VOAL

VOAL

Please Wait ...
0%

Miratohen ndryshimet kushtetuese në Maqedoni

By | January 11, 2019

Komentet

Pas dënimit të Abdulfetah Alimit për 27 prillin, reagon Sela: Më mirë të isha vrarë atë ditë sesa ta jetoj këtë turp

Pas denimit me 7 vjet burg ndaj Abdulfetah Alimit ka reagur Kryetari i Aleancës për Shqiptarët Ziadin Sela, të cilit Alimi ia shptoi jetën nga turma e tërbuar e nacionalistëve maqedonas në Kuvendin e Maqedonisë më 27 prill 2017.

Me anë të një komenti në Facebook pas shqiptimit të aktgjykimit prej 211 vjet burg për 16 nga të akuzuarit për ngjarjet e përgjakshme të natës së 27 prillit, Sela e porosit Abdulfetahun se më shumë do të kishte dashur të mos kishte dalë gjallë atë natë nga Kuvendi, sesa që e përjetoi turpin e dënimit të sotëm të njeriut që i shpëtoi jetën.

Postimi i tij:

Në një ndejë me Fetain më pat thënë: “Nuk shqetësohem shum për dënimin sa shqetësohem për faktin qê po më fusin në një thes me kriminelët…”
Miku im, krimi yt i vetëm është se femijët e mi akoma kanë mundësinë tê thërrasin babanë e tyre dhe unë tju përgjigjem. Ti bëre “mëkatin” e ruajtjes së jetës. Ti je në burg sepse un jam gjall, prandaj ti ska se si të jesh si ata që më deshën të vdekur. Si ata që sot janë të lirë por me duar e me këmbë të zhytur në krim. Po po janë të lirë, biles edhe me pozicione qeveritare.
Nqs dikush nëpërmjet dënimit tënd don të tregoj simbolikën se regjimi i kaluar kishte dy komponentë edhe maqedon edhe shqiptar, ti nuk je kjo simbolikë. Ti je simbolika e shqiptarit të zakonshëm që e don jetën, që e don lirinë. Ti je simbolika e shqiptarit që i montohen akoma procese politike. Je simbolika e gjyqsisë së politizuar dhe me dy standarde. Simbolika e regjimit te kaluar smund te jetë Fetai por është Aliu me Nikollën. Ti dhe dënimi yt sot po që jeni simbolika e regjimit të tanishem të Aliut dhe Zoranit.

P.S. E rëndë sot dita Feta! Më mirë kurrë mos i kisha hapur sytë në mbrëmjen e 27 prillit sesa të jetoj këtë turp. Po, ti je fajtor. Ke fajin që un sot ndihem me fajin e pafuqise për të të ndihmuar. Ke fajin që jam gjall.

Ish-ministri i brendshëm, Çavkov, dënohet me 18 vjet burg për ngjarjet e 27 prillit

Shkup

Gjashtëmbëdhjetë nga 17 të akuzuar për ngjarjet e 27 prillit të vitit 2017 në Kuvendin e Maqedonisë së Veriut janë dënuar me 211 vjet heqje lirie, duke përfshirë edhe ish-ministrin e Punëve të Brendshme, Mitko Çavkov, i cili u dënua me 18 vjet burg, transmeton Anadolu Agency (AA).

Nga 15 vjet heqje lirie u dënuan shefat e policisë Mitko Peshov, Dushko Llazarov, Goran Gjoshevski, si dhe Munik Pepiq, Jane Çento, Vlatko Trajkovski dhe Nikolla Mitrevski.

Villijam MIhajllovski u dënua me 14 vjet, ndërsa Oliver Popovski me nga 13 vjet burg.

Nga 12 vjet u dënuan Mlladen Dodevski, Gorançe Angjellovski dhe Igor Jug.

Oliver Radulov, sigurimi i shefit të Drejtorisë për Siguri dhe Kundërzbulim (DSK), u dënua me 10 vjet burg, ndërsa i punësuari si sigurim në Kuvend, Abdulfetah Alimi, u dënua me 7 vjet heqje lirie.

