Në foltoren e Partisë Demokratike para Kuvendit, mjekja veterinere Silvana Bajrami ngriti alarmin mbi krizën e sigurisë ushqimore në Shqipëri, duke paralajmëruar se çdo ditë shqiptarët rrezikohen nga produkte ushqimore të kontaminuara, pesticide të ndaluara dhe metale të rënda.

Bajrami theksoi se situata ka arritur në një nivel alarmant, ku qeveria aktuale ka vendosur interesat e monopoleve dhe klientelizmit mbi shëndetin e qytetarëve dhe mbështetjen e fermerëve shqiptarë. Sipas saj, fondet e IPARD-it nuk kanë arritur kurrë tek fermerët, ndërsa fermerët shqiptarë janë lënë në mëshirë të fatit, pa subvencione, pa mbështetje për fermat, serat apo teknologjitë e nevojshme.

Doktoreshë Bajrami paralajmëroi se çdo ditë vonesë në marrjen e masave për sigurinë ushqimore është një ditë më shumë rreziku për familjet shqiptare. Ajo bëri të qartë se mbrojtja e shëndetit publik është një e drejtë themelore, dhe se qeveria duhet të veprojë menjëherë.

“Largimi i këtij regjimi nga pushteti nuk është thjesht një domosdoshmëri politike,” përfundoi Bajrami, “por një mision për të shpëtuar shëndetin e shqiptarëve dhe të ardhmen e bujqësisë shqiptare.”

Pjesë nga deklarata:

Mirëmbrëma të gjithëve. Unë jam doktoreshë Silvana Bajrami, në profesion mjeke veterinere. Sot jam këtu për të sjellë në vëmendje se Shqipëria po përballet me një krizë të thellë të interesit publik, që ka të bëjë me sigurinë ushqimore. Pasojat janë të rënda dhe ndihen çdo ditë. Shqiptarët jo vetëm që grabiten dhe po dhunohen institucionalisht, por gjithashtu po ekspozohen sistematikisht ndaj rreziqeve shëndetësore. Siguria ushqimore ndodhet në një alarm kombëtar. Produktet ushqimore të kontaminuara me pesticide të ndaluara, metale të rënda, mykotoksina dhe ndotës të tjerë të rrezikshëm përfundojnë në tryezat tona, në tryezat e familjeve shqiptare.

Skandalet e njëpasnjëshme në produktet bujqësore dhe ushqimore janë jashtë çdo standarti të sigurisë ushqimore. Kjo vë në rrezik shëndetin publik dhe na ekspozon ne në përditshmërinë tonë. Kjo ndodh sepse për regjimin e kësaj qeverie prioritet nuk është jeta dhe shëndeti i qytetarëve, por mbrojtja e interesave klienteliste të importuesve dhe monopoleve, të cilët kanë dëmtuar tregun, kanë shkatërruar prodhimin vendas dhe po falimentojnë bujqësinë shqiptare.

Bujqësia shqiptare ka shkuar në pikë, është në mëshirë të fatit. Rikujtojmë këtu fondet IPARD, të cilat u krijuan me skema të sofistikuara dhe që, përveç se duhet të shkonin tek fermerët, në fakt atje nuk përfunduan. Çdo ditë vonesë në marrjen e masave efektive është një ditë me më shumë rrezik për qytetarët.

Nëse bëjmë një krahasim me vendet e rajonit për mbështetjen e fermerëve, krahasuar me Shqipërinë, kjo lë shumë për të dëshiruar. Atje fermerët marrin subvencione për kafshët, për fermat e tyre, për tokat bujqësore, për serat dhe për teknologjitë e fundit. Ndërsa në Shqipëri kjo mbështetje është pothuajse inekzistente dhe fermerët janë lënë totalisht në harresë.

Mbrojtja e shëndetit publik dhe garantimi i sigurisë ushqimore është e drejtë themelore e çdo qeverie. Ndaj, largimi i këtij regjimi nga pushteti nuk është thjesht një domosdoshmëri politike, por një mision.