Bashkimi Evropian po punon për t’u shndërruar në një “superfuqi ushtarake”, deklaroi presidentja e Komisionit Evropian, Ursula von der Leyen, gjatë një seance të mbyllur sot në Parlamentin Evropian.

“E dimë se duhet të jemi të fortë dhe çfarë do të thotë forca… Nuk jemi ende një superfuqi ushtarake, por po ndërtojmë hap pas hapi për t’u bërë një e tillë”, u tha ajo eurodeputetëve të Partisë Popullore Evropiane (PPE), familjes politike të qendrës së djathtë.

Presidentja e Komisionit theksoi gjithashtu se BE-ja është tashmë një superfuqi ekonomike, por duhet të përmirësojë vazhdimisht performancën e saj. “Jemi një superfuqi ekonomike… dhe duhet të përmirësohemi vazhdimisht, përsëri dhe përsëri. Është si një kompani: për të mbetur superfuqi ekonomike, duhet të evoluosh vazhdimisht”, u shpreh ajo.

Deklaratat e von der Leyen vijnë në një moment delikat, teksa një delegacion nga Danimarka dhe Groenlanda përgatitet të takohet në Uashington me zyrtarë të lartë të administratës së presidentit amerikan Donald Trump, në mes të kërcënimeve amerikane për aneksimin e ishullit autonom.

Ajo u tha eurodeputetëve se mesazhi kryesor i BE-së është respektimi i të drejtës së popullit të Groenlandës për të vendosur vetë për të ardhmen e tij, duke theksuar se ata mund të llogarisin në mbështetjen e Evropës. Këto deklarata u bënë pak minuta pasi ajo refuzoi të konfirmonte nëse Groenlanda mbulohet nga klauzola e mbrojtjes së ndërsjellë të BE-së, e njohur si Neni 42.7 i Traktatit.

“Ka shumë spekulime për atë që duhet të bëhet, çfarë mund të bëhet dhe çfarë mund të ndodhë”, deklaroi më herët në një konferencë për shtyp, kur u pyet drejtpërdrejt nëse kjo klauzolë do të zbatohej në rast të një pushtimi amerikan të territorit danez të pasur me minerale. Groenlanda është pjesë e NATO-s, por nuk është formalisht pjesë e Bashkimit Evropian.

Në seancën e mbyllur të PPE-së, von der Leyen theksoi gjithashtu se ka ardhur koha që BE-ja të hartojë strategjinë e saj të plotë të sigurisë, të cilën Komisioni synon ta prezantojë në vitin 2026. Edhe pse kjo strategji nuk është ende pjesë e programit zyrtar të punës për vitin 2026, “një gjë e tillë nuk është bërë kurrë më parë dhe tani është momenti i duhur”, sipas saj.

Në fund, presidentja e Komisionit renditi masat e ndërmarra muajt e fundit për forcimin e kapaciteteve mbrojtëse të BE-së, duke përfshirë programin ReArm me vlerë deri në 800 miliardë euro dhe programin e përbashkët të prokurimeve SAFE, ku tashmë janë bashkuar 19 shtete anëtare. gsh