I akuzuari Aleksandar Vasilevski – Ninxha u dënua me 8 vjet heqje lirie. Igor Durlovski, një nga udhëheqësit e protestave “Për Maqedoni të përbashkët”, u lirua nga akuza.

Të dënuarit akuzohet për kryerjen e veprës penale “kërcënim terrorist ndaj rendit kushtetues”.

Pas miratimit të Ligjit për Amnisti në Kuvend, 15 persona u amnistuan dhe procedura kundër tyre u ndërpre. Midis tyre ishin deputetët Sasho Vasilevski dhe Krsto Mukoski. Për të akuzuarin Sasho Markovski procedura zhvillohet ndaras për shkak të gjendjes jo të mirë shëndetësore.

Gjykimin e sotëm e njoftoi gjykatësja Dobrilla Kacarska, e cila udhëheq rastin e Prokurorisë për ndjekjen penale të krimit të organizuar dhe korrupsionit nga ngjarjet e 27 prillit.

Mbrëmjen e 27 prillit të vitit 2017, pas zgjedhjes së Talat Xhaferi në një situatë kaotike për kryetar të Kuvendit, protestuesit e kryesuar nga nisma qytetare “Për Maqedoni të përbashkët”, të cilët ishin tubuar para Kuvendit, me forcë hynë brenda godinës dhe ushtruan dhunë ndaj deputetëve, pjesëtarëve të policisë, si dhe punonjësve mediatik, si pasojë e së cilës mbetën të lënduar rreth 100 persona.

Për dhunën në Kuvend janë gjykuar dhjetra persona, përfshirë edhe deputetë të VMRO-DPMNE-së, ndër të cilët edhe deputeti dhe ish-kryeparlamentari Trajko Veljanovski.

Ivanovi nuk i dekreton ligjet me emrin Maqedonia e Veriut

Isuf Kadriu

Presidenti i Maqedonisë së Veriut, Gjorge Ivanov, refuzoi të dekretojë 11 ligje që janë miratuar me emrin Republika e Maqedonisë së Veriut.

Siç bënë të ditur shërbimet e Kuvendit të Maqedonisë së Veriut, bëhet fjalë për ligje në sfera të ndryshme në ekonomi, marrëveshje për bashkëpunim mes shteteve, marrëveshje për shërbimet e sigurisë, për shërbime në armatë, ligjin për komunikime elektronike, për qasje të lirë në informacionet e karakterit publik e të tjera.

Ivanov, ligjet nuk i dekretoi me arsyetimin se “gjatë ushtrimit të funksionit, gjithmonë ka vepruar në bazë të betimit të dhënë se do të mbrojë Kushtetutën dhe interesat e Republikës së Maqedonisë”.

Kuvendi bëri të ditur se kreu i shtetit nuk i ka dekretuar as ligjet që ishin miratuar me dy të tretat e votave, që kryesisht kanë të bëjë me reformat në gjyqësor, e që konsiderohen si kyçe për procesin e integrimit evropian të Maqedonisë së Veriut.

Ligjet janë miratuar pas 11 janarit, kur edhe ishin miratuar ndryshimet kushtetuese për ndryshimin e emrit të Maqedonisë në Republika e Maqedonisë së Veriut.

Ivanov e ka kundërshtuar Marrëveshjen me Greqinë për ndryshimin e emrit, të arritur më 17 qershor, 2018, duke thënë se ajo nuk është në interesa të shtetit.

Ivanov edhe më parë ka refuzuar të dekretojë ligje, si atë për përdorimin e gjuhëve dhe ratifikimin e Marrëveshjes me Greqinë. Ai këtë e ka arsyetuar me vlerësimin se “ligjet bien ndesh me Kushtetutën dhe rrezikojnë identitetin dhe gjuhën maqedonase”.

