Të pashë në ëndërr

E bukur,

e ëndërrt.

Më e bukur se ëndrra.

Floku i dallgëzuar

buzëqeshja e matur.

Ecim pak!- të thashë unë.

Jo!- the ti. Pa asnjë arsye.

Më vrisje me buzëqeshjen e matur

Dhe flokët e dallgëzuar.

Qeshje nën buzë

me qëndrimin tim të kontraktuar.

Unë isha ndarja.

Ti ishe hakmarrja.

Kishe gjetur mënyrën për të ndëshkuar,

për të gjitha gabimet e mia.

Dhe ishe kaq e bukur,

kaq e ëndërrt.

si vetë dashuria.

Bukuri e vonuar

Sy të gjelbër,

flokë të tallazuar.

Bukuri e vonuar.

Kam pasur dhe unë

shumë dëshira në jetë

dhe shumë ëndrra që s’janë realizuar.

Dikur kam dashur të kisha një magnetofon

një vilë në bregdet, një vizë për të udhëtuar,

të hipi në avion e të shikoja gjithë botën botën.

Të vizitoja Parisin, Londrën, Nyjorkun.

Bukuri e vonuar

Pse më erdhe tani?

Sikur të më vije dikur

Do më lije pa gjumë,

do të më lije pa mend,

do të më lije pa sy.

Bukuri e vonuar…

Sa shumë të kam ëndërruar.