VOAL

SHBA

Presidenti Trump ndryshon mënyrën e festimit të 4 korrikut

Presidenti biznesmen i Amerikës ka në plan t’i japë një ngjyrim të tij festës së 4 Korrikut, ditës së pavarësisë së Shteteve të Bashkaura, duke paraqitur ushtrinë amerikane dhe duke duke ndryshuar dhe zgjeruar shfaqjen e fishekzjarreve.

Presidenti Donald Trump do të mbajë një fjalim para vendit në shkallët e Memorialit të Lincoln-it në Ditën e Pavarësisë të enjten mbrëma. Në këtë zonë do të krijohet një seksion i veçantë VIP dhe biletat për këto ulëse do të shpërndahen nga Shtëpia e Bardhë.

Më 4 korrik shënohet dita e shpalljes së pavarësisë në vitin 1776 dhe krijimi i Shteteve të Bashkuara si një vend i pavarur. Presidentët në kohët moderne kanë shënuar ditëlindjen e Amerikës duke marrë pjesë në ngjarje të ndryshme, përveç festës kryesore në Sheshin Kombëtar të Uashingtonit.

Festimet e kaluara kanë shmangur politikën

Ndërsa Dita e Pavarësisë shënon një ngjarje të rëndësishme politike në historinë e kombit, festimet tradicionalisht nuk janë fokusuar në ndonjë parti politike ose politikan të veçantë.

Një sondazh i ri tregon se shumica e amerikanëve mbështesin mbajtjen e një fjalimi publik nga presidenti më 4 korrik. Tetëdhjetë e një përqind e republikanëve, 55 për qind e të pavarurve dhe 27 për qind e demokratëve mbështesin planet e Presidentit Trump për të mbajtur fjalim në Uashington.

Megjithatë, duke marrë parasysh fushatën presidenciale të vitit 2020, disa historianë frikësohen se presidenti po injekton politikën partiake në festimet e këtij viti.

“Ai po e kthen këtë festë, e cila duhet të jetë një festë kombëtare, në një festë të tij”, thotë Mary Beth Norton, profesoreshë e historisë historik në Universitetin Cornell dhe autore e librit, “1774: Viti i Revolucionit”, që pritet të dalë në treg së shpejti.

Pjesëmarrja aktive e një presidenti të Shteteve të Bashkuara në festimet e Ditës së Pavarësisë ndryshon karakterin e ngjarjes, thotë Jim Grossman, drejtor ekzekutiv i Shoqatës Historike Amerikane.

“Dhe kjo nuk do të thotë se ndryshimi është gjithmonë i keq, por kjo do të thotë se ajo bëhet një ngjarje më pak demokratike, dhe më shumë partiake. [Katër Korriku] nuk ka të bëjë me një parti të caktuar, ose një person të caktuar. Në disa mënyra, kjo është një festë politike. Është një festë e demokracisë”.

Planet për më shumë fishekzjarre

Planet e Presidentit Trump për Katër Korrikun përfshijnë fishekzjarre shtesë, së pari, nga një zonë mbrapa Memorialit të Lincoln-it, e pasuar nga një shfaqje e dytë fishekzjarresh nga një park rreth tre kilometra më largë.

Parada Tradicionale e Ditës së Pavarësisë Kombëtare dhe koncerti “A Capitol Fourth” në lëndinën perëndimore të ndërtesës së Kongresit (Kapitolit) do të vazhdojnë si zakonisht.

Sheshi Kombëtar, një zonë me bar që shtrihet në një hapësirë prej tre kilometrash mes Memoriali të Lincoln-it dhe ndërtesës së Kongresit amerikan, është i mbushur me një mori memorialësh që nderojnë historinë e Amerikës dhe është e rrethuar nga muzetë kombëtare Smithsonian.

“Nuk ka vend më të përshtatshëm për të kremtuar përvjetorin e pavarësisë amerikane, sesa mes monumenteve të Kombit në Sheshin Kombëtar dhe përmendoret për nder të burrave dhe grave që kanë mbrojtur Shtetet e Bashkuara në 243 vitet e fundit”, tha Sekretari i Brendshëm David Bernhardt , i cili ndihmoi në planifikimin e ngjarjes.

“Për herë të parë në shumë vite, Memoriali i Luftës së Dytë Botërore dhe zonat rreth pishinës reflektuese do të jenë të hapura për publikun që të shijojë një shfaqje mahnitëse të fishekzjarreve dhe një fjalim nga Presidenti i tyre.”

Pritet të ketë protesta

Disa grupe kanë aplikuar dhe kanë marrë leje për të protestuar gjatë festimeve të këtij viti. Megjithatë, Anita McBride nga Qendra për Studime të Kongresit dhe Presidencës në Universitetin Amerikan, nuk sheh asnjë shkak për alarm.

“Nuk jam kundër çdo presidenti që ndryshon vendndodhjen apo programin për festimet e 4 korrikut”, tha McBride për Zërin e Amerikës përmes email-it. “Ka gjëra shumë të rëndësishme që kanë nevojë për më shumë vëmendje sesa ndryshimi i vendndodhjes dhe programit për festimet”.

McBride, e cila ka punuar në Shtëpinë e Bardhë gjatë administratës së Presidentit Reagan dhe në të dy administratat e Presidentëve Bush, thotë se është e natyrshme që të ketë ndjenja të forta për çdo president.

“Ndjenjat e larta partiake kanë ekzistuar para Presdentit Donald Trump, por nuk ka dyshim se ato janë përkeqësuar gjatë administratës së tij,” thotë McBride. “Nuk është vetëm ai përgjegjës për këtë. Megjithatë, nëse njohim vendin tonë për atë që është, plotë personalitete, qëndrime dhe opinione të ndryshme, atëherë nuk duhet të lejojmë dallimet të pakësojnë atë që përfaqëson festa”.

Nderimi i Forcave të Armatosura

Presidentit do të nderojë forcat e armatosura të Shteteve të Bashkuara përmes muzikës, shfaqjeve ushtarake dhe fluturimeve të avionëve ushtarakë.

“Katër korriku duhet të jetë në lidhje me nderimin e dokumenteve themeluese”, thotë Grossman. “Katër korriku nuk është një festë ushtarake, por një festë politike që nderon demokracinë. Është nderimi i krijimit të një kombi, dhe nuk meriton të militarizohet.”

“Nuk ka qenë dhe nuk duhet të jetë një festë për forcat e armatosura,” thotë Norton. “Kemi ditë të tjera për të nderuar forcat e armatosura. Kemi Ditën e Përkujtimit të të Rënëve, Ditën e Veteranëve, Ditën e Forcave të Armatosura. Njerëzit që festojnë Katër Korrikun janë kryesisht civilë dhe gjithnjë ka qenë kryesisht një festë civile dhe mendoj se duhet të mbetet kështu.”

Presidenti Trump i ndikuar nga festimi për Ditën e Bastijës

Presidentit Trump i lanë përshtypje të mira paradat ushtarake pasi mori pjesë në festimet për nder të Ditës së Bastijës në Paris në vitin 2017. Një plan për një paradë ushtarake për Ditën e Veteranëve në Pensilvani u anulua për shkak të kostos që vlerësohej se mund të arrinte deri në 92 milionë dollarë.

Fjalimi i Presidentit Trump mund ta zhvendosë fokusin e festës tek kreu i përkohshëm i vendit, në vend të qytetarëve të tij dhe Deklaratës së Pavarësisë, e cila i bashkon të gjithë.

“Katër Korriku më patriotik është ai që feston popullin amerikan dhe rëndësinë e dokumenteve themeluese që kanë krijuar themelin për legjitimitetin e institucioneve tona politike”, thotë Grossman.

Ende nuk është e qartë se sa do t’i kushtojnë festimet e zgjeruara qytetit të Uashingtonit dhe qeverisë federale. Zyrtarët e qytetit thonë se administrata e Presidentit Trump ende nuk ka paguar 7 milionë dollarë për shpenzimet në lidhje me ceremoninë e inaugurimit të vitit 2017.

Presidenti Trump dhe Kim Jong Un takohen në zonën e çmilitarizuar

Donald Trump u bë presidenti i parë amerikan në detyrë, që vizitoi Korenë e Veriut, duke kaluar kufirin gjatë një takimi me udhëheqësin e Koresë së Veriut, Kim Jong Un, në zonën e çmilitarizuar.

Pash shtrëngimit të duarve në fshatin kufitar Panmunjom, presidenti Trump kaloi vijën ndarës ë të kufirit ndërmjet të dy Koreve. Kimi më pas kaloi kufirin në Korenë e Jugut.

“Më vjen mirë që ju shoh sërish”, i tha ai presidentit Trump. “Nuk e kam pritur kurrë t’ju takoj në këtë vend”.

“Ishte nder i madh ta kaloj atë vijë”, tha presidenti Trump, i cili e ftoi udhëheqësin Kim në Shtetet e Bashkuara për një takim tjetër zyrtar.

Presidenti Trump tha të shtunën se takimi do të zgjasë vetëm dy minuta. Megjithatë, bashkëbisedimi zgjati me shumë dhe të dy udhëheqësit u futën në një ndërtesë aty parë për të biseduar më tej.

Për shumëkënd, shtrëngimi i duarve në zonën e çmilitarizuar mund të shënojë ripërtëritjen e bisedimeve të bllokuara bërthamore, por shumë analistë tërheqin vërejtjen se takimi është thjeshtë një fotografi dhe legjitimim i mëtejshëm i udhëheqësit të Koresë së Veriut, Kim Jong Un.

Në ambasadën e Kosovës në Uashington nderohet presidenti amerikan Woodrow Wilson

Një delegacion shqiptarësh po viziton Shtetet e Bashkuara për të shprehur mirënjohjen e tyre për ndihmën amerikane, me rastin e 100 vjetorit të Traktatit të Versajës, që njihet edhe si traktati i paqes. Nderim i veçantë iu bë presidentit amerikan,Woodrow Wilson, në një ekspozitë me fotografi e dokumente arkivore në Ambasadën e Kosovës në Uashington. Aty u kujtua roli i presidentit Wilson në krijimin e shtetit të Shqipërisë dhe rrugëtimin e Kosovës drejt pavarësisë. Aktivitete si këto rikonfirmojnë raportin e veçantë mes shqiptarëve dhe amerikanëve, raport ky që i ka rrënjët qysh nga koha e presidentit Wilson. Kolegu Burim Goxhuli ka përgatitur materialin.

Presidenti i 28 i Shteteve të Bashkuara, Woodrow Wilson, gëzon një vend të veçantë në historinë shqiptare.

Ai vuri themelet e para të miqësisë shqiptaro-amerikane, raport ky që ruhet edhe sot.

Kontributi i presidentit Wilson u nderua në një ekspozitë në ambasadën e Kosovës në Uashington, me rastin e 100 vjetorit të traktatit të Versajës, organizuar nga Instituti i Trashëgimisë Shpirtërore dhe Kulturore Shqiptare në Shkup, Instituti për Studime Shqiptaro-Protestante dhe qeveria e Kosovës.

Historiani Skënder Asani, tregoi arsyen pse figura e presidentit Wilson zë vend kaq të rëndësishëm në historinë shqiptare.

“Presidenti Wilson gjatë fushatës zgjedhore angazhohej për paqe dhe jo për luftë dhe ai ishte i detyruar që në fund të mandatit të tij të kyçet në luftën e parë botërore dhe pikerisht nga tmerri që pësuan me dhjetra milionë njerëz gjatë luftës së parë botërore, ai konceptoi kërkesat të cilat do të jenë edhe një proces i cili do tu mundësoj popujve të vegjël të kenë shtetin e tyre kombëtarë dhe të ecin në rrugën që janë shtetet tjera”.

Asani thotë se në Traktatin e Versajës egzistonin dy koncepte ai i presidentit Wilson dhe ai i shteteve që fituan Luftën e Parë Botërore, të cilat dëshironin të merrnin gjithçka.

Ishin pikërisht kërkesat e presidentit Wilson që rikonfirmuan krijimin e shtetit shqiptar.

“Kjo miqësi ka rrënjë, ka një arsye dhe nuk e dija si amerikan kur shkova në Shqipëri për herë të parë, nuk e dija historinë e Wilsonit dhe marrëdhënien e tij me çështjen shqiptare. Por pastaj kur zbulova dhe tani po zbuloj çdo ditë e më tepër çfarë ka bërë, atëherë e kuptoj që ishte Wilsoni që ka themeluar në menyrë zyrtare këtë miqësi që qëndron tani e 100 vjet më pas. Madje shohim që shqiptarët i japin emrin Wilson djemve të tyre, ka nje arsye dhe është pikërisht puna e Wilson-it në konferencën e paqes.” thotë David Hosaflook, me Institutin për Studime Shqiptaro-Protestante.

Këshilltari i kryeministrit të Kosovës, Jahja Lluka, thotë se shqiptarët do të vazhdojnë të nderojnë dhe ndjekin këtë rrugë.

“Besoj që ne duhet mos i harrojmë të gjitha të mirat e miqve tanë, në rend të parë Shteteve të Bashkuara të Amerikës. Arsya është shumë e thjeshtë, pa përkrahjen e Shteteve të Bashkuara të Amerikës, me siguri që shteti shqiptar kishte me qenë i mangët e mos të flas që Kosova do të përjetonte tragjedi të shumta, për shkak të gjenocidit të hapur të Serbisë ndaj shqiptarëve.”

Nëse Presidenti Wilson do të shihte sot Kosovën e Shqipërinë, do të ishte krenar thotë avokati amerikan që vizitoi ekspozitën, Robert Higdon.

“Nëse do të arrinim t’ia shpjegojmë presidentit Wilson natyrën e marrëdhenieve dhe punës që po bëjmë sot, mendoj se do të ishte shumë krenar sepse parimet për të cilat ai luftoi janë ato që po i jetojme”, thotë Robert Higdon, me profesion avokat.

Veç ekspozitës, delegacioni shqiptar vizitoi edhe muzeun e Wilsonit në Virxhinia.

Kjo vizitë ndryshe u quajt edhe kthimi i shqiptarëve në SHBA për të shprehur mirënjohjen e tyre për presidentin Wilson dhe Shtetet e Bashkuara, për ndihmën e vazhdueshme.

Vdes Luis Alvarez, detektiv i policisë së Nju Jorkut gjatë 11 shtatorit 2001

Një drejtues i betejës për përfitime shëndetësore të personelit të emergjencës, i cili u përgjigj në sulmet terroriste të 11 shtatorit 2001 në Shtetet e Bashkuara vdiq sot pas një sëmundje të kancerit.

Detektivi i policisë së qytetit të Nju Jorkut, Luis Alvarez vdiq nga kanceri i zorrës së trashë të shtunën, njoftoi familja e tij në një postim në Facebook.

53-vjeçari Alvarez u paraqit përkrah komedianit amerikan dhe aktivistit politik Jon Stewart përpara një nënkomisioni të drejtësisë në Dhomën e Përfaqësuesve më 11 qershor për të apeluar për një zgjatje të Fondit të Kompensimit të Viktimave të 11 Shtatorit.

