Daniel Serwer dhe Bodo Weber kanë pritje të ndryshme sa i përket angazhimit amerikan në dialogun Kosovë – Serbi gjatë vitit 2022. Serwer pret lëvizje konkrete, derisa Weber potencon se ende s’ka parë qartësi te administratës aktuale në raport me negociatat. Ndërkohë ish-ambasadori i Kosovës në Washington, Avni Spahiu, thotë se emërimet e reja amerikane në rajon janë sinjal se do të ketë lëvizje serioze nga Washingtoni gjatë këtij viti. Spahiu thotë se rajoni ka rrezik të rrëshqasë përsëri në dhunë, në rast se s’do të ketë progres në dialogun Prishtinë – Beograd.
Gazeta Express/ Besnik Veliu
Në rajonin e Ballkanit Perëndimor asnjëherë s’ka pasur zhvillime të rëndësishme politike pa përfshirjen direkte të Shtëpisë së Bardhë. Nëse kthehemi mbrapa në vite, i kemi bombardimin e Jugosllavisë, çlirimin e Kosovës dhe rrugëtimin e vendit deri te 17 Shkurti. Të gjitha këto procese e kanë vulën amerikane. Historia na tregon që ndryshe s’do të mund të jetë as kur bëhet fjalë për përmbylljen e fazës finale të procesit të dialogut me Serbinë. Por çfarë thonë ekspertët dhe njohësit e politikës ndërkombëtare dhe a pritet të kemi një ofensivë të Joe Bidenit në vitin 2022 për t’i shtyrë Prishtinën dhe Beogradin drejt arritjes së një ujdie finale?
Pas ardhjes së Joe Bidenit në krye të Shtëpisë së Bardhë, mozaiku i njerëzve që e implementojnë politikën amerikane në Ballkanin Perëndimor është ndryshuar plotësisht. Në vend të Matthew Palmerit, e kemi emisarin për Ballkanin Perëndimor, Gabriel Escobar, Anthony Godfrey në Beograd do të zëvendësohet nga diplomati i rryer, Christopher Hill, dhe në krye të ambasadës së SHBA-së në Prishtinë do të vijë Jeffrey Hovenier. Të gjithë këta emra kanë lidhje me rajonin nga e kaluara, sidomos ambasadori Hill, rikthimi i të cilit në Beograd ka bërë bujë shumë të madhe, për shkak të angazhimit të këtij të fundit në proceset e viteve 90-a.
Eksperti amerikan dhe profesori i “John Hopkins” University, Daniel Serwer, në një përgjigje për Gazetën Express thotë se pret nga ky ekip njerëzish që të bëjnë diçka për Ballkanin Perëndimor, duke filluar nga viti 2022.
“Unë pres që ky ekip i ri të dëshirojë të kryejë diçka, duke filluar nga viti 2022. Fokusi i tyre fillimisht ka gjasa të jetë parandalimi i fatkeqësisë në Bosnjë e Hercegovinë, por ata gjithashtu do të duan të arrijnë diçka me Kosovën dhe Serbinë”, ka thënë Serwer.
Eksperti amerikan dhe profesori i “John Hopkins”, Daniel Serwer
Profesori amerikan tutje shton se pret zhvillimet konkrete në procesin e dialogut Kosovë – Serbi, sidomos në çështjen e personave të zhdukur dhe çështje që ndërlidhen me aspektet financiare.
“Unë gjithashtu do të doja të shihja miratim në Ballkanin Perëndimor, gjithashtu përfshirë Prishtinën dhe Beogradin, të parimeve që çojnë në sjellje korrekte drejt fqinjëve bashkë me implementimin e planeve”, ka thënë Serwer.
Serwer është skeptik kur pyetet për një takim të mundshëm në Shtëpinë e Bardhë, që do të drejtohej nga Joe Biden, dhe që nuk do të përfundonte pa një marrëveshje finale Kosovë – Serbi.
“Gjëra të tilla spektakulare ndodhin vetëm kur përgatiten me kujdes. Nuk shoh asnjë perspektivë që Prishtina dhe Beogradi të jenë gati për një gjë të tillë përpara zgjedhjeve presidenciale serbe, e ndoshta jo edhe pas kësaj”, ka thënë eksperti amerikan për Express.
Ai tutje thotë se, pavarësisht faktit nëse do të arrihet ose jo një marrëveshje finale, shpreson që Ballkani Perëndimor të fokusohet në çështje me rëndësi.
“Përgatitje për pranim në BE, për ata që duan, anëtarësim në NATO. Përfitimet e të dyjave vijnë kryesisht nga ato përgatitje. Pasi të kualifikohen, vendet e mundshme anëtare të BE-së do të duhet të presin që dritarja politike të hapet, me gjasë jo shumë përpara fundit të kësaj dekade. Rruga është e gjatë”, ka thënë Serwer.
Sipas tij, pavarësisht lëvizjes së ngadalshme, ai që do të jetë i qëndrueshëm do ta fitojë këtë garë.
Eksperti gjerman, Bodo Weber, ka pritje të ndryshme nga amerikani Serwer, kur pyetet për ndonjë iniciativë konkrete të administratës Biden në raport me dialogun Kosovë – Serbi gjatë vitit 2022.
Në një përgjigje për Gazetën Express, Weber ka thënë se aktualisht nuk pret që të ketë ndonjë ofensivë nga administrata Biden sa i përket dialogut Kosovë – Serbi. Sipas gjermanit, ajo që po shohim është më shumë vazhdimësi e politikës që e ka ndjekur administrata e Donald Trump.
