Kush është problemi kryesor i politikës shqiptare dhe ku po vepron propaganda e partisë shtet në duart e një personi?

Kjo duket se ishte dhe do të mbetet çështja e ditës në Shqipëri si shprehje e antikushtetueshmërisë. Ajo u thellua më tej me 6 Nëntorin si e Hëna e parë e një muaji dhe ajo mban plot sfida dhe përgjegjësi për qytetarët, pluralizmin dhe median, kundër një regjimi totalitar.

UGSHPD (Unioni i Gazetarëve Shqiptarë Profesionistë të Diasporës), i vëren me shqetësim zhvillimet në vend dhe rajon dhe tërheq vëmendjen pasi pushteti një partiak i Kryeministrit Rama e ka dëmtuar demokracinë dhe në çdo rast po përpiqet të zgjasë pushtetin e vet përmes “lartësimit” të personalitetit të tij duke minuar çdo veprim opozitar. Në çdo rast ai po e përdor median për informim të gabuar dhe çorientim të interesit publik.

Lajmi i ditës dhe aty ku kamerat dhe mikrofonat kishin marrë në “shënjestër” dhe ishin përqendruar si godinat e SPAK dhe zyrat e komisioneve të Kuvendit për të mbushur ditën me lajme, komente dhe analiza, ku në qendër kemi vetëm një temë me rëndësi jetike; Mohimin sistematik të pluralizmit në Kuvendin e Shqipërisë, kjo temë anashkalua veç trajtave të kaosit edhe me një ngjarje të pa paralajmëruar në Romë (për një takim Meloni-Rama). Do të shkojmë edhe aty, por e dita e Hënë nisi me pjesën kryesore të opozitës së ndërgjegjësuar për rolin dhe veprimtarinë e saj me përshkallëzimin protestë brenda institucionit. Kjo protestë u detyrua për të kapërcyer pengesat fizike (kangjellat) dhe truprojat (gardën) si dhe mundësoi hyrjen nga dritaret për t’u ndodhur në mjediset e punës dhe ushtrimit të detyrës si përfaqësues të zgjedhur.

Ky pra ishte lajmi dhe këto ishin pamjet. Ato u tha rëndom se bënë xhiron e botës, por kurrë se si si i tillë, ky lajm nuk mundi të gjente vend qoftë edhe me një rresht të shkruar apo foto të ilustruar në faqet e ATSH-së. Ky fakt ka shumë rëndësi të madhe pasi ATSH (Agjencia Telegrafike Shqiptare), është komunikimi i lajmit zyrtar. “Fytyra” e shtetit dhe fatkeqësisht ku lehtësisht lexohet 99.99% propagandë socialiste dhe 0.1% gazetari në marrëdhëniet me vendin dhe botën. Do të ndalemi këtu pasi lajmi i ditës u rrëfye jashtë vërtetësisë. Ishte fakt që opozita e tensionuar dhe e provokuar humbet qetësinë dhe tregoi se nuk lejon zhvillimin normal të punës së komisioneve parlamentare deri sa t’u plotësohen dhe respektohen të drejtat. Punimet vërtetë u mbyllën dhe rrëshqitën me firmosje apo kartonë nga takimet zoom të mazhorancës socialiste, u dhanë deklarata denigruese për opozitën protestuese nga përfaqësues të bojkotit ose palë me qeverisjen dhe se më kryesorja Kryeministri Rama së bashku me ministrat e jashtëm, të brendshëm dhe të mbrojtjes, u shfaqën në Palazzo Chigi në mes të ditës si “pa pritur” në një takim me Kryeministren e Italisë Giorgia Meloni. Pas zhvillimit të takimit me dyer të mbyllura në prani të mediave u nënshkrua një Memorandum Mirëkuptimi mbi përballimin e fluksit të emigrantëve, i njohur ndryshe si kriza e refugjatëve.

Ky ishte diversioni mediatik që shoi ngjarjen më kryesore, krizën institucionale dhe veprimet antikushtetuese në parlamentin shqiptar pa opozitë.

