Protestuesit kundërshtojnë kostot e larta të studimeve dhe mungesën e perspektivave profesionale. Ata kërkojnë gjithashtu dorëheqjen e Edi Ramës. 13 persona u plagosën gjatë trazirave.

Tiranë – Protestat e studentëve kundër problematikave në arsimin e lartë kanë degjeneruar në përplasje të dhunshme në kryeqytetin shqiptar, Tiranë. Sipas raportimeve të mediave të mërkurën në mëngjes, 40 persona u shoqëruan nga policia gjatë disa orësh trazirash. Sipas të njëjtave raportime, 13 persona, mes tyre gjashtë policë, mbetën të plagosur.

Disa qindra persona protestuan fillimisht në mënyrë paqësore të martën pasdite para Ministrisë së Arsimit. Tubimi u organizua kundër kushteve të këqija të studimit, kostove të larta të arsimimit dhe mungesës së perspektivave profesionale. Protestuesit kërkuan gjithashtu dorëheqjen e kryeministrit socialist Edi Rama, i cili qeveris vendin ballkanik që prej vitit 2013.

Më vonë, protestuesit hodhën tulla dhe pllaka guri. Pasuan trazira në disa zona të qendrës së qytetit, gjatë të cilave, sipas raportimeve, u dëmtuan dyqane dhe banka, ndërsa u sulmua godina e bashkisë. Policia përdori autobotë me ujë, gaz lotsjellës dhe shkopinj gome. Raportohet se pati edhe sulme ndaj personave që nuk ishin të përfshirë në protestë, si dhe përdorim joproporcional të forcës. Pesë efektivë u pezulluan nga detyra.,,

Protesta lidhet me një seri demonstratash që në Shqipëri njihen me emrin Revolucioni i Flamingove. Ato nisën si reagim ndaj një projekti imobiliar në një zonë të mbrojtur natyrore në bregdetin shqiptar të Adriatikut. Projekti i diskutueshëm gëzon mbështetjen e kryeministrit Rama. Flamingot që jetojnë në zonën e mbrojtur janë kthyer në simbol të lëvizjes.

Shqipëria tashmë ka avancuar relativisht shumë në negociatat për anëtarësimin në Bashkimin Evropian. Megjithatë, shumë qytetarë i konsiderojnë elitat politike të pangopura, të korruptuara dhe të paafta.

Një person duke valëvitur një flamur kombëtar shqiptar teksa studentë zhvillonin protestë antiqeveritare në Tiranë, Shqipëri, më 13 tetor 2026.

Reuters

Studentët protestues hodhën tulla dhe blloqe betoni drejt Ministrisë së Arsimit në Tiranë të martën, ndërsa policia reagoi duke përdorur gaz lotsjellës dhe topa uji. Një demonstratë mbarëkombëtare për arsimin dhe çështjet sociale përshkallëzoi në dhunë.

Policia shoqëroi disa protestues.

Organizatorët studentorë thanë se protesta kishte të bënte me kushtet në universitete, kostot e arsimit të lartë, mbështetjen financiare dhe mundësitë e punësimit pas diplomimit.

Disa protestues të tjerë thanë se dëshironin të shprehnin pakënaqësinë e tyre ndaj pabarazisë dhe qeverisë.

“Shqipërisë i duhet një revolucion, një ndryshim, një përmbysje e plotë e sistemit, sepse nuk mund të vazhdohet më kështu”, tha protestuesja Luljeta Kola, duke shtuar se në vend ka padrejtësi të thellë sociale dhe një hendek të madh mes të pasurve dhe të varfërve.

Demonstrata zhvillohet në një kohë kur në Evropë po shënohet një valë më e gjerë aktivizmi studentor. Në Francë, nxënësit e shkollave të mesme kanë organizuar prej javësh protesta dhe bllokime të shkollave, duke kërkuar më shumë mësues dhe kushte më të mira. Ata argumentojnë se përkeqësimi i gjendjes së godinave shkollore dhe klasat e mbipopulluara po dëmtojnë arsimin.

