Atdhe pa njerëz nuk ka, njerëz pa Atdhe po. Po Shqipëria, Atdheu i kujt është?!… Në vështrimin normal historik, i shqiptarëve. Në vështrimin e sotëm të vërtetë, cili më thotë: kush e gëzon këtë vend?

Unë them më se shumti horrat dhe pjella e tyre. E liga është sunduese. Dhe qartësisht ndihem në një shtetburg dhe këtë nuk e them për ta bërë më të rëndë gjendjen shpirtërore për askënd, pasi ka edhe servilë duar-duar që e duan robërinë moderne shqiptare, për t’i shërbyer e për t’u shpërblyer prej saj, dhe kjo lëndë njerzore edhe habitet nga kundërshtitë e forta ndaj reales fytyrëerrët, se për ata liria është krejt e vogël brenda egos deri në skaje të materies, diçka e tultë, mishtore. Nëpër kohën, kur kam shërbyer në administratën e shtetit dhe kam qëndruar fort në mbrojtjen e dinjitetit tim si dhe të pozicionit të punës, në raport me eprorët sharlatanë dhe kam patur pasoja, jam përpjekur ta kuptoj më tepër vetveten dhe të korrigjoj diçka në natyrën time e të futem në harmoni me këtë soj jete zyrtare, ta pranoj atë duke u shtruar jo ne te mire të punës po të eprorëve, po nuk kam mundur e kjo ju ka ndodhur edhe shume te tjereve. Shpesh më kanë këshilluar miq e të afërm të isha i lakueshëm, pra të shtrija qafën e të përfitoja siç ndodhë edhe sot e perditë, prap nuk kam mundur, kjo ju ka ndodhur edhe shumë të tjereve, jo thjeshtë se ata që kanë sunduar e sundojnë Atdheun tim nga kryesunduesit deri te sundimfundorët në çdo kohë kanë qënë kundër ëndërrave të mija, unë jam një individ, kjo ju ka ndodhur edhe shumë te tjereve, sundimzinjtë e këtij vendi kanë qënë kundër lirisë në kuptimin e plotë të fjalës LIRI, që duhet të gëzojë një popull. Dhe pushtuesit e brendshëm të Atdheut, në të vertetë jo rrallëherë, rezultojnë më shkatrrimtarët.

Me njohjen që kam për gjendjen në këtë vend të vogël si dhe nga bisedat me miqtë e mi, zhgënjimi ndiej të jetë duke bredhur shkallëve të fundme. I fshihen së vërtetës dhe e mjegullojnë gjëndjen reale disa shtresëza të krimbura të shoqërisë, me dobsi në dinjitet, kryesisht mediat e rrethinat madiatike bëjnë sikur ka probleme, po prap ka diçka të bukur, diçka, diku per tu ndrequr dhe behet mirë… po çfarë ështe ne normalitet?! kur çdo mekanizëm i shtetit është në rrënim të dinjitetit të qytetarëve. Këta propogandistët ku e gjejnë përparimin? Po çfarë është kjo prap…? A nuk je në shërbim të krimit ta marrësh më të lëmuar zezonën që ndodh në këtë vend. Të ëndësh teorizime të përzishme, që nuk thonë asgjë konkrete, të moralizosh atdhetari. Atdhetari, do të thotë para së gjithash të luftosh për atdhe normal, me qytetarë që jetojnë në normalitet dhe jo të shtiresh se po lufton, e të lakohesh nëpër skuta përfitimesh. Ja prokuroria dhe gjykata, si arritën deri këtu, si u pasuruan hatashëm?!…

Po gazetarët si e mbajtën të trullosur realitetin?! Këta teoricienët, të pasuruarit me gazetari, të përkëdhelurit, të përdredhurit e partive e qeverive, të shtirurit të pavarur. Kjo që japin mediat sipas ILDKP ështe pasuria e deklaruar, po ajo e fshehura sa mund të jetë?… Pasi fëlliqësitë e tyre janë bërë fshehur. A nuk është tronditëse kur mendon gjyqet e zhvilluara prej këtyre hajdutëve që nuk kanë lidhje me drejtësinë e vërtetë. Po 300 dosjet e zhdukura në çfarë grope i kanë mbuluar?!… Hidhni një shikim në pasurinë e krijuar nga një çift burrë e grua kur njëri punon në gjykatë apo prokurori dhe një tjetër shikim nga një çifti tjetër burrë e grua ku njëri është mësues gjimnazi apo pedagog, bile edhe me grada të larta shkencore, çfarë rezulton?… Si ka qëlluar që këta që punojnë në sistemin e drejtësisë i kanë gratë apo burrat kaq të sukseshëm në biznese, në borde. Si paskan qëlluar me shkëndija gjenjaliteti bashkëshortët apo bashkshortët e gjyqtarëve a prokurorëve sa të punësohen e paguhen  në dy e deri në shtatë punë njëherësh. Çfarë marrëzie dhe harbimi?! Po ata që i kanë bërë emërimet familjare nëpër borde, kush janë?! Çfarë lidhjesh e përfitimesh u rrjedhin nga këto emërime?! Atëherë kush di të më shpjegojë a ka logjikë që të shkosh te një organizatë kriminale e t’i kërkosh të japë një vendim të drejtë, kur e di cilido se duhet të paguash para për vendimn që do të jepet? Qysh këtu je i poshtëruar, je pa shpëtim. Do të bëhesh edhe Ti pis, pjesë e frymë e krimit, je i humbur në vëndimin që merret, le të kesh të drejtë. Në të dyja rastet je i humbur, edhe kur fiton me pagesë.