Shkup, dënime me burg për Menduh Thaçin dhe ish-zyrtarë të tjerë

Gjykata Penale në Shkup i caktoi të premten dënimin me burg Menduh Thaçit, kryetar i Partisë Demokratike Shqiptare dhe pesë ish-anëtarëve të Komisionit Shtetëror të Zgjedhjeve dhe ish-zyrtarë të lartë shtetërorë, për shkak të rolit të tyre në parregullsitë e procesit të zgjedhjeve vendore në vitin 2013. Zotit Thaçi iu caktua dënimi me 3 vjet e dy muaj burg. Bedredin Ibrahimit, po ashtu zyrtar i lartë i PDSH-së dhe ish-anëtar i KSHZ-së, 4 vjet e gjashtë muaj burg. Ish-anëtarëve të tjerë të KSHZ-së, Aneta Stefanovës, 3 vjet burg, Vllatko Sajkovskit, 3 vjet burg, Sasho Sërcevit, 3 vjet burg. Edhe ish-drejtorit të shërbimit sekret, Sasho Mijallkov, 3 vjet burg. Ky i fundit, në bazë të bisedave të përgjuara telefonike, i kishte kërkuar kryetarit të PDSH-së, Thaçi që të ndërhynte tek Bedredin Ibrahimi për të votuar prishjen e procesit të votimit në komunën e Strumicës, në juglindje të Maqedonisë së Veriut. Mijallkovi u dënua për veprën “përfitim të shpërblimit përmes ndikimit të paligjshëm”.

Prokurorja e Prokurorisë së Posaçme, Fatime Fetai kërkoi masën e paraburgimit për zotërinjtë Mijallkov dhe Ibrahimi deri në hyrjen në fuqi të dënimit, për shkak të mundësisë së arratisjes së tyre, sipas saj. Nga të gjithë të akuzuarit, vetëm z. Menduh Thaçi nuk ishte i pranishëm në gjykatë.

Të dënuarit mund të paraqesin ankesat e tyre tek Gjykata e Lartë në lidhje me masat e dënimit ndaj tyre brenda një afati të caktuar.

Zaev: Pendarovski ka mbështetjen e të gjitha bashkësive etnike

Isuf Kadriu

Në Kongresin e Lidhjes Social Demokrate (LSDM), është zyrtarizuar kandidatura e Stevo Pendarovskit për president të Maqedonisë së Veriut, për zgjedhjet presidenciale, që do të mbahen më 21 prill.

Kryeministri Zoran Zaev, njëhërsh kryetar i LSDM-së, tha para delegatëve se Stevo Pendarovski do të jetë presidenti i ardhshëm i Maqedonisë së Veriut, pas të cilit qëndrojnë të gjitha bashkësitë etnike në vend, moment ky sipas tij që nuk ka ndodhur në 27 vjet demokraci në Maqedoninë e Veriut.

“Stevo Pendarovski është propozimi ynë. Besojmë se ai është zgjedhja jonë për fitore, presidenti i ri i Maqedonisë së Veriut. U bashkuam rreth idesë së një kandidat të përbashkët, me një mbështetje të madhe. Për herë të parë kemi kthesë historike e politike në vendin tonë, maqedonas, shqiptarë, turq, serbë, romë, vlleh, boshnjakë dhe të gjithë të tjerët jemi bërë bashkë që të sigurojmë një president për të gjithë qytetarët tanë. Do të shkojmë bashkërisht në gjithë vendin tonë që t’i japim mbështetje Stevo Pendarovski, i cili do të jetë presidenti i shtetit tonë”, ka deklaruar kryeministri Zoran Zaev, duke theksuar se Maqedonisë së Veriut i duhet president i cili do të mund ta çojë vendin drejt integrimit euroatlantik, që do të jetë partner i reformave dhe jo i ndarjeve.

Më këtë rast, Zaev ka drejtuar kritika edhe ndaj presidentit aktual, Gjorge Ivanov i cili sipas Zaevit në vitin 2014 u zgjodh duke bërë padrejtësi të mëdha ndaj Stevo Pendarovski, i cili atëherë ishte kundërkandidat i Ivanovit, por që nuk kishte mbështetjen e Bashkimit Demokratik për Integrim (BDI).

