Presidenti serb Aleksandar Vuçiç dyshohet se kishte përgatitur një plan për të mbajtur pushtetin me forcë pas humbjes së zgjedhjeve, por u tërhoq në momentet e fundit, pas telefonatave që i kërkonin të pranonte rezultatin. Zbulimi bëhet nga gazeta prestigjioze britanike The Times, e cila citon politikanë serbë dhe një ish-zyrtar të lartë të policisë, sipas të cilëve Serbia ishte shumë pranë një përplasjeje të dhunshme për pushtetin.

Sipas burimeve të gazetës britanike, Vuçiç kishte përgatitur një mobilizim të konsiderueshëm të forcave të sigurisë dhe mbështetësve të tij në Beograd, me synimin e dyshuar për të penguar kalimin e pushtetit te fituesit e zgjedhjeve.

Ish-kreu i njësisë antiterroriste të Serbisë, Spasoje Vuleviç, pretendon se në qendër të kryeqytetit ishin vendosur rreth 4 mijë efektivë policie dhe 3 mijë mbështetës të presidentit. Sipas tij, ky mobilizim nuk ishte thjesht një masë sigurie, por pjesë e përgatitjeve për të penguar ndryshimin e pushtetit.

Megjithatë, situata ndryshoi papritur mbrëmjen e së dielës, kur u bë e qartë se Lista e Studentëve kishte siguruar një epërsi prej rreth 500 mijë votash. Diferenca e konsiderueshme, sipas burimeve të cituara, e bëri shumë më të vështirë kundërshtimin e rezultatit zgjedhor.

Vetëm 90 minuta pas mbylljes së qendrave të votimit, Vuçiç pranoi humbjen, një vendim që erdhi në kundërshtim me skenarin që, sipas kundërshtarëve të tij, ishte përgatitur më herët.

Kandidati i Listës së Studentëve, Radomir Saiçiç, deklaron se planet për të përmbysur rezultatin me forcë u ndryshuan pas telefonatave nga drejtues dhe përfaqësues të policisë dhe agjencive të tjera shtetërore.

Sipas tij, ndërhyrjet e minutës së fundit luajtën rol në shmangien e një përshkallëzimi që mund ta kishte futur Serbinë në një krizë të rëndë politike dhe institucionale.

Gazeta britanike sjell edhe dëshminë e eurodeputetit Sandro Gozi, drejtues i Partisë Demokratike Evropiane, i cili thotë se të dielën kishte marrë informacione shqetësuese nga burime diplomatike për gatishmërinë e Vuçiçit për të kundërshtuar me forcë rezultatin zgjedhor.

Madje, përpara se të përfundonte votimi, grupimi politik i Gozit kishte paralajmëruar publikisht mundësinë e mobilizimit të mbështetësve të presidentit serb për të provokuar përplasje në momentin e publikimit të rezultateve të para.

Sipas The Times, gjatë ditës së zgjedhjeve, grupe burrash të veshur me të zeza u panë duke hyrë në Parkun e Pionierëve në Beograd, ku mbështetës të Vuçiçit kishin ngritur prej muajsh një kamp me çadra. Në të njëjtën kohë, forca të xhandarmërisë morën pozicione, disa rrugë u bllokuan dhe ndriçimi publik u ndërpre në zona të caktuara.

Avokati Rade Gjuriç, i lidhur me Shoqatën e Gazetarëve të Pavarur të Serbisë, dyshon se skenari mund të përfshinte pretendime për parregullsi zgjedhore, kërkesa për përsëritjen e votimit dhe provokimin e trazirave që do të shërbenin si justifikim për anulimin e zgjedhjeve.

Një tjetër element i raportimit lidhet me ndërhyrjet e mundshme ndërkombëtare. Në Beograd qarkulluan zëra të pakonfirmuar se ish-kryeministri hungarez Viktor Orbán mund të kishte ndikuar në vendimin e Vuçiçit për t’u tërhequr.

Ndërkohë, Vuleviç shprehet se presidenti serb mund të ketë marrë telefonata nga qeveri evropiane, në nivelin më të lartë politik. Megjithatë, nuk ka konfirmim të pavarur për këto ndërhyrje.

Eurodeputeti Gozi vlerëson se faktori vendimtar mund të ketë qenë vetë rezultati i zgjedhjeve, i cili ishte shumë më i thellë nga sa priste Vuçiç.

Nga ana tjetër, zëdhënësja e Vuçiçit i ka kundërshtuar pretendimet për një plan marrjeje të pushtetit me forcë. Ajo deklaroi për gazetën britanike se prania e policisë në Beograd kishte për qëllim parandalimin e dhunës nga protestuesit dhe nuk lidhej me ndonjë përpjekje për të përmbysur rezultatin zgjedhor.

Raportimi i The Times hedh dritë mbi tensionet që shoqëruan fundin e sundimit 12-vjeçar të Vuçiçit, pas fitores së Listës së Studentëve, e cila siguroi rreth 52,7% të votave dhe një epërsi prej gjysmë milioni votash ndaj Partisë Progresive Serbe.

Megjithëse pretendimet për një grusht shteti të mundshëm mbeten të paverifikuara në mënyrë të pavarur, dëshmitë e publikuara nga gazeta britanike tregojnë se frika nga një përplasje e dhunshme ishte e pranishme deri në momentin kur Vuçiç pranoi humbjen. bw