Zëvendëskryeministrja e Shqipërisë, Albana Koçiu, shkroi në Facebook: “Dhuna nuk ka qenë, nuk është dhe nuk do të jetë kurrë zgjidhje. Hedhja e gurëve, sulmet ndaj institucioneve dhe Policisë së Shtetit, si dhe shkatërrimi i pakuptimtë i pronës publike, nuk janë mënyra se si duhet të shprehen të rinjtë.”

Studenti Klevi Metaj është kthyer në simbol dhe një nga figurat më të komentuara të protestës së studentëve, pas përplasjeve të dhunshme me efektivët e policisë mbrëmjen e së martës. Ai është djali i Brikena Metajt, korrespondentes së News24 në Gjirokastër, dhe student në Universitetin e Tiranës.

Pamjet e publikuara nga protesta tregojnë të riun duke ecur në trotuar, përpara se të goditet nga një efektiv policie. Më pas, ai shihet duke u përfshirë në një përplasje fizike me disa efektivë të Forcave të Ndërhyrjes së Shpejtë (FNSH), të pajisur me shkopinj gome.

Në pamjet e bëra publike, Metaj shihet në përballje me disa efektivë, ndërsa më vonë u publikuan edhe fotografi të tij të prangosur te kangjellat e ministrisë. Pamje të tjera tregojnë të riun me shenja të dukshme dhune brenda një furgoni policie.

Ngjarja ka nxitur reagime në rrjetet sociale, ku studenti po identifikohet nga komentuesit me simbolikën e një të riu që kërkon të drejtën, ndërsa përballet me forcën e policisë.

Shprehja “Studenti i drejtësisë në kërkim të së drejtës” është përdorur për të përshkruar situatën e tij.

Përplasjet ndodhën gjatë protestës së studentëve kundër qeverisë, e cila u shoqërua me tensione dhe ndërhyrjen e forcave të policisë. Rrethanat e plota të incidentit dhe përgjegjësitë për dhunën e pretenduar ndaj protestuesve mbeten për t’u sqaruar. bw

Ish drejtuesi i lartë i Policisë së Shtetit, Shemsi Prençi u shpreh se SHISH nën drejtimin e Vlora Hysenit ka përgjuar opozitën dhe eksponentë të PS.

I ftuar në ‘Kafe Shqeto’ në Syri Tv, Prençi tha se në ‘radarin’ e SHISH ka qenë lideri demokrat Sali Berisha në kohën e ‘arrestit në shtëpi’, sikurse edhe deputeti i PD, Belind Këlliçi në kohën kur udhëhiqte protestat përpara Bashkisë së Tiranës.

Sipas Prençit, në kohën kur SHISH nuk kshte një drejtues, institucioni u përdor për qëllime joshtetërore dhe për interesa të pista të Ramës.

Për ish zyrtarin e lartë të Policisë, Rama nuk mund të flasë pas arrestimit të Vlora Hysenit dhe kundër saj, pasi është përfshirë në krime shumë të rënda, sikurse është edhe Ergys Agasi dhe grupet kriminale, që siç theksoi Prençi mes tyre po ndodh një përplasje e ashpër.

SHISH ka përgjuar opozitën, madje edhe eksponentë të PS, qoftë Berisha në masën ‘arrest shtëpie’, qoftë Këlliçi kur udhëhiqte protestat para Bashkisë Tiranë. Kisha info që po bëhej ky skandal shtetëror nga SHISH dhe Vlora Hyseni. Ishte krijuar një nukël që menaxhonte SHISH për qëllime joshtetërore, si dhe për interesa të pista të Ramës.

Arretsimi i Hysenit s’erdhi spontanisht, ishin alarmuar shërbimet partnere, madje kisha dyshime se Hyseni s’kishte marrë pjesë në takimin e Bakusë, e ka bërë atë rrugëtim për të humbur gjurmë, përdorte 3 telefona dhe 2 s’i ka kthyer, i ka lënë në Kosovë. Vlora Hyseni është një nga zyrtarët më të lartë që shërbimin  s’e ka kryer në interes të shtetit por të grupeve kriminale, Ergys Agasit.

Në këto moment Rama shpreh mërzinë e vet por s’mund të flaës kundër saj, pasi fshihet implikimi i Ramës në shumë krime të rënda, që kanë bërë grupet kiminale të koordinuara nga Agasi. Do dalin, sepse kohët e fundit ka përplasje mes grupeve kriminale. Rama është në periudhën më të keqe pasi mund t’i plasin skandalet me krimet që ka kryer.

