Gjonaj, Has, 2 maj 2025

Kryeministri në detyrë i Republikës së Kosovës, Albin Kurti, mbrëmjen e sotme, mori pjesë në ngjarjen e organizuar me rastin e shënimit të 50-vjetorit të themelimit të Shoqatës kulturo-artistike “Malësori” dhe në edicionin e 36-të të Festivalit Folklorik “Hasi Jehon”.

“Pesë dekada përkushtim e punë të palodhshme për ruajtjen e vlerave të folklorit burimor, përmes veshjeve, instrumenteve e këngës popullore, e kanë shndërruar këtë manifestim në një nga ngjarjet më të rëndësishme kulturore në trojet ku jetojnë shqiptarët. Është një vendtakim i përvitshëm për mijëra artdashës dhe një skenë ku vlerat kulturore marrin hov”, u shpreh në hyrje të fjalës së tij kryeministri Kurti.

Në vijim, kryeministri tha se ky manifestim, që mbahet në fillim të muajit maj, përkon me datat simbolike të pajtimit të madh të gjaqeve më 2 maj 1990, ngjarje kjo e cila ndodhi pikërisht këtu, në vendin ku po zhvillohet manifestimi edhe sivjet.

“Përballë sfidave dhe periudhave të vështira të së kaluarës, “Hasi Jehon” ka qëndruar si një dëshmi e gjallë e rezistencës dhe angazhimit për ruajtjen e identitetit tonë kulturor”, u shpreh kryeministri.

Ai shtoi se Qeveria e Republikës së Kosovës dhe Ministria e Kulturës, Rinisë dhe Sportit, i kanë kushtuar vëmendje të veçantë mbështetjes institucionale dhe financiare për të gjitha fushat e kulturës, veçanërisht në fushën e folklorit, ku kemi mbështetur në vazhdimësi ansamblet, manifestimet, studimet dhe botimet në tërë territorin e vendit, me qëllim zhvillimin e mëtejshëm të kapaciteteve për ruajtjen, kultivimin dhe promovimin e trashëgimisë sonë.

“Hasi Jehon” është më shumë se një festival: është një urë që na lidh me njëri-tjetrin dhe me botën, përmes zërit të pastër të folklorit shqiptar”, tha kryeministri.

Shoqata kulturo-artistike “Malësori”, me projektin Festivali Folklorik “Hasi Jehon”, është mbështetur nga Qeveria përmes Ministrisë së Kulturës, Rinisë dhe Sportit. Gjatë vitit 2021 është përkrahur me shumën 7 mijë euro, në vitin 2022 kjo përkrahje është më shumë se trefishuar në vlerën prej 25 mijë euro. Ndërkohë, festivali ka marrë mbështetje edhe në vitin pasues me vlerë prej rreth 27 mijë euro, ndërsa kjo përkrahje gjatë vitit 2024 ka arritur në vlerën prej 30 mijë euro.

Fjala e plotë e kryeministrit Kurti:

I nderuar Drejtor i Festivalit “Hasi Jehon”, z. Haziz Hodaj,
I nderuar Ministër i Kulturës, Rinisë dhe Sportit, z. Hajrulla Çeku,

Të nderuara shoqëri kulturo-artistike nga Kosova, Shqipëria, Maqedonia e Veriut dhe Mali i Zi,
Të nderuar përfaqësues të institucioneve e të partive tona, në nivel qendror e lokal,
Të nderuar artdashës,
Të nderuar të pranishëm,
Zonja dhe zotërinj,
Motra dhe vëllezër, 

Në malet e bukura të Hasit, këtu ku trashëgimia e pasur natyrore ndërthuret me trashëgiminë po ashtu të pasur kulturore, po takohemi për të festuar një moment të rëndësishëm historik – 50-vjetorin e themelimit të Shoqatës Kulturo-Artistike “Malësori” dhe edicionin e 36-të të Festivalit Folklorik “Hasi Jehon”.