“Deri tani, nuk kemi parë ndonjë qartësi të definueshme të politikës së Administratës Biden karshi Ballkanit Perëndimor. Ka pasur shumë staf dhe vazhdimësi të politikës së administratës Trump. Më shumë në Bosnjë sesa në dialog. Kur i dëgjon Escobarin dhe përfaqësues të tjerë të administratës amerikane teksa flasin për Serbinë, tingëllon më shumë sikurse administrata Trump sesa ndonjë administratë demokratike. Por edhe nëse është kështu, SHBA-ja ka nevojë për Bashkimin Evropian që më në fund të ketë një resetim final dhe rifillim serioz të negociatave për një marrëveshje finale dhe vërtet gjithëpërfshirëse”, ka thënë Weber për Express.
Eksperti gjerman dhe anëtari i “Democratization Policy Council”, Bodo Weber
Ish-ambasadori i Republikës së Kosovës në Washington, Avni Spahiu, thotë se ndërrimi i kokave të politikës amerikane në rajonin e Ballkanit Perëndimor nënkupton se gjatë këtij viti do të ketë një angazhim të fuqishëm amerikan në dialogun në mes të Kosovës dhe Serbisë.
Spahiu thotë se është koha për rezultate në procesin e negociatave dhe thekson se nëse do të ndodhë ndryshe, rajoni do të rrëshqasë sërish në dhunë.
“Ky vit po hyn me një garniturë të diplomatëve të fortë amerikanë në rajon. Kjo do të thotë se mund të presim një angazhim më të fuqishëm amerikan edhe në dialogun Kosovë – Serbi për normalizim. Pas një periudhe të gjatë shterpësie në këtë proces, është koha për rezultate. Ose rajoni do të rrëshqasë sërish në ciklin e dhunës. Ndonëse SHBA-ja sërish nuk do ta ketë rolin e ndërmjetësuesit, të cilin do ta ketë edhe më tutje BE-ja, por prania amerikane do të jetë e ndjeshme dhe shpresoj se do të ndikojë që të ketë rezultate konkrete”, ka thënë Saphiu për Gazetën Express.
Ish-presidenti amerikan, Barack Obama dhe ish-ambasadori i Kosovës në SHBA, Avni Spahiu
Spahiu thotë se administrata aktuale amerikane paralajmëron një angazhim më proaktiv, jo vetëm për shkak të dialogut Kosovë – Serbi, por edhe si rezultat i rritjes së ndikimit të politikës ruso-kineze dhe rëndimit të rajonit nga një gjë e tillë.
Ai thotë se me një gjë të tillë, Moska dhe Pekini po krijojnë konfrontime dhe rreziqe në bashkëpunim me partnerin e tyre të besueshëm, Aleksander Vuçiqin, dhe regjimin hegjemon të këtij të fundit.
Roli i Bashkimit Evropian dhe Berlinit në procesin e negociatave në mes të Kosovës dhe Serbisë dhe bashkëpunimi me SHBA-në
Eksperti amerikan, Daniel Serwer, thotë se Brukseli mbetet ende forumi më i mirë sa i përket dialogut në mes të Kosovës dhe Serbisë. Megjithatë, ai thotë se kërkohet më shumë mbështetje dhe përkushtim i Shteteve të Bashkuara të Amerikës në monitormimin e implementimit të marrëveshjeve që tashmë janë arritur.
“Dyshoj që SHBA-ja do të marrë në dorë, duke qenë se fati i Ballkanit Perëndimor është në Evropë”, ka thënë Serwer, i pyetur nëse e sheh si profitabil modelin negociator të BE-së dhë nëse Washingtoni duhet ta marrë në dorë gjithë procesin.
Por, cili do të jetë roli i BE-së në procesin e negociatave pa Angela Merkelin në krye të Gjermanisë, sipas Bodo Weber?
Eksperti gjeman thotë se roli i Berlinit në procesin e negociatave mes Kosovës dhe Serbisë duhet të rivendoset nga qeveria e re, meqë thotë se në vitet e fundit nuk është që ka mbetur shumë nga roli drejtues i Merkelit dhe politika e BE-së për zgjerim në përgjithësi.
“Në qoftë se Merkel do ta kishte marrë seriozisht rolin e saj drejtues, siç e kishte në vitin 2011-2013, ajo do ta mbyste qysh në fillimin e vitit 2018 idenë e rrezikshme për shkëmbime territoresh dhe do të hynte në një luftë serioze me presidentin Macron për minimin e tij serioz të procesit të zgjerimit dhe bllokimit të liberalizimit të vizave”, ka thënë eksperti nga DPC-ja.
Weber thotë se për të gjitha këto çështje, marrëveshja e koalicionit të qeverisë së re në Gjermani është premtuese, meqë aty janë edhe të Gjelbërit.
“Kështu që pres më shumë nga ministrja [e Jashtme] Baerbock që ta kapë atë rolin drejtues gjerman sesa kancelari Scholz, i cili ende nuk është familjarizuar me Ballkanin perëndimor”, ka thënë ai.
Bodo Weber në fund thotë se pas zgjedhjeve presidenciale në Francë, Gjermania duhet të ketë diskutime serioze me Mcronin për ta ringjallur procesin e zgjerimit, meqë presidenti francez është kundër. Weber thotë se pa u hequr një rezistencë e tillë e Macronit, procesi i zgjerimit do të jetë i vdekur në vitin e ardhshëm.
“Pa perspektivën e anëtarësimit në BE, nuk do të ketë rol drejtues të BE-së në dialog, s’do të ketë avantazh ndaj Serbisë. Sapo të kapërcehet kjo pengesë, Berlini dhe Uashingtoni duhet t’i bashkojnë forcat në një rivendosje të negociatave”, ka përfunduar Weber.
Kosova dhe Serbia ka vite që janë duke negociuar në Bruksel me qëllim të arritjes së një marrëveshje finale. Aktualisht procesi ka ngecur, derisa s’dihet se kur do të ketë një takim të nivelit të lartë Kurti-Vuçiq, pasi një takim të tillë Josep Borell dhe Miroslav Lajça dështuan ta aranzhojnë para vitit të ri.
Tirana pritet të jetë sërish sot në fokus të protestave kundër qeverisë së kryeministrit Edi Rama, me zhvillimin e tubimit të 113-të radhazi.
