Presidentja e Kosovës, Vjosa Osmani, ka bërë thirrje që kërkesat e presidentit të Serbisë, Aleksandar Vuçiqit, të mos merren seriozisht pasi, siç tha ajo, ai nuk e do me të vërtetë rikthimin e serbëve në institucionet e Kosovës, por vetëm dëshiron ta tërheqë vëmendjen e Perëndimit.

“Kur Vuçiqi flet për rithikimin e tyre [serbëve në institucione], ai i prezanton ato vetëm si fjalë e retorikë për ta hequr vëmendjen e botës demokratike nga ajo që po ngjan në të vërtetë – që janë përpjekjet e tij, qeverisë së tij, ushtrisë së tij, në trajnimin e vazhdueshëm të forcave paramilitare, të cilat kanë qëllim vetëm dhunën”, tha Osmani gjatë një ngjarjeje në Prishtin.

Javën e kaluar Vuçiq bëri thirrje për riintegrimin e serbëve nga veriu në institucionet e Kosovës, duke kërkuar, ndër të tjera, shpallje të zgjedhjeve të reja lokale në veri, kthimin e serbëve në Policinë e Kosovës dhe në gjyqësor, si dhe tërheqjen e njësive speciale të Policisë së Kosovës nga rajoni i veriut.

Ai gjithashtu njoftoi më 14 shtator se ka nënshkruar marrëveshjë për rikthimin e shërbimit të rregullt ushtarak për 75 ditë.

Osmani, gjatë deklarimit për media, përsëriti se nuk beson se këto janë kërkesa të sinqerta të Vuçiqit, por shtoi se vetë institucionet e Kosovës duhet të punojnë “që të gjithë qytetarët e saj, pavarësisht etnisë, të jenë të barabartë”.

“Kjo [mosbesimi ndaj deklaratave të Vuçiqit] nuk do të thotë që ne si institucione të Kosovës të mos punojmë afër me të gjithë qytetarët tanë të nacionalitetit serb, në mënyrë që, në përputhje me procedurat e ligjshme ata të jenë prezent në të gjitha institucionet e Kosovës”, shtoi Osmani.

Qindra pjesëtarë të komunitetit serb në veri dhanë dorëheqje nga institucionet e Kosovës, përfshirë komunat, policinë, gjykatat dhe prokurorinë, në nëntor të vitit 2022.

Kjo pasoi indinjatën e tyre me një vendim të Qeverisë së Kosovës për t’i zëvendësuar targat serbe të makinave me targa të Kosovës.

Nga ajo kohë, kryetarët e komunave Mitrovicë e Veriut, Zveçan, Zubin Potok dhe Leposaviq, u zëvendësuan me udhëheqës shqiptarë, pasi komuniteti shumicë serb në zonë i bojkotoi zgjedhjet.

Në gjykata, prokurori dhe polici, punonjësit serbë nuk u kthyen.

Më herët gjatë ditës, kryeministri i Kosovës, Albin Kurti, i kishte quajtur këto kërkesa “jopaqësore” dhe pjesë të një “fushate agresive për konflikte të reja”.

“Kërkesat e tij, masat e tij, bëhen nga një dëshpërim dhe paraqesin joracionalitet dhe nuk janë aspak paqësore, por përkundrazi pjesë e fushatës agresive për konflikte të reja që pa dyshim nuk kanë vend as në Kosovë”, kishte thënë Kurti në komentin e tij të parë për thirrjet e Vuçiqit, të cilat Bashkimi Evropian i mirëpriti si një lëvizje pozitive.REL

Kryeministri i Kosovës, Albin Kurti, ka deklaruar se masat e presidentit të Serbisë, Aleksander Vuçiq për Kosovën janë pjesë e fushatës agresive për konflikte të reja. Teksa përmendi tri kushtet e tij, shefi i ekzekutivit u shpreh se të njëjtat janë racionale e paqësore.