Në një gjendje të brishtë Alvarez i tha panelit: “Ky fond nuk është një biletë për në parajsë, është që t’i sigurojmë familjet tona me kujdes shëndetësor”. Ai vazhdoi duke thënë: “Të gjithë ju thatë se nuk do ta haronit kurrë. Epo, unë jam këtu për t’u siguruar që nuk e keni harruar”.

Alvarez u diagnostikua me kancer në vitin 2016. Sëmundja e tij u zhvillua në tre muajt që ai kaloi në kërkim të të mbijetuarve në rrënojat toksike të kullave binjake të Qendrës Botërore të Tregtisë që u shkatërruan nga sulmet terroriste.

Ai u shtrua në një spital në Long Island të Nju Jorkut brenda pak ditësh nga dëshmia e tij në Kongres.

Legjislacioni për të rifinancuar fondin e kompensimit prej 7.3 miliardë dollarësh që siguron përfitime shëndetësore për oficerët e policisë, zjarrfikësit dhe personelin e tjerë të emergjencës u miratua në mënyrë unanime në Kongres.

Qeveria federale e krijoi fondin në vitin 2011 për të kompensuar punonjësit e emergjencave dhe familjet e tyre për vdekje dhe sëmundje që lidhen me ekspozimin ndaj lëndëve toksike.

Presidenti Trump emëron zonjën Yuri Kim si ambasadore në Shqipëri

Presidenti Donald Trump njoftoi synimin për të emëruar zonjën Yuri Kim nga Guami si ambasadore e jashtëzakonshme dhe fuqiplotë e SHBA në Shqipëri, tha Shtëpia e Bardhë në faqen e saj zyrtare.

Zonja Kim është anëtare në stafin e lartë të Shërbimit të Huaj dhe ka shërbyer në Departamentin e Shtetit si Drejtore e Zyrës së Çështjeve të Evropës Jugore.

Më herët, ajo ka qenë drejtoreshë e Qendrës së Departamentit të Shtetit për Studimin e Diplomacisë, Shefe e Stafit për Zëvendëssekretarin e Shtetit dhe Drejtore e Zyrës për Sigurinë Evropiane dhe Çështjeve Politiko-Ushtarake.

Ajo ka qenë gjithashtu Asistente Speciale e Ndihmës Sekretarit të Shtetit për Çështjet e Azisë Lindore dhe Paqësorit dhe anëtare e delegacionit të Shteteve të Bashkuara në bisedimet gjashtëpalëshe për t’i dhënë fund programit bërthamor të Koresë së Veriut.

Zonja Kim ka shërbyer si Këshilltare Politike në Ambasadën e Shteteve të Bashkuara në Bagdad dhe Ankara.

Ajo mban gradën B.A. nga Universiteti i Pensilvanisë dhe Master of Philosophy nga Universiteti i Kembrixhit. Ajo flet gjuhët koreane, kineze, japoneze dhe turke.

Të emëruarit në postet ambasadoriale duhet të konfirmohen nga Senati.

Dizajneri i iPhone-it largohet nga kompania Apple

Logoja e kompanisë Apple.

Britaniku, Jony Ive, që për më shumë se dy dekada i ka ndihmuar kompanisë Apple të kthehet në emrat më të vlefshëm në botë, ka njoftuar se do të pushojë aktivitetin e tij.

Ai ka dizajnuar pajisjet, iMac, iPod dhe iPhone, mirëpo tani do kontribuojë në kompaninë e tij kreative, LoveFrom.

“Tani më duket se është koha ideale për ta bërë këtë ndryshim”, ka thënë ai.

Shefi i kompanisë, Apple, Tim Cook, ka thënë se roli rigjallërues i Ive “nuk mund të ekzagjerohet”.

Largimi i tij vjen në kohën e ndryshimeve të mëdha që po ndodhin në gjigantin teknologjik.

Shefja e shitjeve, Angela Ahrendts, është larguar po ashtu në muajin prill dhe investitorët janë të shqetësuar për numrin në rënie të shitjeve.

Presidenti Trump “shaka” me presidentin Putin: Mos u përzieni në zgjedhje

Presidenti amerikan, Donald Trump, i tha të premten presidentit rus, Vladimir Putin, të mos përzihet në zgjedhjet amerikane, një shaka në dritën e skandalit që çoi në hetimet gati dyvjeçare të kontakteve të fushatës së tij me Kremlinin gjatë zgjedhjeve të vitit 2016.

I pyetur nga gazetarët nëse do ta shtrojë këtë çështje gjatë takimit me presidentin Putin, presidenti Trump tha “natyrisht që po”.

Presidenti Trump me pas ju drejtua presidentit rus dy herë duke e treguar me gisht dhe duke i thënë “mos u përziej në zgjedhje”. Presidenti rus, vazhdoi të buzëqeshë derisa po ndiqte përkthimin.

Të dy presidentët vazhduan bisedimet në margjinat e takimit të Grupit 20-të që po mbahet në Osaka të Japonisë, takimi i tyre i parë kokë më kokë që nga takimi kundërthënës i Helsinkit në qershorin e vitit të kaluar.

Marrëdhëniet ndërmjet dy vendeve ishin të këqija për disa vite dhe u përkeqësuan pasi Rusia aneksoi Krimenë nga Ukraina në vitin 2014 dhe mbështeti presidentin sirian Bashar al-Assad në luftën e Sirisë. Në një intervistë të kohëve të fundit, presidenti Putin tha se marrëdhëniet ndërmjet Moskës dhe Washingtonit po bëhen “gjithnjë e më të këqija”.

Nga ana e tij, presidenti Trump ka kërkuar marrëdhënie më të mira me presidentin Putin për të trajtuar një mori çështjesh, duke përfshirë synimin e tij për të frenuar ambiciet bërthamore të Koresë së Veriut. Të premten, ai theksoi aspektet pozitive.

“Është nder i madh të jem me presidentin Putin”, u tha ai gazetarëve. “Ne kemi shumë gjëra për të diskutuar, përfshirë tregtinë dhe çarmatimet”.

Ata duhej të takoheshin në fund të nëntorit në takimin G20-tës në Buenos Aires, por presidenti Trump anuloi takimin për shkak të kapjes së anijeve dhe marinarëve ukrainas nga forcat ruse. Të dy presidentët zhvilluan takime jozyrtare në atë takim si dhe në një drekë në Paris më herët gjatë nëntorit, derisa po shënohej përvjetori i përfundimit të Luftës së Parë Botërore.

Rusia ndodhet nën sanksione ndëshkuese të Shteteve të Bashkuara dhe Bashkimit Evropian dhe kërkon heqjen e tyre.

Kritikët e presidentit Trump e kanë akuzuar atë se është shumë miqësor me presidentin Putin dhe e kanë sulmuar atë për dështimin që ta përballë publikisht udhëheqësin rus në Helsinki lidhur me përzierjen ruse në zgjedhjet presidenciale amerikanë të vitit 2016. za

*Mbështetur në agjencinë e lajmeve Reuters

Engel thirrje për qetësi: Krizat e përsëritura rreth zgjedhjeve e minojnë ecjen e Shqipërisë përpara

Kongresmeni amerikan Eliot Engel, Kryetar i Komisionit të Jashtëm të Dhomës së Përfaqësuesve, u bëri thirrje të gjitha palëve “të qëndrojnë larg konfrontimit, të tregojnë përmbajtje maksimale dhe të ndalojnë të gjitha aktet e dhunës.”

Në një deklaratë, zoti Engel shprehu shqetësim për gjendjen e tensionuar në Shqipëri, ku siç tha ai, udhëheqësit politikë duket se kanë arritur një “rrugë pa krye”.

“Kjo mosmarrëveshje, thotë ai, mund të zgjidhet vetëm me dialog dhe në bazë të sundimit të ligjit.”

“Shqipëria, – thuhet në deklaratë, – është anëtare e NATO-s dhe meriton një të ardhme evropiane, por krizat e përsëritura rreth zgjedhjeve e minojnë ecjen e saj përpara.” za

San Francisko ndalon shitjet e cigareve elektronike

San Francisco

San Francisco u bë qyteti i parë i SHBA-së që ndalon shitjen e cigareve elektronike, deri sa nuk sqarohet efekti i saj ndaj shëndetit të njeriut.

Sipas BBC, zyrtarët në San Francisko votuan për ndalimin e shitjes së duhanit me avull në shitore, por edhe shpërndarjen e aparateve që shiten përmes internetit.

Pikërisht në qytetin e Kalifornisë ndodhet selia e “Juula Labs”, prodhuesit më të njohur të e-cigareve në SHBA.

Kompania thotë se për shkak të një vendimi të tillë shumë duhanpirës do t’u kthehen cigareve dhe të krijojnë “treg të zi”.

Kryebashkiakja e San Franciskos, London Breen ka 10 ditë afat për të nënshkruar ligjin, të cilin ka paralajmëruar se do ta nënshkruaj. Ligji do të hyjë në fuqi pas shtatë muajsh.

Aktivistët që janë kundër përdorimit të e-cigareve thonë se prodhuesit si target kanë të rinjtë të cilëve u ofrojnë shije të ndryshme dhe se mund t’i shtyjnë të kalojnë në cigare të vërteta.

Sipas të dhënave të Qendrës Amerikane për Kontrollin dhe Parandalimin e Sëmundjeve, vitin e kaluar numri i adoleshentëve që pranuan se përdorin produkte të nikotinës është rritur për 36 për qind, që lidhet me rritjen e cigareve elektronike. aa

Veterani i parë i gjallë nga lufta e Irakut e fiton medaljen e nderit për trimëri

Veterani i parë i gjallë nga lufta e Irakut fiton medaljen e nderit për trimëri në Falluxha

Medalja e nderit është çmimi më i lartë ushtarak në Shtetet e Bashkuara, për kurajo në betejë. Shumë pjesëtarë të ushtrisë amerikanë që humbën jetën në luftën e Irakut u nderuan me kë çmim. Të martën, për të parën herë, Presidenti Turmp ndau medaljen e nderit për një veteran të gjallë të konfliktit të Irakut. Ishte 10 nëntori i vitit 2004, kur rreshter David Bellvia, në atë kohë 29 vjeçar, rrezikoi jetën e tij për të shpëtuar shokët në një shtëpi të braktisur në zemër të Falluxhas.

Janë pamje nga beteja e dytë në Falluxha, njëra nga betejat më të përgjakshme të luftës së Irakut. Toga e rreshterit Bellavia kishte gjurmuar disa armiq në 12 shtëpi të barktisura.

“Kur e bën planin në letër, duket i mirë. Por pastaj ndodhin gjëra dhe bëhet kaos.”

Një pritë e armiqve në shtëpinë e dhjetë, e bllokoi skuadrën brenda.

“Kisha ngecur në një mënyrë që nuk arrija të lëvizja, unë bashkë me disa tjerë.”

Rreshteri Bellavia doli para zjarrit, për të mbrojtur shokët dhe atë që mbante kamerën, gazetarin Michael Ware.

“Kam parë qindra heronj amerikanë në uniformë duke treguar trimëri të pabesueshme, duke rrezikuar jetët për gjëra të jashtëzakonshme. Por David ishte i dalluar.”

Jo vetëm për rrezikimin e jetës së tij.

“E dinim se dikush duhej të kthehej pas. Dhe unë e kam parë David-in kur vendosi që të shkonte ai.”

“Dhe pastaj ai u kthye në atë shtëpi të errët të vdekjes. Mund të dëgjoni tmerrin.”

“Nuk e dija ku ndodheshin ata, ishte shumë errët. Nuk mund të dëgjosh. Shqisa e vetme që funksiononte është ajo e besimit.”

Teksa ngjiste shkallët dhe luftonte, rreshteri Bellavie vërejti diçka të tmnerrshme.

“Ai kishte një raketë, që donte ta shpërthente. Të gjithë do të vdisnim”

Ai ia doli ta mposhtë atë dhe katër luftëtarë tjerë, njërin nga ta në një përballje dorë më dorë në një dhomë plot eksploziv.

Pas 15 vitesh, rreshterit Bellavie iu dha çmimi më i lartë ushtarak për trimëri në komb.

“Unë po nderohem për këtë. Por unë kam shërbyer me shokë që çdo ditë rrezikuan jetët e tyre duke më shpëtuar timen. Kështuqë ishte radha ime.”

Tani, me medaljen e nderit, është radha e atdheut për të thënë faleminderit.

Robert Mueller do të dëshmojë hapur në Kongres

Prokurori i posaçëm, Robert Mueller, është pajtuar të dëshmojë hapur para Komisionit Juridik dhe atij të zbulimit në Dhomën e Përfaqësuesve muajin e ardhshëm.

Kryetarët e të dy komisioneve, Jerrold Nadler dhe Adam Schiff, njoftuan përmes një letre të martën vonë, se prokurori Mueller do të paraqitet me 17 korrik dhe se ata dhe të gjithë amerikanët mezi po presin të dëgjojnë prej tij.

Robert Mueller udhëhoqi një hetim pothuajse dy vjeçar mbi ndërhyrjen e Rusisë në zgjedhjet e vitit 2016 dhe pretendimet se presidenti, Donald Trump, pengoi drejtësinë duke u përpjekur të mbyllë hetimin.

Ai publikoi një raport, një version i redaktuar i të cilit u bë publik në muajin prill, që përfundoi se fushata e presidentit Trump nuk kishte bashkëpunuar me Rusinë gjatë zgjedhjeve, por nuk arriti të sillte një përfundim në lidhje me pengimin e drejtësisë.

Presidenti Trump ishte shume kritik ndaj procesit, duke i cilësuar hetimet vazhdimisht si “ndjekje shtrigash”. Ai reagoi shkurt pas njoftimit të së martës në rrjetin twiiter duke shkruar “keqtrajtim i presidentit”.

Komentet e vetme të prokurorit Mueller deri tash u bënë në një konferencë me gazetarë në muajin maj, gjatë së cilës ai lexoi një deklaratë të përgatitur që më parë dhe nuk pranoi asnjë pyetje.

Ligjvënësit Nadler dhe Schiff kishin lëshuar fletëthirrje që kërkonin detyrimin e prokurorit Mueller që të dëshmojë, duke shpjeguar se ndërsa ata vënë në dukje dëshirën e prokurorit të posaçëm që është i mjaftueshëm raporti i tij me shkrim, publiku meriton të dëgjojë drejtpërdrejt jo vetëm për përfundimet e tij, por edhe për vet hetimet.

“Amerikanët kanë kërkuar të dëgjojnë drejtpërdrejt nga prokurori i posaçëm, në mënyrë që të mund të kuptojnë atë që ai dhe ekipi i tij hetuan, zbuluan dhe vendosën rreth sulmit të Rusisë në demokracinë tonë, pranimin dhe përdorimin e kësaj ndihme nga ana e presidentit Trump dhe pengimin e hetimit të sulmit nga presidentit Trump dhe bashkëpunëtorët e tij”, shkruan në letrën e tyre ligjvënësit Nadler dhe Schiff.