Qytetarët pritet të mblidhen gjatë pasdites për të vijuar protestën dhe për të kërkuar dorëheqjen e kryeministrit.
Tubimi i sotëm zhvillohet vetëm një ditë pas protestës së 112-të, e cila u shoqërua me marshim në disa prej rrugëve të kryeqytetit dhe me thirrje kundër qeverisë.
Gjatë protestës së djeshme, qytetarët brohoritën “Edi Rama, jep dorëheqjen!”, “Arresto Ballukun, arresto Ramën!”, “Ju erdhi fundi!” dhe “Shqipëria kërkon revolucion!”.
Protestuesit e konsiderojnë dorëheqjen e kryeministrit një nga kërkesat kryesore të tyre, ndërsa organizatorët kanë bërë thirrje për vijimin e qëndresës dhe pjesëmarrjen në protestat e radhës.
Protesta e 113-të pritet të nisë gjatë pasdites në Tiranë, ndërsa mbetet për t’u parë shtrirja e marshimit dhe itinerari që do të ndjekin protestuesit. bw
Mbahet sot në Tiranë protesta e 112 kundër qeverisë së Edi Ramës, ndërsa qytetarët pritet të mblidhen sërish pasditen e sotme për të kërkuar dorëheqjen e kryeministrit.
Protesta vjen një ditë pas tubimit të 111-të, i cili u shoqërua me marshime në rrugët e kryeqytetit dhe me thirrje të forta kundër qeverisë.
“Edi Rama, jep dorëheqjen!”, “Arresto Ballukun, arresto Ramën!”, “Ju erdhi fundi!” dhe “Shqipëria kërkon revolucion!” ishin disa prej thirrjeve të protestuesve gjatë tubimit të kaluar.
Pjesëmarrësit kërkojnë dorëheqjen e panegociueshme të kryeministrit Edi Rama, ndërsa organizatorët kanë bërë thirrje për vijimin e protestave.bw
(Klodiana Spahiu “All in”:-“… unë ose e sjell PET Scan-in, ose jap dorëheqjen”)
Ka shkelur fort me të majtën kur ka hipur në foltoren e Kuvendit të Shqipërisë Ministrja e sapo betuar e Shëndetësisë dhe e Mirëqenies Sociale Klodiana Spahiu për të fituar jo vetëm besimin, por edhe për të ruajtur integritetin profesional që në rast se nuk e mban një zotim si ky:-” Në janar fillon Instituti i Onkologjisë. Në fillim të vitit 2027, unë ose e sjell PET Scan-in, ose jap dorëheqjen”, e përforcojmë deklaratën; do të jap dorëheqjen.
Që prej 2009 në parlament me gjithë ndryshimet që Rilindja Socialiste e kryetarit dhe kryeministrit Rama ka bërë në përfaqësim numerik dhe në përmbajtje, përvoja 17 vjeçare e saj duket e dobishme në mandatin e 4 jo vetëm për besnikërinë e provuar, por edhe për bastin 2 milion dollarë (afërsisht me 26 milion lekë me kursin e këmbimit valutor), që hodhi në kazinonë socialiste që në interpelancën e parë gjatë ditës së Enjte 17 Shtator, 2026.
E bëjmë këtë krahasim me kazinonë pikërisht për të kuptuar një aspekt se si lidhen me paranë pushtetarët. Buxhetin dhe arkën e shtetit si dhe menaxhimin e financave nga ministrja përkatëse Spahiu, pas tre të dështuarve të njëpasnjëshëm Beqaj (arrest shtëpie), Manastirliu (e thirrur në SPAK dhe e promovuar si Kandidate për kreun e Bashkisë Tiranë), Sala (e sapo dorëhequr).
Kur paraja/korrupsioni hyn në mes krahasimi me kazinonë na i përcakton si duhet lojtarët dhe varësinë e tyre me lojën. Dikush mbetet, dikush rrezikon, të tjerë ushqehen dhe luajnë pa e kuptuar se e thellojnë borxhin për shkak të varësisë.
Varësia (adiction*) që njihet si term mjekësor nuk e ka më mirë kuptimin e saj se sa në lidhjet me paranë, korrupsionin dhe narkotrafikun për të cilat qeveria shqiptare është vënë në fokusin e organizatave ndërkombëtare të specializuara që luajnë një rol kryesor në parandalimin, hetimin dhe goditjen e krimit të organizuar dhe trafiqeve të paligjshme në mbarë botën dhe sigurisht të medias në përgjithësi dhe asaj investigative në veçanti.
Befasohesh kur një interpelancë që fillon nga ana e ministres Spahiu ku deklarohen se janë vetëm 100 orët e para të uljes në tavolinë dhe se në se deri në fillim të 2027 po nuk e mbajti premtimin ajo do të largohet.
Kërkesa është në fakt prej kohësh nga publiku që të bëhet puna dhe të bëhet me cilësi dhe me humanizëm.
A e dini se në faqen e facebook-ut ministrja Klodiana Spahiu vetëm pas 100 orëve të para ka 9 segmente video ?
Kush i prodhon?!
Le të themi 7 deri tani në total pasi dy janë marrë nga faqja e Kuvendit, por të kujdesesh me 7 mesazhe propagandistike dhe t’i finalizosh ato me mbledhjen e “drejtuesve të institucioneve në vartësi të Ministrisë së Shëndetësisë dhe Mirëqenies Sociale, në të Premtet e çdo jave në orën 17:00 nën tematikën Prania Besnike”, kjo formë dhe veprim e tejkalon shkallën dhe cilësinë e patronazhimit. Ajo tregon se administratën, specialistët, mjekët dhe pacientët i kthen në aktorë të ideologjisë së Rilindjes Socialiste.