Janë thirrur në SPAK 2-3 biznesmenë të fqishëm që Rama ka bërë pakt edhe me grupe kriminale. Gjurmimi që ka bërë BKH se sa thellë ishte future SHISH, Hyesni e dinte ku ndodhej Agasi, dinin infor për njëri tjetrin. Ata janë shumë të trazuar në këto momente, opozita të mbajë linja bashkëpunimi me ndërkombëtarët e t’i thotë të vërtetën. Partneri më i sigurt është SPAK e BKH.

Në një postim në Facebook, të hënën, Edi Rama shpalli se “tani në Michelin Guide gjenden 20 sipërmarrje shqiptare”, të përzgjedhura, sipas tij, “për autenticitetin, identitetin dhe vlerat e kuzhinës”.

Ai e paraqiti lajmin si një hap të rëndësishëm për promovimin e gastronomisë shqiptare dhe të traditave tona kulinare.

Ajo që ka ndodhur në të vërtetë është shumë më modeste. Sipas portalit EXIT faqja e internetit e udhëzuesit ka shtuar një seksion ku turistët mund të rezervojnë dhoma në 20 hotele shqiptare. Asnjëri prej këtyre hoteleve nuk është përzgjedhur për kuzhinën.

EXIT raporton se Michelin nuk ka vlerësuar kurrë ndonjë kuzhinë shqiptare.

Michelin i publikon përzgjedhjet e restoranteve vend pas vendi, dhe Shqipëria nuk është ndër to.

Lista e përzgjedhjeve kombëtare të vetë udhëzuesit përfshin vende të rajonit, si Greqinë, Kroacinë, Serbinë, Slloveninë dhe Turqinë, por jo Shqipërinë.

Asnjë inspektor i Michelin nuk ka vlerësuar ndonjë restorant shqiptar deri më sot. Faqja për Shqipërinë në faqen e udhëzuesit nuk rendit as edhe një restorant të vetëm.

Qeveria nuk ka se çfarë vlerësimi për kuzhinën shqiptare të festojë.

Faqja për Shqipërinë, të cilës i referohet kryeministri, mban titullin Hotele butik dhe luksoze – Rezervime hotelesh nga Udhëzuesi Michelin (Boutique and luxury hotels – Hotel booking by Michelin Guide).

Aty renditen 20 hotele, nga Tirana dhe Durrësi deri në Vlorë, Himarë, Sarandë, Gjirokastër, Berat dhe Korçë.

Listimet duken ende në fazë fillestare. Në momentin e shkrimit, asnjë nga hotelet shqiptare nuk shfaqte çmime apo dhoma të lira; secili i ftonte vizitorët të kontaktonin shërbimin e klientit.

Seksioni i hoteleve është një biznes më vete i Udhëzuesit Michelin. Kompania e ndërtoi këtë sektor biznesi mbi Tablet Hotels, një platformë rezervimesh me qendër në Nju Jork, të cilën ajo e bleu në vitin 2018.

Michelin i vlerëson edhe hotelet, por me një shenjë dalluese të vetën: ajo përdor Çelësin Michelin (Michelin Key), që është i ngjashëm me yjet për restorantet.

Asnjë nga 20 hotelet shqiptare që mund të rezervohen nga faqja e Michelin nuk ka vlerësim me “Çelës”. Në të njëjtën faqe, hotelet e vendeve të tjera që e kanë fituar shfaqin simbolin e Çelësit; ato shqiptare nuk shfaqin asgjë.

Sipas njoftimit të Michelin për përzgjedhjen e vitit 2026, lista globale e hoteleve të udhëzuesit përfshin mbi 9 400 hotele, nga të cilat vetëm 2 832 janë vlerësuar me një Çelës.

Këtë vit, dhjetë vende morën Çelësa për herë të parë. Shqipëria nuk ishte ndër to. sn

Dritan Prençi ka treguar në dosje të tjera se di të kërkojë “arrest me burg”, madje dhe kur mungojnë provat. Por te dosja e Belinda Ballukut, sa më shumë rëndohet hetimi, aq më e madhe bëhet pikëpyetja se kush ia ka “lidhur duart” prokurorit të SPAK.