Demokratët kanë kërkuar jo vetëm publikimin e më shumë informacioneve nga raporti i zotit Mueller, por kanë vazhduar të kërkojnë dëshmi nga Shtëpia e Bardhë dhe zyrtarët e fushatës së presidentit Trump, për të mësuar më shumë rreth asaj që ka ndodhur gjatë zgjedhjeve dhe në pjesën e parë të mandatit të presidentit. Republikanët i kanë kritikuar hetimet duke theksuar se Kongresi duhet të ecë përpara.

Ligjvënësi, Doug Collins, përfaqësuesi kryesor në Komisionin Juridik, tha se shpreson që paraqitja e prokurorit Mueller “do t’i jap fund lojës politike të demokratëve të këtij komisioni në kurriz të taksapaguesve”.

Kryetarja e Dhomës së Përfaqësuesve, Nancy Pelosi, mirëpriti gatishmërinë e zotit Mueller për të dëshmuar, duke vënë theksin tek shqetësimet për zgjedhjet e ardhshme dhe duke nënvizuar se “është detyrë patriotike e ligjvënësve që të ndjekin faktet, në mënyrë që të mbrojmë demokracinë tonë”.

“Raporti i zoti Mueller zbuloi se rusët zhvilluan një sulm ‘gjithëpërfshirës dhe sistematik’ ndaj zgjedhjeve tona dhe zyrtarët më të lartë amerikanë të zbulimit dhe të zbatimit të ligjit kanë paralajmëruar se rusët do të sulmojnë përsëri zgjedhjet tona,” tha ajo në një deklaratë. “Megjithatë, fatkeqësisht presidenti e quan atë një rreng dhe sugjeron se ai do të mirëpriste ndërhyrjen ruse përsëri.”

Nipi Zach Gershman: Norman ra në dashuri me Shqipërinë dhe “Besën” shqiptare

es, nipi i producentit dhe fotografit të famshëm amerikano-hebre, Norman Gershman, autor i dokumentarit “BESA – THE PROMISE”, tha për gazetën online “Izraeli Sot”, se gjyshi i tij “ra në dashuri më Shqipërinë dhe shqiptarët”, qysh në momentin e parë ku ai dëgjoi për historitë e pabesueshme të shpëtimit të hebrenjve gjatë Holokaustit.

Zach Gershman, nipi i producentit dhe fotografit të famshëm amerikano-hebre, Norman Gershman, autor i dokumentarit “BESA – THE PROMISE”, tha për gazetën online “Izraeli Sot”, se gjyshi i tij “ra në dashuri më Shqipërinë dhe shqiptarët”, qysh në momentin e parë ku ai dëgjoi për historitë e pabesueshme të shpëtimit të hebrenjve gjatë Holokaustit. Norman Gershman ndërroi jetë më 10 qershor.

“Puna e Norman në Shqipëri përcakton trashëgiminë e tij. Ai me të vërtetë besonte se njerëzimi ynë, të gjithë ne, do të triumfonim mbi fanatizmin dhe urrejtjen. “Besa” ilustron këtë besim. “Njerëzit e Drejtë” (titull që jepet nga Yad Vashem) që ai ka fotografuar në Shqipëri, dhe historitë e tyre, jetojnë tek ekspozita ‘Norman’ dhe në zemrat tona”, tha Zach për “Izraeli Sot” në një komunikim nga Shtetet e Bashkuara.

Norman Gershman është autor i dokumentarit “BESA – THE PROMISE”, përmes të cilit bota njohu kontributin e madh të shqiptarëve për shpëtimin e hebrenjve gjatë Holokaustit.

Norman Gershman kishte vizituar Muzeun e Holokaustit në Uashington dhe kishte vënë re një hapësirë të vogël të bardhë në hartën e Evropës, ku dukej se hebrenjtë nuk ishin persekutuar.

I magjepsur nga kjo histori, Gershman erdhi në Tiranë për të dokumentuar historinë e patreguar të burrave dhe grave që kishin shpëtuar jetët e pothuajse 2,000 hebrenjve të cilët kishin mbërritur në Shqipëri gjatë luftës për t’i shpëtuar persekutimit.

“Norman me të vërtetë e ndryshoi botën. Jeta dhe puna e tij preku mijëra, dhe madje edhe në miratimin e tij, unë ende po zbuloj ndikimin që kishte. Ai gjithmonë e pa të mirën në gjithçka dhe kërkoi të ndriçonte atë mirësi të lindur përmes fotografisë së tij. Ai bëri shenjën e tij në botë, në miqtë dhe familjen e tij, dhe në nipin e tij më të madh. Ne do ta ndjejmë mungesën e tij”, theksoi Zach Norman.

Norman Gershman erdhi në Shqipëri dhe u ndihmua maksimalisht nga kryetari i Shoqatës së Miqësisë Shqipëri-Izrael, Prof.Dr. Pertit Zorba dhe ish-Konsulli i Nderit të Izraelit në Shqipëri (në atë kohë), Dr. Bardhyl Canaj, aktualisht Ambasador i Shqipërisë në Izrael.

SHBA, shpërthimi i fruthit, situata më e keqe prej rreth 30 vitesh

Javën e kaluar u njoftuan tridhjetë e tre raste të reja të fruthit duke shënuar një total prej 1,077 rastesh aktive brenda Shteteve të Bashkuara. Autoritetet e shëndetësisë thonë se ky ishte shpërthimi më i keq i infeksionit viral që prej vitit 1992 kur u regjistruan 2,126 raste.

Rreth 30 shtete kanë raportuar raste të prekjes nga fruthi. Në fund të majit distrikti i Rockland-it në Nju Jork shpalli gjendjen e emergjencës për shkak të shpërthimit të fruthit në komunitetin hebre ultra-ortodoks.

Në vitin 2000 autoritet shpallën se fruthi ishte zhdukur brenda SHBA-së, ose katër dekada pasi e kishin vendosur si objektv eleminimin e tij. Një sëmundje konsiderohet se është eliminuar kur kalon një vit i plotë pa transmetime aktive. Nëse deri në tetor 2019, përhapja e sëmundjes nuk do të vendoset nën kontroll, Shtetet e Bashkuara do ta humbasin statusin e vendit ku infesksioni viral rezulton të jetë eliminuar.

“Humbja e këtij statusi do të ishte një goditje e fortë për kombin dhe do të zhbënte punën e madhe në të gjitha nivelet e shëndetit publik“, thuhej në një deklaratë për shtyp të muajit të kaluar të Qendrës për Kontrollin e Sëmundjeve (CDC). “Përpara përdorimit të gjerë të vaksinës së fruthit, çdo vit rreth 3 deri në 4 milionë persona janë prekur nga fruthi në Shtetet e Bashkuara, me rreth 400 deri në 500 raste vdekjesh dhe 48 mijë raste trajtimi spitalor”.

Sipas Qendrës për Kontrollin e Sëmundjeve shumica e rasteve po përhapen nga fëmijët e moshës shkollore të pavaksinuar. Komunitetet me një shkallë të ulët vaksinimi krijojnë shanse që sëmundja të përhapet me lehtësi.

Agjencia e lajmeve “Associated Press” raportoi se udhëtimi drejt vendeve ku rastet e fruthit ndeshen rëndom, veçanërisht në Ukrainë, Izrael e Filipine ka kontribuar gjithashtu në përhapjen e sëmundjes në SHBA.

Presidenti Trump nënshkruan urdhër ekzekutiv për sanksione të reja ndaj Iranit

Presidenti Donald Trump nënshkroi një urdhër ekzekutiv për vendosjen e sanksioneve të reja ndaj Iranit, në përpjekje për të shtuar presionin ndaj ekonomisë iraniane, me synimin që Teherani të ndryshojë sjellje.

Ky veprim vjen ndërsa po shtohen shqetësimet rreth mundësisë së një konfrontimi të armatosur mes të dy vendeve, pasi zyrtarët amerikanë kohët e fundit fajësuan Teheranin për sulmet ndaj dy cisternave me naftë në ngushticën e Hormuzit. Irani i mohon këto akuza, ashtu sikurse edhe rrëzimin nga Irani të një droni amerikan javën e kaluar.

Presidenti Trump tha të enjten se e kishte anuluar një sulm hakmarrës kundër disa objektivave iraniane. Por të enjten, sipas njoftimit të mediave amerikane, zoti Trump miratoi gjithashtu sulmet e Komandës amerikane të Kibernetikës ndaj sistemeve kompjuterike të një grupi iranian të zbulimit, që përdoreshin për të kontrolluar hedhjen e raketave.

Sekretari i Shtetit Mike Pompeo i quajti masat e reja ndaj Iranit “të rëndësishme”, por nuk pranoi të jepte detaje specifike për gazetarët, para njoftimit zyrtar të sanksioneve.

Ai i bëri këto komente para se të fillonte një udhëtim në Arabinë Saudite dhe Emiratet e Bashkuara Arabe, në vijim të përpjekjeve të administratës Trump për të ndërtuar një koalicion aleatësh për t’iu kundërvënë Iranit. Sekretari Pompeo u takua të hënën me Mbretin saudit Salman dhe me princin e kurorës Mohammed bin Salman.

“Bota duhet ta dijë se ne do të vazhdojmë ta bëjmë të qartë se me përpjekjen që kemi ndërmarrë për t’i mohuar Iranit burimet për të ushqyer terrorin, për të ndërtuar sistemin e tyre të armëve bërthamore, për të ndërtuar programin e raketave, ne do t’ia mohojmë burimet që u duhen, duke mbrojtur kështu interesat amerikane dhe të amerikanëve në gjithë botën”, – tha zoti Pompeo.

Irani ka mohuar se po punon për të prodhuar armë bërthamore dhe nënshkroi një marrëveshje në vitin 2015 me Shtetet e Bashkuara, Britaninë, Kinën, Francën, Rusinë dhe Gjermaninë për të zbutur shqetësimet, duke kufizuar aktivitetin bërthamor në këmbim të lehtësimit të sanksioneve.

Por marrëdhëniet SHBA-Iran janë keqësuar gjatë mandatit të Presidentit Donald Trump, veçanërisht që kur mori vendimin vitin e kaluar që të tërhiqej nga marrëveshja bërthamore dhe për vendosjen e sanksioneve të reja.

Megjithëse Presidenti Trump u tërhoq nga kundërpërgjigjia ushtarake, për shkak të rrezikut të numrit të lartë të viktimave që do të kishte shkaktuar, siç tha ai, paralajmërimet ndaj Iranit vazhduan.

Këshilltari i Sigurisë Kombëtare John Bolton tha se përmbajtja amerikane nuk duhet të keqkuptohet si dobësi.

“Askush nuk i ka dhënë Iranit liçencë gjuetie në Lindjen e Mesme. Siç tha Presidenti Trump, ushtria jonë është e rindërtuar, e re dhe absolutisht më e mira në botë”, tha zoti Bolton.

Por ish-shefi i Shtatmadhorisë amerikane, Mike Mullen shprehu shqetësim.

“Shqetësimi im më i madh është se presidentit po i mbarojnë alternativat. Dhe duke pasur parasysh se vazhdon retorika dhe se ishim aq pranë goditjes së Iranit, situata mund të dalë jashtë kontrollit. Lufta me Iranin është gjëja e fundit që na duhet në këtë moment”, – tha ai.

Megjithëse po vendos sanksione, Presidenti Trump thotë se mezi pret që të vijë koha kur ato të hiqen. za

SHBA “ka nisur sulm kibernetik” ndaj Iranit

Mediat në Shtetet e Bashkuara raportojnë se SHBA-ja ka nisur sulm kibernetik ndaj sistemeve kompjuterike të ushtrisë iraniane më 20 qershor, vetëm disa orë pari Irani rrëzoi një dron amerikan.

Washington Post dhe Associated Press, duke cituar zyrtarë të paidentifikuar amerikan, raportuan se ky sulm është kryer me miratimin e presidentit amerikan, Donald Trump.

Megjithatë, zyrtarët e mbrojtjes së SHBA-së refuzuan që të konfirmojnë këto raportime.

Sulmi kibernetik vjen pasi Trump, fillimisht miratoi, pastaj anuloi, sulmet ajrore ndaj disa caqeve brenda Iranit, duke thënë se kundërpërgjigja për dronin e rrëzuar nuk do të ishte “proporcionale” dhe se sulme të tilla do të mund të çonin në humbjen e jetëve të ushtarëve dhe civilëve iranianë.

Trump tha se në vend të sulmeve, SHBA-ja do të vendosë sanksione të rënda ndaj Iranit më 24 qershor, por nuk dha më shumë detaje.

Por presidenti Trump së bashku me Sekretarin amerikan të Shtetit, Mike Pompeo, duket se zbutën gjuhën e ashpër, që kohët e fundit kanë përdorur ndaj Iranit.

Presidenti tha se është i hapur që të arrihet një marrëveshje e shpejtë me Iranin, që sipas tij, do të ndihmonte Republikën Islamike të rimëkëmbej nga kriza shkatërruese ekonomike, që në masë të madhe është shkaktuar nga ndalesat financiare të vendosura nga SHBA-ja.

Nëse Teherani do të hiqte dorë nga armët bërthamore, Trump tha se ai do të bëhej “shoku më i mirë” i Iranit.

Në një deklaratë më 22 qershor, sekretari Pompeo tha se “kur regjimi iranian do të vendosë të heqë dorë nga dhuna dhe t’i përgjigjet diplomacisë sonë me diplomaci, ai (Irani) do të dijë se si të kontaktojë me ne”, u shpreh Pompeo.

“Deri atëherë, diplomacia jonë e izolimit dhe fushata e presionit ekonomik ndaj regjimit do të intensifikohet”, tha sekretari Pompeo.

Washington Post ka raportuar se Trump ka autorizuar Komandën Kibernetike të SHBA-së që të sulmojë kompjuterët ushtarakë iranianë, pasi më 20 qershor, Garda Revolucionare Islamike e Iranit rrëzoi një dron amerikan.

Teherani ka thënë se droni po fluturonte mbi territorin e tij, përderisa Pentagoni thotë se droni ishte mbi ujërat ndërkombëtare në momentin kur është rrëzuar.

Associated Press ka cituar dy zyrtarë amerikanë të kenë thënë se sulmi kibernetik ka pasur për cak sistemin kompjuterik të Gardës së Iranit.

Ndërkaq, Washington Post raporton se sulmi ka shkatërruar mundësinë e kompjuterëve për të kontrolluar raketat dhe lëshimin e tyre.

Washington Post dhe AP thanë se sulmi kibernetik është zhvilluar që disa javë, teksa tensionet ndërmjet Uashingtonit dhe Teheranit janë rritur.