E turpshme që në 100 orët e para…
Duke e ndjekur me vëmendje këtë lojë dhe filma të shkurtër propagande facebook-u, tërhoqi vemendjen një mesazh që nuk i arrin takimet e së Premtes, por i shërben për sa ka mbetur në faqen e Ministrisë së Shëndetësisë dhe Mirëqenies Sociale pa një përgjigje, besojmë se duhet përforcuar pasi ngjan me zërin dhe kërkesat e fjalës së lirë në protestat e kryeqytetit plot 111 ditë. Pikërisht poshtë zyrës së kryeministrit dhe tryezës së kazinosë të kabinetit qeverisës. Një qytetar P.K shkruante ndër të tjera:-“Për personat me Aftësi të Kufizuar nuk kam patur asnjëherë përkrahje dhe që dr. Klodi e njeh mirë djalin që është 43 vjeç. Të shohim dhe mbajmë shpresën se historia e djalit tim është si nëpër filma”.
Në se kjo është një histori 43 vjeçare kthesa nga ministrja dhe justifikimi mund të jetë i kollajshëm. Në fakt është njësoj i barabartë me një nga më të freskëtit në ditët e para të protestës kur një prindi*, babai i një fëmije me status invaliditeti u arrestua gjatë shpërthimit të protestave pasi kërkonte ndihmë në pajisjet mjekësore që nuk i mbulonte pikërisht kjo ministri.
Histori të tjera dhe të ngjashme janë të shumta, por ajo që na lidh me çështjen është se ideologjizimi i pranisë besnike në pushtetin e rilindësve është një sistem që është hedhur dhe i ka aty themelet. Propaganda vetëm sa e lustron duke dhënë premtime. Ndryshimet janë zëvendësim lojtarësh e fytyra të reja që e provojnë kazinonë e kabinetit të kryeministrit. Boshatisin xhepat, futen në borxhe, detyrohen të përvetësojnë për të luajtur dhe “fatkeqësisht” kur kapen shkojnë pas hekurave pa e kuptuar adiction-in , varësinë nga pushteti.
‘All in’, tani është radha e Spahiut pas kurdisjes së 100 orëve dhe daljes së videoklipeve të para propagandistike.
Teksa punohej për këtë shënim një tjetër titull i ri u shfaq në facebook-un e ministrisë., Onkologjiku i QSUT.
Pa dashur të keqkuptohemi me rastin e pacientit në nevojë, fabula e videos propagandistike shënon:-“Nënë Liliana prej ditës së sotme po trajtohet në Spitalin Onkologjik në QSUT, pa qenë nevoja të udhëtojë vajtje-ardhje nga Elbasani”.
Tani për qartësim
Ku u gjet ky humanizëm?…
Ku ishte kjo empati e munguar?…
Çfarë ka ndodhur që nuk po i besojmë as syve pas 100 orëve të para?!
Në thelb do të sqarojmë jo dëshirën për të parë dorëheqjen në fillim të 2027 nëse ministrja Klodiana Spahiu nuk e mban premtimin pasi së pari kjo qeveri nuk shkon dot aq gjatë. Fjala është për propagandën dhe menaxhimin.
Janë dy rastet vetëm deri tani që duan vëmendje me ministren e sapo emëruar; 1- Check up falas nga mosha 70 dhe 2-PET Scan.
E para sipas video njoftimit fton esëll grup moshën për vizita falas nga ora 8-11 në Klinikën Nr.2 Tiranë. Pyetja sa do të jetë fluksi dhe si do të mbulohen kërkesat. Si do të sigurohet rradha e pritjes kur këtë moshë e angazhon që të paraqitet dhe ca më shumë esëll. Orari i bukur vendosur nga e Hëna në të Shtunën ka në mes edhe ditë e pranisë besnike ku padyshim vjelja e mesazheve do të frymëzojë për zgjedhjet e ardhshme.
E dyta PET Scan-i, ka me vete provën e menaxhimit me taksat dhe paratë e qytetarëve. Një pajisje profesionale kushton nga 200 mijë deri në 2 milion. Çdo qytet mund ta kishte atë bashkë me personelin në se qeverisja do ta kishte bërë punën edhe këto 13-14 vite.
Ka edhe një shembull të dytë menaxhues në qoftë se ka përkushtim dhe dëshirë për t’i shërbyer qytetarëve. Me një ose disa pajisje PET-Scan të lëvizshme vetëm me 70 mijë dollarë në muaj personeli mjekësor mund t’i shkojë më pranë qytetarëve në nevojë duke ju ulur edhe transportin sikurse filmat propagandistikë vazhdojnë.
Në fund të këtij shënimi dhe sidomos kur flitet për problematikën në shëndetësinë shqiptare dikush mund të shprehej se përse ky shënim shpreh pakënaqësinë tani kur “shyqyr që sapo ka filluar punë dhe diçka po ndryshon”, po të ishte i vërtetë rezultati do të përgëzohej padyshim.
Rastet që përmenden kur krahasohen me kazinonë, i përmbys llogaritë. Videoklipet dhe propaganda janë menaxhim i bindjeve ideologjike deri në adiction për rilindësit dhe Ramën të cilës kura nuk i është gjendur.
Ajo që është e dukshme dhe e krahasueshme do të ishte përmes pyetjes:-Më mirë një Laborator i lëvizshëm PET Scan-i me qira mujore 70 mijë dollarë apo 80 mijë euro pagesë për një incenerator që nuk ekziston.
Premtimi i Spahiut është plotësisht i mbajtshëm për sasinë e parave.
Ndaj entuziazmi i saj ishte “ALL IN”.
All in deri kur në orët e vona për të treguar forcën e katronave, në kazinonë e buxhetit u shfaq edhe vetë kryelojtari Rama.
Një mesazh me dhunë kartoni, një mesazh Propagandistik, Politizues, Besnik dhe aspak më me një koncept ekonomik.
