Protesta e banorëve të Unazës së Re hyri sot në ditën e 12. Ata u zhvendosën përpara godinës së Bashkisë së Tiranës, ku i bëjnë thirrje kryetarit Erion Veliaj, të tërheqë vendimin.

Pas rreth 1 ore proteste, zona para Bashkisë i ngjan një sheshi pas “lufte” ku shihen tymuese, copëza shashkash dhe vezë.

Situata përshkallëzoi pasi banorët hodhën tymuese, vezë e shashka drejt Bashkisë. Turma i është afruar kordonit të policisë duke tentuar ta çajnë atë dhe të futen në Bashki.

Ndërkohë që jashtë zhvillohet protesta, brenda godinës zhvillohej normalisht mbledhja e Këshillit Bashkiak.

Rreth 200 banorë me thirrje dhe me një banderolë të madhe ku shkruhet “MASHTRIM” e quajnë korruptiv projektin që do u prishë shtëpiat e bizneset tek zona e Astirit.

Gazetari Erjon Skëndaj raporton për BalkanWeb  se “tek Bashkia pati një numër të shtuar të policisë, policia e rendit, policia bashkiake dhe Forcat Shqiponja”.

Banorët janë shprehur se kanë kërkuar leje për të protestuar, leja i është refuzuar por ata kanë vazhduar me planin e tyre.

Ata kërkojnë dëmshpërblim të plotë për shtëpitë që do prishen, të legalizuara apo jo. Sipas tyre, projekti është korruptiv.

“ Di të them që ne jemi, kryetari i Bashkisë na quajti shpellarë. Nuk e di kur është bërë tirans kryebashkiaku, por ne kemi shumë dokumenta të rregullta. Kam certifikatë pronësie, kam leje legalizimi, kam hipotekë, paguaj taksat. Pse jam shpellar mo zoty kryetar,” u shpreh një prej protestuesve.

Protestat do të vazhdojnë nesër në orën 17:00