“Së pari duhet të flisni për tri kushtet që i kam vënë unë, e që janë kushte paqësore dhe racionale, do të thotë janë dorëzimi në autoritetet kosovare i Millan Radojiçiqit, është nënshkrimi i Marrëveshjes dhe është gjithashtu tërheqja e letrës së ish-kryeministres Bërnabiq, e cila tha që nuk e pranon as pavarësinë e Kosovës, as ulësen në OKB për Kosovën dhe as nuk e respekton integritetin territorial të Kosovës. Ato tri kushte janë paqësore dhe racionale.

Ndërkaq ato kërkesat e tij, masat e tij bëhen nga një dëshpërim dhe paraqesin jo-racionalitet e nuk janë aspak paqësore, por përkundrazi pjesë e fushatës agresive për konflikte të reja që pa dyshim nuk kanë vend as në Kosovë”, ka deklaruar Kurti.

Para mediave, Kurti ka folur të martën se ata që hodhën koktej molotovi në një shtëpi në veri do të ndiqen nga organet vendore.

“Ka deklaruar tashmë Policia e Kosovës edhe ne do ta bëjmë sanimin e këtij dënimi. Ndërkaq, ata të cilët e bënë këtë krim me këtë koktej molotovi pa dyshim që do të ndiqen nga organet e Republikës së Kosovës”, ka thënë Kurti, derisa nuk komentoi takimin e sotëm në Bruksel. sn

Të premten, presidenti i Serbisë Aleksandar Vuçiq njoftoi masat me të cilat synon të kundërshtojë pavarësinë e Kosovës. Ai nuk është më i kënaqur me refuzimin e njohjes së Kosovës, por dëshiron të marrë të paktën një pjesë të saj. Ndërkohë, ambasada amerikane në Beograd vazhdon të shprehë besimin se ajo po e çon Serbinë drejt Perëndimit.

Kështu shkruan profesori amerikan i John Hopkins, Danier Serwer, i cili në analizën e tij të fundit thotë se përkëdhelja e Serbisë nuk funksionon dhe as ndëshkimi i Kosovës nuk funksionon, raporton Gazeta Express.

Uashingtoni duhet të rivendosë politikën e tij për Ballkanin në drejtime më koherente, thotë Serwer, i cili ka radhitur në disa pika se si mendon që kjo rivendosje e politikës duhet të bëhet:

Ai [Uashingtoni] duhet të mbështesë përpjekjet e Prishtinës për të qeverisur në mënyrë të barabartë në veri të Kosovës dhe të ndihmojë në planifikimin e lëvizjeve të ardhshme në atë drejtim.

Duhet t’i japë fund përkëdheljes së Serbisë, të kritikojë publikisht synimet irredentiste dhe antidemokratike të Vuçiqit dhe t’i jepet fund grumbullimit të lavdërimeve dhe parave për Beogradin.

SHBA duhet të inkurajojë rishpërndarjen e EUFOR-it në qytetin verilindor të Bosnjës, Brcko, ku do të përfaqësonte një pengesë serioze ndaj shkëputjes.

Uashingtoni duhet të insistojë që Bosnja të zbatojë vendimet e Gjykatës Europiane të të Drejtave të Njeriut që do t’i jepnin fund politikës me bazë etnike të vendit.

Uashingtoni duhet të udhëheqë një përpjekje për të izoluar rusofilët e Malit të Zi nga informacionet e ndjeshme të NATO-s.

Ai gjithashtu duhet të paralajmërojë Maqedoninë se do të jetë e radhës nëse rusofilët atje mbeten në pushtet.

Serwer thotë se mënyrat se si kryeministri i Kosovës, Albin Kurti, ushtron sovranitetin në veri e shqetësojnë Perëndimin, por thotë se Kurti “pa mëdyshje” rreshtohet kah Perëndimi.

