Në më pak se dy javë që prej 18 Shtatorit, pas fjalës virtuale në Kuvendin e Shqipërisë ku një aplikacion u paraqit si një Ministre duke drejtuar fjalinë e parë :-“A është kushtetuese të kesh një Ministre që nuk është njeri?” dhe se “Kushtetuta flet për institucione që u shërbejnë njerëzve. Ajo nuk flet për kromozome, për mish apo për gjak. Ajo flet për detyra, përgjegjësi, transparencë dhe shërbim pa diskriminim”, Diella nuk i futet thellë shkencës apo përgjegjësive, por ndërron veshjen në Rozë me 1 Tetor, duke ju bashkuar tërësisht kontrollorëve dhe manipulatorëve programues të saj.
Diella nuk tha asgjë më shumë se fasada e politikës së qeverisë. Përsëritje jo njerëzore dhe slogane të pandjeshme duke filluar nga presidenti, kryeministri, ministra e politikanë që publikojnë citate dhe thënie rreth një fjongoje, duke zhveshur përmbajtjen e ndërgjegjësimit të grave dhe vajzave për shëndetin gjithë vjetor të gjirit dhe parandalimin e kancerit të gjirit.
Për të mos përsëritur citatet propagandë njëri pas tjetrit po veçojmë një statistikë prej Drejtoresha e Institutit të Shëndetit Publik, Dorina Toçi që mbetet i vetmi informacion zyrtar sipas ATSH. Ku përveç 25 mijë kontrolleve vjetore ajo cilëson:– “Për vitin 2024, bazuar në regjistrin kombëtar të kancerit janë diagnostikuar 805 raste të reja me kancer të gjirit. Është një incidencë që gjatë dhjetëvjeçarit të fundit ka ardhur në rritje me 2.1% çdo vit. Nuk kemi rritje të rasteve me kancer të gjirit te moshat e reja, madje kemi një ulje të lehtë të incidencës tek moshat nën 50 vjeç” dhe se “vërehet një rënie e lehtë e rasteve nga viti 2015 deri në 2024-ën, ndërsa shtrimet spitalore janë dyfishuar në 10-vjeçarin e fundit”.