Pesë dekada përkushtim e punë të palodhshme për ruajtjen e vlerave të folklorit burimor, përmes veshjeve, instrumenteve e këngës popullore, e kanë shndërruar këtë manifestim në një nga ngjarjet më të rëndësishme kulturore në trojet ku jetojnë shqiptarët. Është një vendtakim i përvitshëm për mijëra artdashës dhe një skenë ku vlerat kulturore marrin hov.

Ky manifestim, që mbahet në fillim të muajit maj, përkon me datat simbolike të pajtimit të madh të gjaqeve më 2 maj 1990, ngjarje kjo e cila ndodhi pikërisht këtu, në vendin ku po e zhvillojmë manifestimin edhe sivjet. Përballë sfidave dhe periudhave të vështira të së kaluarës, “Hasi Jehon” ka qëndruar si një dëshmi e gjallë e rezistencës dhe angazhimit për ruajtjen e identitetit tonë kulturor.

Ky festival përfaqëson një institucion të rëndësishëm për mbrojtjen, prezantimin, bartjen dhe promovimin e trashëgimisë sonë shpirtërore. Për më shumë se tri dekada, ka bashkuar shoqëri kulturo-artistike nga të gjitha trojet e banuara me shqiptarë, duke ofruar një hapësirë për të festuar pasurinë tonë folklorike dhe etnomuzikore.

Meqë e njohim rëndësinë jetike të ruajtjes dhe kultivimit të trashëgimisë kulturore, si Qeveri e Republikës së Kosovës dhe Ministri e Kulturës, Rinisë dhe Sportit, i kemi kushtuar vëmendje të veçantë mbështetjes institucionale dhe financiare për të gjitha fushat e kulturës. Veçanërisht në fushën e folklorit, kemi mbështetur në vazhdimësi ansamblet, manifestimet, studimet dhe botimet në tërë territorin e vendit. Sepse duam zhvillimin e mëtejshëm të kapaciteteve për ruajtjen, kultivimin dhe promovimin e trashëgimisë sonë.

Festivali Folklorik “Hasi Jehon”, i cili që nga viti 2022 gëzon mbrojtje ligjore si vlerë e trashëgimisë kulturore shpirtërore në mbrojtje institucionale, është një shembull i shkëlqyer i asaj që mund të arrihet kur përkushtimi i artdashësve bashkohet me përkrahjen profesionale të institucioneve.

Qeveria e Republikës së Kosovës do të vazhdojë mbështetjen për të gjitha nismat që synojnë ruajtjen dhe zhvillimin e vlerave të trashëgimisë kulturore. Nëpërmjet mbështetjes së rregullt, synojmë që kjo trashëgimi të dokumentohet, të kultivohet dhe t’i jepet vendi i merituar në jetën kulturore e shoqërore.

Dua të përgëzoj të gjithë ata që kanë kontribuar në realizimin e kësaj ngjarjeje, që jo vetëm e ruan dhe pasuron trashëgiminë tonë, por edhe e shfaq atë në mënyrë të denjë para publikut vendor dhe ndërkombëtar.

Ju uroj suksese të gjithë pjesëmarrësve në prezantimin e këngëve, artit, valleve dhe gjithë trashëgimisë sonë shpirtërore. Po ashtu, uroj që të gjithë të pranishmit të përjetojnë tri net të mbushura me emocione, krenari dhe ndjenjë të bashkimit kulturor.

Mirënjohjet më të sinqerta u shkojnë të gjithë atyre që me pasion e kujdes punojnë për ruajtjen dhe zhvillimin e trashëgimisë sonë kulturore. “Hasi Jehon” është më shumë se një festival: është një urë e cila na lidh me njëri-tjetrin dhe me botën, përmes zërit të pastër të folklorit shqiptar.

Ju faleminderit dhe ju uroj një festival sa më të suksesshëm, e sonte, nesër mbrëma e pasnesër mbrëma, një çast shumë të veçantë e të këndshëm për juve dhe të gjithë ata mysafirë që na kanë nderuar neve në “Hasi Jehon”.

Faleminderit!

(Zyra e Kryeministrit)