Unioni i Gazetarëve Shqiptarë Profesionistë të Diasporës (UGSHPD)
Verband Albanischer Berufsjournalisten der Diaspora (VABD)
Union of Professional Albanian Journalists of Diaspora (UPAJD)
L’Union des journalistes professionnels albanais de la diaspora (UJPAD)
Unione dei Giornalisti Professionisti Albanesi della Diaspora (UGPAD)
_______
*ALL -in- të luash me gjithçka sa ke.
* Kazino,sipas Ligjit pika 15. është një zonë e veçantë për zhvillimin e lojërave të fatit, ku lojtarëve u ofrohet mundësia për të luajtur me mjetet e lojërave të fatit, si makina të tipit slot, video-lotari ose makina elektronike, me shumë lojtarë, si dhe tryeza loje të quajtura “lojëra live”.
*ATSH-Në janar fillon Instituti i Onkologjisë. Në fillim të vitit 2027, unë ose e sjell PET Scan-in, ose jap dorëheqjen
* Altin Hila- arrestuar /shoqëruar nga policia gjatë protestës më 3 Korrik, 2026. Brenda 24 orëve qytetarët grumbulluan 115 mijë euro ndihma.
* PET Scan- tomografia me emetim pozitronesh, një analizë imazherike që jep pamjet se si funksionojnë në nivel qelizor organet dhe indet në trupin e njeriut. Çmimi nga 200 mijë deri në 2 milion dollarë. Imazheria Mobile, si një qendër shëtitëse mund të merret me qira mujore nga 20 mijë deri në 70 mijë dollarë).
TIRANA– Protesta qytetare në Tiranë ka shënuar ditën e sotme, ditën e 111-të të revoltës kundër klasës politike. Qytetaret janë ngritur në protestë nën thirrjet “Rama në burg! Berisha në burg!”, “Opozitë e shitur”.
Qytetarët kanë përcjellë mesazhet e tyre edhe përmes pankartave të vendosura në shesh, ku spikasin kritikat ndaj qeverisë dhe thirrjet drejtuar drejtësisë./Dosja.al
Vijon sot në Tiranë protesta e 111-të kundër qeverisë, pas protestës së 110-të të zhvilluar një ditë më parë në kryeqytet.
Gjatë protestës së djeshme, qytetarët u mblodhën fillimisht në zonën e sheshit “Skënderbej” dhe më pas marshuan drejt Kryeministrisë. Protestuesit përcollën sërish thirrje kundër qeverisë dhe kërkuan dorëheqjen e kryeministrit Edi Rama.
Pas përfundimit të tubimit, organizatorët paralajmëruan vijimin e protestave edhe gjatë ditës së sotme.
Por ndryshe nga ditët e tjera, ditën e djeshme protesta nisi që në orën 10 me nisjen e seancës plenare në Kuvend.
Tubimi u shoërua me tensione, përplasje me policinë dhe disa të ndaluar. bw
Të paktën 25 persona janë shoqëruar nga policia në Komisariatin numër 1 në Tiranë nga policia pas protestës së zhvilluar para Parlamentit gjatë seancës plenare dhe tensioneve në rrugët e kryeqytetit.
Edhe protesta e sotme u shoqërua me tensione dhe përplasje mes protestuesve dhe efektivëve.
Duke përsëritur thirrjen për dorëheqjen e kryeministrit Edi Rama, disa protestues rrëzuan kazanët e mbeturinave në rrugë në afërsi të selisë së Partisë Demokratike në shenjë revolte, ndërsa deputetët ndodheshin brenda sallës së Parlamentit. Panorama
Protesta e qytetarëve kundër qeverisë dhe kryeministrit Edi Rama hyn sot në ditën e 110-të, ndërsa këtë herë aksioni është paralajmëruar të zhvendoset edhe para Parlamentit gjatë paradites.
Prej 110 ditësh, qytetarë dhe aktivistë mblidhen në Tiranë duke kërkuar dorëheqjen e kryeministrit Edi Rama dhe largimin e qeverisë, ndërsa tubimet janë shoqëruar me marshime në rrugët kryesore të kryeqytetit dhe ndalesa para institucioneve.
Për sot është paralajmëruar një protestë në orën 10:00 para Parlamentit, pikërisht në kohën kur Kuvendi pritet të zhvillojë seancën plenare. Thirrja për pjesëmarrje u përsërit edhe gjatë protestës së 109-të, të zhvilluar një ditë më parë.
“Do të jemi të gjithë të enjten në orën 10:00 te Parlamenti”, ishte thirrja e bërë gjatë tubimeve, ndërsa aktivisti Arben Kola deklaroi se protesta para Kuvendit synon të shënojë një tjetër fazë të aksionit qytetar.
“Nesër është protestë te Parlamenti që në orën 10:00, ku ka seancë”, deklaroi Kola gjatë protestës së mbrëmshme, duke u bërë thirrje qytetarëve t’i bashkohen tubimit.
Protesta e sotme vjen pas tubimit të 109-të, kur qytetarët nisën marshimin nga sheshi “Skënderbej” drejt Kryeministrisë. Përpara godinës së qeverisë u përsëritën kërkesat për largimin e Ramës dhe u shfaqën pankarta me mesazhe kritike ndaj qeverisë.
Gjatë protestës së një dite më parë morën fjalën qytetarë dhe aktivistë të ndryshëm, të cilët artikuluan kritika ndaj qeverisë dhe kërkuan vijimin e protestave. Profesori Lush Susaj bëri thirrje që tubimet të vijojnë në mënyrë paqësore, duke theksuar se protesta duhet të mbështetet te “durimi, rezistenca dhe qëndrueshmëria”.
Një pjesë e diskutimeve të protestës së 109-të u përqendrua gjithashtu te zhvillimet në Hagë lidhur me ish-krerët e UÇK-së, ndërsa protestues të ndryshëm shprehën qëndrimet e tyre për këtë çështje.
Protestat e ditëve të fundit nuk janë kufizuar vetëm në qëndrimin para Kryeministrisë. Qytetarët kanë zhvilluar marshime në zona të ndryshme të Tiranës, ndërsa një prej kërkesave të përsëritura ka qenë edhe lirimi i protestuesve të ndaluar gjatë tubimeve të mëparshme.
