Megjithëse ngjarja ditës së Hënë 10 Shkurti, 2025 u lidh me arrestin me burg të Kryetarit të Bashkisë Tiranë Erion Veliaj ajo duhet kuptuar së pari në efektin propagandistik të saj. U tërhoq tërësisht vëmendja e publikut jo vetëm thjeshtë me paraqitjen e prokurorëve të BKH-s në ndërtesën e qytetarit të parë të kryeqytetit, por edhe me mbylljen e lajmit të ditës për të, ku çuditërisht Veliaj dha një reagim në ATSH se ai dhe familja e tij nuk kanë lidhje me fjalën “korrupsion”. E bërë kjo deklaratë nga mjediset e izolimit, do të ishte disa herë më shumë e fuqishme se sa fotografia ilustruese që ringjallet nga fond arkiva e ATSH-s.

E vërteta është se nuk kemi më të bëjmë me imazhin e Erion Veliaj sikur e bën këtë deklaratë nga mjediset e zyrës.

Ky është shtrembërim i faktit!

Ky nuk është më jo vetëm perceptimi i lajmit, por as edhe vërtetësia e tij  në qoftë se synohet të ndahet e vërteta nga propaganda.

Rregulli numër 1, është vërtetësia e lajmit!

Në qoftë se duam të respektojmë inteligjencën e publikut, atëherë le të ilustrohet vendndodhja e Erion Veliajt deri sa t’i provohet pafajësia e tij pa e paralelizuar atë me “Reagimin e Plotë”, fyerja prej të cilit është një shantazh mediatik prej një organi zyrtar informacioni të qeverisë siç është ATSH-ja në drejtim të publikut dhe institucioneve të tjera.

Erion Veliaj prej 10 Shkurtit është me masë arresti dhe kjo nuk bën atë të ndodhet më në të njëjtën kohë në dy vende të ndryshme si të tjera herë.

Kjo është njëra nga arsyet që të bën të kuptosh se mediat ishin të papërgatitura dhe hezituan apo dhe vepruan me vonesë në pjesën më të madhe të rasteve.

Pesha e dytë e rëndë ishte Kuvendi i Shqipërisë me një seancë të zakonshme plenare. Ligjvënësit nuk e menaxhuan dot profesionalisht ngjarjen dhe se ndarjet e theksuara në linjat politike kushtëzuan zhvillimet e debatit dhe ngjyrimet e përgjegjësive. Kështu ky institucion, i konfuzuar si asnjëherë nga aktorët e marrëzisë së forcës së kartonit të Rilindjes Socialiste shfaqën mungesën e identitetit për problemet e qytetarëve në jetën parlamentare. Kryesorja marrjen seriozisht të përgjegjësive, por bile edhe në të kundërt. Si për të konkretizuar dyshimet për depërtimin e korrupsionit në jetën politike dhe lidhjen e interesave, kriza e thellë e krijuar konstatohet se  po tregon nuk do të mundet t’i ushqejë më me oksigjen ditët e numëruara të pushtetit të kryeministrit Rama.

Në këtë përmbajtje dhe këndvështrim duhet theksuar se disa fakte të rëndësishme nga dhjetëditëshi i parë i muajit Shkurt ishin me shumë rëndësi të nënvizohen para se të arrihet tek ngjarja e së Hënës, arrestin me burg të Kryetarit të Bashkisë së Kryeqytetit Erion Veliaj.

Erion Veliaj ishte problemi i ditur.

Pjesa e paditur të cilës i shtohet konfuzioni i arrestit janë zgjedhjet e 11 Majit.

Vetëm tre muaj larg dhe kur pritet që të marrë pjesë për të parën herë diaspora.

Ndalesa në efektin e propagandës së partisë shtet rreth një arresti, ka qenë e ushqyer dhe e shumëpritur.

Lufta për pushtet brenda llojit në një politikë dhe ideologji monopartiake duhet kuptuar si kthim pas i demokracisë dhe i shtetit të së drejtës.

