Voal.ch – Kjo vajzë e bukur siç e shihni në foto është Nurije Zekaj.

Ajo është një nga shumë vajza e gra të Kosovës, emri i të cilave i janë bashkuar historisë së lavdishme të popullit të Kosovës.

Nurije Zekaj u lind më 11 mars të vitit 1967, në fshatin Raushiq të Pejës. Nurija ishte sdudente e vitit të tretë në Degën e Pedagogjisë së Fakultetit Filozofik të Prishtinës, ajo ishte anëtare e Parlamentit Rinor dhe njëra nga të rejat që iu bashkangjit  aksionit të madh gjithë popullor të Pajtimit të Gjaqeve.

Më 2 shkurt 1990 me nismën e Anton Çettës nisi në Kosovë aksioni atdhetar e humanitar i faljes së gjaqeve që mori përmasa të gjera, duke u përhapur anembanë vendit. Ky konsiderohet edhe si viti më i organizuar dhe më frytdhënës i kombit shqiptar që hyri në histori si vit i bashkimit e i pajtimit të popullit shqiptar kudo që jetonte, brenda trojeve etnike dhe mërgatë.

Edhe studentja Nurije Zekaj iu bashkua me gjithë energjitë e saj kësaj nisme kombëtare.

Por aktivizmi i vajzës u pre në mes pasi më 23 prill 1990 UDB-ja organizoi një aksident që i mori jetën aktivistes të re.

Nuhije Zekaj do të mbetet e paharruar në zemrat e popullit të Kosovës dhe shembull i rinisë së saj.