“La Repubblica” ka botuar një analizë sa i përket problematikave të mëdha me të cilat përballet Ballkani.

Mes shteteve të tjera media italiane ka shkruar edhe për vendin tonë, ku thuhet se një problem shqetësues është emigrimi.

Gazeta italiane “La Repubblica” në një analizë të publikuar për emigracionin nga vendet e Ballkanit drejt Europës, veçanërisht Gjermanisë, i ka dhënë një goditje të fortë qeverisë Rama, teksa citon shifrat për largimet e shqiptarëve nga vendi vitet e fundit.

“Sipas Kombeve të Bashkuara, vetëm Guajana ka një përqindje më të lartë të banorëve jashtë vendit sesa Bosnja dhe Hercegovina dhe Shqipëria. Emigrimi çoi në uljen e popullsisë në moshë pune të Ballkanit Perëndimor me mbi 400,000 banorë nga viti 2016 në 2020.

Popujt e Ballkanit të ndarë nga gjithçka, i bashkon dëshira për t’u larguar: qeveria e Beogradit ankohet se Serbia po humbet “një qytet në vit”, instituti statistikor vëzhgon me shqetësim se si popullsia ka rënë me 10 për qind në dhjetë vjet, në Bosnje Hercegovinë, Hulumtimi i Kombeve të Bashkuara zbulon se 72 për qind e të rinjve mendojnë se jetojnë në një vend “strukturalisht të korruptuar”, nga i cili pothuajse gjysma duan të largohen sa më shpejt të jetë e mundur.

Qindra mijëra i shpëtojnë varfërisë, korrupsionit, ndotjes. Dhe nëse në të kaluarën largoheshin kryesisht punëtorët, sot burra e gra, punëtorë e të diplomuar ikin nga Atdheu.

‘Në vitet ’90 të rinjtë tanë u larguan plot shpresë për të ardhmen. Sot njerëzit emigrojnë sepse kanë humbur çdo shpresë në vendin e tyre’, thotë Afrim Krasniqi, politolog në Universitetin e Tiranës.

Parashikimet e Kombeve të Bashkuara janë të pamëshirshme: Bosnja është e destinuar të humbasë 60 për qind të banorëve të saj në pesëdhjetë vitet e ardhshme, Shqipëria 66 për qind deri në fund të shekullit. Por nuk duhet të fokusohemi në dekada.

‘Në paralelet e mia në vitin 2010 kam pasur njëqind nxënës, sot dhjetë. Nga ana tjetër, kurset e mjekësisë dhe infermierisë janë mbushur me studentë që tashmë e kanë në xhep biletën e largimit: pesë mijë punonjës shëndetësorë shqiptarë janë punësuar vetëm në tre vitet e fundit dhe vetëm në Gjermani’, deklaron Krasniqi.

Agjencia Eurofound ka hetuar mirëqenien ekonomike të punëtorëve evropianë: 5 për qind e danezëve e kanë të vështirë të përballojnë bukën e gojës, ndërsa në Shqipëri kjo shifër është 69 për qind.

Edhe pse kryeministri Edi Rama vazhdon të gëzojë mbështetjen e Bashkimit Europian, vetëm në pesë vitet e para të “mbretërimit” të tij 260 mijë shqiptarë emigruan në Europë. Dhe në vitin 2021 rifilloi fluksi me 42 mijë largime.

‘Evropa na paralajmëron për ndikimet ruse dhe kineze, por nuk bën asgjë për të kundërshtuar emigracionin: ajo duket se e sheh të favorshme eksodin e fuqisë sonë punëtore të kualifikuar’, deklaron Krasniqi”, thuhet në postimin e La Repubblica.

Media italiane raporton se për vendet e rajonit, dikur BE shihej si “ilaçi për të gjitha sëmundjet, por se tashmë ky qëndrim nuk ka të njëjtin popullaritet.

“Për vite me radhë, Bashkimi Evropian dukej se ishte ilaçi për të gjitha sëmundjet.

‘Por pas kaq periudhës së mosvancimit, askush nuk mendon më njësoj. Në Shqipëri zgjedhjet e 2021 ishin të parat në të cilat nuk u fol për Europën’, deklaroi Krasniqi”, thuhet më tej në artikull.