Kryetari i Partisë Republikane, njëkohësisht deputeti Fatmir Mediu, rrëfeu nga SHBA-të çështjet e diskutuara gjatë takimeve të delegacionit opozitar në turin e vizitës që po zhvillon atje.

I ftuar në një lidhje drejtpërdrejt në studion e “News 24”, Mediu tha se delegacioni i opozitës, ku bëjnë pjesë edhe deputetët Gazment Bardhi, Jorida Tabaku, Ivi Kaso, Belind Këlliçi dhe Klevis Balliu, ka zhvilluar një sërë takimesh me senatorë dhe kongresmenë, si dhe drejtues të NDI dhe IRI, ku janë dëgjuar shqetësimet e opozitës për aktualitetin politik dhe të sigurisë në Shqipëri.

Ai bëri me dije se SHBA-të e kanë nën vëmendje Shqipërinë për shkak të problematikave me zgjedhjet e lira, korrupsionit dhe krimit të organizuar dhe karteleve të drogës, ndërsa Kongresi ka pasur edhe një reagim e deklaratë publike për këto çështje.

Mediu theksoi se tani opozita shqiptare është partnere e SHBA-ve dhe dëgjohet, ndryshe nga më parë ku dëgjohej si monopol vetëm pala tjetër (mazhoranca).

“Kemi qenë së bashku si delegacion edhe me deputetët e tjerë si Jorida Tabaku, Ivi Kaso, Gazment Bardhi. Janë diskutuar edhe shqetësimet e opozitës, që janë ngritur edhe në nivel të Kongresit Amerikan, për zgjedhjet e lira, nivelin e korrupsionit dhe problematikat me krimin e organizuar”, u shpreh deputeti opozitar.

I pyetur nëse takimet në Mëngjesin e Lutjeve kishin lidhje me Forumin e Sigurisë, ai shpjegoi se ishte një rastësi që ky forum u zhvillua në këtë moment, por takimet dhe bisedimet kanë qenë intensive nga ana e opozitës, që të dëgjoheshin të gjitha shqetësimet.

“Mëngjesi i Lutjeve nuk lidhet me Forumin e Sigurisë. Ne si opozitë zhvilluam takime të rëndësishme në SHBA, ku u dëgjuam si nga kongresmenët dhe senatorët dhe parashtruam shqetësimet e opozitës, sikurse takimet me IRI dhe NDI. Edhe Kongresi ka pasur një deklaratë për çështjen e Shqipërisë për zgjedhjet, krimin dhe korrupsionin”, vijoi Mediu.

Ligjvënësi opozitar tha se takimet në SHBA ishin mesazhe inkurajuese, pasi opozita tani konsiderohet partnere e Amerikanëve.

“Takimet në SHBA ishin mesazhe inkurajuese për opozitën shqiptare. SHBA-të janë të shqetësuara për mungesën e zgjedhjeve të lira, krimit të organizuar dhe nivelit të korrupsionit. Jo vetëm vëmendje ndaj Shqipërisë, por edhe ndaj Ballkanit. SHBA janë aleat strategjik i vendit, por edhe partner i opozitës. Më parë ka pasur një monopol vetëm për krahun tjetër, kurse tani ka një balancim dhe përfaqësim në dëgjime edhe të palës tjetër, pra opozitës”, u shpreh deputeti. gsh