VOAL- Zvicra nënshkroi sot, të premten, një deklaratë  me Gjermaninë dhe Austrinë për të marrë pjesë në iniciativën në kuadër të mbrojtjes kontinentale tokë-ajër “European Sky Shields” (ESSI).

Deklarata u nënshkrua në Bernë nga kreu i Departamentit të Mbrojtjes, Mbrojtjes Civile dhe Sportit Viola Amherd dhe nga Boris Pistorius dhe Klaudia Tanner, ministrat homologë të Berlinit dhe Vjenës. Të tre nënshkruan gjithashtu një marrëveshje që synon nxitjen e bashkëpunimit në frontin e kërkimit në sektorin e armëve.

Nisma ESSI ka të bëjë me prokurimin e përbashkët të një mburoje evropiane kundër raketave. Në sfondin e konfliktit të vazhdueshëm në Ukrainë, ky sistem, i promovuar me nxitjen e Gjermanisë, duhet të ndihmojë në plotësimin e boshllëqeve të mbrojtjes në qiej.

Çdo shtet përcakton se ku dhe në çfarë mase do të marrë pjesë, nënvizon Departamenti i Mbrojtjes, Mbrojtjes Civile dhe Sportit në një komunikatë. Për shembull, për të përjashtuar përfshirjen në konflikte ushtarake, Zvicra dhe Austria kanë përcaktuar rezervat e tyre ligjore në lidhje me neutralitetin në një deklaratë shtesë. rsi-eb