Fakti është më shumë se skandaloz.

Në një festival filmi, është përfshirë në program pa marrë më parë pëlqimin e autorëve, siç e kane denoncuar faktin vetë autorët, edhe filmi “Rikard”, i regjisorit Mevlan Shanaj me skenar të poetes dhe skenaristes Natasha Lako.

Ndërsa në një ceremoni nga ato që tani i quajnë “gala”, fotografia e Natasha Lakos, shfaqet në ekran në vend të portretit të së mirës, regjisores së paharruar, Xhanfise Keko!

Të dy artistët bashkëshortë,

Natasha Lako dhe Mevlan Shanaj

kanë reaguar të fyer e të lënduar në të drejtën e tyre.

Miqtë e mi të dashur

Natasha dhe Mevlan,

Mos u ndjeni të lënduar nga e gjithë shpërfaqja skandaloze e injorancës së ngritur në sistem;

Mos u ndjeni të fyer nga ca idiotë pushteti që medoemos duan të dëshmojnë se janë idiotë;

ËSHTË KOHA E TYRE!

KOHA E PRANISË BESNIKE!

Ka diçka pothuajse estetike në këtë mjerim: mënyra se si e shëmtuara kërkon me kaq këmbëngulje të paraqitet si madhështore.

Ndoshta ky është paradoksi më i trishtë i kohës sonë: jo se mungon kultura, por se mungesa e saj ka filluar të prodhojë stilin e vet.

Dhe kur mungesa e kulturës arrin të bëhet stil, idiotësia nuk ka më nevojë të justifikohet. Mjafton të marrë skenën.