“Në këto zgjedhje përfundimisht do të përmirësojmë padrejtësinë e vitit 2014. Do ta dërgojmë në histori atë i cili nuk duhet të fitonte mandatin, por kur e fitoi atë e keqpërdori atë, duke përhapur urrejtje duke i dëmtuar qytetarët e vet. Do t’i themi lamtumirë Ivanovit”, ka deklaruar kryeministri Zaev.

Ndërkohë, kandidati për president i partive të koalicionit qeverisës, Stevo Pendarovski ka qëndruar në Tetovë ku po ashtu Bashkimi Demokratik për Integrim i ka konfirmuar mbështetjen në mbledhjen e Këshillit Qendror të partisë.

“Koncepti im ka qenë dhe mbetet, Maqedonia për të gjithë, ku nuk do të qiraxhi e pronar, thjesht askush nuk guxon të ndjehet qytetar i rendit të dytë apo të tretë, apo të ketë privilegje për njërën apo tjetrën bashkësi etnike. Për mua të gjithë janë njësoj. Këtë koncept kam mbrojtur edhe më parë, edhe në vitin 2014 në zgjedhjet presidenciale, por edhe në vitin 2016 në zgjedhjet parlamentare. Këtë koncept e mbrojë edhe më tej”, ka deklaruar Pendarovski, duke shtuar me rëndësi të madhe është që në zgjedhjet e 21 prillit, Maqedonia e Veriut duhet të dëshmojë se është e aftë të organizojë zgjedhje të lira e demokratike. Më këtë, siç tha Pendarovski, vendi do ta arsyetojë anëtarësimin në NATO dhe çeljen e negociatave për anëtarësim në Bashkimin Evropian.

Nga ana tjetër, VMRO-DPMNE-ja kandidaten e saj për presidente shteti, Gordana Siljanovska, e ka prezantuar para forumit të gruas të kësaj partie, ku janë drejtuar akuza ndaj pushtetit aktual, në veçanti lidhur me Marrëveshjen e Prespës për ndërrimin e emrit të shtetit në Maqedonia e Veriut.

Siljanovska tha se kushti që kërkuan për ndërrimin e emrit të shtetit është në kundërshtim me normat ndërkombëtare.

“Nga ne kërkuan kushte plotësuese, të bisedojmë për emrin…si mundet që për emrin tim të arrihet zgjidhje…kjo është e pamundur pasi është emri im. Kjo është në kundërshtim me të gjitha normat ndërkombëtare”, ka deklaruar Gordana Siljanovska, kandidate e VMRO-DPMNE-së për presidente të Maqedonisë së Veriut.

Stevo Pendarovski kandidat presidencial i partive të pushtetit në Maqedoninë e Veriut

Stevo Pendarovski është kandidat presidencial i partive të pushtetit dhe një koalicioni prej rreth tridhjetë partish të vogla në Maqedoninë e Veriut.

Lidhja Social Demokrate e Kryeministrit Zoran Zaev, Bashkimi Demokratik për Integrim, Alternativa, Partia Demokratike Shqiptare dhe partitë e turqve e të serbëve u dakorduan të premten vonë në mbrëmje që t’i japin mbështetje zotit Pendarovski në garën presidenciale të 21 prillit.

Kryeministri Zaev tha pas takimit me drejues të tridhjetë partive se Stevo Pendarovski është kandidat mbipartiak, ndërsa theksoi shpresat se ai do të jetë presidenti i ardhshëm i Maqedonisë së Veriut.

Ai e quajti vendimin si historik, ndërsa tha se zoti Pendarovski do të jetë president i të gjithë qytetarëve, pa dallim përkatësie etnike e fetare në Maqedoninë e Veriut.

Zoti Pendarvovski aktualisht është bashkërendues kombëtar për NATO-n. Ai ishte kandidat presidencial i LSDM-së edhe në zgjedhjet e vitit 2014 kur humbi garën ndaj zotit Gjorgje Ivanov të VMRO-DPMNE-së, pasi BDI-ja e bojkotoi balotazhin, ndërsa përkrahësit e PDSH-së votuan Gjorgje Ivanovin.