Në dosjen Balluku, ndërkohë, një tjetër personazh i futbollit, kësaj here Igli Tare është marrë nën hetim për pastrim parash, pasi SPAK dyshon se është përdorur për të fshehur pronësinë reale të një vile që prokuroria ia atribuon Ballukut. Por ndaj tij nuk rezulton publikisht një masë arresti. Edhe biznesmeni Pandeli Carapuli është marrë nën hetim për pastrim parash në lidhje me vilën e Dhërmiut, por sërish pa masë arresti.

Por dy standardet vijojnë edhe brenda vetë dosjes Balluku. Rasti më i pastër është ai i Evis Berberi, i cili qëndron në burg që prej marsit 2024 dhe Prençi ka kërkuar për të një dënim të rëndë për korrupsion, tendera dhe pastrim parash. Në të njëjtën dosje të ARRSH-së, për Erald Elezin dhe Gentian Gjylin prokurori Prençi ka kërkuar dënime shumë më të ulëta, ndërsa masat e tyre të arrestit në shtëpi u zbutën.

Edhe Ergys Verdho është tashmë i pandehur në një tjetër procedim të SPAK për “shpërdorim detyre”, ndërsa në dosjen Balluku është thirrur disa herë për të dhënë shpjegime. Ai gjithashtu nuk ndodhet në arrest dhe deri tani është i amnistuar nga Dritan Prençi.

Por një prej rasteve më domethënëse është Viola Haxhiademi, ish-sekretarja e përgjithshme e Ministrisë së Infrastrukturës. BKH i sekuestroi telefonin dhe nga ekspertimi janë dalë komunikime të frikshme korrupsioni, por sërish prokurori Dritan Prençi është treguar i butë, duke mos caktuar asnjë masë sigurie për ish numrin 2 të Ministrisë së Energjisë dhe Industrisë.

Dhe qershia mbi tortë, është vetë Belinda Balluku.

SPAK thotë zyrtarisht se ajo është e pandehur për shkelje të barazisë në tendera dhe se ndaj saj ekzistojnë gjithashtu dyshime për korrupsion pasiv dhe pastrim parash. Prokuroria ka sekuestruar edhe një vilë që e konsideron pronësi indirekte të saj dhe produkt të dyshuar korrupsioni.

Dritan Prençi e kërkoi një herë heqjen e imunitetit për Belinda Ballukun. Më 16 dhjetor 2025 SPAK iu drejtua Kuvendit për autorizimin e heqjes së lirisë së saj. Kuvendi nuk ia dha autorizimin.

Por që atëherë dosja është rënduar. Janë shtuar dyshimet për korrupsion dhe pastrim parash, janë sekuestruar pasuri dhe janë marrë në hetim persona të tjerë. Po të shtojmë këtu dhe faktin, se Balluku i ka bërë presion një prej dëshmitareve kryesore, Mirzeta Kashnicës, si dhe kontrollon të gjithë Ministrinë e Energjisë dhe Industrisë, me njerëzit e saj.

Atëherë pse nuk ka një kërkesë të re? Kjo është pyetja që Dritan Prençi duhet t’i përgjigjen.

Pse në dosje të tjera SPAK kërkon burg kur sheh rrezik procedural, ndërsa në një çështje ku vetë prokuroria flet për tendera të manipuluar, korrupsion, pastrim parash, pasuri të fshehura dhe madje presione ndaj dëshmitarëve, figura qendrore e hetimit vazhdon jashtë qelisë?

Nuk ka provë që Prençi ka bërë marrëveshje me Ballukun për ta aministuar, por kur ky prokuror ka vepruar me nxitim të jashtëzakonshëm për të arrestuar biznesmenë dhe gazetarë, me fjalë goje dhe thashetheme, në rastin e Belinda Ballukut, po e merr shtruar, aq shtruar sa zërat qarkullojnë se do ta amnistojë duke e çuar në gjykim pa masë sigurie./ Voxnews

Odisejada politike për ta bërë Kosovën me president, kishte një qëllim të errët. “Komandantët” pa ushtarë ngulmojnë kthimin në pushtet, edhe pse janë refuzuar për të katërtën herë radhazi nga populli i Kosovës. Sepse krimet dhe hajnitë zyrtare, tashmë, janë faktike dhe të konfirmuara ligjërisht.