Duke folur sot, një komandant i lartë i Gardës Revolucionare paralajmëroi se çdo konflikt në rajon, mund të shpërndahet në mënyrë të pakontrolluar.

“Nëse konflikti shpërthen në rajon, asnjë vend nuk do të mund ta menaxhoj përmasën e tij apo edhe kohën”, citohet të ketë thënë për agjencinë Fars,Gjeneral-majori, Gholamali Rashid.

Rashid tha se administrata e Trumpit “duhet të sillet në mënyrë të përgjegjshme që të mbrojë jetën e forcave amerikane”.

Ai tha se Irani nuk po kërkon luftë, teksa shtoi se shteti i tij do ta mbrojë veten nga çdo “kërcënim apo agresion”.

SHBA-ja e fajëson Iranin për sulmet ndaj cisternave të naftës në Gjirin Persik dhe Gjirin e Omanit. Irani, në anën tjetër, mohon çdo përfshirje në këto sulme.

Përshkallëzimi i tensioneve ka bërë që shumë kompani të fluturimeve të mos fluturojnë mbi Gjirin e Omanit dhe Ngushticën e Hormuzit.

Kompania shtetërore ajroree Arabisë Saudite është kompania e fundit që ka njoftuar se ka ndryshuar rrugët e fluturimeve me qëllim që të shmangë hapësirën ajrore iraniane, duke thënë se ky vendim vjen për shkaqe të sigurisë.

Vendimi i kompanisë saudite vjen pasi Autoriteti i Aviacionit në SHBA ua ndalojë avionëve të regjistruar në SHBA që të operojnë mbi disa territore në Gjirin Persik dhe Gjirin e Omanit, pas rrëzimit të dronit amerikan.

Përgatiti: Mimoza Sadiku

Trumpi e konfirmon se SHBA ishte gati për goditje ndaj Iranit

Presidenti amerikan Donald Trump tha të premten se kishte hequr dorë nga një goditje ushtarake ndaj Iranit sepse një përgjigje e tillë ndaj rrëzimit të dronit amerikan nga ana e Teheranit do të shkaktonte humbjen e jetës së një numri të madh njerëzish. Media amerikane kishte njoftuar se Presidenti amerikan Donald Trump miratoi goditje ajrore ndaj Iranit të enjten, por më pas u tërhoq nga vendimi për t’i ndërmarrë ato.

Në një sërë postimesh në Twitter, presidenti Trump tha se sanksionet ekonomike ndaj Iranit, po jepnin efekt dhe sanksione të tjera ishin vendosur të enjten vonë, pas shkatërrimit të dronit amerikan nga një raketë iraniane tokë-ajër. Zoti Trump tha se plani kishte qenë për të goditur tre objektiva të ndryshme në përgjigje të rrëzimit të dronit dhe se i kishin thënë se 150 vetë do të kishin humbur jetën si pasojë e tyre dhe për këtë arsye ai ishte tërhequr.

Agjencia e lajmeve Reuters thotë se qeveria iraniane i tha se kishte marrë një mesazh nga Presidenti Trump përmes Omanit, ku ai paralajmëronte për një sulm të pritshëm ndaj Iranit.

Reuters tha se përgjigjia e menjëherëshme e Teheranit ndaj mesazhit të Presidentit Trump ishte një paralajmërim i ashpër lidhur me pasojat “rajonale dhe ndërkombëtare” nëse Shtetet e Bashkuara ndërmerrnin veprime ushtarake.

Por një zyrtar iranian më pas mohoi që Irani të kishte marrë mesazh paralajmërimi.

I dërguari amerikan për Iranin Brian Hook, i cili ishte për vizitë në Arabinë Saudite tha se është e rëndësishme të bëhet gjithçka për të qetësuar gjendjen.

“Diplomacia jonë nuk i jep të drejtën Iranit që të përgjigjet me forcë ushtarake dhe Irani duhet t’i përgjigjet diplomacisë sonë me diplomaci, jo forcë ushtarake”, tha ai.

Por kreu i Divizionit të Hapësirës Ajrore të Gardës Revolucionare iraniane, Amirali Hajizadeh tha se Teherani kishte dërguar dy sinjale paralajmëruese 10 minuta para se të lëshohej raketa.

“Ata që kontrollonin dronin, i dëgjuan paralajmërimet por nuk u kushtuan vëmendje. Duke pasur parasysh se droni kishte shkelur kufijtë tanë, ai u vu në shënjestër nga raketa tokë-ajër e divizionit ajror të Gardës Revolucionare dhe u godit”, tha ai.

Por Uashingtoni këmbëngul se droni ishte mbi ujra ndërkombëtare.

Vendimi amerikan për t’u tërhequr nga goditjet ushtarake ndaj Iranit, duket se shmanj një konflik të mundshëm të armatosur që do të përfshinte pjesën më të madhe të Lindjes së Mesme.

Po ashtu duket se hap një shteg pët dialog mes dy vendeve kundërshtare.

Të enjten në mbrëmje, Administrata Federale e Aviacionit lëshoi një urdhër urgjent përmes së cilit ndalonte të gjitha kompanitë ajrore amerikane që të lejonin avionë të hynin në hapësirën ajrore mbi pjesë të Gjirit Persik dhe atij të Omanit, zona ku u godit droni i Marinës amerikane nga Irani. Edhe disa linja ajrore ndërkombëtare, përfshirë KLM –në holandeze dhe Qantas të Australisë thonë se nuk do të fluturojnë mbi Ngushticën e Hormuzit. za

Media: Presidenti Trump miratoi goditje ajrore ndaj Iranit, por u tërhoq

Zyrtarët e sigurisë kombëtare në Uashington mohuan komentet lidhur me njoftimet e medias se Presidenti amerikan Donald Trump miratoi goditje ajrore ndaj Iranit të enjten, por më pas u tërhoq nga vendimi për t’i ndërmarrë ato për arsye të panjohura.

Fillimisht presidenti Trump autorizoi sulme ndaj një numri objektivash iraniane, si radarë dhe bateri raketash, siç njoftoi së pari gazeta The New York Times.

Më pas, edhe The Washington Post dhe media të tjera njoftuan se zyrtarët e administratës thanë se presidenti i miratoi kundërgoditjet.

Ndërkohë agjencia e lajmeve Reuters thotë se qeveria iraniane i tha se kishte marrë një mesazh nga Presidenti Trump përmes Omanit, ku ai paralajmëronte për një sulm të pritshëm ndaj Iranit.

Reuters tha se përgjigjja e menjëhershme e Teheranit ndaj mesazhit të Presidentit Trump ishte një paralajmërim i ashpër lidhur me pasojat “rajonale dhe ndërkombëtare” nëse Shtetet e Bashkuara ndërmerrnin veprime ushtarake.

Presidenti Trump paralajmëron Iranin

Presidenti Donald Trump dha një paralajmërim për Iranin nëpërmjet mediave sociale, disa orë pasi zyrtarët amerikanë të mbrojtjes konfirmuan se Teherani kishte qëlluar një avion amerikan pa pilot mbi hapësirën ajrore ndërkombëtare.

Iran made a very big mistake!

— Donald J. Trump (@realDonaldTrump) June 20, 2019

“Irani bëri një gabim shumë të madh!” tha presidenti Trump në Twitter të enjten, ndërsa tensionet mes Uashingtonit dhe Iranit vazhdojnë të përshkallëzohen pas sulmeve të dyshuara mbi dy anije çisternë në Ngushticën e Hormuzit javën e kaluar.

Zëdhënësi i Komandës Qendrore Amerikane Bill Urban tha të enjten se një raketë iraniane tokë-ajër goditi një avion pa pilot të mbikqyrjes detare të marinës amerikane në hapësirën ajrore ndërkombëtare mbi Ngushticën e Hormuzit.

Ai e quajti atë një “sulm të paprovokuar mbi një pajisje mbikqyrëse amerikane”, dhe tha se avioni pa pilot është përdorur për misionet e inteligjencës, vëzhgimit dhe zbulimit mbi rajonet oqeanike dhe bregdetare.

Ushtria amerikane tha se Irani u përpoq të rrëzonte një dron amerikan javën e kaluar dhe tensionet mes dy vendeve u rritën me sulmet kundër anijeve çisternë në rajon për të cilat Shtetet e Bashkuara fajësojnë Iranin, por që Irani i mohon.

Marrëdhëniet janë përkeqësuar që kur Presidenti Donald Trump u tërhoq vitin e kaluar nga marrëveshja ndërkombëtare që kufizon programin bërthamor të Iranit në këmbim të lehtësimit të sanksioneve.

Rrëzimi i dronit shënon sulmin e parë të drejtpërdrejtë të Iranit ndaj Shteteve të Bashkuara gjatë kësaj krize.

حسین سلامی جانشین فرمانده کل سپاه پاسداران انقلاب اسلامی

“Ne nuk kemi ndonjë synim për luftë me asnjë vend, por jemi plotësisht të përgatitur për luftë,” tha komandanti i Gardës Revolucionare Hossein Salami në një fjalim në televizion.

Duke folur para një grumbulli njerëzish në qytetin perendimor të Sanandajit, Salami tha se droni amerikan “shkeli sigurinë tonë kombëtare kufitare”.

“Kufijtë janë vija jonë e kuqe,” tha Salami. “Çdo armik që shkel kufijtë do të asgjësohet”.

Sanksionet e reja amerikane kanë dëmtuar ekonominë e Iranit dhe Teherani ka njoftuar rritjen e prodhimit të uraniumit të pasuruar, ndërsa kërkon ndihmë nga vendet evropiane për të shmangur sanksionet amerikane.

Një zyrtar i lartë i Departamentit të Shtetit siguroi dje Kongresin se Shtetet e Bashkuara nuk po kërkojnë luftë me Iranin. Por demokratët në Kongres janë të shqetësuar se tensionet në rritje me Republikën Islamike do t’i japin administratës Trump një justifikim për të hyrë në një konflikt ushtarak. Ata paralajmërojnë se Presidenti Trump duhet të respektojë fuqinë kushtetuese të Kongresit për të shpallur luftë.

I dërguari i posaçëm amerikan për Iranin tha se politika e Presidentit Trump në Iran synon përfundimisht të sjellë Teheranin në tryezën e negociatave.

Brian Hook informoi ligjvënësit në një komision të Dhomës së Përfaqësuesve të mërkurën mes shqetësimeve të disa prej anëtarëve të Kongresit se situata në Lindjen e Mesme mund të përshkallëzohet në konflikt ushtarak.

“Askush nuk duhet të jetë i pasigurt lidhur me dëshirën tonë për paqe apo gatishmërinë tonë për të normalizuar marrëdhëniet, nëse mund të arrijmë një marrëveshje gjithëpërfshirëse”.

Disa në Kongres kanë shprehur shqetësime se dërgimi i trupave amerikane, presionet e sanksioneve dhe retorika e nxehtë mund të tërheqin aksidentalisht Shtetet e Bashkuara në një konfrontim ushtarak me Iranin.

Trumpi premton dëbime masive të emigrantëve të paligjshëm

Presidenti Donald Trump, i cili nisi zyrtarisht fushatën për rizgjedhje, thotë se autoritetet amerikane të emigracionit do të fillojnë deportimin e miliona emigrantëve pa dokumente. Disa analistë pohojnë se kërcënimet e tij nuk janë tjetër përveçse pjesë e retorikës së nxehtë të fushatës, por për miliona njerëz mesazhi i tij është një paralajmërim serioz. Ramon Taylor i Zërit të Amerikës sjell këto hollësi.

Duke nisur zyrtarisht fushatën, Presidenti Trump u bëri jehonë disa temave të njohura:

“Ne besojmë se vendi ynë duhet të jetë vendi i shenjtë për qytetarët që respektojnë ligjin, jo për të huaj kriminalë”, tha ai.

Përpara kësaj, ai publikoi një numër komentesh në Twitter, ku paralajmëronte se autoritetet e emigracionit do të kryejnë dëbime masive, duke filluar nga java e ardhshme. Një operacion i tillë do të kërkonte qindra, apo mijëra agjentë dhe personel ligjzbatues, të cilët qysh tani përballen me një vëllim të madh pune. Analistët thonë se qeverisë i duhen më shumë mjete dhe njerëz.

Jessica Vaughn, është me Qendrën për Studimet e Emigracionit.

“Mendoj se gjëja e parë është se qeveria duhet të ketë kapacitetin, aftësinë dhe burimet për të zbatuar ligjin. Me fjalë të tjera, jepini fund krizës në kufi pastaj sigurohuni që autoritetet të jenë në gjendje të bëjnë punën në brendësi të vendit.”

Momenti kur Presidenti e dha njoftimin ngriti menjëherë pikëpyetje sa i përket qëllimeve të tij. Por kundërshtarët paralajmërojnë se retorika e tij tashmë është provuar se vjen me pasoja.

“Mendoj se nuk mund të lejojmë qeverinë federale të bëjë atë që ajo thotë se do të bëjë. Ne pamë se si ata nuk i ndryshuan planet për ndarjen e familjeve në kufi dhe, siç e dini, sado që kjo rezultoi diçka e tmerrshme, nuk i pengoi ata ta zbatonin. Prandaj duhet të besojmë se ata do të përpiqen ta bëjnë edhe këtë”.

Avokati i emigracionit Matthew Cameron thotë se një operacion masiv deportimi thjesht nuk është i mundur, por nuk ka dyshim se kjo do të ngjallë frikë në komunitetin e emigrantëve pa dokumente.

“Kjo do të thotë që njerëzit nuk do të shkojnë në takimet me mjekun, nuk do të shkojnë të marrin fëmijët nga shkolla, nuk do të shkojnë dot të punojnë, nëse vërtet besojnë se ka mundësi që kjo të ndodhë”.

Në të njëjtën ditë që kërcënoi për deportime masive, Presidenti Trump tha se Shtetet e Bashkuara po përgatiten të nënshkruajnë një marrëveshje me Guatemalën, për të mos lejuar njerëzit nga ky vend i Amerikës Qendrore të largohen për t’i shpëtuar përndjekjeve dhe të vijnë të kërkojnë strehim në SHBA.

Ish drejtorja e komunikimit të Shtëpisë së Bardhë dëshmon në Kongres

Në SHBA, Komisioni Juridik i Dhomës së Përfaqësuesve po zhvillon të mërkurën një seancë dëgjimore me dyer të mbyllura me ish-drejtoren e Komunikimit të Shtëpisë së Bardhë Hope Hicks. Kjo është hera e parë që ligjvënësit marrin në pyetje një person të rrethit të ngushtë të presidentit, që prej publikimit të raportit të Prokurorit të Posaçëm Robert Mueller në muajin prill.

Demokratët e konsiderojnë dëshminë e zonjës Hicks, ish-ndihmëse e ngushtë e Presidentit Donald Trump, një fitore të rëndësishme pasi zoti Trump i ka penguar gjerësisht hetimet e nisura prej tyre.