Analistët mbushën studiot, kthyen sytë përtej Adriatikut dhe nisën të peshojnë vlerën e punëve të mëdha që kryeministri global bën duke e krahasuar largpamësinë e tij në raport me veprimet dhe sjelljet e një opozite “shkatërruese”. Pa frikë mund të tregojmë se shumë nga kërkimet shkuan thellë aq sa marrëdhëniet Meloni-Rama vishen me cilësi udhëheqësie drejt BE-së dhe për BE-në, pa çka se ata të dy kanë përkatësi të krahëve politikë diametralisht të kundërt. Humanizmi dhe të gjendurit për njëri-tjetrin dhe kthimi “i borxhit” italo-shqiptar dhe anasjelltas u vlerësua si gjesti i bashkëpunimit për t’u gjendur në ditë të vështira. Vetë termi i përpunuar në memorandum “marrja nën juridiksion e një territori sovran” , pra çështje e parlamenteve respektive dhe kushtetutës u kalua dhe u trajtua me nota të ulta si të ishte një problem mes dy individësh me pushtet dhe që më parë të ishin autorizuar nga institucionet. Por pa hyrë në thellësi të problematikës, mund të theksojmë në këtë rast se të dy kryeministrat shquhen për nuhatjen e vështirësive të qeverisjeve se ku ndodhen. Së pari pas premtimeve elektorale dhe se dyti zbulimi i një doze të fortë pragmatizmi për përfitim politik nën ombrellën e BE-së dhe për BE-në, ku rezultati është kurorëzimi i jetëgjatësisë së pushtetit. Meloni kështu synon të shuaj disi kritikat mbi gjendjen e valës së përkeqësuar të emigracionit, ndërsa Rama hedh kamerdaren në Jon dhe në Adriatik për të përgatitur terrenin për zgjedhjet e ardhshme të vitit 2025 dhe për të thelluar sundimin e vet autoritar.

Këto janë disa përshkrime të situatës në Romë, pasi memorandumi do të parashtrohet për diskutim dhe votim në Kuvend, i cili fatkeqësisht për probleme të vogla dhe të mëdha gjendet i bllokuar, votohet pa opozitë dhe po provon jashtë çdo standardi përjetimin e situatave të jashtëzakonshme duke u ngujuar në vendimmarrje virtuale (zoom/online).

Kjo situatë e ngarkuar pakënaqësie në Tiranë rrjedhoi ndryshe, me provokime dhe dalje jashtë kontrollit të pushtetit i cili po vë në pikëpyetje edhe mendimin e mëparshëm se zgjedhjet e parakohshme do të ishin të favorshme për socialistët në pushtet.

Por për Romën dhe Tiranën, kur mendohet se respektohen marrëdhëniet dhe flitet në emër të popujve, lidhjet historike dhe kulturore tradicionale, ndjesia humanitare dhe ku palët i gjenden njëri-tjetrit në nevojë kanë një të vërtetë trashëgimie dhe kjo është e papërsëritshmja që i shquan të dyja vendet dhe po aq sa edhe zemra e dy popujve i ka treguar me dinjitet dhe mirënjohje.