“Kosova, ku ndërrimi i pushtetit ka ndodhur disa herë, ka një kryeministër popullor, i cili ushtron autoritet sovran në veriun e Kosovës me shumicë serbe në mënyra që u japin shqetësime amerikanëve dhe evropianëve. Ata duan që ai të konsultohet dhe të marrë leje për çdo gjë që bën që mund të shqetësojë ose serbët e Kosovës ose Beogradin. Ai nuk ka qenë i gatshëm ta bëjë këtë. Por kryeministri Kurti gjithsesi rreshtohet pa mëdyshje me Perëndimin. Ai nuk ka alternativë”.

Kryeministri Albin Kurti i tha Al Jazeera-s se e ka pranuar Asociacionin e komunave me shumicë serbe.

“Pyetje direkte: Asociacioni, po apo jo?”, pyetet Kurti në një dokumentar me titullin “Kosova: Krijimi i një shteti”.

“Natyrisht që Asociacioni i komunave me shumicë serbe është diçka që e kam trashëguar nga paraardhësit e mi. Megjithatë kjo është pjesë e marrëveshjes bazike tash. Neni 7 thotë se komuniteti serb duhet të ketë vetëmenaxhim. Nga ana tjetër, neni 10 thotë se të gjitha marrëveshjet e nënshkruara më parë duhet të zbatohen. Kështu që unë nuk e mohoj këtë. Megjithatë, vetëm si pjesë të pakos së normalizimit të marrëdhënieve ndërmjet Kosovës dhe Serbisë me njohje të ndërsjellë”, thotë Kurti.

Ai tha se s’mund të zgjidhet vetëm njëra prej 39 marrëveshjeve me Serbinë, “sikur të jetë tavolinë suedeze” dhe “as ta vendosni përpara marrëveshjes bazë”.

“Si pako, kam thënë po”, nënvizoi kryeministri.

Kurti tha paraprakisht se nuk është kryeministër vetëm i shqiptarëve.

“Ne e kemi 93% të popullsisë shqiptarë, por unë nuk jam kryeministër vetëm i shqiptarëve. Ne kemi 4% serbë dhe kemi 3% minoritete të tjera”.

Ai përmendi “diskriminimin pozitiv” që tha se shteti e bën për serbët, duke përmendur të drejtat që ata i gëzojnë në Kosovë. sn

Hyrjet e shqiptarëve të Kosovës ranë me 16% në korrik 2024 krahasuar me të njëjtin muaj të një viti më parë.

Të dhënat e publikuara nga Instituti i Statistikave lidhur me vendet e origjinës nga kanë ardhur shtetasit që kanë hyrë në vendin tonë, konfirmojnë atë që më herët pohuan edhe tur-operatorë: në bregdetin shqiptar pushuan më pak shqiptarë të Kosovës.

Në muajin e 7-të të vitit hynë në total 710 mijë shtetas nga Kosova teksa një vit më parë ishin mbi 847 mijë. Kjo është hera e parë që nga pandemia që ky grup shënon rënie teksa ka mbajtur çdo vit peshën kryesore të turizmit duke mbetur në nivelet mbi 40 për qind të totalit të hyrjeve. Deri në qershor në fakt shifrat tregojnë për një ecuri pozitive të hyrjes së turistëve nga Kosova ku në qershor 2024 ishin 15 për qind më shumë se qershori i një viti më parë.

Rënia e numrit të vizitorëve nga Kosova u paralajmërua që në fillim të vitit si efekt i liberalizimit të vizave që nisi nga janari. Turoperatorët e Kosovës pohuan se kishte një numër në rritje të shtetasve që Kosovës që po preferonin destinacione të reja si Greqia apo Kroacia përmes rritjes së frekuencës së autobusëve që i çonin ata në destinacion, teksa edhe udhëtimet nga Tirana për destinacone me linja low cost panë rritje.

Shifrat e raportuara nga Aeroporti Ndërkombëtar i Tiranës treguan për një rritje të shtetasve nga Kosova që zgjodhën për të fluturuar nga ky aeroport. Liberalizimi i vizave pakësoi jo vetëm udhëtimet e fundjavave drejt Shqipërisë, por mesa duket edhe pushimet e verës.

