A është kryeministri i vendit Rama një ndikues dhe promovues i natyrës së Shqipërisë që e ka hobi kapjen e peizazheve me kameran tij si artist, apo është Agjencia Telegrafike Shqiptare (ATSH) një institucion zyrtar informacioni që gërmon pusin e tharë të qeverisë për të treguar se burimi nuk ka shterur?

Aspektin e njëanshmërisë dhe mungesën e pasqyrimit me profesionalizëm të realitetit Unioni i Gazetarëve Shqiptarë Profesionistë të Diasporës e sheh si një frymë kërcënuese që sot ushtrohet mbi median e lirë nga pushteti një partiak.

Janë me dhjetëra rastet kur “selfiet” e kryeministrit dhe të ministrave të kabinetit të tij shkrepen, u vendosen “diçitura” dhe postohen në rrjete sociale dhe kryesisht në Facebook a thua se kabineti ka shpallur ndonjë konkurs pranimi për punën më të mirë artistike dhe domethënien e mesazhit se sa shumë po zhvillohet vendi në çdo skaj.

Ndjen keqardhje për këtë amatorizëm të drejtimit të shtetit ku duket se edhe punët e zyrës ua zgjidh Facebook-u.

Rastet e përsëritura kulmuan sot ku në katër formate të përsëritura ATSH realizon prodhimin e lajmit qeveritar;

(shabllonet nga ATSH)

“Kryeministri Edi Rama ndau sot në rrjetet sociale një video informuese mbi ”

“Në videon e publikuar nga kreu i qeverisë fjalët i kanë lënë vendin pamjeve, të cilat ofrojnë magjinë e ngjyrave të perëndimit”

 

“ Kryeministri Edi Rama ndau sot në rrjetet sociale një fotografi të veçantë, ku Berati promovohet në trenat e qytetit të Hamburgut në Gjermani”.

4- “Kryeministri Edi Rama ndau sot në rrjetet sociale, pamje mbresëlënëse nga kodrat me ullinj në fshatin Dushk të Lushnjës, të cilat i cilësoi si ‘kodrat e jetës’.”

Të katër “lajmet” mbajnë datën 21 Gusht. Pra ATSH e realizoi planin edhe sot. Katër gazetarë i ilustruan me shifra frymëzimet e kreut të qeverisë, rrogën e marrin si gazetarë dhe nesër mbi tryezë u vjen tematika ditore nga mbikëqyrësit e tyre që nuk janë gjë tjetër veç se agjentë të propagandës, patronazhistë dhe nuk kanë kurrfarë lidhje me profesionin e gazetarit.

Po nesër ?

Konkursi do të vazhdojë pa dyshim. Nga përvoja e dhjetë viteve skema vazhdon. Në terren do të hidhen sipas shkallës së rëndësisë zv/kryeministrie Balluku me tunele dhe infrastrukturë, ministri i rendit Balla mbi kanabis, ministrja e turizmit Kumbaro me ndonjë mrekulli turistike dhe natyre, ajo arsimit me ndonjë përurim shkolle me qenë se po vjen viti i ri shkollor e kështu me rradhë, pra “vetëm suksese” dhe “vetëm përpara”.

ATSH-ja po thyen çdo rekord të servilizmit ndaj qeverisjes.

Unioni i Gazetarëve Shqiptarë Profesionistë të Diasporës (UGSHPD)
Verband Albanischer Berufsjournalisten der Diaspora (VABD)
Union of Professional Albanian Journalists of Diaspora (UPAJD)
Union des Journalistes Professionells Albaniase de la Diaspora (UJPAD)
Unione dei giornalisti professionisti albanesi della diaspora (UGPAD)

Kuvendi i Kosovës ka hapur dyert për mërgimtarët. Prishtinë, 24 korrik 2023.

Avokatja shqiptare që jeton në Australi Eva Buzo u shtrua në spitalin e Vlorës për shkak të problemeve shëndetësore që e detyruan të ndërpresë sfidën e nisur prej mëngjesit të djeshëm.

Gazetari Enrik Mehmeti raportoi për “BalkanWeb” se ajo fillimisht u vendos në terapi intensive, pasi sipas mjekëve kishte hipotermi për shkak të qëndrimit në ujë.