Por kur thuhet dhe shprehet me konceptin kthim “borxhesh”, fisnikëritë e popujve, vriten dhe zvogëlohen dhe raporti i vërtetë i shqiptarëve dhe italianëve humbet vlerat e mirënjohjes ndaj njëri-tjetrit. Për të dyja vendet pa mburrje flet historia. Atë është mirë ta kujtojmë edhe në këto ditë të vështira si një e vërtetë dhe pa mburrje. Për shqiptarët ishte qëndresa e Heroit Legjendar, Gjergj Kastrioti Skënderbeu që i dha kohë Evropës të mblidhte forcat dhe të shpëtonte nga pushtimi osman. Shqipëria njihej që atëherë, prej 2 Marsit, 1444 si toka e kuvendit të burrave me Besëlidhjen e Lezhës dhe dha vlerën e një kuvendi ku ishte fjala e dhënë e bashkimit të interesave kombëtare me ato të përkatësisë së qytetërimit Evropian. Ishin këto kohë krenarie dhe të vështira sepse më pas populli italian tregoi kujdesin dhe bujarinë e vet kur u bë streha e Arbëreshëve, mbijetesa një bashkësie shqiptare në diasporë që gjallëron prej 535. Historia ishte ushqyer me mirënjohje dhe ajo u përsërit sërish pas pesë shekujsh atëherë kur shqiptarët rrëzuan diktaturën komuniste në pranverën e 1991. Ishte Italia që priti me mijëra refugjatë dhe shqiptarët u përpoqën të integrohen duke e vlerësuar ndihmën dhe të dy popujt dhe kurrë më nuk cenuan integritetin territorial mes tyre. Përkundrazi të dy popujt gëzojnë fqinjësinë e mirë dhe jetojnë përkrah mes aleatëve të NATO-s. Me këtë përmbajtje shtetet mund të zhvillojnë marrëdhëniet natyrshëm, të përmirësojnë ekonominë dhe jetën shoqërore ku përparësi merr siguria dhe paqja.

Por me Memorandumin e Mirëkuptimit, aty ku një territor shqiptar (Shëngjini dhe Gjadri) do të kalojnë përkohësisht (5-10 vjet), nën një juridiksion italian, pa miratim në Kuvend dhe Parlamentin respektivisht popujt dhe që zbaton kushtetutshmërinë dhe ligjet ndërkombëtare, kjo tregon se pragmatizmi politik për jetëgjatësinë e pushtetit ushqehet nga doktrina të dëmshme globaliste që shpëlajnë vlerat historike, traditat dhe kulturën e kombeve të vjetra nga dyndjet e imponuara migratore.

Duke i qëndruar larg çdo etiketimi ksenofob, racor, gjinor, të besimit apo edhe të përkeqësimit klimatik sikur edhe ky i fundit të merrej për bazë, koha po tregon se politika të caktuara globaliste nxisin flukset e lëvizjeve masive të popullatave drejt vendeve të lira dhe me zhvillim demokratik dhe se tregojnë se ato janë të imponuara nga shkelja e lirive dhe të drejtave njerëzore, varfëria ekonomike dhe kërcënimi i jetës nga rregjime diktatoriale dhe totalitare prej vendeve të origjinës.

Për shqiptarët dhe Shqipërinë sot më shumë se kurrë kanë rëndësi, transparenca dhe e vërteta. Ky sinqeritet me publikun kalon përmes Kuvendit dhe mbron ligjin dhe rendin kushtetues. Jemi të bindur se Lezha sot i ruan vlerat e mikpritjes dhe humanizmit për të ndihmuar edhe popullsi në nevojë, por kurrë lezhjanët nuk mund t’i humbasin këto cilësi në qoftë se në jeta, prona dhe familjet e tyre nuk dorëzohen ndaj pragmatizmit të politikave globaliste që cenojnë sovranitetin e vendit.

Sërish një lajm kryesor dite për shqiptarët mbetet lufta për mbijetesë e opozitës në parlament dhe pluralizmi. Fatkeqësisht më e fundit ishte edhe nga dritaret për të përfaqësuar votën e zgjedhësve. Kjo është sakrifica përmes protestës, maturia politike pa rënë në gracë të provokimeve. Drejtësia, ligji dhe kushtetutshmëria duhet të veprojnë si duhet në Kuvendin e Shqipërisë që me dinjitet të pranohet në familjen Evropiane, pa tentuar që për hir të imazhit individët pushtet mbajtës dhe me frymë globaliste, synojnë BE-në të përulur dhe që proceset e anëtarësimit duan t’i arrijnë duke u futur vetë nga dritarja.

6 Nëntor, 2023

Unioni i Gazetarëve Shqiptarë Profesionistë të Diasporës (UGSHPD)

Verband Albanischer Berufsjournalisten der Diaspora (VABD)

Union of Professional Albanian Journalists of Diaspora (UPAJD)

Union des Journalistes Professionnels Albanaise de la Diaspora (UJPAD)

Unione dei Giornalisti Professionisti Albanesi di Diaspora (UGAPD)