Marshi protestuesit udhëhiqej nga ekskavatorë dhe mjete tjera gërmuese të cilat ishin të mbuluara me flamuj të Maqedonisë dhe me pankarta “Në mbrojte të Maqedonisë-Ekskavatorët janë këtu”

SHKUP – Mijëra qytetarë të Shkupit të organizuar nga Iniciativa qytetare “Për Maqedoni të përbashkët” vazhdojnë të protestojnë kundër platformës shqiptare, e cila sipas tyre “është përgatitur nga Tirana zyrtare dhe synon të dëmtojë karakterin unitar, sovranitetin dhe pavarësinë e Republikës së Maqedonisë”, raporton Anadolu Agency (AA).

Si zakonisht, protestuesit edhe sonte u tubuan para godinës së Qeverisë për të vazhduar drejt Kuvendit të Maqedonisë, ku dhe organizatorët në adresimet e tyre porositën se nuk do të pranojnë kryetar të ri të Kuvendit nëse i njëjti nuk e refuzon platformën shqiptare.

Marshi protestuesit udhëhiqej nga ekskavatorë dhe mjete tjera gërmuese të cilat ishin të mbuluara me flamuj të Maqedonisë dhe me pankarta “Në mbrojte të Maqedonisë-Ekskavatorët janë këtu”.

Protestuesit të cilët platformën shqiptare e konsiderojnë si pengesë për zgjidhjen e krizës politike që ka përfshirë vendin, kundërshtojnë edhe përdorimin e gjuhës shqipe në tërë territorin e Maqedonisë, sepse sipas tyre, “përdorimi i gjuhës shqipe në mbarë territorin do ta çojë vendin drejt ridefinimit”.

Protesta përfundoi para godinës së Kuvendit në mënyrë paqësore, ndërkohë organizatorët paralajmëruan se do të vazhdojnë të protestojnë kundër platformës shqiptare deri sa e njëjta do të refuzohet dhe partitë politike do të angazhohen në përgatitjen e një platforme të re.

Më herët, protestuesit kaluan edhe përmes Zyrës Kombëtare të presidentit Gjorge Ivanov, duke përkrahur vendimin e tij i cili refuzoi të mandatojë kreun e Lidhjes Social Demokratike të Maqedonisë (LSDM) për të formuar qeverinë e re të Maqedonisë.

Ndryshe, protestat e iniciuara nga kjo iniciativë filluan nga 27 shkurti i këtij viti, kur kreu i LSDM-së, Zoran Zaev ia dorëzoi presidentit Ivanov dëshminë për sigurimin e shumicës parlamentare për formimin e qeverisë së re, ndërsa presidenti pas dy ditëve të njëjtën e refuzoi duke u arsyetuar se “nuk do të mandatojë çdo kë që negocion për platforma të huaja me të cilat cenohet populli maqedonas, kërcënohet shteti unitar, sovraniteti dhe pavarësia”.

Platforma e përbashkët mes subjekteve politike shqiptare në Maqedoni u arrit pas zgjedhjeve të parakohshme parlamentare të 11 dhjetorit të vitit të kaluar, me ndërmjetësimin e kryeministrit të Shqipërisë, Edi Rama. Përmes kësaj platforme të përbashkët ku përfshihen disa kërkesa për të drejtat e shqiptarëve në Maqedoni, krerët politike shqiptarë zotohen se nuk do të marrin pjesë në Qeverinë e re të Maqedonisë, nëse nuk zbatohen kërkesat e theksuara në të.