Presidenti rus, Vladimir Putin, e ka mirëpritur të hënën në Kremlin homologun e tij kinez, Xi Jinping, i cili rikthehet në Rusi pas katër vjetësh.

Ai e viziton Rusinë në kohën kur ky shtet po përballet me izolim ndërkombëtar për shkak të luftës në Ukrainë.

“Mirë se vjen mik i dashur”, i ka thënë Putin Xi-së në Kremlin.

Vizita e Xi-së në Kinë i jep mundësi Putinit të pretendojë se nuk është i bllokuar nga e gjithë bota, pavarësisht se për të është lëshuar një urdhërarrestim nga Gjykata Ndërkombëtare Penale, lidhur me supozimet për krime lufte.

Lufta e Rusisë në Ukrainë – e nisur më 24 shkurt 2022 – pritet të jetë tema kryesore e diskutimeve në mes të liderëve të të dyja vendeve.

Muajin e kaluar, Kina e ka prezantuar një plan të paqes për luftën në Ukrainë, në të cilin përmendet armëpushimi dhe bisedimet mes palëve.

Në nisje të takimit, Putin e ka mirëpritur planin e Xi-së.

“Ne jemi gjithmonë të hapur për negociata”, i ka thënë Putin presidentit kinez.

“Ne do të diskutojmë të gjitha këto çështje, përfshirë iniciativën tuaj, të cilën e trajtojmë me respekt”.

Në një artikull të publikuar më 20 mars, në gazetën ruse, Russian Gazette, Xi ka thënë se Kina ka mbetur “e paanshme” dhe “i ka promovuar vazhdimisht bisedimet për paqe”, mirëpo nuk ka përmendur diçka konkrete lidhur me planin për paqe.

Para takimit, Putin është lavdëruar për marrëdhëniet e tij me presidentin kinez, dhe ka thënë se lidhjet Moskë-Pekin nuk kanë qenë kurrë më të forta.

Putin dhe Xi janë takuar rreth 40 herë, në pozita të ndryshme, përgjatë 13 vjetëve të fundit.

Putin i ka përshkruar lidhjet mes Rusisë dhe Kinës si të barabarta, duke thënë se “nuk ka lider dhe ndjekës”.

Megjithatë, shumë ekspertë besojnë se Kina, ekonomia e dytë më e madhe në botë, është partnerja kryesore në këtë marrëdhënie.

Dhe ky status, sipas tyre, sa shkon e rritet, duke pasur parasysh dëmin që i është bërë ekonomisë ruse nën sanksionet e Perëndimit.

Kina është bërë rrugë kyçe transtiti për Rusinë për të importuar mallrat e ndaluara nga Perëndimi.

Koreja e Veriut tha të hënën se ka simuluar një sulm bërthamor në Korenë e Jugut, duke testuar raketa balistike gjatë fundjavës.

Lëshimi i raketave ishte demonstrimi i pestë që Koreja e Veriut ka kryer gjatë këtij muaji në shenjë proteste ndaj stërvitjeve më të mëdha të përbashkëta ushtarake në vite që kanë kryer Koreja e Jugut dhe Shtetet e Bashkuara.

Lideri i Koresë së Veriut, Kim Jong Un, udhëzoi ushtrinë e tij që të kryejë më shumë stërvitje për të rritur gatishmërinë e luftës të forcave të tij bërthamore përballë “agresionit” nga armiqtë e tij, raportoi media shtetërore.

Ushtritë e Koresë së Jugut dhe Japonisë kanë detektuar lëshimin e një rakete me rreze të mesme veprimi në ujërat e bregdetit lindor të Veriut. Lëshimi i kësaj rakete besohet se ndodhi një orë para se SHBA-ja të fluturonte bombarduesit B-1B për trajnime me avionët luftarakë të Koresë së Jugut. Koreja e Veriut i ka cilësuar stërvitjet SHBA-Kore e Jugut si përgatitje për pushtim, edhe pse aleatët insistojnë se stërvitjet janë të natyrës së mbrojtjes. Disa ekspertë kanë argumentuar se Veriu i përdor këto stërvitje si pretekst për të avancuar programet e tij të armëve.

Agjencia shtetërore e lajmeve verikoreane, KCNA, tha se raketa, që fluturoi rreth 800 kilometra, ishte e pajisur me një kokë bërthamore të rreme. Kjo agjenci tha se testimi ishte i suksesshëm, duke shtuar se pajisje shpërtheu ashtu siç ishte planifikuar, 800 metra mbi ujë në vendin që ishte simuluar se ishte “një shënjestër e madhe e armikut”.