Me hyrjen në ditën e 110-të, vëmendja zhvendoset sot te Parlamenti. Protestuesit kanë paralajmëruar se do të mblidhen para godinës gjatë zhvillimit të seancës plenare, ndërsa mbetet për t’u parë se si do të vijojë më pas aksioni dhe nëse protesta do të rikthehet në itinerarin e zakonshëm drejt Kryeministrisë dhe rrugëve të tjera të kryeqytetit. bw
Shtetet e Bashkuara thanë se e respektojnë aktgjykimin e Dhomave të Specializuara ndaj Hashim Thaçit, Kadri Veselit, Jakup Krasniqit dhe Rexhep Selimit dhe u bënë thirrje të gjitha palëve që ta pranojnë vendimin e gjykatës.
“Ne e respektojmë aktgjykimin e sotëm të Dhomave të Specializuara të Kosovës”, tha një zëdhënës i Departamentit amerikan të Shtetit për Radion Evropa e Lirë.
Departamenti i Shtetit tha se SHBA-ja mbështet drejtësinë për të gjitha viktimat dhe familjet e tyre dhe ritheksoi mbështetjen për llogaridhënien, procesin e rregullt ligjor dhe sundimin e ligjit.
Uashingtoni bëri thirrje, gjithashtu, për shmangien e retorikës nxitëse pas shpalljes së aktgjykimit.
“U bëjmë thirrje të gjitha palëve që ta respektojnë vendimin e gjykatës, të shmangin retorikën nxitëse dhe të vazhdojnë të punojnë drejt një të ardhmeje paqësore dhe demokratike”, tha zëdhënësi i Departamentit të Shtetit.
Gjykata Speciale në Hagë i shpalli katër ish-krerët e Ushtrisë Çlirimitare të Kosovës fajtorë për katër akuza për krime lufte, ndërsa i liroi nga akuzat për krime kundër njerëzimit.
Hashim Thaçi dhe Jakup Krasniqi u dënuan me nga 25 vjet burgim, ndërsa Kadri Veseli me 18 dhe Rexhep Selimi me 13.
Aktgjykimi është i shkallës së parë dhe avokatët mbrojtës kanë paralajmëruar se do ta apelojnë atë.
Protesta kundër qeverisë së Edi Ramës hyn sot në ditën e 109-të, me qytetarët dhe aktivistët që pritet të mblidhen sërish në Tiranë për të vijuar atë që e kanë cilësuar si revoltë të pandërprerë.
Tubimi i sotëm vjen pas një dite të ngarkuar protestash në kryeqytet. Në ditën e 108-të, pjesëmarrësit u mblodhën fillimisht para Kryeministrisë dhe më pas marshuan nëpër rrugët e Tiranës, me thirrje kundër qeverisë dhe kërkesa për dorëheqjen e Ramës.
“Shqipëria po bën revolucion”, “Nuk shitet Shqipëria, shitet qeveria”, “Ju erdhi fundi” dhe “Arrestoni Ramën” ishin disa prej thirrjeve që shoqëruan marshimin.
Protestuesit iu drejtuan gjithashtu SPAK-ut, duke kërkuar vijimin e hetimeve dhe arrestimeve ndaj zyrtarëve të lartë. Aktivisti Arben Kola përmendi kryeministrin Edi Rama dhe Belinda Ballukun, ndërsa deklaroi se presioni qytetar duhet të vazhdojë.
“Veliaj në qeli dhe shqiptarët të lirë. Radhën e ka Rama me Belinda Ballukun. Ju ftoj çdo ditë në shesh të rrisim presionin popullor”, deklaroi Kola.
Protesta e së martës nuk qëndroi vetëm para Kryeministrisë. Pas marshimit në kryeqytet, pjesëmarrësit u drejtuan te Blloku i Sigurisë në rrugën “Mine Peza”, ku kërkuan lirimin e protestuesve të ndaluar.
“Nuk jeni vetëm”, “Lironi shqipet” dhe “Gjithë Shqipëria është me ju”, ishin thirrjet e tyre para ambienteve ku mbahen të ndaluarit.
Ndërkohë, dita e 109-të pritet të shërbejë edhe si pararendëse e protestës së paralajmëruar për të enjten. Nga tubimi i një dite më parë u bë thirrje që qytetarët të mblidhen në orën 10:00 para Parlamentit, në kohën kur Kuvendi do të zhvillojë punimet.
“Do të jemi të gjithë të enjten në orën 10:00 te Parlamenti”, ishte thirrja e bërë nga protestuesit, të cilët kanë paralajmëruar se aksioni nuk do të ndalet vetëm te tubimet e përditshme para Kryeministrisë. bw
Protesta kundër qeverisë së Edi Ramës rikthehet sot në Tiranë, me qytetarët që do të mblidhen për të 108-ën ditë radhazi në kuadër të qëndresës së nisur prej muajsh. Tubimi i sotëm vjen një ditë pas protestës së 107-të, e cila u shoqërua me tensione, përplasje me policinë dhe arrestime të disa protestuesve gjatë paradites.
Gjatë mbrëmjes, përfaqësues të shoqërisë civile dhe aktivistë denoncuan dhunën policore, duke e cilësuar atë si tejkalim kompetencash. Pas përfundimit të fjalimeve para Kryeministrisë, protestuesit vijuan marshimin në rrugët e Tiranës, duke u ndalur edhe pranë institucioneve të drejtësisë dhe duke kërkuar lirimin e personave të arrestuar.
Sot, protesta pritet të rikthejë në qendër të vëmendjes kërkesat e qytetarëve ndaj qeverisë dhe kryeministrit Edi Rama. Thirrjet për dorëheqjen e kryeministrit, kundërshtimi i korrupsionit dhe kërkesa për ndryshim politik pritet të shoqërojnë sërish tubimin.