Komisioni kërkoi fillimisht që dëshmia e zonjës Hicks të ishte publike, por në fund ra dakord për një seancë me dyer të mbyllura. Një transkript i seancës pritet të publikohet në ditët në vazhdim.

Është e paqartë se sa informacion të ri do të ofrojë Hope Hicks. Ajo ka bashkëpunuar gjerësisht me hetimin e zotit Mueller lidhur me ndërhyrjen ruse në zgjedhje. Një avokat i Shtëpisë së Bardhë, i pranishëm gjatë seancës dëgjimore, pritet ta ndalojë atë t’u përgjigjet disa pyetjeve.

Në një letër dërguar të martën kryetarit të komisionit Jerry Nadler, avokati i Shtëpisë së Bardhë Pat Patrick Cipollone shkruante se zoti Trump e kishte udhëzuar zonjën Hicks që të mos i përgjigjej pyetjeve “në lidhje me periudhën e shërbimit të saj si këshilltare e lartë e presidentit”.

Zoti Cipollone tha se zonja Hicks, si një nga ish-këshilltaret e larta të zotit Trump është “absolutisht imune” lidhur me dëshminë për shërbimin e saj ndaj presidentit për shkak të ndarjes së pushteteve mes degëve ekzekutive e legjislative. Shtëpia e Bardhë ka përmendur gjithashtu privilegjin ekzekutiv në lidhje me shumë nga kërkesat e demokratëve, duke përdorur fuqinë e presidentit për të refuzuar dhënien e informacionit për të mbrojtur konfidencialitetin e procesit vendimmarrës të Zyrës Ovale.

Demokratët kanë argumentuar se përgjigjet e zonjës Hicks nuk mbrohen nga imuniteti apo privilegji ekzekutiv, sidomos pas bashkëpunimit të saj me zotin Mueller. Komisioni i ka kërkuar zyrtarisht zonjës Hicks të paraqesë dokumente, por ajo është pajtuar vetëm pjesërisht me këtë kërkesë. za

Ligjvënësja e SHBA i kërkon Facebook-ut të ndalë planet për monedhën digjitale

Një ligjvënëse në SHBA i bëri thirrje komanisë Facebook të ndalë zhvillimin e monedhës digjitale, si dhe ftoi drejtuesit e kompanisë për të dëshmuar para Kongresit.

Deklarimet e saj janë pjesë e shqetësimeve botërore, lidhur me ndikimin në privatësi dhe në sigurinë e të dhënave, që mund të ketë monedha Libra.

Ligjvënësja demokrate, Maxine Waters, që kryeson Komitetin për Shërbime Financiare të Kongresit, tha se Facebook duhet të ndalë planet derisa Kongresi dhe rregullatorët të mund të shqyrtojnë çështjen.

“Facebook ka të dhëna për miliarda njerëz dhe vazhdimisht ka treguar një shpërfillje për mbrojtjen dhe përdorimin e kujdesshëm të këtyre të dhënave”, tha ajo në një deklaratë.

Edhe ligjvënësi republikan, Patrick Mc Henhry, gjithashtu kërkoi një seancë të Komitetit për nismën e re të Facebook-ut.

Të martën, kompania Facebook ka zbuluar planet për të lëshuar në qarkullim, vitin e ardhshëm, një monedhë të re digjitale, të quajtur Libra.

Facebook tha se njerëzit do të jenë në gjendje të bëjnë pagesa me monedhën nëpërmjet aplikacioneve të tyre, si dhe përmes shërbimit të mesazheve WhatsApp.

Presidenti Trump fillon zyrtarisht fushatën për rizgjedhjen

Presidenti Donald Trump fillon zyrtarisht fushatën elektorale për rizgjedhjen e tij, në një shtet kyç – Floridën. Presidenti Trump shpreson se votuesit do ta shpërblejnë në votime vitin e ardhshëm për ekonominë e fortë të vendit. Por, ndërsa i afrohemi garës së vitit 2020, anketime të ndryshme tregojnë se ai mbetet jopopullor në segmente të mëdha votuesish. Kjo është zakonisht një shenjë rreziku për një president që kërkon të rizgjidhet.

Air Force One ulet për një miting në Pensilvani, një ndër shtetet kryesore për zgjedhjet e 2020-s, dhe ku Presidenti Trump fitoi me vështirësi në vitin 2016.

Presidenti Trump e shikon ekonominë amerikane si avantazhin e tij kryesor në këtë fushatë elektorale.

“Politika është një botë e çmendur. Por, kur kemi shifrat më të mira të punësimit në histori; kur kemi nivelin më të ulët historikisht të papunësisë; kur kemi ndoshta ekonominë më të mirë që kemi patur ndonjëherë… Nuk di se si mund t’i humbasim këto zgjedhje, apo jo?”, u tha mbështetësve Presidenti Trump.

Një reklamë e re televizive e fushatës Trump u kujton votuesve arritjet e tij.

Ndërsa shpall zyrtarisht në Florida synimin për të rikandiduar, Presidenti Trump duke se është gati të përballet me këdo që mund të shfaqet nga një mori kandidatësh demokratë për president.

Për momentin, ish-Nënpresidenti Joe Biden kryeson në radhët e demokratëve, ndërsa është përqëndruar tek kritikat ndaj Presidentit Trump.

“Në pikëpamjen time, ai është një kërcënim, një kërcënim ndaj vlerave tona thelbësore. Katër vitet e Donald Trump-it do të shihen si një anomali në historinë amerikane. Tetë vite do të ndryshonin me themel atë çfarë ne jemi si komb, dhe se si na sheh bota”, deklaroi zoti Biden.

Të dhënat e anketimeve më të fundit i kanë nxjerrë në avantazh zotin Biden dhe disa kandidatë të tjerë demokratë, në një matje teorike përballë Presidentit.

Presidenti Trump hodhi poshtë edhe anketimet e brendshme të fushatës së tij, të cilat gjithashtu tregonin se zoti Biden dhe disa kandidatë të tjerë demokratë do të fitonin me diferencë të madhe në disa shtete kyçe.

Por, anketimet në një fazë kaq të hershme për zgjedhjet presidenciale mund të jenë jo të sigurta.

“Siç e pamë në vitin 2016, anketimet dhe gara mund të ndryshojnë papritur. Mendoj se presidenti mund të detyrohet të pranojë realitetin duke thënë se ka mbetur prapa dhe se nuk është hapur sa ç’duhet. Megjithatë është e rëndësishme që demokratët të kuptojnë se anketimet mund të ndryshojnë parpritur dhe shpesh nuk tregojnë se si është pozicionuar publiku amerikan”, i tha kanalit ABC analisti politik Mattthew Dowd.

Megjithë ekonominë e fortë, niveli i miratimit për Presidentin Trump vazhdon të jetë historikisht i ulët.

Dhe ka mbetur kështu për pjesën më të madhe të presidencës së tij.

“Nëse shqyrtojmë vetëm anketimet mund të themi se asgjë nuk ka ndryshuar. Donald Trump ka qenë gjatë gjithë presidencës së tij në nivelin nga 30% deri në mbi 40% të miratimit”, thotë Larry Sabato, i Universitetit të Virxhinias”.

Nga anketimet del se megjithëse Presidenti Trump ka mbajtur përgjithësisht të kënaqur bazën e tij politike, atij i duhet të gjejë mënyrat për ta zgjeruar këtë bazë në mënyrë që të rrisë shanset e fitores.

Presidenti Trump thotë se udhëheq garën me demokratët, anketat tregojnë ndryshe

Presidenti amerikan Donald Trump, deklaroi të hënën se ai udhëheq garën me një grup kandidatësh demokratë për president, që kërkojnë ta rrëzojnë atë në zgjedhjet e vitit 2020, megjithëse fushata e tij i hodhi poshtë si të pavërteta tre anketa, pas zbulimit të rezultateve të tyre, duke treguar se zoti Trump është shumë prapa udhëheqësit demokrat, ish-nënpresidentit Joe Biden.

“Vetëm sondazhet e rreme na tregojnë se jemi pas grupit Motley Crew,” shkruante zoti Trump në Twitter, duke ju referuar një grupi muzikor të viteve 1980, “Ne po paraqitemi me të vërtetë mirë, por është shumë herët të përqendrohemi tek kjo çështje. Mbetet shumë punë për të bërë! Do ta bëjmë përsëri madhështore Amerikën!”

https://twitter.com/realDonaldTrump/status/1140591670280564737

Sipas mediave amerikane, Donald Trump ishte i zemëruar që sondazhet që u bënë publike nga vetë fushata e tij, tregojnë se ai po e humb betejën me rivalin demokrat Biden në shtetet kyçe për betejën presidenciale, që ka gjasa të jenë vendimtare për rezultatin e zgjedhjeve të 3 nëntorit 2020.

Një sondazh i brendshëm në muajin mars tregonte se Presidenti Trump vinte pas zotit Biden në anketa, i cili aktualisht po udhëheq 22 demokratë të tjerë që kërkojnë emërimin e partisë presidenciale, me 16 përqind në Pensilvani, 10 për qind më tepër në Wisconsin dhe shtatë përqind më shumë në Florida. Presidenti Trump fitoi në të tre këto shtete në zgjedhjet e vitit 2016, ndaj demokrates Hillari Klinton dhe ka gjasa që ata t’i duhen përsëri për të fituar një mandat të dytë katërvjeçar në Shtëpinë e Bardhë.

Menaxheri i fushatës së zotit Trump Brad Parscale, i konfirmoi rezultatet e sondazhit, por tha se ato ishin të vjetëruara.

Për të minimizuar rrezikun e rrjedhjes së informacionit në zgjedhjet e ardhshme, fushata e zotit Trump i pushoi nga puna tre nga 5 personat që punonin për anketat e tij.

Sondazhet e pavarura gjithashtu tregojnë se presidenti amerikan është prapa disa prej rivalëve të tij në anketa, thuajse 17 muaj përpara zgjedhjeve.

E pasigurt e ardhmja e kompensimeve të punonjësve të shpëtimit të 11 shtatorit

Komediani amerikan Jon Stewart shprehu indinjatën ndaj ligjvënësve që nuk morën pjesë në një seancë për një fond që do të kompensonte plotësisht punonjësit e ndërhyrjes së shpejtë gjatë sulmeve të 11 shtatorit 2001 në Qendrën Botërore të Tregëtisë në Nju Jork.

Zoti Stewart, një avokat i hershëm për anëtarët e ekipeve të shpëtimit të 11 shtatorit e drejtoi dorën nga karriget e zbrazëta në Komisionin Juridik të Dhomës së Përfaqësuesve dhe i quajti ata “një turp për vendin dhe një njollë për institucionin” e Kongresit. Ish-drejtuesi i programit satirik “The Daily Show” akuzoi gjithashtu anëtarët e komisionit se po tregonin “mungesë të papranueshme respekti”, për punonjësit e emergjencës.

“Indiferenca juaj u ka kushtuar këtyre burrave dhe grave gjënë më të çmuar: kohën. Është e vetmja gjë që po u mbaron. Rolet duhet të ndërrohen në këtë seancë. Këta burra dhe gra duhet të jenë në podium dhe Kongresi duhet të jetë aty poshtë duke iu përgjigjur pyetjeve se pse dreqin qenka kaq e vështirë dhe pse u dashka kaq shumë kohë”, tha zoti Stewart.

Mbi 7 miliardë dollarë u përfshinë në një fond për të kompensuar zjarrfikësit, ekipet e ndërtimit, policët dhe punonjës të tjerë të ndërhyrjes së shpejtë që nxituan në rrënojat e Qendrës Botërore të Tregëtisë, duke thither pluhur, tym, kimikate dhe lëndë të tjera të rrezikshme.

Shumë vetë po vuajnë nga probleme frymëmarrjeje, çrregullime me sistemin e tretjes, kancer në mushkëri dhe kancere të tjera.

“Ky fond nuk është biletë për në parajsë. Është për të mbajtur familjet tona, kur ne nuk mundemi. Asgjë më shumë. Ju të gjithë thatë se nuk do të harroni kurrë. Unë jam këtu që të sigurohem që vërtet nuk do të harroni. Më detyruat të vij këtu një ditë para raundit të 69-të të kimioterapisë. Dhe unë do të bëj të pamundurën që të mos harroni kurrë të kujdeseni për ekipet e shpëtimit të 11 shtatorit”, – tha Luis Alvarez, ish-detektiv i policisë së Nju Jorkut që ishte pjesë e ekipit të shpëtimit të 11 shtatorit.

Departmenti i Drejtësisë ka paralajmëruar se fondi po tkurret pas nuk ka mekanizëm në Kongres që të mos ta lejojë një gjë të tillë, para se të skadojë programi vitin që vjen.

Pagesat e sigurimeve janë reduktuar dhe 21 mijë kërkesa janë ende pezull.

Zoti Stewart dhe të tjerë po i kërkojnë Kongresit që të miratojë një ligj që të sigurojë se fondi do të vazhdojë të funksionojë për 70 vitet e ardhshme. za

Presidenti Trump dhe ish nënpresidenti Biden zhvillojnë fushatë në Ajova

Presidenti Donald Trump dhe ish-nënpresidenti Joe Biden dhanë të martën mesazhin e tyre politik në shtetin e Ajovas, secili me synimin për t’i bindur votuesit e zgjedhjeve të vitit 2020, se ai është njeriu me vizionin dhe forcën për të udhëhequr vendin. Trump dhe Biden kanë shkëmbyer replika që nga koha kur ish nënpresidenti amerikan njoftoi kandidaturën e tij për në zgjedhjet presidenciale të vitit 2020, kur zoti Trump e portretizoi demokratin Biden si një njeri që i mungon energjia; zoti Biden, nga ana e tij, kritikoi stilin agresiv të Presidentit Trump. Por replikat e tyre u bënë edhe më të forta, kur të dy u shfaqën në të njëjtin shtet, Ajova.

Gjatë aktiviteteve të tij të së martës në Ajova, zoti Trump u pa qartë se kishte në mendje zgjedhjet presidenciale të vitit 2020. Presidenti republikan, i cili pritet të kandidojë për t’u rizgjedhur, shfrytëzoi çdo rast për të minuar punën e administratës Obama dhe për të përbuzur ish-nënpresidentin Biden:

“Amerika nuk duhet të jetë kurrë peng i furnizuesve të huaj me energji, sikurse ndodhi nën drejtimin Obama-Biden. Joe gjumashi!”

Argumenti kryesor i zotit Trump në favor të tij, ka qenë rritja ekonomike në Shtetet e Bashkuara. Por politikat e tij për tarifat kanë dëmtuar fermerët amerikanë dhe disa prodhues, duke shkaktuar shqetësim se ekonomia mund të shkojë drejt rënies. Presidenti Trump këmbënguli se nga tarifat përfitojnë fermerët amerikanë.

“Ne jemi duke marrë miliarda nga ato miliarda dollarë që hyjnë në vendin tonë përmes tarifave – u dhamë fermerëve 16 miliardë dollarë, sepse kjo ishte shuma më e lartë që Kina kishte përdorur ndonjëherë për të blerë produktin tuaj”, – tha zoti Trump.