Agjencia tha se lëshimi i raketës ishte hapi i fundit i stërvitjeve dyditore që përfshiu edhe stërvitje të komandës bërthamore të stërvitjeve të kontrollit. Po ashtu, Koreja e Veriut kreu stërvitje të njësive ushtarake, përkatësisht të reagimit të tyre për kundërsulm bërthamor.

Këto stërvitje janë po ashtu “paralajmërim i fuqishëm” për SHBA-në dhe Korenë e Jugut “të cilat nuk po fshehin përpjekjet e tyre për të nisur një luftë” kundër Koresë së Veriut, tha KCNA.

Kim, sipas medias shtetërore, tha se armiqtë e tij “janë duke bërë lëvizje gjithnjë e më agresive”.

Koreja e Veriut pretendoi se raketa e fundit e lëshuar është modeluar në bazë të raketës ruse balistike, Iskander. Phenjani tha se këtë raketë e ka testuar që nga viti 2019. Kjo raketë thuhet se mund të fluturojë në lartësi të ulëta dhe ka mundësi të manovrimit.

Gjykata Penale Ndërkombëtare në Hagë ka lëshuar një urdhër-arrest kundër presidentit rus, Vladimir Putin.

Ai e akuzon atë se është përgjegjës për krimet e luftës në Ukrainë, duke përfshirë dëbimin e paligjshëm të fëmijëve.

Komisionerja ruse për të drejtat e fëmijëve, Maria Lvova-Belova, është gjithashtu subjekt i një urdhër-arresti, raporton BBC.

Sipas Ukrainës, dhjetëra mijëra krime të mundshme lufte janë kryer nga forcat ruse që kur ata pushtuan Ukrainën në muajin shkurt të vitit të kaluar.

Çfarë është një krim lufte?

“Edhe lufta ka rregulla”, thotë Komiteti Ndërkombëtar i Kryqit të Kuq.

Këto janë përcaktuar në traktatet e quajtura “Konventa e Gjenevës”, së bashku me ligje dhe marrëveshje të tjera ndërkombëtare.

Forcat ushtarake nuk mund të sulmojnë qëllimisht civilët-as infrastrukturën që është jetike për mbijetesën e tyre, transmeton Telegrafi.

Disa armë janë të ndaluara për shkak të vuajtjeve që shkaktojnë-të tilla si minat tokësore kundër personelit dhe armët kimike ose biologjike.

Të sëmurët dhe të plagosurit duhet të kujdesen-duke përfshirë ushtarët e plagosur, të cilët kanë të drejta si robër lufte.

Veprat e rënda si vrasja, përdhunimi ose persekutimi masiv i një grupi njihen si “krime kundër njerëzimit” ose në disa rrethana “gjenocid”.

Cilat janë akuzat e fundit kundër presidentit Putin?

Komisioni Hetimor i Kombeve të Bashkuara për Ukrainën ka thënë se ka prova të transferimit të paligjshëm të qindra fëmijëve ukrainas në Rusi.

Rusia ka prezantuar politika të tilla si detyrimi i fëmijëve për të marrë nënshtetësinë ruse dhe vendosja e tyre në familje kujdestare për të “krijuar një kornizë në të cilën disa nga fëmijët mund të përfundojnë përgjithmonë” në Rusi, thekson raporti i komisionit.

Ndërsa transferimet supozohej të ishin të përkohshme, “shumica u zgjatën”, me prindërit dhe fëmijët që përballeshin me “një sërë pengesash në vendosjen e kontaktit”, shkruajnë hetuesit e OKB-së.

Shifrat e qeverisë së Ukrainës thonë se numri i fëmijëve të dërguar me forcë në Rusi është 16,221.

Këto deportime të detyruara “shkelin ligjin ndërkombëtar humanitar dhe përbëjnë krime lufte”, përfundon raporti i OKB-së.

Çfarë krimesh të tjera lufte thuhet se ka kryer Rusia në Ukrainë?

OKB-ja njoftoi se përveç përdhunimeve, vrasjeve dhe torturave “të përhapura”, Moska mund të jetë përgjegjëse për “krimet kundër njerëzimit” edhe më të rënda-veçanërisht valën e sulmeve ruse ndaj infrastrukturës energjetike të Ukrainës që filloi tetorin e kaluar.