Tur-operatorët do të vlerësonin se tashmë jemi përpara faktit se epoka e turizmit patriotik ka përfunduar dhe tërheqja e turistëve nga Kosova do të duhet të bëhet në një raport të drejtë me shërbim dhe oferta konkurruese në raport me tregjet potencialë ku këta të fundit mund të shkojnë.

Një tjetër shkak që duket se ndikoi tek prania e më pak shqiptarëve të Kosovës në vend ishin edhe çmimet e rritura këtë vit. Nga Velipoja deri në Ksamil, vendi pati rritje të çmimeve nga vlerat minimale deri në gati 2-fishim dhe edhe pse Shqipëria ofroi sërish alternativa për të gjithë duket se paniku që u krijua në rrjete sociale sidomos në qershor dhe fillim korrik “trembën” turizmin patriotik.

Pushuesit nga Kosova u qëndruan kryesisht në Velipojë dhe Shëngjin ku çmimet ishin më ekonomike teksa në Golem kishte më pak pushues e po kështu edhe në Jug. Krahas rritjes direkte së çmimeve, rënia e Euros është një tjetër faktor që ka ndikuar negativisht në turizmin e Kosovës. Nëse disa vite më parë për 100 euro, turistët merrnin 120-125 lekë, tashmë ata marrin më pak sesa 100 lekë./Monitor

Ukraina tha të hënën se i ka kërkuar Kombeve të Bashkuara dhe Komisionit Ndërkombëtar të Kryqit të Kuq (ICRC) t’u bashkohen përpjekjeve humanitare në rajonin Kursk të Rusisë, në të cilin forcat ukrainase e kryen një inkursion në gusht.

Ushtria ukrainase tani ka nën kontroll rreth 100 vendbanime në rajonin e Kurskit një muaj pasi e nisi inkursionin befasues, sipas presidentit të Ukrainës, Volodymyr Zelensky.

Ministria e Mbrojtjes e Rusisë tha se forcat ruse i kanë rimarrë nën kontroll edhe dy fshatra të tjera në këtë rajon.

Ministri i Jashtëm i Ukrainës, Andriy Sybiha, tha se e udhëzoi të dielën Ministrinë e vet t’i ftojë OKB-në dhe ICRC-në të punojnë në rajonin e Kurskut.

“Ukraina është e gatshme ta lehtësojë punën e tyre dhe të sillet në përputhje me ligjin ndërkombëtar humanitar”, tha Sybiha në X gjatë një vizite në Sumi, nga ku forcat ukrainase e nisën sulmin matanë kufirit.

Ai tha se ushtria ukrainase po garanton ndihmë humanitare dhe kalim të sigurt për civilët në rajonin e Kurskut.

Ministria e Jashtme e Ukrainës tha se ftesat u janë dërguar OKB-së dhe ICRC-së “duke marrë parasysh gjendjen humanitare dhe nevojën për të siguruar të drejta themelore njerëzore në territorin e rajonit të Kurskut”.

Ajo tha se i ka kërkuar ICRC-së të vëzhgojë nëse Ukraina po vepron në përputhje me parimet e ligjit ndërkombëtar humanitar.

Nuk është e qartë nëse OKB-ja dhe ICRC-ja janë përgjigjur.

Agjencia shtetërore e lajmeve e Rusisë, TASS, e citoi zëdhënësin e Kremlinit, Dmitry Peskov, duke thënë se deklarata të tilla janë “provokuese”.

Ai e bëri të qartë se Moska, e cila e nisi pushtimin e plotë të Ukrainës më 2022, pret që OKB-ja dhe ICRC-ja të mos i pranojnë ftesat. REL

Ministri i Mbrojtjes, Ejup Maqedonci, ka njoftuar se në kuadër të ushtrimit “Arroë Delta 01”, togu i rikonicionit dhe togu i mortajave nga Regjimenti i Tretë i Këmbësorisë janë duke demostruar testimin e kapaciteteve të tyre për mbështetjen e operacioneve mbrojtëse dhe aftësive të liderëve kyç.