Po pse është kthyer drejtësia në një strukturë kriminale të pamposhtur dhe çfarë rrënimi i ka sjellë shoqërisë, nga i buron kjo fuqi?! Po, është e thjeshtë për t’u shpjeguar sepse e tillë ka qënë dhe është klasa politike, prej saj ka buruar dhe i buron fuqia. Kjo e ka mposhtur qytetarin e ka bërë një qënie inferiore. E ka detyruar të pranojë robërinë e të jetë i shkelur, ta shohë me frikë dhe njëherësh, ta shtyjë të urrejë shtetin e tij, duke e njohur si armik. Këta gjyqtarë e prokurorë me pasuri brenda e jashtë Shqipërisë, nuk janë të vetmit, po të tillë janë edhe parlamentarët, edhe qeveritarët, me te pasur, shumfish edhe… edhe… edhe… janë njëherësh me shtëpi banimi brenda e jashtë Atdheut. Po si more këta që na kanë vedhur e kanë blerë prona marramëndese në Shqipëri e në perëndim do të na qeverisin ne duke fluturuar nëpër qiej drejt pronave të vjedhura me paratë tona  Po cili institucion që buron nga parlamenti nuk është i korruptuar?!… Më thoni njërin, që nuk vjen nga lidhjet familjare të klaneve?! Këto të dhëna për gjyqsorin vijnë nga deklarimi i ILDKP. Po si është e mundur që ILDKP i ka pranuar si të justifikuara këto prona, dhe nuk ka bërë denoncimin në prokurori…kjo vërtetë ngjan ironike e kundërthënëse, t’ju thuash të dyshuarve si kriminelë, dyshoj se ti ke prona të pajusstifikuara dhe duhet të hetohesh e gjykohesh nga organizata kriminale ku ben pjesë…Po fakti që ajo i ka pranuar pa i parë si të dyshimta është kompromentuese. Duhej bërë me dije edhe parlamentin e njehersh mediat, për pasuri të tilla. Pra detyrën e saj, dhe që aty kuptohej, e çdo qytetar do ta kuptonte se  ishin krijuar nga korrupsioni pasuri te tilla, dhe kjo të shpie në gjykimin se ILDKP ishte ne mbrojtje të tyre, përse?! Ndryshe reagimi do kishte filluar më herët dhe më i fortë.

Pikërisht kjo strukturë e kontrollit të pasurive të deklaruara nga zyrtarët, ka gërmuar për pasuri fare të parëndësishme punonjës të administratës, miq të mijtë dhe kanë qënë të detyruar të paguanin para për të mos i dërguar në prokurori dhe ndërkohë janë pranuar si të justifikuara pasuri të mëdha të gjyqsorit e politikës. Kjo ka ndodhur edhe në kontrolle të kryera nga KLSH, kur unë punoja në administratë pasi kryenin kontrolle nëpër institucione, bënin raporte paraprake dhe prisnin reagimin e punonjësve apo drejtuesve të përfshirë në raporte me shkelje që sillnin dëm ekonomik, ndërkohë bëheshin pazare dersa mbyllej raporti. Po çfarë reformash janë kryer në Shqipëri?! Asgjë e vërtetë, veç mashtrim. Rrotforma skllavëruese po, për të punësuar gratë apo burrat nëpër borde, miqtë apo të afermit e tyre. Po ç’është ky shtet palaço?! A jetohet në një shtet palaço me dinjitet? Po si more të bjerrur mendërisht, kishit fytyrë të dënonit ata fukarenjë, shumë më dinjitozë se kushdo zyrtar korruptiv i shtetit shqiptar, për energjinë kur vetem hajdutë nuk ishin, sepse ishin dhe janë në pamundsi ngaqë janë vjedhur sistematikisht nga pushteti, edhe ndriçim nuk duhej të kishin ata, fëmijët e tyre dhe pleqtë. Këta hallegjinjë që i arrestonte lukunia e sundimtarit që hakrrehej në media duke i quajtur vjedhës, dhe dikush  nga këta u vetvra në burg e dikush jashtë burgut në shtëpinë varr të errët. Nga njëra anë sundimtari ju sulmonte ju drejtësinë, si hajdutë nga ana tjetër arrestonte të mjerët dhe i dorzonte po te ju, për të vënë drejtësi… çfarë ironie dhe te drejtësizeza paguanin nga 3000 euro me shpejtesi ose mbeteshin ne burg, kaq vendosët çmimin për kokë. Populli shqiptar nuk duhet ta njohë më tej autoritetin e korruptuar të drejtësisë, duhet t‘ua mbyllë portat derisa të ndryshojë gjendja dhe pas votimit të organeve të reja të këtij organi, nuk duhet ta njohë më tej autoritetin e parlamentit të dalë nga zgjedhjet e droguara të 25 Qershorit. Të bëhen zgjedhje të reja, me ligj tjetër zgjedhor, ku të kenë të drejtë  të votojnë edhe të gjithë shqiptarët jashtë atdheut. Kjo do të jetë në të mirën e atyre dhe tonën. Tirania e mafjes shtetërore sado të shkojë, do të bjerë. Vonesa do ta rrenojë me tej Shqiperine.