Ngrehina shtetërore në qoftë se nuk ka mundur të ruajë dot pjesë të integritetit dhe të pavarësisë së pushteteve gjatë viteve të gjata të tranzicionit demokratik me këtë situatë të krijuar prej krimit ekonomik dhe korrupsionit do të tregojë se kur kjo ndërtesë të shembet do të mbulojë me heshtje të gjitha vërtetat dhe do të mundohet të vrasë të gjitha liritë.

Ndaj ky është rasti i duhur historik i shqiptarëve që me qetësi dhe maturi të tregojnë se duan të ndërtojnë vërtetë një shtet modern i ftuar drejt Evropës, por fatkeqësisht i përçarë dhe i vonuar si faktor shqiptar.

Prandaj fokusi dhe energjitë si opozitës  ashtu edhe të forcave shoqërore që e duan  Shqipërinë dhe zhvillimin e saj demokratik e kanë përgjegjësinë e madhe për të mos ju ndarë për asnjë çast kërkesave të ndërtimit të një procesi të ndershëm zgjedhor, vigjilencës së regjistrimit dhe sigurimit të një pjesëmarrje masive  brenda dhe jashtë vendit, veçanërisht diaspora për të  ushtruar të drejtën e votës dhe zgjedhje të lira.

Në qoftë se do të bënim një renditje ngjarjesh për të cilat efekti propagandë i arrestit Veliaj ndikoi, rëndësia për vëmendje do të ishte:

1- Zhvillimet e rëndësishme me Zgjedhjet në Kosovë, u harruan.

2- Mediat dhe titujt e standardeve demokratike të shtetit amë thuajse “patriotike” të ndjekjes deri në mesnatën e së Dielës “Kosova Voton” dhe rezultati, u zbeh si mbështetje.

3- Protesta e opozitës e 8 Shkurtit me pjesëmarrjen e parë pas shumë kohësh si rikthimit në betejë ndërgjegjësuese të Partisë Demokratike, me simbole, udhëheqës dhe me mbështetje mbarëkombëtare aq sa edhe kryetari i saj Prof. Dr. Sali Berisha do të udhëtonte pas protestës drejt Romës për një takim me diasporën, nuk ju dha vendi i duhur si një moment i ri ngritje i opozitës.

E ndërsa këto u trysnuan qëllimshëm nga propaganda në kampin e pushtetit, ku nënkuptohet investimi politik për Ramën, dhjetëditëshi i parë i muajit Shkurt ishte çoroditja vetë e shoqëruar nga takime pa thelb dhe pa peshë që nuk mbajnë më fillin e një programi politik, por interesat e një autokrati.

Kështu Rama nga frymëzimi me Rininë, u shpërngul disa ditë në Spanjë ku u shmangën detyrat e tij shtetërore për një takim në Spanjë me Mbretin Felipe VI dhe ku plot një javë Rama foli vetëm për Kongresin Botëror të Ligjit* dhe turizmin si pa e ditur se çdo të sillte e Hëna.

Dhe si për ironi të fatit nën rrezet e diellit buzë një plazhi “anonim”, kryeministri i fshehur prej një jave nga zyra e tij i kthente përgjigje Sali Kurra-s (ndjekës i rubrikës “Sy  m’sy”), dhe i tregonte se çfarë dallimi ka Shqipëria e bërë nga Zoti në raport me Shqipërinë që Rama ndjehet Zoti i saj kur thotë:-“Shqipërinë turistike e bëmë ne dhe askush tjetër”.

Në  një delir të plotë dhe mëndjedhënës, kryeministri ironizon me vulgaritet dhe fyerje bashkëbiseduesin kur nuk i shkon kunja e tij.

Pra një kryeministër që ulet e ngrihet në biseda veç se me turizmin çdo pjesë të ditës dhe në çdo takim dhe ndjehet zot i arritjeve, tregon paqëndrueshmëri pragmatike në politikë dhe se vuan nga një simptomë “bipolare politike”. Ai hyn në atë marrëdhënie me Zotin  kur flet nga një ndjekës si Saliu në “Sy m’sy”  sikurse edhe ashtu del kur gjatë një interviste në “la Razón”, pyetet se:

A mendoni se Donald Trump do të jetë një faktor në nxitjen e integrimit të mëtejshëm të Bashkimit Evropian?