Ndërkohë gjendja e saj shëndetësore aktualisht raportohet se është e qëndrueshme, dhe gjithashtu bëhet me dije se Eva ka filluar të komunikojë.

Pas daljes së saj dhe rikuperimit nga spitali do të ketë një pritje në lungomare. Është bërë një organizim për ta pritur atë edhe pse sfida e saj nuk shkoi deri në fund, u thye çdo rekord.

Avokatja u nis mëngjesin e djeshëm nga Otranto, Itali për të mbërritur me not në Vlorë, por pas rreth 27 orësh në det u detyrua të ndërpresë sfidën 10 milje nga Karaburuni. Ajo u dërgua me urgjencë në spital, ku ndodhet nën kujdesin e mjekëve. bw

Me shumë shqetësim kam parë këto ditë prononcime të eksponentëve të ndryshëm të Diasporës për Shqipërinë e Lirë për situatën post zgjedhore në Shqipëri.

Ajo që mbizotëron në ligjërimin e tyre është nevoja për një përfaqësim të ri politik në Shqipëri. Me gjysmë zëri dhe sa për të larë gojën e thonë që në Shqipëri është vjedhur dhe tjetërsuar vota, e këtë vetëm kur sfidohen dhe pyeten direkt nga gazetarët.

Me një gjuhë të maskuar ligjërimi i tyre në fakt është në të njëjtën linjë me tymueset qeveritare në Shqipëri.

Bërtasin fort që duhet vota e diasporës duke e paraqitur veten si faktor super të rëndësishëm politik në diasporë duke krijuar përshtypjen që janë kaq të fuqishëm sa vetëm vendet në Parlament ju mungojnë.

Ne shqiptarët kudo ku jetojmë – të nderuar diasporistë – po shohim se Shqipëria po rreshqet jo në autokraci, siç është bërë e modës të quhet sot, por në diktaturë të mirëfilltë. Kush ka sy e ka përpara.

Ne kemi parë që si asnjëherë tjetër që pushteti ka masakruar jo vetëm një parti politike liderin e së cilës në kushte normale mund të mos e pëlqejmë shumë prej nesh duke parë me dylbitë e rehatllëkut nga vendet ku jetojmë por është shkallmuar opozita shqiptare, është rrënuar pluralizmi politik!

A nuk e vëreni këtë – të nderuar diasporistë?

Si mund të thuash opozita nuk frymëzoi kur ne e dimë që operacionet e tmerrshme politike dhe ekstraligjore të regjimit nuk lejojnë të regjistrohet ligjërisht vullneti i 500 mijë shqiptarëve por mjaftoheni me konstatime bajate?

A nuk e kuptoni ju – të nderuar diasporistë – që një grupim politik i opozitës që unë i kam quajtur delenxhinj, pa kryetar, pa forume dhe pa anëtarë të financuar rëndë nga KQZ e dëmtuan keqas opozitën reale jo vetëm duke shpërndarë mjegull në popullin opozitar përmes studiove të cilat hapën dyert për çdo lloj anonimi mjafton të ishte kundër Sali Berishës?

Vetëm dje ky grup votoi në unison me pushtetin për rritjen e rrogave të tyre kur njerëzit e thjeshtë mezi mbyllin muajin!

Në cilin vend (të madh apo të vogël) ku jetoni ju – të nderuar diasporistë – që do bëni namin nesër me partiçkën tuaj ndodh që ambasadorët e vendeve të huaja sillen me deputetet vendas me arrogancë duke ju bërë presion se kë duhet të mbështesin e me kë nuk duhet të bashkohen!?

Gojët e liga thonë që me disa ambasadorë në Shqipëri takoheni shpesh edhe ju?

Nëse jeni takuar të paktën na e thoni atë që nuk na e thonë neve publikisht?

Në cilin vend të botës ku jetoni ju – të nderuar diasporistë – ndodh që kursi i këmbimit të valutës 3 javë para zgjedhjeve tronditet në mënyrë drastike duke e zhvlerësuar atë frikshëm? Shumë prej jush punoni në instuticione financiare!

A na e shpjegoni dot? Apo kjo ndodh se nuk frymëzon opozita?!

