apo shtypi i lirë më në fund nuk do të hapen!

Mora si shembull Syri.net, sepse është skandaloze që ky medium është i mbyllur jo vetëm ndaj zërit kritik jashtë suazave partiake, por edhe ndaj përfaqësuesve të forumeve të PD.

Mjeshtri i Madh Osman Mula është nga të paktët rebelë që ka rezistuar në PD, nga persekutimet që u bën establishmenti brënda PD personaliteteve shqiptare, kur kolegët e tij janë shitur tek Vëllai i Madh. Artisti i Madh Osman Mula u ndëshkua nga Vëllai i Madh duke iu mohuar e drejta e pensionit si figure madhore e kulturës shqiptare, por nuk u dorëzua!

Nga njëra anë ai përballet me Vëllain e Madh të plotpushtetshëm, nga ana tjetër me establishmentin e PD.

Çim Peka kërkon të hapet PD e bunkerizuar, ndërsa nuk e zhbunkerizon mediumin që pretendon se përfaqëson opozitën, duke ia mbyllur ekranin një personaliteti i shquar të skenes dhe ekranit shqiptar si Mjeshtri i Madh Osman Mula.

Pra, thënë shqip syri.net e censuron Osman Mulën kur ky denoncon luftën e klasave ushtruar nga Vëllai i Madh, siç ishte rasti i pushimit nga puna të dy aktorëve nga Bashkia Shkodër. Syri.net dhe Vëllai i Madh në rezonancë!

Deri kur Syri.net do t’ju japë hapësirë ish censorëve e mbyllë portën një zërave të fuqishëm si Osman Mula, i cili gëzon kredibilitet të padiskutueshëm ndër shqiptarë, si artist i madh, si personalitet i shquar edhe si figurë me integritet, pretendimet për hapje të PD do të mbeten vetëm propagandë.

E kam pare me sytë e ballit live tek Syri.TV, kur Osman Mula ka mbajtur qëndrim kritik ndaj asaj që ka ndodhur brënda në PD, kur ka pohuar që para dy vitesh, jo sot si Çim Peka (më mirë vonë se kurrë), se Rithemelimi i PD nuk ka ndodhur dhe është censuruar!

Quo Vadis PD! Quo Vadis Syri.net!

E pra, përgjegjës për këtë kataklizmë të sistemit demokratik nuk është vetëm Vellai i Madh!

Po kthehem tek ajo sentenca gur themeli se Rithemelimi nuk ka ndodhur. Po, nuk ka ndodhur Rithemelimi!

PD e mban në këmbë vetëm një emër. Ndaj të cilit Vëllai i Madh organizoi dhe harxhoi miliona duke kompromentuar ish zyrtarin më të lartë të FBI deri tek blerjet kokë për kokë brenda PD, me qëllim shkatërrimin e saj dhe të opozitarizmit e pluralizmit. Të gjithë ata “opozitarë” që bleu Vellai i Madh për të zhdukur PD dhe opozitën ishin humbës kur dolën të pavarur. Edhe emrat e establishmentit janë humbësa, pasi e kanë fituar pushtetin në tabaka dhe të katapultuar. Ku janë? Nuk i njeh kush! Nuk ua var kush!

Ndërsa një medium i fjalës së lirë i falet Shqipërisë, i falet konstitucionit të vlerave dhe lirisë, i falet kodit të gazetarit për të mbrojtur të vërtetën, anticensurë, anti-autocensurë, duke e edukuar popullin që të mos pranojë të hajë bar, por të luftojë për një jetë me dinjitet, sepse Sovrani është ai!

Por kur një medium që pretendon se është opozitar censuron zërat sovrane që mbrojnë kauzën opozitare si Artisti i shquar Osman Mula, sovranitetin e të cilit Vëllai i Madh e ndëshkoi, duke mos i dhënë si shpërblim, pensionin që e meritonte, më thoni çfarë duhet të bëjmë për ta shpëtuar atë vend dhe a ka shpëtim ai vend!