Pas ndërprerjes së seancës konstituive të Kuvendit të Kosovës për shkak të mosmiratimit të raportit të Komisionit të përkohshëm për verifikimin e mandateve, Presidenca ka marrë zyrtarisht njoftimin për situatën e krijuar.

Zëdhënësi i presidentes Vjosa Osmani, Bekim Kupina, konfirmoi se letra e dërguar nga kryesuesi i seancës, Avni Dehari, ka mbërritur në Presidencë dhe po trajtohet nga ekipi ligjor.

“Letra sapo ka ardhur në Presidencë dhe ekipi ligjor i Presidencës është duke e analizuar, për t’i propozuar Presidentes hapat e mëtejmë”, deklaroi Kupina për mediat.

Mosmiratimi i raportit të komisionit pengoi betimin e deputetëve të rinj, duke bllokuar në këtë mënyrë formimin e institucioneve paszgjedhore. Pavarësisht se në sallë ishin të pranishëm 119 deputetë, vetëm 52 votuan në favor të raportit, duke mos arritur kuorumin prej 61 votash të nevojshme për miratim.

Kryesuesi i seancës, Avni Dehari, njoftoi se për shkak të situatës së krijuar, seanca u detyrua të ndërpritet dhe se Presidentja do të informohet zyrtarisht për zhvillimet. “Në këto rrethana detyrohemi ta ndërpresim seancën dhe me një letër ta njoftojmë presidenten se si do të veprohet më tutje,” deklaroi Dehari.

Kriza parlamentare thellohet më tej edhe nga dorëheqja e protokolluar e kryeministrit në detyrë Albin Kurti dhe kabinetit të tij qeveritar, e cila ishte nënshkruar më 27 mars por u bë publike gjatë seancës.

Situata e krijuar lë pezull nisjen e legjislaturës së re dhe formimin e qeverisë së re, ndërsa pritet që Presidentja Osmani, në koordinim me forcat politike, të ndërmarrë hapat e nevojshëm për të gjetur një zgjidhje dhe për të rikthyer funksionimin normal të institucioneve. bw