Instituti i Studimeve te Krimeve dhe Pasojave te Komunizmit ka bërë publike disa foto të panjohura për publikun, të cilat lidhen me vitin e largët 1945, më Gjyqin ndaj deputetëve të opozitës por edhe të intelektualëve, i cili ishte pikënisja e tmerrit dhe krimeve të komunizmit që do të pasonin 50 vitet e ardhshme. Në foto tregohen të pandehurit, të quajtur armiq të popullit, të cilët ishin elita e SHqipërisë së atyre viteve, duke filluar me arsimtarë, klerikë, intelektualë, mjekë e të tjerë. Mes tyre, edhe durrsakët Shefqet Beja, Beqir Çela, Enver Zazani, Ing.Fejzi Alizoti.

Po kështu, pamjet rrënqethëse tregojnë edhe trupin gjykues, dëshmitarët e rremë apo edhe publik e zgjedhur për të ndjekur seancat vdekjeprurëse.

Fotografitë janë shoqëruar me emrat përkatës të të dënuarve dhe prokurorëve të tyre nga drejtori i Institutit të Studimeve të Krimeve dhe Pasojave të Komunizmit, Agron Tufa.

Me anë të një gjyqi të posaçëm Koçi Xoxe, Hysni Kapo, Bilbil Klosi, Beqir Balluku, Medar Shtylla etj., dënuan “krimet e luftës dhe kriminelët që bashkëpunuan me okupatorin”, duke nisur kështu spastrimet e para të kundërshtarëve të komunizmit, një ngjarje në të cilën u dënuan 17 deputetë dhe përkrahësit e tyre, si edhe 28 pedagogë të pushkatuar gjatë viteve të para të çlirimit. Sipas të dhënave, numri i intelektualëve që janë burgosur në fillimet e sistemit komunist, është 65, një histori e mbushur me tmerr e padrejtësi e cila zgjati 50 vjet.