Duke shpërndarë disa fotografi të ushtarëve në rrjetin social Facebook, ministri thotë se krahas furnizimit me pajisje dhe sisteme të armatimit, trajnimi dhe testimi i shkathtësive individuale dhe ekipore janë shtylla tejet të rëndësishme për zhvillimin e aftësive luftarake të njësive të FSK-së.

Më poshtë postimi i plotë i Maqedoncit:

Me qëllim përgatitjen për të qenë e aftë për të ushtruar njërën nga tre detyrat kyçe të misionit të saj, mbrojtjen e territorit, Forca e Sigurisë e Kosovës po vazhdon përgatitjen dhe trajnimin e njësiteve të saj.

Në kuadër të ushtrimit “Arrow Delta 01”, togu i rikonicionit dhe togu i mortajave nga Regjimenti i Tretë i Këmbësorisë janë duke demostruar testimin e kapaciteteve të tyre për mbështetjen e operacioneve mbrojtëse dhe aftësive të liderëve kyç.

Krahas furnizimit me pajisje dhe sisteme të armatimit, trajnimi dhe testimi i shkathtësive individuale dhe ekipore janë shtylla tejet të rëndësishme për zhvillimin e aftësive luftarake të njësive të FSK-së. sn

Drejtuesi i zyrës së Bankës Botërore në Shqipëri, Emanuel Salinas ka zbuluar shifrat e varfërisë në vendin tonë.

Sipas tij, jane mbi 400 mije shqiptare te cilet jetojne ne varferi, ndersa nje pjese e madhe tjeter eshte shume prane ketij pragu.

‘Gati 14 për qind e popullsisë në Shqipëri jetojnë në varfëri, pra kanë më pak se 5,5 dollarë në ditë për të jetuar’, tha Salinas në Konferencën Ekonomike të Ballkanit Perëndimor që po zhvillohet në Shqipëri.

‘Një pjesë tjetër e konsiderueshme jeton në kufirin e varfërisë. Shqipëria duhet të luftojë varfërinë, pabarazinë duke krijuar vende të mira pune’, shtoi ai. sn

Ministrja e Drejtësisë, Albulena Haxhiu e ka mirëpritur ngritjen e aktakuzës nga Prokuroria Speciale e Kosovës ndaj 24 të akuzuarve për sulmin terrorist që ndodhi më 24 shtator 2023 në Banjskë të Zveçanit.

Haxhiu ka thënë për Ekonomia Online se në vazhdimësi kanë shprehur shqetësimin e tyre për mos ngritjen e aktakuzës për krye terroristin Milan Radojiçiq dhe të grupit të tij.

“Ne në vazhdimësi kemi shprehur shqetësimet tonë sepse nuk është ngritur aktakuza për krye terroristin Milan Radojiçiq dhe për terroristët tjerë të cilët kanë kryer sulmin terroristë në Banjskë, që kishte për qëllim aneksimin e Veriut të vendit tonë, dhe duke pasur parasysh që pas këtij sulmi ka qëndruar Serbia, ka financuar terroristët dhe ka financuar dhe trajnuar ata, kemi konsideruar Prokuroria Speciale është dashur qysh më herët të ngritë aktakuzën për këtë rast, dhe sigurisht që siç ka thënë kryeministri më mirë vonë se kurrë”, ka thënë Haxhiu.

Sipas saj, është jashtëzakonisht e rëndësishme që “Serbisë t’i bëhet presion që t’i dorëzojë kriminelët terroristë”.

