Kosova votoi të dielën në zgjedhjet e parakohshme parlamentare, të tretat me radhë që kur vendi shpalli pavarësinë në shkurt të viti 2008.
Sipas Komisionit Qendror të Zgjedhjeve, pjesëmarrja në votime ishte 41.45 për qind, ndërsa në zgjedhjet e vitit 2014 përqindja e votuesve ishte 42.08 për qind.
Kur janë numëruar mbi 90 për qind të votave, koalicioni i Partisë Demokratike, Aleancës për Ardhmërinë e Kosovës dhe Nismës për Kosovën, kryeson me 34.66 për qind, lëvizja Vetëvendosje 26.57 për qind dhe koalicioni i Lidhjes Demokratike, Aleancës Kosova e re dhe Alternativës ka 25.83 për qind.
Kandidati për kryeministër i koalicionit PDK-AAK-Nisma, Ramush Haradinaj, tha se Kosova e ka kaluar sprovën me zgjedhjet e 11 qershorit dhe votuesit i kanë dhënë besimin këtij koalicioni. Në mesnatë ky koalicion kremtoi në qendër të Prishtinës.
Në festë u hodh edhe lëvizja Vetëvendosje, e cila tha se është subjekti i parë politik, ndërsa Lidhja Demokratike kërkoi që të priten rezultatet zyrtare. Rezultati i lëvizjes Vetëvendosje është befasia e këtyre zgjedhjeve. Në zgjedhjet e vitit 2014 ajo kishte fituar 13.5 për qind të votave.
Mbi 1 milion e 872 mijë qytetarë me të drejtë vote ishin regjistruar për të votuar për 5 koalicione, 19 parti politike dhe 2 nisma qytetare, ndërsa 971 kandidatë konkurrojnë për parlamentin 120 vendesh.
Në gjithë Kosovën, qenë hapur 889 qendra të votimit, ndërsa procesi u ndoq nga 29 mijë e 264 vëzhgues, nga subjektet politike, Bashkimi Evropian, ambasadat dhe organizatat joqeveritare vendase.
Organizatat jo qeveritare që merren me vëzhgimin e zgjedhjeve thanë ndërkaq se gjatë procesit të votimit janë regjistruar parregullsi të ndryshme, të cilat megjithatë nuk ndikojnë në proces.
Ambasadori amerikan në Prishtinë, Greg Delawie, e cilësoi ditën e sotme një hap të rëndësishëm për demokracinë në Kosovë. Ai përgëzoi qytetarët në një postim në rrjetin social twitter, duke nënvizuar se “pavarësisht rezultateve përfundimtare, sfidat Pa marrë parasysh numrin përfundimtar të votave, sfidat dhe mundësitë mbeten. Qëllimi i përbashkët dhe jo politika duhet të jetë qëllimi për Kosovën”, theksoi ai.
Policia zbatoi një plan operativ për të siguruar një mjedis te qetë dhe të sigurt, ndërsa rreth 100 prokurorë ndoqën nga afër procesin për të siguruar veprimet ligjore ndaj çdo përpjekjeje për keqpërdorimin e votës.
Partitë politike premtuan gjatë fushatës rritje ekonomike e rritje pagash si dhe luftë kundër krimit të organizuar dhe korrupsionit.
Institucionet që do të dalin nga zgjedhjet e sotme do të përballen me probleme të trashëguara siç janë çështja e kufirit me Malin e Zi, që çoi edhe në rrëzimin e qeverisë, bisedimet për normalizimin e marrëdhënieve me Serbinë që vazhdon të kundërshtojë pavarësinë e Kosovës si dhe përballjen me fillimin e funksionimit të Gjykatës së Posaçme që do të trajtojë pretendimet për krime lufte.
Kosova është vendi i vetëm në rajonin e Evropës Juglindore që ka mbetur jashtë regjimit të udhëtimit pa viza në vendet e zonës Shëngen dhe e fundit në proceset integruese.
Një pjesëmarrje më e lartë se kurdoherë është regjistruar në komunat me shumicë serbe në të cilat konkurruan pesë subjekte politike nga radhët e këtij komuniteti.
Rreth 200 vëzhgues të misionit në Kosovë të Organizatës për Siguri e Bashkëpunim në Evropë, qëndruan në pjesën veriore të Kosovës për të ndihmuar në mbarëvajtjen e procesit zgjedhor, i cili kaloi i qetë me gjithë shqetësimet që pasuan disa incidente gjatë fushatës zgjedhore, përfshirë edhe shoqërimin në stacionin e policisë të Aleksandër Jabllanoviçit, udhëheqës i Partisë së Serbëve të Kosovës. Zoti Jabllanoviç që ishte njëri nga themeluesit e Listës serbe, është ndarë nga ky grup ndërsa ka krijuar partinë e tij. Kjo ndarje ka nxitur reagime të shumta dhe ka përçarë serbët e Kosovës. Një pjesë e mbledhur rreth Listës serbe, mbështetet nga Beogradi zyrtar, ndërsa pjesa tjetër akuzoi Serbinë për manipulim me qytetarët serb që jetojnë në Kosovë.
Përfaqësues të komunitetit ndërkombëtar në vazhdimësi kanë shprehur shqetësimin rreth incidenteve, kërcënimeve dhe trysnisë që është ushtruar në pjesën veriore të Kosovës, në kohën e fushatës zgjedhore.
Lista Serbe, e themeluar në vitin 2013 me mbështetjen e qeverisë së Serbisë, është fituese e zgjedhjeve në mesin e subjekteve nga radhët e komunitetit serb.
Komentet