Pas ngjarjeve të ditës së djeshme, pjesëmarrësit kanë deklaruar se arrestimet dhe përplasjet me policinë nuk do ta ndalin protestën, por përkundrazi do të shërbejnë si motiv për vijimin e saj. Mesazhi i përsëritur nga protestuesit është se qëndresa do të vazhdojë dhe se presioni qytetar ndaj qeverisë do të vijojë edhe në ditët në vazhdim. bw
Dhomat e Specializuara të Kosovës në Hagë do të shpallin më 16 shtator aktgjykimin ndaj ish-presidentit të Kosovës, Hashim Thaçi, ish-kryeparlamentarëve Jakup Krasniqi dhe Kadri Veseli dhe ish-deputetit Rexhep Selimi, në rastin për krime lufte dhe krime kundër njerëzimit.
KOSOVË- Sekretari i Përgjithshëm i NATO-s, Mark Rutte, tha se përkushtimi i Aleancës për ruajtjen e paqes dhe sigurisë në Kosovë do të mbetet i pandryshuar, pavarësisht zhvillimeve të mundshme lidhur me aktgjykimin ndaj katër ish-krerëve të Ushtrisë Çlirimtare të Kosovës.
Dhomat e Specializuara të Kosovës në Hagë do të shpallin më 16 shtator aktgjykimin ndaj ish-presidentit të Kosovës, Hashim Thaçi, ish-kryeparlamentarëve Jakup Krasniqi dhe Kadri Veseli dhe ish-deputetit Rexhep Selimi, në rastin për krime lufte dhe krime kundër njerëzimit. Të katërt janë deklaruar të pafajshëm për dhjetë pikat e aktakuzës.
Sipas Ruttes, KFOR-i është në aty, në Kosovë, për të siguruar që NATO-ja të kontribuojë në stabilitet dhe paqe, ndërsa misioni paqeruajtës i Aleancës, sipas tij, ka kontribuar për më shumë se dy dekada në krijimin e një mjedisi të sigurt dhe të qëndrueshëm në Kosovë.
“Kjo vlen edhe sot, pavarësisht se çfarë lajmesh mund të vijnë këtë javë ose në periudhën e ardhshme, por edhe sa i përket zotimit afatgjatë për paqe dhe siguri në Kosovë”, tha Rutte në një konferencë për media në selinë e NATO-s në Bruksel më 14 shtator, kur u pyet nëse është i shqetësuar për trazira të dhunshme të mundshme në Kosovë dhe rajon si rezultat i vendimit, pavarësisht se si do të jetë ai.
Shefi i NATO-s tha se aleanca ushtarake perëndimore do të vazhdojë të vlerësojë përbërjen dhe vendosjen e trupave të KFOR-it, për të siguruar që misioni të përshtatet në mënyrë adekuate me situatën e sigurisë në Kosovë. Ai theksoi po ashtu se zhvillimet në Kosovë ndikojnë edhe në rajonin më të gjerë.
Deklaratat e shefit të NATO-s vijnë disa orë pasi Ambasada amerikane në Prishtinë u bëri thirrje shtetasve amerikanë që të shmangin lëvizjet në afërsi të vendeve, ku siç tha, janë paralajmëruar protesta më 16 shtator. Ambasada tha se disa organizata po planifikojnë demonstrata të mëdha më 16 shtator në qendër të Prishtinës dhe qytete të tjera të mëdha të Kosovës.
“Këto demonstrata mund të shkaktojnë grumbullime të mëdha njerëzish, mbyllje të rrugëve dhe ndërprerje në trafik”, tha Ambasada duke udhëzuar shtetasit amerikanë që të kufizojnë lëvizjet në këto zona.
Shpallja e aktgjykimit në Hagë vjen katër ditë pasi në Prishtinë mijëra persona morën pjesë në “Marshin për Liri”, ku pjesëmarrësit kërkuan që vendimi të jetë i drejtë dhe paanshëm.
Zyra e Prokurorit të Specializuar në Hagë pretendon se katër ish-eprorët e UÇK-së mbajnë përgjegjësi penale për krime të kryera në Kosovë dhe në veri të Shqipërisë gjatë periudhës së luftës. Mesazhe nga Prishtina para vendimit të Hagës për ish-krerët e UÇK-së
Aktakuza ndaj tyre përfshin gjashtë pika për krime kundër njerëzimit dhe katër për krime lufte dhe Prokuroria ka kërkuar nga 45 vjet burgim për secilin të akuzuar. Të katër ish-krerët e UÇK-së u arrestuan në nëntor 2020 dhe u transferuan në qendrën e paraburgimit të Dhomave të Specializuara në Hagë. Gjykimi nisi më 3 prill 2023.
Aktgjykimi i 16 shtatorit pritet që të jetë një prej vendimeve më të rëndësishme të Dhomave të Specializuara, të krijuara në vitin 2015 për gjykimin e rasteve që lidhen me pretendime për krime të kryera nga pjesëtarë të UÇK-së gjatë dhe pas luftës së viteve 1998-1999./REL
Unioni i Gazetarëve Shqiptarë Profesionistë të Diasporës zhvilloi takimin e radhës, ku në qendër të diskutimeve ishin zhvillimet politike në Shqipëri, protesta që prej 106 ditësh vijon në rrugët e Tiranës, liria e medias, si dhe mënyra se si këto zhvillime po pasqyrohen në hapësirën mediatike shqiptare.
Në fokus të takimit ishte veçanërisht roli i medias në një periudhë të tensionuar politike. Unioni theksoi se e vërteta, objektiviteti, paanshmëria dhe profesionalizmi janë domosdoshmëri për informimin korrekt të publikut. Media, duhet të jetë e pavarur nga çdo pushtet politik apo ekonomik, të verifikojë faktet dhe t’i japë publikut informacion të plotë, të saktë dhe të balancuar.