Pozitive është se, më në fund, Kosova u bë me president. Populli i Kosovës po dëshmon pjekuri dhe emancipim. Brenda dy dekadave ka zgjedhur në krye të shtetit tri zonja të nderuara. Së fundi, njëra syresh e besimit katolik, dëshmi kjo e trashëgimisë, tolerancës të shkëlqyer nder fetare.

Të tria këto zonja, veç tjerash, kanë pasur specializime të ndryshme në SHBA dhe, mbi të gjitha, kanë orientim proamerikan. Zonja Atifete Jahjaga, Dr. Vjosë Osmani shkëlqyen në pozitën e kreut të shtetit.

Presidentja Justina Shiroka – Pula gjithashtu vjen nga bota akademike. Me keqardhje, ajo vjen nga një parti fort të përfolur për krime vrastare, hajni zyrtare, abuzuese e shtetit. Një lakmi-cen ky lëndues i figurës të kreut të shtetit, edhe pse nuk ka afera faktike përgjatë ushtrimit të pozitës ministrore apo të deputetes të PDK-së.

Mosha 73 vjeçare e presidentes aktuale, është përkfizim i dukshëm për atë. Ecejaket e shpeshta ndër shtete dhe kancelari botërore, do të jenë të lodhshme për moshën e saj.

Mënyra e zgjedhjes, edhe pse jo për fajin e saj, u bë në kushte të rënda, nën zhurmimin dhe kërcënimin me  mjete piroteknike dhe krisma tjera.

Njeri nga kuadrot e PDK-sä shantazhoj dhe kërcënoi deputetët në sallën kuvendore: Kuvendi dhe Prishtina janë rrethuar, ligjin për Gjykatën Speciale duhet me votuar sonte!” Kësaj atmosfere të zymtë dhe të frikshme, u paraprinë deklarime rrugaçërore: “Nëse dënohen çlirimtarët, do ta kallim Kosovën”, siç është Nait Hasani e tjerë. Kurse kreu i PDK-së, Bedri Hamza, një ditë para dhënies së verdiktit, akuzoi dhe kërcënoi Gjykatën e Hagës: “Para se të jipni dënimin, duhet t`i mendoni pasojat!”

Organizimi i protestave “në emër të popullit”, ndërkohë që ishin partiake, vetëm të partive të PAN-it, është një mashtrim dhe falsifikim grotesk, i turpshëm. Në Kosovë kanë ndodhur krime makabre. U huazuan metodat e Enver Hoxhës, gjatë Luftës së Dytë Botërore, vrasja e kundërshtarëve politikë, për ta marrë pushtetin me dhunë.

Mos përzierja e LDK-së në pazaret e zgjedhjes të presidentes dhe të votimit për zhbërjen e Gjykatës Speciale, ishte vendim i duhur. Është ironike dhe absurde që viktima ta amnistojë persekutorin, pa kërkuar kurrë falje!

Transportimi i protestuesve me autobusë të sposorizuar nga shteti, nëpër Kosovë, Evropë, është e ndershm me paratë e taksapagueseve të Kosovës.

Eksponentët e PDK-së, AAK-së, nuk e kanë hallin e të dënuarve në Hagë, por të vetes, sepse emrat e disave lakohen në ketë Gjykatë, si pjesë e  Kriminale.

Pedagogu Lush Susaj ka rrëfyer një episod nga protestat studentore të viteve 2018-2019, duke sjellë në vëmendje rastin e studentit Selman Porja, i cili, sipas tij, u la një vit pas në studime për shkak të pjesëmarrjes së tij.

Sipas pedagogut, studenti u ngel sepse i mbajti çadrën gjatë leximit të poezisë së një studenti tjetër. Susaj thotë se kur Selman Porja u kthye në klasë, iu drejtuan me fjalët: “Çohu ti, Selman, se je i mirë për t’i mbajtur çadrën Lushit”.

Pedagogu e konsideron këtë episod si një shembull të mënyrës se si trajtoheshin studentët që ishin përfshirë në protestat e asaj periudhe.