Më parë gjatë ditës së martë, zoti Trump shkroi një sërë tweetesh, ku shprehte besimin e tij për t’u rizgjedhuar, duke përfshirë një vlerësim ndaj tij në kohët e fundit në anketa. Sipas Raportit Rasmusen, mbështetja për të është tani rreth 50 për qind.

Megjithatë, një sondazh i Universitetit Quinnipiac i botuar të martën, tregoi se Joseph Biden është 13 pikë para zotit Trump në mbështetjen që ai ka në nivel kombëtar.

Zoti Biden e filloi vizitën e tij dy-ditore në Ajova më herët të martën, duke vënë në shënjestër stilin e udhëheqjes së zotit Trump.

“Unë mendoj se ai përbën me të vërtetë një kërcënim për vlerat tona kryesore. Ai është gjithashtu kërcënim për imazhin tonë në botë. Gjatë ceremonive me rastin e përvjetorit të zbarkimit të trupave aleate në Normandi më la pa mend fakti që ai i sulmoi me tweete të gjithë, nga kryebashkiaku i Londrës tek aktorja amerikane Bette Midler.”– tha zoti Biden.

Kandidati demokrat për president me më tepër mbështetje, kritikoi gjithashtu deklaratat e zotit Trump mbi tarifat:

“Fakti është se ai e tërhoqi kërcënimin për tarifat me Meksikën kohët e fundit, sepse e kuptoi se rrezikonte të humbiste Michiganin, Ohajon, Ajovën dhe papritur – siç themi ne në Delauerin jugor – atij i vika një thirrje nga Zoti… Por do të shikoni, nëse situata vështirësohet, ai do të fillojë përsëri të kërcënojë me tarifat. Sipas mendimit tim, për të punëtorët amerikanë janë veçse një peng i lojës së tij”.

Tani për tani zoti Biden dhe zoti Trump janë në pararojë të garës së partive të tyre përkatëse për zgjedhjet e ardhshme presidenciale, por nëntori i vitit 2020 është ende larg dhe zgjedhjet e 2016-ës treguan se surprizat e minutës së fundit nuk mund të përjashtohen. za

20-vjetori i Çlirimit, Palmer: SHBA do të jenë përkah jush

Matthew Palmer, zv.ndihmes Sekretari Amerikan i Shtetit

12 Qershor, 2019 12:39

KOSOVE- Në fjalimin e tij para të pranishmëve në 20-vjetorin e Çlirimit të Kosovës, Matthew Palmer, zv.ndihmës Sekretari Amerikan i Shtetit tha se Kosova dhe Serbia duhet të arrijnë një marrëveshje për të mirën e qytetarëve të dy vendeve.

Pjesë nga fjala e Palmer:

Qytetarët e Kosovës kanë treguar se mund të jenë një partner i besueshëm për SHBA. Ruajtja e vlerave për Kosovën që sot është e rritur dhe e pjekur, në 20-vjetorin kanë ndryshuar tensionet në jetët tona. Sot, SHBA do të jenë përkah jush, por sot nuk merr më askush vendime për ju. Duhet lënë mënjanë retorika nacionaliste. Shpalosja e viktimave të luftës nuk ju ndihmon ju për të ndërtuar një shtet demokratik. Sot, Kosova duhet të punojë për një paqe demokratike. Duhet një marrëveshje gjithëpërfshirëse me Serbinë, që do të sillte pranimin e dyanëshëm. Jeta e qytetarëve do të përmirësohej. Kosova dhe Serbia do të jenë gjithnjë fqinj. Të dy vendet duhet të zhbllokojnë të ardhmen dhe të drejtohen nga ardhmëria dhe përparimi. Nëse Kosova nuk ecën përpara, atëherë do të prishet cikli. Shfrytëzojeni mundësinë për një të ardhme më të mirë. Kjo është koha më e mirë.

Gjenerali Wesley Clark sot në Kosovë – Ja si i shkruan presidentit Bill Clinton!

Ish-komandanti i NATO-s gjatë bombardimeve kundër caqeve serbe më 1999, gjenerali i pensionuar, Wesley Clark, do të qëndrojë të mërkurën në Kosovë, në 20 vjetorin e çlirimit të Kosovës.

Gjenerali Clark ka njoftuar në llogarinë e tij në Twitter se do t’i bashkohet ish-presidentit të Shteteve të Bashkuara, Bill Clinton, dhe ish-sekretares amerikane të Shtetit, Madeleine Albright, në festimet që do të organizohen më 12 qershor në Prishtinë.

Ish-presidenti Clinton dhe ish-sekretarja e Shtetit, Albright, kanë arritur të martën në Kosovë.

Clinton dhe Albright janë pritur nga krerët e institucioneve të Kosovës.

Gjenerali Wesley Clark ka qenë komandant i forcave të NATO-s në kohën e bombardimeve të forcave aleate kundër ushtrisë dhe policisë serbe, të cilat po kryenin krime kundër njerëzimit dhe kishin ndërmarrë fushatë të pastrimit etnik kundër shqiptarëve të Kosovës.

12 qershori konsiderohet dita e çlirimit të Kosovës pasi më 12 qershor 1999, forcat e NATO-s hynë në Kosovë pas nënshkrimit të marrëveshjes tre ditë më herët me forcat serbe, të cilat u pajtuan të largoheshin nga Kosova.

Marrëveshja teknike-ushtarake ishte nënshkruar më 9 qershor 1999 në Kumanovë pas 78 ditë bombardimesh ajrore nga forcat e NATO-s kundër ushtrisë dhe policisë serbe.

(Video) Clinton: Krenar që isha president kur duhej dikush që do t’i kundërvihej spastrimit etnik

Ish presidenti amerikan, Bill Clinton, tha të martën në Prishtinë se Kosova meriton të anëtarësohet në Bashkimin Evropian dhe NATO, duke shprehur bindjen se Shtetet e Bashkuara të Amerikës do të vazhdojnë përkrahjen e plotë për Kosovën në rrugën e saj përpara.

“Mendoj se Kosova e meriton të jetë në Bashkimin Evropian, në NATO dhe në çdo organizatë tjetër që mund të anëtarësohet një shtet i pavarur. Unë kam qenë shumë i lumtur që pasardhësi im presidenti Bush njohu Kosovën dhe pavarësinë e saj. Në një mjedis të paqartë politik në Amerikë, Kosova duket të jetë e vetmja temë për të cilën pajtohen të gjithë amerikanët prandaj ju uroj sukses dhe besoj se vendi im do të vazhdojë të ju mbështesë në përparimin tuaj”, tha ish presidenti Clinton.

Ai i bëri këto komente pas takimit me presidentin e Kosovës, Hashim Thaçi, i cili e dekoroi ish presidentin amerikan me “Urdhrin e Lirisë” për kontributin e tij në çlirimin e Kosovës.

Ish presidenti Clinton tha se mbarë bota mund të marrë Kosovën si shembull të demokracisë dhe përkushtimit për të përparuar dhe jetuar në paqe me fqinjët.

“Kjo është diçka për të cilën të gjitha shtetet duhet të punojnë brenda dhe jashtë kufijve të tyre. Mendoj se ju e keni rastin të vendosni edhe një shembull të ri për botën edhe për njëzet vjetët e ardhshme. Do të jem gjithmonë krenar për faktin se kam qenë president i Shteteve të Bashkuara në kohën kur juve ju duhej dikush që do të qëndronte kundër spastrimit etnik, dëbimit të njerëzve nga shtëpitë e tyre”, tha ish presidenti amerikan.

Ai u prit edhe nga kryeministri i Kosovës, Ramush Hardinaj, i cili pas takimit shkroi ne rrjetet sociale: “Ju na ndihmuat ta fitojmë luftën dhe bashkë e ndërtuam paqen! Mirë se erdhe në shtëpinë tënde dhe te populli në zemrat e të cilit ju keni hyrë si njeriu më i dashur, President Bill Clinton. Falë vendosmërisë, humanizmit dhe guximit tuaj, ne jetësuam të drejtën tonë për liri dhe demokraci dhe ndërtuam shtetin e Kosovës! Falë kësaj kthese historike, fëmijët tanë sot jetojnë të lirë. Të lirë për të pasur jetë, për të pasur ëndrra, për të pasur shtetin e tyre, Kosovën! President Clinton, faleminderit dhe përjetë mirënjohës për ju dhe popullin Tuaj”.

Ish presidenti Clinton dhe ish sekretarja amerikane e shtetit, Madeleine Albright, po qëndrojnë në Kosovë për të marrë pjesë në veprimtaritë me të cilat pritet të shënohet 20 vjetori i hyrjes së trupave të NATO-s, që i dhanë fund luftës gati dyvjeçare dhe administrimit serb të Kosovës.

Roli i të dy zyrtarëve amerikanë vlerësohet vendimtar për ndërhyrjen e NATO-s 20 vjet më parë dhe hapjen e rrugës për pavarësinë e Kosovës.

“Jam i nderuar të kthehem në Kosovë për të kremtuar 20 vjet paqe – një arritje e qytetarëve të Kosovës që duhet të kremtohet jo vetëm në këtë përvjetor, por çdo ditë”, shkroi presidenti Clinton në rrjetet sociale.

Ish presidentja e Kosovës, Atifete Jahjaga dhe shefi i diplomacisë së Kosovës, Behgjet Pacolli pritën ish presidentin Clinton në aeroportin e Prishtinës.

“Ishte nder dhe privilegj i madh ta mirëpres ish-Presidentin e Shteteve të Bashkuara të Amerikës, Bill Klinton, në Kosovën e lirë, të pavarur dhe demokratike. Në kohën më të errët të historisë moderne të vendit tonë, vendosmëria dhe guximi i Presidentit Klinton ishin vendimtare për t’i dhënë fund luftës në Kosovë dhe për t’ia kthyer lirinë një populli të tërë. Vendimi i Presidentit Klinton për të mbështetur fushatën e NATO-së në dhënien fund luftës në Kosovë ndaloi një katastrofë njerëzore që po merrte përmasa gjithnjë e më të mëdha në Ballkan. Lidershipi i Presidentit Klinton ndryshoi kursin e historisë së Kosovës dhe u bë garantues për rivendosjen paqes dhe të stabilitetit në të gjithë rajonin. Mbështetja e palëkundur e tij për Kosovën dhe popullin e saj është simbol i miqësisë dhe aleancës së fuqishme të Shteteve të Bashkuara me Kosovën! Përjetësisht mirënjohës!”, shkroi në rrjetet sociale ish presidentja Jahjaga.

Ministri i Jashtëm, Behgjet Pacolli, shkroi se “Liria dhe Pavarësia jonë është e lidhur ngushtë me emrin e njeriut që sot po viziton Republikën tonë. Presidenti Klinton do të jetë i nderuar për jetë e mot nga Kosova”.

Ish presidentja Jahjaga, priti ne aeroportin e Prishtinës edhe ish sekretaren Albright.

“Jam krenare që, njëzet vite pas çlirimit, të mirëpres në Kosovë ish-Sekretaren Amerikane të Shtetit, Madeline Albright- njërën nga kontribuueset më të fuqishme në lirinë dhe pavarësinë tonë. Vendosmëria dhe përkushtimi i Sekretarss Albright për ta ndalur gjenocidin në Kosovë dhe për t’ia kthyer lirinë dhe shpresën një populli të shtypur ishin kruciale për të ardhmen e popullit tonë. Sekretarja Albright, e cila ishte e pakompromis ndaj dhunës që regjimi i Millosheviqit po ushtronte në Kosovë, sot erdhi në një Kosovë që kultivon vlerat për të cilat ajo është angazhuar- lirinë, demokracinë, tolerancën dhe paqen”, shkroi ajo.

Viti 2019 në Kosovë është shpallur vit i NATO-s në shenjë nderimi për ndërhyrjen e saj 20 vjet më parë.

Shtëpia e Bardhë, thirrje Kosovës e Serbisë për njohje reciproke

Shtëpia e Bardhë i bëri thirrje Kosovës dhe Serbisë të lenë mënjanë retorikën ekstremiste dhe të punojnë për një marrëveshje që përqendrohet në njohjen reciproke mes tyre.

Në një deklaratë me rastin e 20 vjetorit të përfundimit të operacionit të NATO-s që i dha fund spastrimit etnik në Kosovë, zëdhënësi i Shtëpisë së Bardhë Judd Deere tha:

“Prishtina dhe Beogradi duhet të dyfishojnë përpjekjet për të punuar drejt një marrëveshjeje gjithëpërfshirëse të përqendruar në njohjen reciproke dhe të heqin menjëherë pengesat ndaj përparimit.”

“E vetmja rrugë për një të ardhme më të mirë është një dialog midis fqinjësh që të synojë normalizimin e marrëdhënieve dhe t’i hapë rrugën Serbisë dhe Kosovës të kenë vendin e tyre të ligjshëm brenda komunitetit euroatlantik,” tha zëdhënësi.

“Shtetet e Bashkuara janë të gatshme të ndihmojnë gjatë gjithë këtij procesi, por i takon Kosovës dhe Serbisë që të ndërmarrin hapat e ardhshëm,” thuhet në deklaratën e Shtëpisë së Bardhë, e cila u bën thirrje Prishtinës dhe Beogradit të veprojnë tani e të mos ua lënë punën brezave të ardhshëm. za

Seanca të reja dëgjimore mbi raportin Mueller

Gjatë ditëve të ardhshme pritet të zhvillohen disa seanca me dëshmi mbi raportin e Prokurorit të Posaçëm Mueller mbi ndërhyrjet ruse në zgjedhjet e 2016. Po shtohet presoni për të vazhduar hetimet që mund të çojnë në hapjen e procesit për shkarkimin e Presidentit Donald Trump.

Por zoti Robert Mueller, i cili ditët e fundit e përmbylli detyrën e prokurorit të posaçëm pas përfundimit të raportit, nuk do të japë dëshmi para Komisionit të Dhomës së Përfaqësuesve për Gjyqësorin, i cili do të zhvillojë një seancë me titull: “Mësime nga Raporti Mueller: Ndërhyrje presidenciale dhe vepra të tjera penale”.

Komisioni do të dëgjojë dëshmi të ish-prokurorëve të përgjithshëm dhe ekspertëve të tjerë ligjorë, përfshirë John Dean, dëshmitar kryesor në vitet 1970 gjatë skandalit Watergate dhe ish-këshillar për Presidentin e atëhershëm Richard Nixon. Komisioni thotë se dëshmitarët do të diskutojnë prova të raportit se Presidenti Trump ishte përpjekur të pengonte ose kufizonte hetimet, të cilat përforcuan përfundimet e komunitetit të zbulimit se Rusia kishte ndërhyrë në zgjedhje me synimin për të ndihmuar Presidentin Trump të fitonte.