“Ne e kemi mirëpritur aktakuzën si Ministri e Drejtësisë kemi adresuar të gjitha përgjegjësitë në kohë reale që i kemi pasur në këtë rast por për shkak të ndjeshmërisë ne nuk mund të flasim për to, tani po e përcjellim këtë rast me vëmendje të madhe, sikurse ne si Qeveri po edhe qytetarët e Republikës së Kosovës. Ajo çfarë e konsideroj që është e rëndësishme që Serbia të dorëzojë krye terroristin Rajodociq dhe po ashtu terroristët tjerë që kanë kryer sulmin terrorist në Banjskë. Dhe që partnerët tanë ndërkombëtarë të bëjnë presion për të jo që të kërkohet nga Kosova që të dorëzojë prova Serbisë, sepse ju e dini që i vetmi autoritet të vetmet institucionet të cilat kanë përgjegjësinë për kompetencën për ta hetuar këtë rast dhe për ta gjykuar është Republika e Kosovës. Prandaj është jashtëzakonisht e rëndësishme që të bëhet presion që t’i dorëzojë kriminelët, terroristët dhe në anën tjetër gjithçka çka varet nga ne do ta adresojmë në kohë reale”, theksoi ajo.

E pyetur se a mund të ketë një sulm të ngjashëm përsëri, Haxhiu ka potencuar se nga Serbia mund të pritet gjithçka, “duke parasysh qëllimet hegjemone dhe pretendimet territoriale që Serbia i ka ndaj vendit tonë”.

“Ne prej Serbisë gjithçka mund të presim duke pasur parasysh që Serbia nuk ka kërkuar falje për krimet e luftës, që Serbia i ka përkëdhelur terroristët që kanë kryer këtë sulm terrorist në |Kosovë. Duke pasur parasysh qëllimet hegjemone dhe pretendimet territoriale që Serbia i ka ndaj vendit tonë, nxitjet që ia bënë e njëjta grupeve kriminale të cilat nuk po i lënë të qetë serb që të jetojnë lirshëm në Republikën e Kosovës. Prej Serbisë gjithçka pritet, ne jemi vigjilent, institucionet tona të sigurisë po ashtu këtu më duhet ta vlerësoj lartë rolin që ka pasur Policia e Kosovës jo vetëm në sulmin në Banjskë, por gjatë gjithë kësaj kohe që me veprimet e tyre, me vetëmohim kanë qëndruar në përgjegjësitë e tyre si njësite brenda Policisë së Kosovë, natyrisht që edhe të gjitha institucionet tjera që kanë dhënë një kontribut në këtë drejtim, qoftë ato të sigurisë, inteligjencës dhe të drejtësisë” është shprehur ajo për EO.

Megjithëkëtë, ajo shtoi se është shumë e rëndësishme që Radojiçiqi bashkë me grupin e tij të dalë para përgjegjësisë.

“Emri i krye terroristit Rajodociq dhe terroristëve të tjerë tashmë është edhe në kuadër të Interpolit dhe sigurisht që është jashtëzakonisht e rëndësishme që ky person të del para përgjegjësisë, tashmë gjithçka çfarë ka qenë në kuadër të policisë tonë ne e kemi adresuar, sigurisht që do të duhet të ketë drejtësi për atë që ka ndodhur në Banjskë. Ne si Qeveri e Kosovës gjithçka që varet nga ne do të adresojmë në kohë reale, përgjegjësia për këtë është e rëndësishme, e duhur dhe duhet të ndodh sa më parë”, shtoi ajo.

Ministrja theksoi se në vend të Kosovës, Serbia ishte dashur që të dënohen, sanksionohet për sulmin që ka bërë nga partnerët ndërkombëtarë.

Duke shtuar që prapa sulmit në Banjskë, ka qëndruar Serbia me armatim, trajnim dhe financim.

“Sigurisht që Serbia është dashur që të dënohet, të sanksionohet për sulmin që ka bërë, gjatë kohës kur ne kemi qenë në negociata një shtet si Serbia e ka bërë sulmin terrorist në Basnjkë, pra Serbia nuk mund ta fsheh që qëndron prapa këtij sulmi. Vetë fakti i deklarimeve publike që ka pasur por edhe armatimit, trajnimit dhe financimit që i është bërë këtij grupi terrorist e dëshmon këtë, sigurisht që partnerët tanë ndërkombëtarë është dashur që të vendosin masa, madje sanksione për Serbinë, jo për Kosovën që në vazhdimësi është duke bërë përpjeke për të shtrirë sovranitetin dhe për të respektuar integritetin territorial, gjegjësisht për të mos lejuar që ky integritet të cenohet, por që fatkeqësisht masat ia janë vënë Kosovë, dhe jo një vendi si Serbia që ka kryer sulm terrorist në Republikën e Kosovës.