Pendarovski konsiderohet si një politikan i moderuar. Ai ka mbështetjen e madhe të shqiptarëve dhe të partive të pushtetit; kjo sipas një ankete publike të brendshme që ka zhvilluar LSDM-ja gjatë javëve të fundit.

Zoti Pendarovski radhitej në anketat e brendshme publike më mirë se ministrat Oliver Spasovski i Punëve të Brendshme, Radmilla Sheqerinska e Mbrojtjes dhe Nikolla Dimitrov i Punëve të Jashtme. Lidhja Social Demokrate, megjithatë pritet që ta zyrtarizojë kandidaturën e tij në Kongresin e paralajmëruar për të dielën.

Stevo Pendarovski nuk do të ketë një garë të lehtë; Përballë tij do të jenë profesorët universitarë Gordana Siljanovska e VMRO-DPMNE-së dhe Blerim Reka i mbështetur nga partitë opozitare shqiptare Aleanca për Shqiptarët dhe Lëvizja Besa.

Ky i fundit e ka vështirë të kalojë në balotazh, duke u nisur nga përvoja e të gjitha cikleve zgjedhore presidenciale që prej pavarësisë së Maqedonisë e këndej.

Sidoqoftë, janë votat e shqiptarëve të cilat vendosin në balotazh se kush do të jetë president i Maqedonisë së Veriut.

Që zgjedhjet të jenë të vlefshme, në balotazh duhet të dalin 40 përqind të votuesve, në të kundërtën kryetari i Parlamentit, në këtë rast Talat Xhaferi i merr detyrat e presidentit të paktën për gjashtë muaj deri sa të shpallen zgjedhjet e reja, plus dhe tre muaj të tjerë deri në ditën e zgjedhjeve.

Pjesëtari i Grupit të Kumanovës i rreh dy ish-ministrat maqedonas në burgun e Shutkës

Një pjesëtar i Grupit të Kumanovës, ka rrahur ish-ministrin e Transportit dhe Lidhjeve të Maqedonisë, Mile Janakievski, si dhe atë të Punës dhe Politikës Sociale Spiro Risteski, kanë njoftuar mediat e Maqedonisë.

Siç transmeton Gazeta Express, burime të Gazetës Lajm kanë konfirmuar se ka ndodhur një kacafytje fizike, por theksojnë se bëhet fjalë për incident të vogël, respektivisht “vetëm shtyrje” të ish-ministrit Janakievski.

“Sa kemi ne informacione, Janakievski nuk është rrahur, por vetëm ka pasë një zënkë verbale dhe kacafytje të vogël fizike, respektivisht shtyrje nga ana e njërit prej të arresttuarëve. Është e vërtetë se bëhet fjalë në këtë rast për një nga pjesëtarët e Grupit të Kumanovës”, kanë thënë për Lajmin burime zyrtare nga burgu i Shutkës.

Sipas tyre detaje shtesë duhet të japin nga Gjykata themelore Shkup 2, si gjykatë e cila ia ka caktuar paraburgimin Janakievskit.

Zëdhënësi i kësaj gjykate, Dejan Ristovski, deklaroi për portalin se deri në mbarim të orarit të punës në ora 15 e 30, ata nuk kanë marrë ndonjë informacion për incidentin.

“Ndoshta ka arritur te gjykatësi ndonjë informacion i tillë, mirëpo mbetet të ju informojmë gjatë ditës së nesërme”, theksoi Ristovski.

Ndërkohë burime të tjera, sidomos portale në gjuhën maqedonase, kanë informuar se një pjesëtar i Grupit të Kumanovës i paska sulmuar dy ish-ministrat, me ç’rast Janakieskit ia ka thyer dorën, kurse Risteski ka kaluar pa lëndime serioze. Media maqedonas që i publikuan këto informata u referohen anëtarëve të familjes së ish-anëtarëve të kabinetit të Nikolla Gruevskit.