Gazetarët Shqiptarë Profesionsitë të Diasporës u shprehën kritikë ndaj atyre mediave që e trajtojnë protestën e vazhdueshme në Tiranë si një zhvillim dytësor, duke i kushtuar hapësirë të kufizuar ose duke e anashkaluar në raportimin e përditshëm.
Sipas Unionit, është problematike që një protestë që ka hyrë në ditën e 106-të dhe që ka tërhequr vëmendje edhe jashtë Shqipërisë të mos trajtohet me seriozitetin dhe standardin profesional që kërkon një zhvillim i tillë. Në vend që të analizohen kërkesat e protestuesve, të verifikohen faktet dhe të dëgjohet zëri i qytetarëve, protesta, sipas diskutimeve, shpesh reduktohet në një lajm periferik.
Unioni ngriti shqetësimin edhe për ndikimin e presioneve të qeverisë, politike, ekonomike apo institucionale mbi mediat dhe gazetarët, veçanërisht në rastet kur raportimi përmban qëndrime kritike ndaj qeverisë.
Në diskutim u përmendën gjithashtu kufizimet apo bllokimet e dhjetëra profileve që përcjellin zërat e protestës, denoncimet ndaj skandaleve dhe korrupsionit në qeveri, si dhe postimet, videot dhe fotografitë që përmbajnë kritika të forta dhe fakte në kundërshtim me qëndrimet e qeverisë.
Unioni vlerëson se çdo kufizim i pajustifikuar i qarkullimit të informacionit cenon të drejtën e publikut për t’u informuar dhe krijon rrezik për deformimin e realitetit publik.
Reforma zgjedhore, reforma territoriale dhe zgjedhjet e vitit 2027
Një pjesë e rëndësishme e takimit iu kushtua reformave ligjore dhe institucionale, veçanërisht reformës zgjedhore dhe asaj territoriale.
Sa i përket reformës zgjedhore, Unioni theksoi nevojën për një reformë zgjedhore në shërbim të standardeve të demokracisë, të funksionimit të drejtë të sistemit zgjedhor dhe të rikthimit të besimit të qytetarëve te procesi demokratik. Sipas Unionit, reforma duhet të garantojë transparencë, konkurrencë reale dhe standarde të barabarta për të gjithë aktorët politikë.
Vëmendje iu kushtua edhe reformës territoriale, për të cilën u ngrit shqetësimi se mund të favorizojë interesa elektorale të partisë në pushtet. Diskutimi u përqendrua te mënyra se si ndarja aktuale territoriale ndikon në përfaqësimin e komuniteteve, decentralizimin dhe funksionimin e pushtetit vendor.
Në fokus ishte edhe perspektiva e zgjedhjeve vendore të vitit 2027. Një prej pikëpyetjeve të ngritura ishte pjesëmarrja e forcave opozitare në këtë proces dhe, në mënyrë të veçantë, nëse ato do të pranojnë të hyjnë në garën elektorale përballë mazhorancës së drejtuar nga Edi Rama.
Unioni vlerëson se vendimi i forcave opozitare për pjesëmarrje ose jo në zgjedhje do të jetë një prej faktorëve që mund të ndikojë ndjeshëm në klimën politike të vendit dhe në mënyrën se si do të zhvillohet përballja elektorale.
Protesta dhe nevoja për një përfaqësim më të qartë
Protesta që vijon prej 106 ditësh në Tiranë ishte një tjetër pikë e rëndësishme e diskutimit.
Unioni shprehu interes për mënyrën se si kjo lëvizje do të vijojë dhe nëse do të ketë një forcim të saj përmes formave të ndryshme të mosbindjes civile.
Në këtë kuadër u ngrit edhe nevoja për një përfaqësim më të qartë të protestës. Sipas Unionit, organizatorët duhet të kenë një strukturë apo përfaqësi që të mundësojë komunikim të rregullt me median, publikun dhe institucionet, duke bërë të qarta kërkesat, objektivat dhe hapat e ardhshëm të lëvizjes.
Një përfaqësim i tillë, sipas Unionit, do të ndihmonte median dhe opinionin publik të kuptojnë më mirë synimet e protestës, mënyrën se si ajo do të vijojë dhe strategjinë që organizatorët synojnë të ndjekin.
Në përfundim të takimit, Unioni i Gazetarëve Shqiptarë Profesionistë të Diasporës bëri të ditur se do të vijojë ndjekjen e zhvillimeve politike dhe shoqërore në Shqipëri.
Në kuadër të këtij angazhimi, Unioni do të kontaktojë dhe intervistojë figura politike, përfaqësues të shoqërisë civile, ekspertë, analistë dhe personalitete të tjera që, përmes qëndrimeve dhe analizave të tyre, ndikojnë në debatin publik dhe në zhvillimet aktuale në vend.
Qëllimi është që publiku shqiptar brenda dhe jashtë Shqipërisë të ketë akses në informacion të plotë, profesional dhe të verifikueshëm, duke dëgjuar këndvështrime të ndryshme dhe duke krijuar hapësirë për një debat publik të bazuar në fakte.
Për Unionin, ky është pjesë e misionit të gazetarisë profesionale: të ndjekë, të analizojë, të pyesë dhe të informojë, duke ruajtur pavarësinë editoriale dhe duke mos u vendosur në funksion të interesave të asnjë force politike.
Takimi u përmbyll me mesazhin se e vërteta dhe interesi publik duhet të qëndrojnë mbi interesat politike, ndërsa objektiviteti, profesionalizmi dhe pavarësia editoriale duhet të jenë bazat mbi të cilat ndërtohet besimi i publikut te media.
Unioni i Gazetarëve Shqiptarë Profesionistë të Diasporës (UGSHPD)
Verband Albanischer Berufsjournalisten der Diaspora (VABD)
Union of Professional Albanian Journalists of Diaspora (UPAJD)
L’Union des journalistes professionnels albanais de la diaspora (UJPAD)
Unione dei Giornalisti Professionisti Albanesi della Diaspora (UGPAD)
Komentet