Të mërkurën, Komisioni i Dhomës së Përfaqësuesve për Zbulimin do të organizojë një seancë të re me synimin për të nxjerrë mësime mbi “ndërlikimet në punën e agjencive të zbulimit” bazuar në konkluzionet e raportit Mueller.

Të dy këto komisione kryesohen nga demokratë, ndërkohë që vetë antarësia e Partisë Demokrate është e përçarë në pikëpamjet e tyre pro dhe kundër hapjes së procesit për shkarkimin e Presidentit Trump. za

SHBA: Aeroporti merr emrin e boksierit Muhamed Ali (video)

Muhamed Ali mahniti botën si kampion i boksit dhe veprimtar politik. Pasi vdiq në vitin 2016, qyteti i tij, Luivill në Kentaki, po e kujton atë duke i dhënë aeroportit emrin e tij. Korrespondenti i Zërit të Amerikës Alam Burhanan njofton nga Luivill i Kentakit:

Thuhet se Muhamed Ali nuk i trembej asnjë boksieri…por kishte diçka tjetër që e frikësonte:

“Mendoj sikur të prishet avioni dhe kur është duke rënë, mendoj: Po pse duhet të nxitoja. Mund të kisha marrë autobuzin. Zot i Madh, nëse nuk më ndodh gjë, herës tjetër do marr trenin”.

Frika e tij nga avionët ishte e njohur.

“Kishte frikë të merrte avionin, ishte një nga ato fobitë. Dhe nuk kishte frikë përballë kundërshtarit në boks. Kjo nuk diskutohet”, thotë miku i tij, Rudolph Davidson.

Si për ironi, emri i tij është tani pjesë e botës së aviacionit.

“Menduam se do të ishte një mesazh kuptimplotë për qytetin tone, sikur të thoshim: OK, Muhamed tani po i vëmë aeroportit emrin tend. Është koha të mos kesh më frikë të fluturosh”, thotë kryebashkiaku Greg Fischer.

Në janar, Bordi i Aeroporteve Rajonale të Luivillit miratoi riemërtimin e aerportit ndërkombëtar, duke i dhënë emrin e legjendës së këtij qyteti.

“U formua një komision. U takuam disa herë në një periudhë një vit e gjysëm. Dhe ndërsa diskutohej në këto takime, u pa qartë se nderimi i Muhamed Aliut, emërtimi i Aeroportit Ndërkombëtar Muhamed Ali, ishte i vetmi që kishte kuptim”, thotë Dan Mann i Autoritetit të Aerporteve.

Muhamed Aliu ishte i njohur edhe për aktivizmin e tij. Ai u konvertua në mysliman dhe u dënua se nuk pranoi të shkonte ushtar në Vietnam. Presidenti i qendrës “Muhamed Ali”, Donald Lassere thotë se shpreson që emërtimi i aeroportit do ta nxjerrë edhe më shumë në pah trashëgiminë e tij.

“Duam që publiku ta kuptojë më mirë se pse ndryshuam emrin e aerportit, si edhe rëndësinë që ka kjo për qendrën ‘Muhamed Ali’, familjen, vendin dhe botën”.

Muhamed Ali u lind dhe u rrit në Luivill dhe u varros atje në vitin 2016. Ky qytet i Kentakit vazhdon ta nderojë njeriun që u bë një ikonë globale.

Nën hetim antitrust kompanitë Amazon, Google dhe Facebook, Twitter, Netflix, Microsoft dhe Apple

VOAL – Lugina e Silikonit (Silicon Valley ) është në shënjestër të autoriteteve amerikane. Në Uashington, Komisioni i Drejtësisë i Dhomës së Përfaqësuesve nisi një hetim antitrust në kompanitë e mëdha të teknologjisë. Kjo u njoftua nga përfaqësuesit e partive Demokratike dhe Republikane, të bashkuar në dëshirën e tyre për të hedhur dritë. Qëllimi është të konstatojë nëse gjigantët e internetit po e mbytin konkurrencën dhe nëse ka nevojë për ligje më të rrepta. Është hera e parë që Kongresi hap një hetim mbi emrat e mëdhenj në rrjet.

Pikërisht në funksion të njoftimit, të hënën titujt e Amazon, Google dhe Facebook, Twitter, Netflix, Microsoft dhe Apple pësuan humbje të konsiderueshme në bursë, duke u rrëzuar në nivelet më të ulëta të pesë muajve të fundit, duke fundosur Wall Street dhe duke shkaktuar rrëshqitje në korrigjim të Nasdaq. Në fund të tregtimit në alfabetin Wall Street kishte humbur 6.12% dhe Facebook 7.51%, Amazon 4.64% dhe Apple 1.01%.

Hetimet janë gjithashtu një demonstrim i interesit në rritje të politikës në rregullimin e asaj që shumë e quajnë “far west i internetit”. Në fakt, si në partinë demokratike ashtu edhe në atë republikane, kori i atyre që kërkojnë rregulla dhe kontrolle më të mëdha për gjigantët e internetit, është forcuar.

Intervista – Palmer: Nuk vendosim afate e as vija të kuqe në bisedimet Kosovë – Serbi

Zëvendës ndihmës sekretari amerikan i shtetit, Mathew Palmer, tha se Shtetet e Bashkuara nuk kërkojnë një afat të caktuar për arritjen e një marrëveshjeje për normalizimin e marrëdhënieve ndërmjet Kosovës dhe Serbisë, por do të dëshironin një rifillim sa më të shpejtë të bisedimeve. Në një intervistë për programin në gjuhën serbe të Zërit të Amerikës, ai tha se Shtetet e Bashkuara nuk vendosin vija të kuqe në procesin e bisedimeve, por kjo nuk nënkupton se të gjithë mundësitë janë të hapura.

Zëri i Amerikës: Zoti Palmer, a prisni që Serbia dhe Kosova të nënshkruajnë një marrëveshje për normalizimin e marrëdhënieve mes tyre në Shtëpinë e Bardhë këtë vit?

Matthew Palmer: Ne nuk po kërkojmë ndonjë kuadër kohor të caktuar. Ne mbështesim normalizimin e marrëdhënieve mes Kosovës dhe Serbisë, ne duam të shohim që dialogu për arritjen e këtij synimi të rifillojë sa më shpejt që të jetë e mundur dhe që palët të arrijnë një marrëveshje gjithëpërfshirëse për normalizimin e marrëdhënieve në kohë. Në se kjo do të ndodhë apo jo deri në fund të vitit, nuk jam në gjendje ta parashikoj.

Zëri i Amerikës: Presidenti Trump ka bërë thirrje për arritjen e një marrëveshje sa më shpejt që të jetë e mundur. Prandaj ju pyeta, a besoni se ajo do të ndodh këtë vit?

Matthew Palmer: Në këtë moment jam më i interesuar që palët të ulen përsëri në tryezën e bisedimeve, të rifillojnë dialogun, të përparojnë hap pas hapi drejt një marrëveshjeje. Nuk mendojmë se vendosja e një kufiri artificial kohor do të ndihmonte arritjen e një marrëveshjeje apo të lehtësonte procesin. Por duam që palët të rifillojnë negociatat sa më shpejt që të jetë e mundur dhe urgjentisht.

Zëri i Amerikës: Presidenti Vuçiç foli në parlament për një kompromis për çështjen e Kosovës dhe paralajmëroi se mund të ketë sulme nga shqiptarët nëse nuk arrihet një kompromis. A e shikoni këtë si një sinjal se ai është më i gatshëm të arrijë një kompromis nga sa ç’ka qenë më parë?

Matthew Palmer: Mendoj se presidenti Vuçiç e ka bërë të qartë se është i përgatitur të kthehet tek negociatat kur tarifat të hiqen dhe të punojë me Kosovën drejt një marrëveshjeje për normalizimin e plotë të marrëdhënieve. Ne besojmë se ai është i sinqertë për këtë, ne besojmë se pala e Kosovës është gjithashtu e sinqertë në dëshirën për të siguruar marrëveshje për normalizimin e plotë të marrëdhënieve. Por këto janë çështje të ndërlikuara. Ato janë të ndërlikuara politikisht, emocionalisht dhe psikologjikisht. Pra do të duhet kohë për t’i zgjidhur. Hapi i parë sigurisht është që palët të ulen përsëri në bisedime për negociata dhe të ecin në drejtimin e duhur.

Zëri i Amerikës: Përse besoni se Vuçiç do ta arrijë këtë. Ai ka qenë në pushtet për shtatë vjet dhe asgjë s’ka ndryshuar?

Matthew Palmer: Ne besojmë se presidenti Vuçiç është i vendosur për një të ardhme evropiane për Serbinë dhe besoj se ka një kuptim të qartë tek të gjithë që janë të përfshirë në këtë proces se e ardhmja evropiane si për Serbinë edhe për Kosovën, do të kërkonte një marrëveshje për normalizimin e marrëdhënieve. Pra shpresa jonë është që palët të takohen, të negociojnë, të arrijnë marrëveshje, ta zbatojnë atë dhe të hapin një rrugë të qartë evropiane si për Serbinë ashtu edhe për Kosovën.

Zëri i Amerikës: Beogradi nuk do të kthehet në tryezën e bisedimeve para se Prishtina të heq tarifat. Prishtina e refuzon një gjë të tillë edhe pse Shtetet e Bashkuara dhe BE-ja kanë bërë thirrje disa herë për ta bërë një gjë të tillë. Edhe ju e keni kërkuar këtë. Presidenti Vuçiç tha javën e kaluar se Prishtina do të heq tarifat kur “mentorët e saj perëndimorë të vendosin një gjë të tillë”. Cili është komenti juaj?

Matthew Palmer: Mendoj se është shumë e rëndësishme që Serbia, udhëheqja politike në Beograd të pranojë se Kosova ka agjenci të pavarura. Kosova nuk është thjesht një instrument i Shteteve të Bashkuara. Kosova është një vend i pavarur, një shoqëri e pavarur që ka politikat e veta dhe këto politika duhet të zbatohen. Çështja e negociatave, çështja e tarifave është çështje e ngarkuar politikisht në kontekstin e politikës në Kosovë. Ne do të mbështesnim pezullimin apo heqjen e tarifave si një mjet për t’u kthyer në dialog. Ne mendojmë se ky do të ishte një hap i rëndësishëm përpara. Por gjithashtu mendojmë se është e rëndësishme që vetë palët të gjejnë një rrugë për të manovruar sfidat në të dyja anët për t’u kthyer në tryezën e bisedimeve, për të gjetur një rrugë përpara për të arritur një zgjidhje të negociuar.

Zëri i Amerikës: Pra ju thoni se Uashingtoni nuk mund të bëjë asgjë për të inkurajuar Prishtinën për të pezulluar tarifat?

Matthew Palmer: Jo, nuk është ajo që po them. Mendoj se ka gjëra që mund të bëjmë për të mbështetur dhe lehtësuar përparimin që përfshin inkurajimin e partnerëve tanë në Kosovë të mendojnë thellë dhe me kujdes nëse tarifat në fakt avancojnë interesat e Kosovës. Ne besojmë se interesat e Kosovës shërbehen më mirë me arritjen e një marrëveshje gjithëpërfshirëse me Beogradin dhe për të arritur atë marrëveshje, ata duhet të kthehen tek dialogu dhe për të arritur tek dialogu, është e rëndësishme që tarifat të eliminohen si një pengesë për përparim.

Zëri i Amerikës: Kur do të ndodh kjo?

Matthew Palmer: Nuk mund t’u japë një datë për këtë por shpresoj që të ndodh sa më shpejt që të jetë e mundur.

Zëri i Amerikës: Do të ndodh këtë vit? A mendoni se dialogu mund të vazhdojë këtë vit?

Matthew Palmer: Po, mendoj se është absolutisht e mundur.

Zëri i Amerikës: Nëse flasim për modelin e zgjidhjes, duket sikur Gjermania dhe Franca e hoqën nga tryeza idenë e shkëmbimit të territoreve, pas samitit në Berlin.

Matthew Palmer: Ne mendojmë se është e rëndësishme që vetë palët të vendosin parametrat e marrëveshjes. Ajo çfarë ne do të dëshironim të shikonim është një marrëveshje me autorësi lokale, një marrëveshje të qëndrueshme, një marrëveshje të drejtë, një marrëveshje të zbatueshme dhe që mund të pranohet nga publiku i të dyja palëve, që mund të zbatohet drejt dhe plotësisht, dhe një marrëveshje që mund të çelë rrugëtimin drejt të ardhmes evropiane.

Zëri i Amerikës: A do të thotë kjo se SHBA-ja nuk e ka hequr nga tavolina idenë e shkëmbimit të territoreve? Pra, në kundërshtim me Gjermaninë dhe Francën?

Mattthew Palmer: Ne nuk po vendosim vija të kuqe në procesin e negocimit, për gjëra që palët nuk duhet të diskutojnë. Është në dorën e vetë palëve që të gjejnë rrugën për të lëvizur përpara, me mbështetjen tonë. Por, kjo gjithashtu nuk është një “çek i bardhë”. Do të dëshironim t’i shohim palët të negociojnë marrëveshjen më të mirë të mundshme; të na e paraqesin, nëse do të kërkojnë mbështetjen tonë. Nëse do të kemi shqetësime, do t’i shprehim ato dhe do të përpiqemi të gjejmë zgjidhjen me palët për të arritur diçka që mund ta mbështesim dhe me të cilën mund të punojmë për zbatimin e saj. Por, ky nuk është procesi ynë. Ky është procesi i tyre. Ne i mbështesim.

Zëri i Amerikës: Çfarë prisni se do të ndodh në Paris?

Matthew Palmer: Nuk kam ndonjë pritshmëri specifike për atë takim

Zëri i Amerikës: A keni biseduar me partnerët francezë dhe gjermanë

Matthew Palmer: Absolutisht. Mendoj se synimi i takimeve, në Berlin në prill dhe në Paris në korrik, të ndihmojnë të krijojnë kushte që do të lejonte palët të ktheheshin në negociata përmes procesit të udhëhequr nga BE-ja që ka sjell marrëveshjen e Brukselit dhe ka prodhuar disa lëvizje përparuese për një marrëveshje gjithëpërfshirëse.

Zëri i Amerikës: A do të marrin Shtetet e Bashkuara një rol më të rëndësishëm apo më të dukshëm në dialog tani që Komisioni Evropian po ristrukturohet?

Matthew Palmer: Ne kemi qenë partnerë me Evropën për këtë proces, e kemi mbështetur këtë proces dhe BE-ja e ka udhëhequr këtë proces. Nuk shoh ndonjë arsye specifike përse kjo duhet të ndryshojë në këtë moment.

Zëri i Amerikës: Shumë palë kanë bërë thirrje për një angazhim më të madh të Shteteve të Bashkuara

Matthew Palmer: Në se do të ketë një rol për ne, që të jetë konstruktiv dhe mbështetës për këtë proces, një rol që partnerët evropianë dhe vetë palët do të donin që ne të luanim, ne jemi të hapur për çdo gjë që mund të bëjmë në mbështetje të këtij procesi.