Familjarët e të akuzuarve për “Makfax”, thonë se të dy janë lënduar në një rrahje me të dënuarit e “Lagjes së Trimave”. Të njëjtit thonë se të dy ish-ministrat kanë qenë të përgjakur dhe janë dërguar për kontrolle mjekësore në spitale.

Në një bisedë telefonike me drejtorin e Burgut, Jovica Stojanoviq, ai thotë për Portalb.mk vetëm se mundet ta konfirmojë se ka ndodhur incident, por kush dhe si, s’mund të tregojë pasi që, siç thotë ai, rrahja ka ndodhur në repartin e paraburgimit.

Ky portal njofton se deri te Gjykata ka arritur njoftim për incident fizik në Burgun e Shtukës, por nuk tregohet se për çfarë bëhet fjalë.

“Gjykatësi nesër do të shkojë në burg dhe do të shohë se çfarë ka ndodhur”, thotë për Portalb.mk, zëdhënësi i Gjykatës Penale, Dejan Ristovski.

Televizioni Alsat, siç transmeton Expressi, përcjell informata jozyrtare se sulmi ka ndodhur në oborrin e burgut, derisa të burgosurit kanë qenë duke shëtitur. Zënka verbale ka filluar mes Ristoskit dhe një të burgosuri tjetër. Menjëherë pas zënkës Ristevski dhe i burgosuri tjetër janë dërguar për kontroll në ambulancën e burgut.

Janakieski dhe Ristovski nga mbrëmë gjenden nnë paraburgim 30 ditorë në burgun hetues të Shutkës./Gazeta Express/

Përpjekje për sulme të mundshme terroriste në Maqedoninë e Veriut

Ministria e Rendit në Maqedoninë e Veriut, njofton se ka kryer bastisje në disa vende, për të parandaluar një sulm të mundshëm terrorist nga mbështetës të Shtetit Islamik.

Sipas autoriteteve operacionet u kryen pas marrjes së informacionit nga një vend partner, por pa dhënë hollësi se cili është ky vend.

Ministria e Rendit njofton se ka konfiskuar një sërë mjetesh që lidhen me sulmin e mundshëm, por pa i identifikuar ato.

Ndërkohë, ambasada e Shteteve të Bashkuara lëshoi një paralajmërim për shtetasit amerikanë ku thekson “rrezikun e lartë nga mundësia e sulmeve terroriste të frymëzuara nga ideologjia ekstremiste në Maqedoninë e Veriut”.

Sipas vlerësimeve rreth 130 shtetas të Maqedonisë së Veriut i janë bashkuar grupit Shteti Islamik.

Javën e kaluar Maqedonia e Veriut nënshkroi protokollin e anëtarësimit në aleancën e NATO-s, pas miratimit të marrëveshjes me Greqinë për ndryshimin e emrit, nga Maqedoni në Maqedonia e Veriut.

Këta janë emrat e udhëtarëve që gjenden në spital pas tragjedisë në Maqedoni, janë jashtë rrezikut për jetë

Para spitalit të qytetit “8 Shtatori”, drejtori i spitalit, Hristijan Kostov, lexoi emrat e udhëtarëve të lënduar që janë jashtë rrezikut për jetë në këtë spital.

Ai tha se në këtë spital kanë ndërruar jetë gjithsej 5 persona, katër burra dhe një grua, por që ende nuk janë identifikuar.

Familjet dhe të afërmit po përpiqen të gjejnë më shumë informacion rreth gjendjes së të dashurve të tyre. Një pjesë e tyre me lot në sytë kanë pritur lajmin për personat që janë jashtë rrezikut në këtë spital. Kostov tha se të katër sallat operative po punojnë me kapacitet të plotë.

Para hyrjes në Spitalin e Qytetit ka shumë skuadra policore dhe qasja në spital është e ndaluar në mënyrë që personeli mjekësor të mundë të kryejë punën pa probleme.
Kurse edhe në spitalin “8 Shtatori” ka ardhur një ekip nga Instituti i Mjekësisë Ligjore.