Në vazhdimësi kemi thënë edhe në takimet tona me partnerët tanë ndërkombëtarë por edhe publikisht që konsiderojmë që kjo është e padrejtë, sepse dikush duhet të ndëshkohet për sulmin terrorist dhe për veprimet destruktimve, për refuzim të implementimit të marrëveshjeve të dakorduara të cilat i referohemi në vazhdimësi sigurisht që është Serbia dhe jo Kosova”, shtoi ministrja.

Ndryshe, Prokuroria Speciale ka ngritur aktakuzë për 45 persona, në krye me ish-nënkryetarin e Listës Serbe, Milan Radojiçiq, për veprën penale “Kryerja e veprës terroriste”, “Veprat e rënda kundër rendit kushtetues dhe sigurisë së Republikës së Kosovës”, “Lehtësimi dhe financimi në kryerjen e terrorizmit” dhe “Shpëlarja e parave”.sn

Presidenti ukrainas, Volodymyr Zelensky, sërish u ka bërë thirrje Shteteve të Bashkuara dhe aleatëve të tjerë “të zbatojnë shpejtë” marrëveshjet për armët dhe furnizimet e tjera për të ndihmuar Ukrainën në luftën kundër pushtimit të nisur nga Rusia.

Në një video-mesazh të publikuar në orët e vona të 14 shtatorit, ai tha se “është e rëndësisë kritike që të gjitha shtetet, veçmas SHBA-ja, të zbatojnë menjëherë marrëveshjet e arritura me Ukrainën”.

“Ndikimi duhet të ndihet në front”, tha Zelensky. “Çdo vonesë e pakove ushtarake ka pasoja negative në front. Çdo dërgesë në kohë, dërgesë e shpejt ka ndikim pozitiv”.

Përpjekjet e mëdha për të ndihmuar ushtarakisht Ukrainën po vazhdojnë, teksa NATO-ja po përballet me thirrje nga disa shtete anëtare që të furnizojë Kievin me armë më të avancuara.

Kievi po ashtu vazhdimisht thotë se ka nevojë që të kryejë sulme brenda territorit rus me armë me rreze të gjatë veprimi, në mënyrë që të mbrojë veten nga forcat pushtuese ruse. Ky argument ukrainas është mbështetur nga disa zyrtarë të NATO-s.

Kryeministri britanik, Keir Starmer, u takua në Shtëpinë e Bardhë më 13 shtator me presidentin amerikan, Joe Biden, për të diskutuar nëse duhet miratuar kërkesa e Ukrainës për të përdorur armë me rreze të gjatë veprimi kundër caqeve në Rusi.

Këshilltari për siguri kombëtare i SHBA-së, Jake Sullivan, tha më 14 shtator se Biden “është i vendosur që t’i përdorë katër muajt që i kanë mbetur të mandatit që ta vendosë Ukrainën në pozitën më të mirë të mundshme në mënyrë që të triumfojë”.

Presidenti rus, Vladimir Putin, ka thënë më herët gjatë javës se Perëndimi do të ishte “në luftë” me Rusinë nëse i lejon Ukrainës të sulmojë me raketa me rreze të gjatë, të prodhuara në Perëndim, ndërkaq Medvedev tha më 14 shtator se Rusia mund ta shkatërrojë kryeqytetin ukrainas, Kiev, me armë jobërthamore nëse Perëndimi heq kufizimet e tij.

Medvedev, që tani shërben në postin e kryetari të Këshillit të Sigurisë së Ukrainës, po ashtu tha se Rusia mund të përdorë armë bërthamore. /REL/