Rregulla të reja për vizat amerikane

Departamenti amerikan i Shtetit njofton se tani kërkon nga aplikantët për vizë të japin hollësi për llogaritë në median sociale, si dhe adresën e emailit dhe numrin e telefonit.

Rregulloret e reja për ata që kërkojnë vizë amerikane si vizitorë apo si aplikantë për të emigruar në Amerikë përfshijnë emrin e llogarisë së aplikantit në median sociale, të gjitha adresat e emailit dhe të gjithë numrat e telefonit që ka përdorur aplikanti gjatë pesë vjetëve të fundit.

Zyrtarët thonë se afro 15 milionë shtetas të huaj do të preken nga kjo kërkesë. Vetëm aplikantët për viza diplomatike dhe zyrtare do të përjashtohen nga këto kërkesa.

Aplikantët do të pyeten edhe nëse ndonjë prej të afërmve të tyre ka qenë i përfshirë në aktivitet terrorist. za

SHBA, Policia identifikon autorin e masakrës në Virginia Beach

Dwayne Craddock është identifikuar si personi i dyshuar për vrasjen e 12 personave të premten në një ndërtesë të komunës në Virxhinia Beach. Ai punonte prej kohësh si një punonjës i shërbimeve publike.

Në një konferencë për shtyp të shtunën shefi i policisë James Cervera tha se personi i armatosur, ishte një punëtor i pakënaqur. Ai u vra nga policia pas një shkëmbimi zjarri për një kohë të gjatë siç tha zoti Cervera. Por shefi i policisë tha se ende nuk është përcaktuar një motiv mbi ngjarjen.

Gjatë konferencës për shtyp autoritetet u përqëndruan tek viktimat, duke përmendur emrin e secilit prej tyre, shoqëruar me fotografitë dhe informacion biografik.

Shefi administrativ i qytetit Dave Hansen tha se të gjithë ishin punonjës të administratës lokale të Virginia Beach përveç njërit prej tyre që ishte kontraktor. Zoti Hansen tha se ai kishte punuar prej vitesh me shumë prej tyre duke shtuar se ata do të “lënë një zbrazëti që kurrë nuk do të mbushet”.

Shefi i policisë James Cervera tha të premten se personi i armatosur “nisi të qëllojë ndaj të gjithëve pa dallim” menjëherë sapo hyri në ndërtesën komunale, pak pas orës 4 pasdite.

Sipas zyrtarëve katër persona të tjerë u plagosën si pasojë e të shtënave.

Dëshmitarët thonë se të shtënat ndodhën në ndërtesën e dytë të kompleksit komunal të Virginia Beach, ku ndodhen zyrat e personelit përgjegjës për punimet publike të qytetit, shërbimet publike dhe departamentet e planifikimit.

Zoti Cervera tha se mes atyre që u goditën me armë zjarri ishte edhe një oficer policie, por ai arriti të shpëtojë falë veshjes antiplumb. Shefi i policisë tha se oficerët ia dolën të pengojnë përpjekjet e të dyshuarin që të vriste persona të tjerë.

Ai tha se hetuesit besojnë se i dyshuari kishte vepruar i vetëm. Ai përdori një pistoletë të kalibrit 45mm me silenciator si dhe karikatorë të modifikuar që mbajnë më shumë plumba.

Në konferencën për shtyp të mbajtur menjëherë pas ngjarjes kryebashkiaku Bobby Dyer tha se “kjo ishte një nga ditët më të rënda në historinë e Virginia Beach. Personat e përfshirë janë miqtë tanë, bashkëpunëtorët, fqinjët, kolegët tanë”, tha ai.

Shtëpia e Bardhë njoftoi se Presidenti Donald Trump ishte informuar mbi ngjarjen dhe po monitoronte situatën.

Guvernatori i Virxhinias Ralph Northam udhëtoi për në Virginia Beach të premten dhe tha se kishte ofruar mbështetjen e plotë të shtetit.

“Kjo është dhunë e paimagjinueshme dhe e pakuptimtë,” tha ai në një deklaratë.

Senatori amerikan i Virxhinias Mark Warner tha të premten se “ndihej i tmerruar nga ajo që kishte ndodhur në Virginia Beach“.

Senatori tjetër i Virxhinias Tim Kaine, shkruante në twitter se “ai është pranë të gjithë atyre që kanë humbur njeriun e dashur gjatë këtij sulmi”. Ai shkruante se po lutet për një shërim të shpejtë për të gjithë të plagosurit.

Këto vrasje ishin më të fundit të një serie incidentesh në rritje në SHBA që përfshijnë të shtëna masive. Në nëntorin e vitit të kaluar një person i armatosur vrau 12 vetë në një bar në Thousand Oaks të Kalifornisë përpara se të vriste veten. Gjatë këtij sulmi u vra edhe një polic.

SHBA: Pasoja “shkatërruese” për Turqinë nëse e blen sistemin rus

Një zyrtare e lartë e Pentagonit ka paralajmëruar përsëri Turqinë për pasojat e blerjes së një sistemi të mbrojtjes raketore nga Rusia. Presioni i fundit amerikan ndaj Turqisë, bëhet pavarësisht vendosmërisë së deklaruar të Ankarasë për të realizuar marrëveshjen me rusët.

Ndihmës-sekretarja e mbrojtjes, Kathryn Wheelbarger, tha se blerja e sistemit të raketave S-400 nga ana e Turqisë, do të kishte një efekt “shkatërrues” për raportet e saj me aleatët tjerë të NATO-s, si dhe pjesëmarrjen e saj në programin e furnizimit me aeroplanë luftarakë të SHBA-së, F-35.

“Përfundimi i këtij transaksioni do të ishte shkatërrues, jo vetëm për programin F-35, në të cilin Perëndimi ka integruar aftësinë ajrore të modernizuar të saj, por kjo do të mund të shkëpuste ndërveprimin turk me NATO-n, një aspekt kyç i mbrojtjes së aleancës”, tha Wheelbarger gjatë një fjalimi në Këshillin Atlantik në Uashington.

“Le të jetë e qartë, S-400 është një sistem rus i projektuar për të rrëzuar një avion si F-35, dhe është e pakonceptueshme të imagjinohet se Rusia nuk përfiton nga kjo marrëveshje me Turqinë”, shtoi ajo.

Zyrtarja e lartë amerikane tërhoqi vërejtjen se nëse ky sistem rus integrohet në ndonjë vend aleat të NATO-s atëherë kjo e minon aftësinë e SHBA-së për të ndihmuar këto vende të mbrojnë veten e tyre.

Turqia, si anëtare e NATO-s, po merr pjesë në prodhimin e avionit luftarak amerikan për përdorim nga ushtarët e aleancës dhe ka në plan vetë të blejë 100 avionë luftarakë nga SHBA-ja.

Por Shtetet e Bashkuara kanë kërkuar që Ankaraja të heqë dorë nga marrëveshja për blerjen e sistemit rus dhe aleatët e NATO-s, gjithashtu, kanë shprehur shqetësime rreth kërcënimit të mundshëm që ky sistem paraqet për avionët luftarakë të prodhuar nga SHBA-ja.

Uashingtoni ka paralajmëruar Ankaranë se mund të përballet me sanksione nëse Turqia e vazhdon marrëveshjen me rusët.

Zyrtarët e SHBA-së kanë thënë, po ashtu, se kompanitë turke do të eliminohen nga puna e prodhimit që lidhet me programin e avionëve F-35.

Presidenti turk, Rexhep Tajip Erdogan, ka refuzuar të marrë në konsideratë anulimin e blerjes së raketave dhe e ka quajtur atë një “marrëveshje të kryer”. Ndërkaq, ministri i Mbrojtjes i Turqisë, Hulusi Akar, ka thënë së fundmi se Turqia ka dërguar tashmë personel në Rusi për trajnimin në sistemin e raketave.

Përgatiti: Kestrin Kumnova

Trump: Nuk kam bërë asgjë që të justifikonte shkarkimin

Presidenti Donald Trump kritikoi të enjten zërat në radhët e demokratëve rreth mundësisë për të nisur procedurën për shkarkimin e tij si rezultat i hetimeve mbi ndikimin e Rusisë në zgjedhjet presidenciale të vitit 2016. Ai tha se nuk ka bërë asgjë për të merituar një gjë të tillë.

Komentet zoti Trump i bëri në Shtëpinë e Bardhë para se të nisej për një udhëtim drejt Kolorados. Një ditë më parë Prokurori i Posaçëm Robert Mueller tha se “nuk kishte prova të mjaftueshme” për të akuzuar presidentin për konspiracion gjatë zgjedhjeve të vitit 2016, por shtoi se “hetimet po ashtu nuk arritën në përfundimin se presidenti nuk ka kryer asnjë lloj shkeljeje”.

“Nëse do të ishim të bindur se presidenti nuk ka kryer asnjë shkelje do ta kishim thënë këtë”, tha zoti Mueller.

Në raportin e zotit Mueller përmenden disa raste të mundshme që presidenti mund të akuzohet për pengim drejtësie.

Në një reagim pas kësaj deklarate, kryetarja e Dhomës së Përfaqësuesve Nancy Pelosi e cila ndodhet nën presionin e disa demokratëve që përkrahin nisjen e procedurës për shkarkimin e presidentit, tha se “asgjë nuk është hequr nga tavolina“.

I pyetur nëse e pret një gjë të tillë, presidenti Trump tha se “nuk sheh asnjë mundësi se si ata mund ta bëjnë këtë. Është një çështje e pistë, e ndyrë dhe neveritshme … është një presion agresiv ndaj presidencës“, tha ai.

Zoti Trump tha gjithashtu se zoti Mueller si prokuror ishte në “konflikt” duke vënë në dukje se ai është një mik i ngushtë i ish-drejtorit të FBI-së James Comey, të cilin zoti Trump e shkarkoi disa javë pasi mori detyrën, në fillim 2017. za

Foshnja më e vogël në botë del nga spitali

Një foshnje që ka lindur vetëm 245 gramë, dhe që besohet se është fëmija më i vogël që ka mbijetuar ndonjëherë sa u përket lindjeve të parakohshme, është liruar nga spitali në Shtetet e Bashkuara.

Foshnja Saybie ka peshuar sa një mollë e madhe kur ka lindur në javën e 23-të të zhvillimit, në dhjetor të vitit 2018.

Duke luftuar për jetë, ajo është trasferuar në kujdes intensiv në një spital në San Diego të Kalifornisë.

Doktorët u kanë thënë prindërve të foshnjës fillimisht se ajo ka vetëm disa orë për të jetuar.

Mirëpo pesë muaj më vonë, ajo peshon 2.5 kilogramë, duke tejkaluar të gjitha pritshmëritë.

Një infermiere, që është kujdestuar për të, mbijetësen e Saybiet e ka cilësuar “mrekulli”.

Para Saybiet, ka qenë një vajzë e lindur më Gjermani më 2015, që ka mbajtur rekordin e foshnjës më të vogël të lindur ndonjëherë, pasi ka peshuar vetëm 252 gramë.

Deklaratat e Muellerit shtojnë thirrjet për votëbesim ndaj Trumpit

Demokratët në Shtetet e Bashkuara bënë thirrje për nxjerrjen e presidentit Donald Trump në votëbesim, pasi këshilltari i posaçëm, Robert Mueller, i bëri komentet e para publike.

Duke folur të mërkurën, Mueller tha se hetimet e tij nuk e kanë shfajësuar Trumpin nga pengimi i drejtësisë.

Mueller është ngarkuar me hetimin e ndërhyrjes së Rusisë në zgjedhjet presidenciale në SHBA, më 2016.

Ai tha se akuzat për krim kundër një presidenti nuk kanë qenë opsion.

Çështja e votëbesimit e ka ndarë Partinë Demokratike, duke vënë një numër ligjvënësish në kundërshtim me kryetaren e Dhomës së Përfaqësuesve, Nancy Pelsoi, dhe të tjerë. Pelosi, deri më tash, i ka rezistuar idesë, duke argumentuar se do të ishte kundërproduktive.

Por, komentet e Muellerit i nxitën tre kandidatë të mundshëm për president të SHBA-së, nga Partia Demokratike: Cory Booker, Kirsten Gillibrand dhe Pete Buttigieg, t’iu bashkohen thirrjeve për votëbesim.

“Kongresi ka detyrim ligjor dhe moral për të filluar menjëherë procedurat e votëbesimit”, tha Booker, senator nga Nju Xhërsi.

Senatorja e Nju Jorkut, Gillibrand, tha se “është koha që republikanët dhe demokratët të nisin seanca dëgjimore dhe të ndjekin faktet kudo që mund të çojnë”.

Kryebashkiaku i Indianës, Pete Buttigieg, tha përmes një postimi në Twitter se situata është afër “referimit për votëbesim”.

Duke iu përgjigjur deklaratës së Muellerit, kryetarja e Dhomës së Përfaqësuesve, Pelosi, tha se “Kongresi e konsideron të shenjtë përgjegjësinë e tij kushtetuese për të hetuar dhe mbajtur presidentin përgjegjës për shpërdorimin e pushtetit”.

Kryetari i Komitetit Gjyqësor në Dhomën e Përfaqësuesve, Jerrold Nadler, tha se këshilltari i posaçëm nuk e shfajësoi presidentin nga pengimi i drejtësisë.

“Në lidhje me çështjen e votëbesimit, në këtë pikë të gjitha opsionet janë në tavolinë dhe asgjë nuk duhet përjashtuar”, tha Nadler.

Trump tha në Twitter se nuk ka pasur prova të mjaftueshme kundër tij. “Dhe, për këtë arsye, në vendin tonë, një person është i pafajshëm”, tha Trump.

Mueller kryesisht konfirmoi atë që thuhet në raportin e tij, i cili është publikuar muajin e kaluar me disa redaktime.

Ai i detajoi dhjetë raste kur Trump mund të ketë bërë përpjekje për të penguar hetimet, por tha se akuzimi i presidentit për krim nuk ka qenë opsion për këshilltarin e posaçëm.

Mueller tha se nuk beson se është “e përshtatshme të flasë më tej” për hetimet dhe se nuk do të jepte ndonjë informacion që nuk është në raportin e ekipit të tij.

Duke iu përgjigjur thirrjeve të ligjvënësve demokratë për dëshmi para Kongresit, Mueller tha: “Raporti është dëshmia ime”.

Ai gjithashtu njoftoi mbylljen formale të zyrës së këshillitarit të posaçëm dhe dorëheqjen e tij nga Departamenti i Drejtësisë, për t’iu kthyer jetës private.

Përgatiti: Valona Tela

Faqja 54 prej 128« Fillimi ‹ Prapa 50 51 52 535455 56 57 58 Para ›Fundi »

San Francisco

Përgatiti: Mimoza Sadiku

Përgatiti: Kestrin Kumnova

Përgatiti: Valona Tela

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL