Përkujdesja për të akuzuarit për krime të luftës dhe krime kundër njerëzimit, nga Gjykata e Kosovës, me seli në Hagë, qeveria dhe shteti i Kosovës ka qenë korrekt. Ish- kryetari i Parlamentit, Glauk Konjufca, ish-ministrja e Drejtësisë, Albulenë Haxhiu i kanë vizituar në burgun e Hagës, për të parë kushtet dhe trajtimin. Gjithçka ka qenë në rrugull dhe konformë normave të përcaktuara ligjërisht. Por, opinioni shqiptar, akuzon qeveritë paraprake dhe Kuvendin, për vendimin e pagesës të 3 dhe 4 avokatëve ndërkombëtarë të kushtueshëm, për secilin nga të izoluarit e Hagës. Deri në qershor të vitit 2025, në 7 vitet e fundit, janë paguar nga buxheti i shtetit të Kosovës e 276 milionë euro për Hagën!

     Ndërkohë që akuza bazë e tyre është kidnapimi, burgimi, torturimi, deri në vrasje të kundërshtarëve cilësorë politikë, kryesisht, luftëtarët luftëbërës të FARK-ut, veprimtarët e LDK-së, gazetarët e “Bota sot”, veprimtarët e hershëm të LPK-së, këta për arsye të konkurrencës të ardhshme pushtetare.

     OVL vazhdon të abuzojë me demokracinë. Me porosi të PAN-it, organizon protesta kundër Gjykatës Speciale, si krijesë ekskluzive e Amerikës, çliruese faktike të Kosovës. Në protestat e organizuara, flitet, kinse, për trajtim mizerabël, mjeran të izoluarve në Hagë, privim të vizitave dhe gënjeshtra të tjera. Organizatorët e protestave, avokatërit partiakë, këshilltarë e lakej PAN-istë, të strehuar në OVL, gazetarë dhe analistë mediatikë mercenarë, shpifin -non stop- për 24 orë, se “gjoja” të izoluarit në Hagë, përballën me akuza të sajuara, dëshmitarë të rrejshëm, të paguar dhe broçkulla të tjera.

     Si burgaxhi politik shumëvjeçarë, me fjetje herë në çimento, beton, herë në dërrasa, pa ngrohje, me uri të përhershme, me provokime e ndëshkim në qeli, birucë, vetmi, jam i informuar nga dorë e parë, nga ata që kanë kaluar kohë në izolimin e Scheweningenit të Hagës, atje asgjë nuk ju mungon, përveç lirisë.

     E vetmja padrejtësi është stërzgjatja e hetimit, për katërshen e akuzuar për krime të luftës dhe krime kundër njerëzimit. Dhe për këtë zgjatim kanë kontribuar gjyqtarët dhe vetë avokatërit e tyre, të cilët, me pagesat e majme, thonë “zgjat zot kësi moti!”

     Ankesat për ndalimin e vizitave të familjarëve të katërshes, të akuzuar të Gjykatës Speciale, është shpifje e poshtër e eksponentëve të OVL dhe horrakëve të tjerë. Familja e ngushtë nuk është penguar kurrë. Disa nga familja e gjerë janë refuzuar, përkohësisht, pas aferës faktike të përgjimeve, për pengimin e drejtësisë, tashmë, e verifikuar, si kur i thuhet viktimës “ose mohoni dëshminë kundër Hashimit, ose ta vrasim djalin e hasretit!”

     Përndryshe, në burgun e Scheweningenit ka vazhduar, ndër vite, pelegrinazhi i turpshëm nga lukunia e zuzarëve dhe maskarenjve, hipokritë e servilë, jo vetëm të PAN-it, por edhe të subjekteve të tjera, të goditura nga SHIK-u kriminal, përkatësisht, Ndërmarrja e Përbashkët Kriminale!

     Përgjatë gjithë burgut të gjatë, unë me shokët bashkë-vuajtës, të burgosur politikë, kurrë nuk kemi gëzuar asnjë vizitë familjare dhe të mos flasim për vizita të tjera. Kemi humbur prindër dhe familjarë të tjerë, pa pasur asnjë mundësi vizite apo pjesëmarrje në ceremoninë mortore.

     Argatët e PAN-it, Ismail Tasholli dhe Eliza Hoxha, lënduan mijëra familje të viktimave të Ndërmarrjes të Përbashkët Kriminale. Ata akuzuan për dëshmi të rreme, edhe pse ata rrëfyen të vërtetën, për kidnapimet dhe maltretimet në burgjet-ahure të improvizuara, në fshatrat rurale të Kosovës dhe të Shqipërisë, si dhe të familjarëve të tyre të ekzekutuar nga bandat e disa “komandantëve” mujsharë dhe kriminelë.

     Tasholli dhe Hoxha deklaruan se në protestën e parë, të organizuar në Prishtinë, kundër Gjykatës Speciale të Kosovës, me seli në Hagë, “morën pjesë dhjetëra-mijëra qytetarë”, duke e konsideruar si protestën më të madhe, të mbajtur ndonjëherë në Kosovë. Realisht, sipas matjeve të numrit të pjesëmarrësve në protestë, metoda që praktikohet, në bazë të hapësirës që zënë, të bërë nga Rron Gjinovci, rezulton të kenë qenë jo më shumë se 12 mijë protestues.

     Ndërsa protesta më e madhe e organizuar në Kosovë, me pjesëmarrjen e qindra-mijëra qytetarëve, nga e gjithë Kosova dhe përtej, ka qenë ajo e datës 19 shtator 2018, e organizuar nga Lëvizja Vetëvendosje.

     Për ironi, atë ditë presidenti Hashim Thaçi shëtiste në Liqenin e Ujmanit, me varkën dhe rojet e Radoiçiqit, në shoqërim të Bedri Hamzës, Rashid Qalës, Abelard Tahirit dhe ndoca të tjerëve! Ajo protestë fundosi karrierën e përlloçur dhe nam keqe të Hashim Thaçit!