Eksperti i sigurisë Fatjon Softa ishte sot i ftuar në “News24 Fundjavë” me Megi Latifin, ku ka analizuar mundësinë e sulmeve nga Irani, sidomos pas paralajmërimeve nga ambasada e SHBA.

Softa renditi tre arsyet që sipas tij mund të kthejnë vendin tonë në një shënjestër të sulmeve, ndërsa rekomandoi transparencë të plotë ndaj qytetarëve dhe rritje të masave mbrojtëse nga ana e qeversë shqiptare.

Ai shtoi se Irani nuk po kursen asnjë shtet dhe e ka cilësuar Shqipërinë si “vend i vogël djallëzor që bashkëpunon me armiqtë tanë”, duke theksuar nevojën për kujdes.

“Po të shohësh mesazhet e shpërndara nga Ambasadat e SHBA në rajon, nuk ka një të tillë si ai që është postuar për Shqipërinë, është i veçantë. Konsiderohet si një paralajmërim që vjen si pasojë e një analize rrisku.
Jo domosdoshmërisht sulmi mund të jetë ushtarak, mund të jetë edhe sulm kibernetik, hibrid.
Ka tre arsye për paralajmërimin, prezenca e kampit MEK, Shqipëria është aleat i SHBA dhe rezoluta në Kuvend që shpalli Iranin vend terrorist.

Duhet reagim dhe informacion për qytetarët shqiptarë sepse është shumë e rëndësishme të ketë transparencë, masat janë më të mira se si mënyra se si mund të shmanget apo jo një koment në publik. Qeveria duhet të rrisë prezencën ndaj ambasadës, zonën e Durrësit pranë MEK dhe pikat nevralgjike që mund të jenë shënjestër e sulmeve si digat, portet etj.

Irani nuk po kursen asnjë shtet, e ka deklaruar se : Shqipëria vend i vogël djallëzor që bashkëpunon me armiqtë tanë”, tha ai.