Moska u ka ofruar Shteteve të Bashkuara të ndalojnë ndarjen e të dhënave të inteligjencës me Iranin, siç janë koordinatat e sakta të forcave ushtarake amerikane në Lindjen e Mesme, nëse Uashingtoni ndalon së ofruari informacione për Ukrainën në lidhje me Rusinë.

Politico raporton se dy persona të njohur me negociatat SHBA-Rusi thanë se propozimi u bë nga i dërguari rus Kirill Dmitriev te të dërguarit e administratës Trump, Steve Witkoff dhe Jared Kushner, gjatë takimit të tyre javën e kaluar në Miami.

SHBA-të e hodhën poshtë propozimin, thanë burimet, duke folur në kushte anonimiteti për shkak të ndjeshmërisë së çështjes.

Megjithatë, sipas medias, vetë ekzistenca e një propozimi të tillë ka shkaktuar shqetësim midis diplomatëve evropianë, të cilët kanë frikë se Moska po përpiqet të mbjellë përçarje midis Evropës dhe Shteteve të Bashkuara në një moment kritik për marrëdhëniet transatlantike për shkak të luftës në Lindjen e Mesme.

Vetëm sot, për më tepër, Donald Trump shprehu zemërimin e tij për refuzimin e aleatëve për të dërguar anije luftarake në Ngushticën e Hormuzit. Ai tha se ata janë “frikacakë” dhe se Shtetet e Bashkuara “do ta kujtojnë” qëndrimin e tyre.

Rusia i ka bërë disa propozime për Iranin SHBA-së, të cilat të gjitha janë refuzuar, tha një person tjetër i njohur me diskutimet. SHBA-të hodhën poshtë një propozim për të transferuar uraniumin e pasuruar të Iranit në Rusi, tha i njëjti person.

Rusia ka zgjeruar shkëmbimin e inteligjencës dhe bashkëpunimin ushtarak me Iranin që nga fillimi i luftës. Wall Street Journal madje raportoi se Moska po ofron imazhe satelitore dhe teknologji dronësh për të ndihmuar Teheranin të shënjestrojë forcat amerikane në rajon. Kremlini e quajti raportin “lajm të rremë”. gsh