Agjencia e lajmeve “Reuters” i ka kushtuar një kronikë situatës së zjarreve në Krujë, ku thekson se banorët iu bashkuan përpjekjeve për shuarjen e flakëve me mjete rrethanore.

Sipas Reuters, banorët e zonës iu bashkuan zjarrfikësve dhe forcave ushtarake të hënën në luftën kundër një zjarri të madh që kërcënonte qytetin e Krujës, rreth 30 kilometra në veri të kryeqytetit, Tiranës.

Banori i zonës, Shaban Hasani, u pa duke përdorur degë pemësh për të larguar flakët që po i afroheshin banesës së tij, ndërsa helikopterët e ushtrisë shqiptare hidhnin ujë nga lart.

Flaka, e cila ka përfshirë pyjet me pisha rreth qytetit historik të Krujës, vijon prej disa ditësh, me zjarrfikësit që punojnë pa ndërprerje për të parandaluar përhapjen e flakëve në zonat e populluara.

Tre helikopterë u panë në përpjekje për të shuar zjarret deri në muzg të hënën, por erërat e forta nxitën përhapjen e flakëve në zonë.

Shërbimet e emergjencës kanë paralajmëruar për ditë më sfiduese, me temperatura të larta që vazhdojnë dhe dhjetëra zjarre që ndizen në të gjithë Shqipërinë çdo ditë. Zjarrfikësit thuhet se po përballen me mbi 20 zjarre në ditë në të gjithë vendin, disa në zona të largëta me terren të thyer që ndërlikon përpjekjet e zjarrfikësve.bw