Varreza masive janë gjetur në disa pjesë të Ukrainës të pushtuara më parë nga trupat ruse, duke përfshirë disa trupa civilë që kishin shenja torture.

Prill, 2022-më shumë se 400 trupa civilësh u gjetën në Bucha, një qytet në periferi të Kievit.

Shtator, 2022-450 trupa-kryesisht civilë-u gjetën në varreza masive në Izium, në rajonin Kharkiv.

Presidenti Volodymyr Zelensky ka thënë se trupat ruse mund të kishin kryer më shumë se 400 krime lufte në rajonin Kherson ndërsa ishte nën okupimin e tyre nga marsi deri në nëntor të vitit 2022.

Mars, 2022-forcat ruse kryen një sulm ajror në një teatër në Mariupol, i cili përdorej si strehë për fëmijët. Një spital në Mariupol u godit gjithashtu në mars të vitit të kaluar.

Si mund të ndiqen penalisht krimet e luftës?

Gjykatat e Ukrainës tashmë kanë ndjekur penalisht një ushtar rus.

Komandanti 21-vjeçar i tankeve ruse, Vadim Shishimarin u dënua me burgim të përjetshëm pasi qëlloi një civil të paarmatosur, 62-vjeçarin Oleksandr Shelipov, në fshatin veri-lindor të Chupakhivka, disa ditë pas fillimit të pushtimit.

Megjithatë, mund të jetë më e lehtë të ndiqen penalisht ushtarët individualisht për krime lufte sesa komandantët ushtarakë ose politikanë të lartë, transmeton Telegrafi.

Hugh Williamson i Human Rights Watch thotë se krijimi i “zinxhirit të komandës” është shumë i rëndësishëm për çdo gjyq të ardhshëm, duke përfshirë nëse një udhëheqës autorizoi një mizori-apo mbylli një sy ndaj tij.

Gjykata Ndërkombëtare Penale (ICC) po heton krimet e luftës dhe krimet kundër njerëzimit në Ukrainë-që nga viti 2013, para aneksimit të Krimesë nga Rusia nga Ukraina.

Kryeprokurori i saj, avokati britanik Karim Khan, beson se ka një bazë të arsyeshme për të besuar se janë kryer krime të luftës.

Vadim Shishimarin ishte ushtari i parë rus që u gjykua për krime lufte

Megjithatë, ICC nuk ka kompetenca për të arrestuar të dyshuarit dhe Rusia nuk është nënshkruese e marrëveshjes që ngriti gjykatën-kështu që nuk ka gjasa të ekstradojë ndonjë të dyshuar.

ICC në përgjithësi merr përsipër ndjekjet penale për krime lufte në vendet ku sistemet e gjykatave janë shumë të dobëta për të kryer vetë ndjekjet penale.

Megjithatë, deri më tani, duket se gjykatat e Ukrainës kanë qenë në gjendje të ngrenë çështjet e tyre. Deri në fund të gushtit, prokurori i përgjithshëm i saj kishte akuzuar 135 të dyshuar për krime lufte.

Gjykata e Hagës mund të ngrejë aktakuza penale kundër liderëve politikë për “luftë agresive”. Kjo mbulon një pushtim ose konflikt të pajustifikuar që nuk është ndërmarrë në vetëmbrojtje.

Megjithatë, profesori Philippe Sands, një ekspert për të drejtën ndërkombëtare në University College London, thotë se ICC nuk mund të ndiqte penalisht liderët rusë si presidenti Vladimir Putin për këtë-përsëri, sepse vendi nuk është një nënshkrues i gjykatës.

Në teori, Këshilli i Sigurimit i OKB-së mund t’i kërkojë ICC-së të hetojë këtë vepër. Por Rusia mund të vërë veton ndaj kësaj.

Prof Sands thotë se liderët botërorë duhet të krijojnë një gjykatë të vetme për të ndjekur penalisht krimin e agresionit në Ukrainë. syri.net

Që kur Ukraina u pushtua më shumë se një vit më parë, qeveria e saj vlerëson se mbi 16 mijë fëmijë mendohet se janë transferuar në Rusi ose në zonat e kontrolluara nga shteti rus.

Më herët, hetuesit e Kombeve të Bashkuara thanë se dëbimi i fëmijëve ukrainas përbënte një krim lufte.

Komisioni Hetimor i OKB-së për Ukrainën tha se kishte prova të transferimit të paligjshëm të qindra fëmijëve ukrainas në Rusi.

