Pasditen e sotme, lideri i opozitës Sali Berisha mblodhi anëtarët e Kryesisë për të diskutuar dhe miratuar kandidaturat për zgjedhjet e ardhshme. Kjo mbledhje shënon një nga vendimmarrjet më të rëndësishme të PD-së në këtë katërvjeçar, pasi përcakton ekipin që do të përfaqësojë opozitën në garën elektorale.

Sipas Berishës, ky proces është zhvilluar me transparencë të plotë dhe me përfaqësimin më të gjerë të mundshëm, duke përfshirë të gjitha shtresat dhe komunitetet e shoqërisë shqiptare. Kreu i PD-së e cilësoi këtë moment si një hap vendimtar për projektin politik “Shqipëria Madhështore”, duke theksuar se ky koalicion është më i fuqishmi në historinë e vendit. Ai vuri në dukje avantazhet e kandidatëve të PD-së, të cilët përfaqësojnë një aleancë me rreth 25 parti politike. Berisha nuk ngurroi të akuzojë kundërshtarët politikë, duke e cilësuar ekipin e Edi Ramës si të kapur nga krimi dhe interesat klienteliste. Ai solli shembuj konkretë për mënyrën se si po përzgjidhen kandidatët në PS, duke përmendur raste të ndikimit nga grupe të dyshimta. Në këtë kontekst, ai paralajmëroi se zgjedhjet e ardhshme do të jenë një përballje mes një opozite të bashkuar dhe një mazhorance në kaos të plotë.

FJALA E BERISHËS:

Mblidhemi sot në vendimmarrjen më të rëndësishme të këtij 4-vjeçari, në miratimin nga kjo kryesi të kandidaturave që PD e Shqipërisë do paraqesë para elektoratit shqiptar së bashku me koalicionin për Shqipërinë Madhështore.

Ky është një moment jashtëzakonisht i rëndësishëm, meritë e madhe e anëtarësisë së PD, drejtuesve të saj në degët e PD-së dhe në qendër, deputetëve të saj dhe ajo çka mund t’u them unë se ky proces qëndron në lartësinë e plotë të objektivit kryesor të PD-së, Shqipëria Madhështore.
Ky është procesi më transparent që është zhvilluar ndonjëherë në historinë e PD, me pjesëmarrjen më të gjerë të mundshme, me përfaqësimin e të gjitha ndjesive, të gjitha shtresave, nënshtresave, grupeve, komuniteteve të shoqërisë shqiptare.
Por këta kandidatë për deputetë kanë avantazhin sepse janë njëkohësisht përfaqësuesit e koalicionit më të fuqishëm që ka njohur Shqipëria në 32 vite.
Ky koalicion që bashkon rreth 25 parti, të cilat pa PD-në, përfaqësojnë pothuaj një të tretën e elektoratit shqiptar.
Kjo përbën një avantazh të fuqishëm për aleancën për Shqipërinë Madhështore dhe PD-në, një avantazh i cili ka goditur thellë në dëshpërim palën kundërshtare, që në fakt është në kaos të vërtetë.
Ekipi Rama-Lubi Balluku po përcakton kandidaturat tërësisht në bashkëpunim me klanet e krimit në Shqipëri.
Janë flakur edhe socialistët e fundit që kishin mbetur në atë parti dhe janë zëvendësuar me eksponentë të botës së krimit apo kushërinj, kushërira, etj, etj.
Kërcënimi është metoda bazë e përcaktimit në lista të deputetëve.
Kështu, në rast se Rama dëshironte që të lante duart me Gjiknurin, Gjiknuri i çoi një zarf jo me para, por me fotot e McGonigalit. Dhe Gjiknuri u rikthye në lista.
Dhashë këtë shembull se si po caktohet lista në krahun tjetër.
Mund t’u sjell edhe shembuj të tjerë plot se si famëzi Ceno Klosi përjashtoi socialistin asnjëherë të mençur, Petro Koçi. E të tjera me radhë, por nuk jemi për këtë çështje këtu.