Rama shprehet se:-Donald Trump thotë se Zoti e shpëtoi nga pushkatimi për ta bërë Amerikën sërish të madhe. Dhe jam shumë i lumtur që Zoti e bëri këtë. Shtoj se Zoti e shpëtoi Donald Trumpin për të zgjuar Evropën. Pra, nëse është kështu, Trump është një bekim për Evropën në kuptimin që Evropa ka çdo arsye të zgjohet dhe të ndryshojë dhe të bëhet shumë më e vetëdijshme – se nevoja për ndryshim nuk mund të shtyhet çdo vit – pasi përndryshe Evropa do të jetë më pak e rëndësishme. Evropa mund dhe duhet të jetë një fuqi e madhe, dhe për ta bërë këtë duhet të ndryshojë dhe të bëhet e vetëmjaftueshme. 

Nga pushkatimi siç është shkruar këtu dhe jo nga tentativa e një atentati, kjo tregon se rrjedha e mendimit në qoftë se nuk është një gabim gramatikor dhe ende i pa korrigjuar flet shumë. Flet aq shumë sa të kujton qëndrimin e pa ndryshuar të Ramës në vitin 2016 kur shprehej “Trump nomination would harm America”.

Në qoftë se ka një kuptim thelbësor të çështjes se si një kundërshtar politik është sulmuar duke e përdorur drejtësinë si armë politike, ky mund të jetë rasti i duhur i të kuptuarit të Ramës sepse i ka humbur të gjitha ekuilibrat.

Të jeni të qartë se nuk pritet ndjesë prej këtij lloji autokrati që kërkon qendrën e vëmendjes dhe që shprehet se në “shqipen e shkruar dhe të folur askush nuk ja kalon”. Në këtë rast, dallimi nga një tentativë atentati me pushkatimin është shumë i madh. Të dy ta marrin jetën, por i dyti në kuptimin e plotë është zbatimi i një dënimi me vdekje, sipas Fjalorit të Shqipes së Sotme. Autoritarët vuajnë nga gjuha asgjësuese kryesisht.

Pra e shkëputëm këtë pasazh sepse një qëndrim ende i pa korrigjuar, është mungesë respekti qoftë edhe pas disa ditësh. Ndoshta vjen nga ndonjë pakujdesi editoriale, por korrigjimi dhe ndjesa e pa zbatuar tregojnë se nuk kemi më ndërgjegje dhe etikë diplomatike nga kjo qeverisje qoftë edhe për shenjë respekti edhe për aleatin më të fuqishëm për ne shqiptarët, SHBA-në.

Administrata e re e Presidentit të SHBA-ve Trump ka zbatuar që në ditët e para një ecuri ndryshimesh dhe reforme thelbësore prej nga pritet se edhe marrëdhëniet me vendet mike dhe aleatët strategjikë do të kenë raporte të ndershme dhe reciprociteti, efiçencë ekonomike dhe mbrojtje të vlerave të besimit, familjes, kombit.

Këto interesa janë përcaktuese për ecurinë e marrëdhënieve dypalëshe dhe shumëpalëshe në të ardhmen me qeverisje që nuk janë të ekspozuara dhe të prekura nga krimi dhe korrupsioni.

Gjatë një interviste për një TV të njohur në SHBA, Stephen Miller (zv/shef i stafit në Shtëpinë e Bardhë), për shpenzimet shqetësuese nga USAID ku 1.9 milion dollarë kanë shkuar për forcimin e të drejtave njerëzore të LGBTQ, Miller theksoi se Donald tramp i ka ekspozuar dhe do t’i mbyllë :-“…skemën e tyre që ata kanë përdorur për të mbushur xhepat e tyre dhe xhepat e organizatave të tyre radikale duke financuar studimet gjinore në Shqipëri përfshirjen e barazisë së diversitetit në të gjithë botën nga Grupi Radikal i Emigracionit të Paligjshëm”.

