Shqiptarët që jetojnë në SHBA kanë hartuar një peticion kundër kampeve të refugjatëve në vendin tonë. Një grup atdhedashësish nga Diaspora shprehen se vënia në funksion e këtyre kampeve ndikon negativisht në të tashmen dhe të ardhmen e vendit tonë. Sipas tyre qeveria duhet të hartojë politika për mbajtjen e të rinjve dhe jo ta kthejë Shqipërinë në vend-grumbullim për të huajt që refuzohen nga Evropa.

Nga SYRI TV

Shqiptarët që jetojnë në SHBA mbajnë qëndrim kundër ngritjes së kampeve të refugjatëve në Shqipëri.

Ata kanë ndërmarrë iniciativën për krijimin e një peticioni kundër kampeve për emigrantët në vendin tonë. Një grup intelektualësh atdhedashës nga Diaspora ishin të ftuar në studion e ACTV në Michigan ku kanë shprehur publikisht shqetësimin për ngritjen e këtyre kampeve, që sipas tyre ndikojnë negativisht jo vetëm në të tashmen, por edhe në të ardhmen e vendit tonë.

Nismëtarët e këtij peticioni vënë theksin në bërjen dhe zbatimin e politikave më të mira për mbajtjen e të rinjve në vend dhe inkurajimin për shtimin e lindshmërisë, e jo në kthimin e Shqipërisë si vend-grumbullim i të huajve nga kontinente të tjera të refuzuar nga Evropa.