Emrat e pacientëve jashtë rrezikut në spitalin “8 Shtatori”:

Nikolla Karanfilovski
Mersem Neziri
Esat Emruli
Jasmina Stojanova
Ahmeti Betim
Antonoi Antonievski
Alajdin Shabani
Dushan Stefanovski
Lulzim Dalipi
Manuill Trifunovski
Muhamed Shishko-Vjuzim
Verica Stojanovska
Serie Mustafi
Aliqe Uzeir
Goran Naumovski
Demira Ali
Seda Jusufi
Jeton Ismaili
Vjollca Ibrahimi
Halit Useini
Miqif Fikiri
Jasin Sejfuli
Fikrie Stefa
Jovana Gramatnikova
Abas Kasmi-Ferdi
Ilia Ristovski
Dilala Alili
Abdul Ismaili
Lujan Alili

Dy ditë zie në Maqedoninë e Veriut për viktimat e aksidentit rrugor

Isuf Kadriu

Katërmbëdhjetë të vdekur dhe mbi 40 të plagosur është bilanci i aksidentit të rëndë rrugor që ka ndodhur të mërkurën pasdite në autostradën Shkup-Tetovë, afër fshatit Llaskarcë, 10 kilometra nga kryeqendra e Maqedonisë së Veriut.

Aksidenti ka ndodhur nga rrokullisja e autobusit të linjës Shkup-Gostivar.

Kryeministri i Maqedonisë së Veriut, Zoran Zaev, ka ftuar në një mbledhje urgjente qeverinë, e cila ka shpallur dy ditë zie në këtë vend.

“Natë e rëndë, e mbushur përplot me dhimbje e dëshpërim. Sonte shteti jonë është në pikëllim. Nuk kam fjalë që mund të ngushëllojnë familjet e bashkëqytetarëve tanë, të cilët humbën jetën në këtë tragjedi të rëndë komunikacioni”, ka deklaruar Zaev.

Të plagosurit janë dërguar në urgjencën e Klinikës Universitare në Shkup dhe, sipas informacioneve të zyrtarëve, gjendja e së paku pesë personave është ende kritike.

Ministri i Shëndetësisë, Venko Filipçe, ka thënë se mjekët po bëjnë gjithçka për t’iu dhënë të të plagosurve ndihmën e nevojshme.

Ekipet e Ministrisë së Punëve të Brendshme dhe të Prokurorisë Publike kanë dalë në vendin e ngjarjes për të bërë ekspertizat mbi shkaqet e aksidentit.

Vozitësi i autobusit i ka shpëtuar aksidentit dhe, sipas mjekëve, ndodhet në gjendje stabile, ndërsa ekipet e hetuesisë kanë zhvilluar bisedë me të, por pa dhënë detaje.

Jozyrtarisht mësohet se shkak për këtë tragjedi mund të ketë qenë plasja e njërës nga gomat e autobusit, pas çka vozitësi ka humbur kontrollin mbi automjetin, duke rënë në një hendek përgjatë autostradës.

Përmbyset autobusi me pasagjerë në autostradën Shkup-Tetovë, të vdekur e të plagosur

SHKUP – Të paktën 13 persona kanë humbur jetën pasi një autobus me pasagjerë ka dalë nga rruga dhe është rrokullisur në autostradën Shkup-Tetovë.

Ministri i Shëndetësisë, Venko Filipçe, në një deklaratë për mediat tha se në autobus gjendeshin rreth 50 pasagjerë dhe se aktualisht bilanci i viktimave është 13, prej të cilëve shtatë kanë humbur jetën në vendin e ngjarjes, kurse gjashtë në spital.

Ambulanca nga spitale të ndryshme janë dërguar në vendin ngjarjes, kurse institucionet shëndetësore aktualisht janë duke bërë intervenimet e nevojshme për trajtimin e të lënduarve, njoftoi Filipçe.

