Ish-figura e lartë e politikës britanike, Peter Mandelson, është arrestuar nën dyshimin për sjellje të keqe në detyrën publike.

Në një deklaratë zyrtare, Policia Metropolitane bëri të ditur:

“Oficerët kanë arrestuar një burrë 72-vjeçar nën dyshimin për sjellje të keqe në detyrën publike.
Ai u arrestua në një adresë në Camden të hënën, më 23 shkurt, dhe është dërguar në një stacion policie në Londër për t’u marrë në pyetje.
Kjo vjen pas urdhër-bastisjeve në dy adresa në zonat e Wiltshire dhe Camden.”

U shoqërua nga shtëpia e tij në Londër

Mandelson u pa duke u larguar nga shtëpia e tij në Camden pasditen e sotme, i shoqëruar nga oficerë policie me rroba civile. Ai u fut në pjesën e pasme të një automjeti pa targa dhe u dërgua për t’u marrë në pyetje.

Policia kishte konfirmuar më herët gjatë këtij muaji se kishte nisur një hetim penal lidhur me akuza për sjellje të keqe në detyrën publike.

Karriera politike dhe polemikat

Mandelson ishte një figurë kyçe e Partia Laburiste që nga vitet 1980. Ai luajti një rol të rëndësishëm në transformimin e partisë në “New Labour” dhe në fitoren dërrmuese të udhëhequr nga Tony Blair në zgjedhjet e vitit 1997.

Në dhjetor 2024, kryeministri Keir Starmer e emëroi atë ambasador të Mbretërisë së Bashkuar në Washington.

Megjithatë, emri i tij u përfshi në polemika për shkak të lidhjeve të tij me financierin e dënuar për krime seksuale, Jeffrey Epstein. Më herët, ai u shkarkua nga një rol zyrtar pasi, sipas Downing Street, kishin dalë informacione të reja mbi thellësinë e marrëdhënies së tij me Epstein.

Më pas, Mandelson dha dorëheqjen edhe nga Dhoma e Lordëve, pasi publikimi i dokumenteve të lidhura me Epstein në SHBA ngriti pyetje të reja mbi marrëdhënien e tyre.