Pamjet me dron tregojnë se si po tjetërsohet zona e Gjirit të Manastirit në Sarandë, e cila në Janar të vitit 2022 doli nga harta e Parkut Kombëtar të Butrintit pas një vendimi të qeverisë shqiptare për rishikimin e kufijve të Zonave të Mbrojtura.

Projekti “Manastiri Resort” është i pari i miratuar nga qeveria shqiptare në vijën bregdetare nga Kanali i Çukës deri në Lagunën e Butrintit pas rishikimit të hartës së zonave të mbrojtura, ndërkohë që plane të tjera ndërtimesh janë në proces.

Nga Parku Kombëtar i Butrintit u hoqën me vendimin e qeverisë rreth 800 hektarë përfshirë edhe disa zona të Ksamilit.

Mbingarkesa e ndërtimeve, sic duket edhe nga pamjet nga ajri po shfaqet frikshëm në Ksamil , i cili ka një vijë të vogël detare për plazhe.

Peisazhe të paprekura mijëvjecare po dëmtohen në vijën bregdetare nga Saranda në Ksamil për t`u kthyer në plazhe dhe ndërtime.

23 zyrtarë të administratës publike dhe 1 noter, janë janë arrestuar nën dyshimet për abuzim me detyrën gjatë 21 muajve të fundit me urdhër të Prokurorisë së Sarandës dhe SPAK.

Ndërkohë rreth 48 organizata mjedisore shqiptare kanë kërkuar që të mos miratohet rishikimi i zonave të mbrojtura dhe 11 prej tyre janë paditëse ndaj vendimit të qeverisë dhe vijojnë betejen për anullimin e vendimit në një proces gjyqësor që vijon në gjykatën e Tiranës.

Përkundër këtyre reagimeve mazhoranca socialiste përgatitet të miratojë ndryshime të reja në hartën e zonave të mbrojtura në Shqipëri.

12 deputetë të Partisë Socialiste kanë kanë depozituar këto ditë një kërkesë për ndryshimin e ligjit “Për zonat e mbrojtura”.

Projektligji i ri sjell sërish ulje të shkallës së mbrojtjes së zonave të rëndësishme natyrore të vendit për t`u hapur rrugë investimeve.