Politika e vjetër i ka ushqyer majmërisht mediat në Kosovë, me qëllim që t’ju shërbejnë.

Por jo lidërshipi i ri i Kosovës.

Kjo sepse në shtetin e së drejtës politika dhe mediat duhet të qendrojnë larg njëra-tjetrës, e seicila të kryejë detyrën.

Mediat të jenë watchdog – në mbrojtje të interesit publik, ndërsa ekzekutivi, legjislativi e drejtësia si pushtete të pavarura të kryejnë obligimet kushtetuese.

Ne jemi dëshmitarë se si opozita parazite, nuk e ka kryer asnjë punë veç është marrë me demonizimin e Albin Kurtit, Vjosa Osmanit, Donika Gërvallës, Albulenës, Dimalit e me rradhë – pra i vetmi qëllim i opozitës që ka humbur besimin e elektoratit, ka qenë moskonstituimi i kësaj qeverie, votuar nga shumica e popullit të Kosovës.

Me vete opozita ka patur dhe ka mediat, si celula dezinformimi dhe manipulimi të fakteve, sipas gustos të shefave të tyre.

Çfarë e shoh jashtë kornizës së një sistemi demokratik pluralist, ku duhet të funksionojë bipartizanizmi, ndërsa opozita është fiksuar tek rrëmbimi i pushtetit me çdo kusht dhe kësisoj i ka bishtënue obligimeve kushtetuese që lidhen direkt me paqen sociale, mirëqenien e qytetarëve dhe sigurinë e vendit.

Në krah opozita ka patur dhe ka mediat e kompromentuara. Si rrezik për demokracinë.

Shqip, opozita i ka dezertuar obligimeve të veta, për të shkaktuar zemrim të popullit dhe për të treguar me gisht se fajtori është Albini.

Nëse mediat do të kryenin misionin e tyre të shenjtë, do të shigjetonin rolin e mbrapsht të opozitës, do t’ja fusnin këmbët në një këpucë duke e detyruar të vepronte konform interesit shtetëror e të justifikonte mandatin e deputetit si përfaqësues i Sovranit.

Si në rastin më të fundit, nëse mediat do të mirinformonin dhe sensibilizonin, duke e bërë përgjegjëse opozitën për dezertimin nga detyrimi kushtetues, kjo duke u përballur direkt me opinionin publik, do ta pranonte kërkesën e Presidentes së Kosovës për të votuar:

1. buxhetin në tri komunat,

2.1.1 miliardë Euro përfitime nga marrëveshjet ndërkombētare, që përfshihen në Pakon Europiane të Rritjes dhe

3.buxhetin për tre muajt e parë të vitit 2026 –

të tre votimet direkt në interes të qytetarëve të Kosovës.

Por, për fat të keq, askush nuk dinte se çfarë veprimesh kishte ndërmarrë Presidentja e Republikës, edhe tash mendoj se pak e dinë, sepse asnjë media nuk ka njoftuar deri kur Vjosa Osmani u pyet nga gazetarët, të cilët edhe kur e morën përgjigjen nuk e botuan as si lajm, pra e censuruan Presidenten e Republikës.

Presidentja Osmani edhe pas refuzimit të votimit të mandatarit të dytë Glauk Konjufcës i kishte thirrur partitë e opozitës që të votonin buxhetin e tre komunave, 1.1 miliardë të marrëveshjeve me institucionet ndërkombëtare që kërkonte 2/3 e votave dhe tre muaj buxhetin për Kosovën, por partitë e opozitës nuk e kishin pranuar këtë kërkesë të Presidentes së Republikës së Kosovës.

“Pyetini partitë e opozitës përse”, u tha Presidentja gazetarëve të pranishëm.

Kur opozita ndërmerr veprime që synojnë të shkaktojnë turbullira sociale,

kur opozita vetë është burimi për të shkaktuar rrëmujë dhe zemërim popullor me qëllim manipulimin e votës së 28 dhjetorit –

por fajin dhe fajtorin e delegon tek Albini – dhe mediat i shërbejnë si argatë – atëherë ky është puç institucional.

Fakt është se opozita e refuzoi lutjen e Presidentes së Republikës për të votuar në të mirë të interesit publik, të kryeqytetit dhe të Kosovës, duke dashur të manipulojë qytetarët e Prishtinës e Kosovës se faji që mbeten pa rroga asht i Albinit, i Vjosës dhe i Donikës.

Natyrisht opozita është kontribuesja kryesore e kësaj situate. Me ndihmën e mediave, Beratëve me kompani, që u shërbejnë partive të opozitës dhe xhepave të tyre, duke degraduar misionin e shtypit për të qenë i pavarur dhe në shërbim të qytetarëve të Kosovës.

Pa media të pavarura, shteti i së drejtës është i rrezikuar.

Albini, Vjosa, Donika sollën një erë të re në Kosovë, qeverisjen me duar të pastra, por të rrethuar nga media të egra, shërbyese të opozitës së vjetruar, larg çdo standarti të mediave demokratike, ku e vërteta dhe interesi qytetar e kombëtar është mision i pacënueshëm në mbrojtje të lirisë.