Presidenti i Ukrainës, Volodymyr Zelensky ka paralajmëruar se vendimi i Shteteve të Bashkuara të Amerikës për të lehtësuar sanksionet ndaj naftës ruse mund të përbëjë një “goditje reputacioni” për komunitetin ndërkombëtar.

Gjatë një konference për shtyp të martën, Zelensky tha se masa e SHBA-së do të ishte një “goditje serioze” për Ukrainën dhe do të krijonte një precedent negativ.

“Si mund të hiqen sanksionet ndaj Rusisë, nëse ajo është një agresor?”, pyeti presidenti ukrainas. “Kjo mund të hapë rrugën për precedentë të tjerë, dhe jo në një mënyrë pozitive.”

Vendimi i Departamentit të Thesarit amerikan lejon shitjen e naftës bruto dhe produkteve të naftës ruse që janë tashmë të ngarkuara në anije deri më 11 prill. Ky hap vjen pas rritjes së çmimeve globale të naftës si pasojë e bllokimit të Ngushticës së Hormuzit nga Irani dhe sulmeve ndaj anijeve që transportojnë energji, duke prekur një pjesë të madhe të furnizimeve ndërkombëtare.