“Në spitalin ‘8 Shtatori’ janë pranuar 25 pacientë, 22 u hospitalizuan, tre janë të lënduar lehtë nga numri total dhe me gjasë do të lëshohen në trajtim shtëpiak. Katër pacientë janë në Njësinë e Kujdesit Intensiv dhe dy pacientë janë në ndërhyrje kirurgjikale. Në qendrën urgjente në Shkup janë pranuar gjithsej pesë pacientë, tre prej të cilave janë në gjendje të lehtë. Në mesin e këtyre pacientëve është një grua shtatzënë dhe ajo do të lirohet në shtëpi. Një nga pacientët po përgatitet për ndërhyrje kirurgjikale dhe pacienti i pestë është në gjendje të rëndë rreziku, ndërsa një paciente është dërguar në Spitalin e Qytetit”, tha Filipçe.

Nga Ministria e Punëve të Brendshme ende priten informacione të detajuara rreth shkaqeve të aksidentit.

Sekretariati për Marrëveshjen e Ohrit shndërrohet në ministri

Sekretariati për Zbatimin e Marrëveshjes së Ohrit pranë Qeverisë së Maqedonisë së shpejti do të pushojë së ekzistuari dhe në vend të tij do të formohet Ministria për Sistem Politik dhe Marrëdhënie mes Bashkësive.

Televizioni Alsat i Shkupit ka siguruar draft versionet e propozim ndryshimeve të ligjit për Qeverinë dhe ligjit për organizimin e organeve shtetërore, të cilat pritet të hynë në procedurë parlamentare dhe të miratohen para fushatës së zgjedhjeve presidenciale.

“Kemi nisur bisedimet me partnerët e koalicionit dhe urojmë që shumë shpejt ata dy ligje për themelimin e Ministrisë së re për sistem politik dhe marrëdhënie mes bashkësive të gjindet para deputetëve dhe të gjejmë përkrahjen e së paku 2/3 së deputetëve në Kuvend. Me këtë ministri zëvendësohet Sekretariati për Zbatimin e Marrëveshjes së Ohrit, ashtu siç ishte rekomandim i autoriteteve të Brukselit dhe vlerësoj se do të tejkalojmë situatës ku tashmë e kemi miratuar të gjithë pjesën normative që rrjedh nga Marrëveshja e Ohrit”, deklaroi sekretari organizativ dhe deputet i Bashkimit Demokratik për Integrim Artan Grubi.

Deputetët në draft sugjerojnë që kjo ministri përveç kompetencave të sekretariatit, të marrë edhe një pjesë të kompetencave të Ministrisë së Arsimit dhe asaj të Kulturës.

Propozim – ligji

Në përbërje të Ministrisë për Sistem Politik dhe Marrëdhënie mes Bashkësive janë:

– Drejtoria për zhvillim dhe avancim të arsimit në gjuhën e pjesëtarëve të bashkësive,
– Drejtoria për afirmim dhe avancim të kulturës së pjesëtarëve të bashkësive.

Sekretariati do të pushojë së ekzistuari menjëherë nga hyrja në fuqi e ligjit kurse ministri i cili do të drejtojë dikasterin e ri do të zgjidhet në afat prej tre muajsh nga hyrja në fuqi e ndryshimeve. BDI-ja shpreson që të udhëheqë me këtë dikaster edhe pas riorganizimit të tij.

Nga Qeveria deklarojnë se deri tani në organin ekzekutiv nuk është diskutuar për këto ndryshime të mundshme.

“Në kuadër të Qeverisë nuk ka një proces të tillë, nuk është filluar. Ndoshta në nivel politik mes partnerëve të koalicionit duhet të pyesni a ekziston ndonjë iniciativë e tillë. Megjithatë, në Qeveri, nuk ka një proces të tillë”, deklaroi Mile Boshnjakovski, zëdhënës i Qeverisë.

Në rastet kur ndryshimet e këtilla iniciohen nga deputetët, Kuvendi kërkon vlerësim nga Qeveria. Në këtë përbërje të ekzekutivit me Sekretariatin për Zbatimin e Marrëveshjes së Ohrit ka udhëhequr zv.kryeministri Hazbi Lika. Ai ka qenë në qendër të kritikave për shkak të mungesës disamujore në punë dhe në seancat e Qeverisë.

/Fatlume Dervishi – Alsat/