Një tjetër aspekt me ndryshime të dukshme po vihet re edhe me median amerikane të çliruar nga influenca dhe investimet e Soros-it, ashtu edhe sikurse administrata amerikane po merret seriozisht me fondet e shpenzuara të taksapaguesve dhe aktorët që kanë zbatuar projekte në vendet ku kanë lulëzuar qeverisjet e korruptuara e të lidhura me krimin.

Ndërsa në Shqipëri me pak fjalë gjatë tre mandateve të qeverisur nga Rama dhe Rilindja Socialiste ka një kujdes të shtuar edhe për hartimin e një kuadri ligjor në Kuvend të ushtruar me forcën e kartonit.  “Bipolariteti-politik” është paqëndrueshmëria e qeverisjes së Ramës që kujdeset për të qëndruar në pushtet megjithëse tre muajt e mbetur deri në zgjedhjet e përgjithshme

Duke ju referuar ATSH- agjencisë zyrtare të lajmeve për qeverinë është vënë re shmangja nga problematika e madhe që ka pushtuar degradimin politik të Rilindjes Socialiste.

Në Kuvend flitet për  dezinformimin afatgjatë nga veprimtaria e të një komisioni një partiak për vitet 2025-2030 në një kohë kur brenda javës eksponentë të qeverisë dhe pushtetit vendor kanë zbritur në terren për të ofruar si dhurata gjërat e premtuara gjatë 12 viteve të qeverisjes. Duke ndjekur disa tituj intrigues si : “të jap për të ma dhënë votën”, Balluku dhe Veliaj janë skema dhe filozofia e tregtisë elektorale në fantazitë më të çmendura të Ramës deri në zgjedhje. Si mund të shiten si arritje të qeverisë apo edhe dhe si lajme shkëmbimet zgjedhore të emërtuara si; “Subvencionimi i paneleve diellore për 2,000 familje, Balluku: Aplikimi hapet më 24 shkurt”, Veliaj: “1200 kredi të buta për familjet e pastreha”.

Veç tyre takimet në diasporë ku administrata shtetërore, operativët politik dhe individë të trajnuar për vjeljen e votës gjenden në teren brenda dhe jashtë kufijve. Vetëm në dhjetëditëshin e fundit, pra hyrjen e muajit Shkurt mesazhet se “Si të votojmë” janë patronazhuar me instruksionin se “Si duhet ta votoni Rilindjen Socialiste”.

Ajanë këto format e ndaluara dhe të provuara më parë nga opozita si “skema të krimit zgjedhor” për të cilat SPAK ka ndërtuar tani një task forcë.

Si do të zgjidhen këto dhe do të mbrohet vota e lirë?

Deri sa këto të kuptohen dhe të ndalohen një gjë është e qartë se partia në pushtet është e pamëshirshme me shfrytëzimin e kohës televizive. Rilindja Socialiste mbetet një pushtuese e theksuar e kohës dhe hapësirës në ekran. Për interesa propagandistike dhe duke shkaktuar konfuzion e zhurmë tek zgjedhësit brenda dhe jashtë vendit në mesazhet që përcillen me veprimtari politike, por pjesa më e madhe vishen me suksesin e politikave të qeverisë prej tre mandateve në pushtet.

Dhjetëditëshi i parë i muajit Shkurt ishte i tillë.

Rama i konfuzuar po kërkon tani lidhjen me Zotin dhe flet “Sy m’sy” me ndjekësit e vet dhe ku mes patronazhistëve gjen anonimët si Nesti Angoni dhe Sali Kurra, të cilët vazhdojnë të shtohen.

________________

*Kongresi Botëror të Ligjit -2027, (Rama synon të mbahet në Tiranë dhe ku do të sjellë rreth 3 mijë juristë nga gjykatat supreme dhe sistemet gjyqësore të shumë vendeve të botës)

10 Shkurt, 2025

Unioni i Gazetarëve Shqiptarë Profesionistë të Diasporës (UGSHPD)

Verband Albanischer Berufsjournalisten der Diaspora (VABD)

Union of Professional Albanian Journalists of Diaspora (UPAJD)

L’Union des journalistes professionnels albanais de la diaspora (UJPAD)

Unione dei Giornalisti Professionisti Albanesi della Diaspora (UGPAD)