“Është një djalë, po ia them emrin se nuk ka problem. Ai quhet Selman Porja. E kanë ngelur në klasë një vit vetëm sepse mbante çadrën kur po lexoja poezinë e një studenti tjetër. Po binte shi dhe çadrën e mbante që të mos lagej letra. Kur shkoi në klasë, i thanë: “Çohu ti, Selman, se je i mirë për t’ia mbajtur çadrën Lushit”. Po a i thuhet studentit në mes të klasës për kolegun vetë? Sepse në mendjen e tyre, gjatë vitit 2018-2019, ne që e kishim kuptuar çfarë mizorie po i përgatiste kombit shqiptar, ishim armiqtë e shtetit. Edhe sot është i papunë, ka mbaruar për inxhinieri pyjesh, ndërsa sot pyjet digjen se punësojnë patronazhistë”,- tha Susaj. Panorama

    Deklaratë për mediat

“Lëvizja për Zhvillim Kombëtar” është investuar shumë dhe me të gjitha mënyrat për Reformen Territoriale dhe Reformen Zgjedhore.

Meqenëse nesër diskutohet në Kuvend, Reforma Territoriale j’u rikonfirmojmë qëndrimin tonë:

• Ndryshimin e numërit të bashkive, rikthimin e komunave dhe uljen e numërit tw Qarqeve, sipas standarteve më të mira europiane të përshtatura në traditen, llogjiken dhe specifikat e Shqipërisë.
• Kalimin në zgjedhjet me dy raunde nëse asnjë kandidat në raundin e parë nuk fiton 50% +1 votë.
• Pragu i vlefshmërisë së zgjedhjeve të jet me pjesmarrjen e 50% +1 votë të zgjedhësve.
• Votimin dhe numërimin elektronik.

Tashmë propozimet e LZHK-s janë bërë pjesë e platformës së opozitës për t’i parqitur në Kuvendin e Shqipërisë dhe mbrojtur ato me konsekuencë, se kjo reformë është shumë e rëndësishme për të ardhmen e shqiptarëve, demokracisë dhe Shqipërisë.

Jo pa qëllim, sipas Nenin 81/2 të Kushtetutes, ligji për zgjedhjet e përgjithshme dhe vendore, miratohet me tre të pestat e të gjithë anëtarëve të Kuvendit, pra kërkohet një konsensus i gjërë i partive politike, se në rastin konkret reforma territoriale nuk i përket vetëm një mandati qeverisës të një partie por duhet të jetë shumë afatëgjatë.

I bëjm thirrje shumicës parlamentare të PS, që nesër të tërheq projektin e saj një partiak dhe të mos bëjë të njëjtin faji si në vitin 2014 ku e vetme bëri ndarjen administrative dhe pasojat e saj i’u kushtuan shumë shqiptarëve.

***

“Lëvizja për Zhvillim Kombëtar” ka shprehur në vijimësi qëndrimet dhe shqetësimet për zhvillimet politike në Kosovë dhe në trevat e tjera shqiptare, gjithnjë në raport me interesin kombëtar.

Sikurse dihet, brenda një periudhe prej 16 muajsh, Kosova ka kaluar nëpër tri palë zgjedhje parlamentare, për shkak të dështimit për të krijuar një shumicë të qëndrueshme dhe për të zgjidhur ngërçet institucionale.

Por, sidoqoftë klasa politike e Kosovës, duke vendosur interesin e shtetit mbi interesat e ngushta partiake diti të tregojë përgjegjësinë që kërkon investimi dhe besimi i shqiptarëve, i demokracive perëndimore dhe i Aleancës Euroatlantike, duke kaluar ngërçin për zgjedhjen e Presidentit.

Zgjedhja e akademikes Justina Shiroka Pula si Presidente e re e Republikës së Kosovës shënon një moment historik dhe kthesë vendimtare për stabilitetin politik të vendit. “Lëvizja për Zhvillim Kombëtar” përshëndet këtë zhvillim të shëndetshëm institucional dhe i uron punë të mbarë e suksese.

Po kështu vlerësojmë edhe projektligjin për ndryshimet lidhur me ligjin për Dhomat e Specializuara.

Lëvizja për Zhvillim Kombëtar

Bashkëkryetar

Dashamir Shehi                                Ekrem Spahiu