Raporti i Komisionit është kategorik se Rusia kreu edhe krime të tjera lufte në Ukrainë, raporton bbc.

Ato përfshijnë sulme në spitale, tortura, përdhunime dhe vrasje me dashje.

Rusia ka mohuar në mënyrë të përsëritur kryerjen e mizorive në pushtimin e saj që filloi më 24 shkurt të vitit të kaluar. syri.net

Pentagoni publikoi të enjten pamjet e një avioni rus që hedh karburant mbi një dron mbikëqyrës të Forcave Ajrore të Shteteve të Bashkuara të Amerikës, në hapësirën ajrore ndërkombëtare mbi Detin e Zi. Ky veprim dëmtoi një teh të dronit duke prerë helikën e tij.

Videoja e shkurtër tregon një Su-27 rus që i afrohet pjesës së pasme të dronit amerikan MQ-9 dhe fillon të lëshojë karburant, tha Pentagoni, duke shtuar se “hedhja e karburantit dukej se kishte për qëllim të verbonte instrumentet optike të dronit dhe ta dëbonte atë nga zona”.

Fragmenti i videos i publikuar nga Pentagoni nuk tregon ngjarjet para ose pas konfrontimit të dukshëm të hedhjes së karburantit.

Sekretari i Mbrojtjes Lloyd Austin dhe shefi i Shtabit të Përbashkët, gjenerali Mark Milley kanë folur me homologët e tyre rusë për shkatërrimin e dronit amerikan pas përplasjes.

Thirrjet me ministrin rus të Mbrojtjes Sergei Shoigu dhe shefin e shtabit të përgjithshëm rus, gjeneralin Valery Gerasimov të mërkurën, ishin të parat që nga tetori i vitit 2022.

Teksa përpjekjet për përgjim nuk janë të rralla, incidenti në mes të luftës në Ukrainë ka ngritur shqetësime se mund t’i sjellë Shtetet e Bashkuara dhe Rusinë më afër një konflikti të drejtpërdrejtë.

Fakti që udhëheqësit kryesorë të mbrojtjes dhe ushtarakëve të të dy vendeve po flisnin kaq shpejt pas kësaj ndeshjeje mbi Detin e Zi, nënvizoi seriozitetin e tij.

Ministria ruse e Mbrojtjes në njoftimin për telefonatën me Austin dhe Shoigu, tha se ky i fundit akuzoi SHBA-në për provokimin e incidentit, pasi ka injoruar kufizimet e fluturimit që Kremlini kishte vendosur mbi SHBA-të “për shkak të operacioneve të tyre ushtarake në Ukrainë”.

Rusia fajësoi gjithashtu SHBA-në për “intensifikimin e aktiviteteve të inteligjencës kundër interesave të Federatës Ruse” dhe tha se “Moska do t’i përgjigjet njëlloj të gjitha provokimeve”.

MQ-9, i cili ka një hapje krahësh prej 20 metrash, përfshin një stacion kontrolli tokësor dhe pajisje satelitore. Ai është i aftë të mbajë municione, por gjenerali Pat Ryder, një zëdhënës i Pentagonit, nuk tha nëse droni i hedhur në det ishte i armatosur.

Ai tha se incidenti ndodhi në orën 7:03 të mëngjesit mbi ujërat ndërkombëtare dhe shumë larg Ukrainës, pasi avionët rusë kishin fluturuar në afërsi të dronit për 30 deri në 40 minuta.

Shtetet e Bashkuara nuk e kanë rikuperuar dronin e rrëzuar, thanë Forcat Ajrore të SHBA-së në Evropë, por as Rusia nuk e ka bërë një gjë të tillë, tha Ryder.

Zyrtarët rusë të mërkurën thanë se do të përpiqeshin të shpëtonin fragmente të dronit MQ-9 nga Deti i Zi.

Zyrtarët amerikanë kanë lënë të hapur mundësinë e përpjekjes për të rikuperuar një pjesë të dronit të rrëzuar që kushton 32 milionë dollarë, për të cilin ata thanë se u rrëzua në ujërat që ishin 1,200 deri në 1,500 metra të thella.

Zyrtarë të tjerë amerikanë thanë se SHBA nuk ka anije ushtarake në rajon dhe nuk ka gjasa të rekuperojë mbetjet e dronit. Megjithatë, ata shprehën besimin se nuk do të mbetej asgjë me vlerë ushtarake në dron, edhe nëse Rusia arrin të marrë mbetjet e tij.