Në cilin vend të botës ku jetoni ju – të nderuar diasporistë – ndodh që një parti politike si ajo e Tom Doshit pa asnjë program apo ofertë politike të ketë aq ndikim në zgjedhje sa të dalë parti e dytë jo në një por disa zona zgjedhore?

A e besoni ju – të nderuar diasporistë – votimin elektronik që u aplikua në Shqipëri jo për gjë po shumë prej jush e mbani veten si ekspertë të shkencës kibernetike!

A na jepni ndonjë shembull nga vendet ku jetoni si votën e fut për X e te del Y?

Nuk ju dëgjova të flisni për këtë!

Në cilin vend të botës ku jetoni ju – të nderuar diasporistë – partive që janë në pushtet ju rritet mbështetja nga mandati në mandat paçka se vendi braktiset e korrupsioni rritet në mënyrë eksponenciale?

Tani ju lutem ndajeni mendjen e mos na merrni për leshko të paktën neve që jetojmë si ju në përendim ose opozita nuk frymëzon ose në Shqipëri është bërë kasaphanë me votën e lirë! Sepse na u shprehët që në zgjedhjet e fundit keni patur edhe përfaqësuesit tuaj.

Shumë pyetje më kanë munduar për ju dhe individë të caktuar prej jush që drejtoni këtë organizatë që duket se nuk vuan për financime se këtej ku jetoj unë të paktën ne nuk ta fal njeri kollaj paranë por kjo nuk është objekt i këtij shkrimi!

Bashkëatdhetarët tanë në Shqipëri nuk kanë nevojë për një parti të re politike qoftë edhe diasporiste sepse i kanë nja 150 të tilla por duan ndihmë që botës së qytetëruar e qendrave vendimarrëse të ju bëhet e ditur çfarë po ndodh me opozitën shqiptare! Ti bëhet e ditur se Shqipëria një vend edhe ashtu i vogël po zhbëhet nën hundën e ambasadorëve të tyre ! Kjo sepse në Shqiperi regjimi i ka mbyllur thuajse të gjitha gojët e lira.

A nuk e dini ju – të nderuar diasporistë – se ndryshimi politik në Shqipëri nëse do bëhet ndonjëherë do ndodhë vetëm nga brenda e kurrë nga jashtë!?

Si do ta ligjëroni ju votën e diasporës kur nuk keni në dorë asnjë mekanizëm ligjor për ta bërë këtë? Po pse more kujtoni ju se me ato lojërat me Kushtetuesen që e kontrollon një njeri i vetëm do na hidhni hi syve?

Shqipëra nuk ndihmohet duke hedhur tymuese që ndihmojnë vetëm pushtetin por duhet ndihmë që vendit ti rikthehet pluralizmi politik dhe vullneti i njerezve të çlirohet nga litarët e pushtetit!

Shqipëria nuk ndihmohet duke fraqmentarizuar opozitën akoma me shumë me partiçka të reja sepse 20 vitet e fundit çdo parti apo grupim i ri politik ka dështuar që embrion për shkak të sistemit vrasës dhe hermetik që nuk e mundëson një gjë të tillë!

Ju e dini fort mirë – të nderuar diasporistë – që edhe sikur nesër regjimi ta lejojë votën e diasporës ajo sërish do jetë minimale në krahasim me peshën që do kishte në Shqipëri pasi jo vetëm jemi të shpërndarë si zogjtë e korbit por shumica e shqiptareve janë pa status të definuar legal në vendet ku punojnë e jetojnë e do jenë indiferentë ndaj së drejtës së votimit.

Pse more kujtoni ju sa ata na përzunë neve që të jemi faktor?

A jeni në metro?

Ju besoj se nuk ushqeni ndonjë iluzion të çmendur që regjimi do lëshojë pe në kontrollin e institucioneve përfshi atë të votës e të na lejojë neve të votojmë nga vendet ku jetojmë!

Ju mund ta besoni, unë jo.

Edhe nese ndodh hataja ata do lejojnë votimin elektronik si në Kamzë e Elbasan ose votimin me postë që votat të ju a numërojë Taulanti me Elisën!

Po pse kujtoni ju se regjimi na ka përzënë që me të organizohemi e ti shembim me parti politike nga jashtë!

Ata të mërguarit e para 90s kanë qenë burra më të zot se ne por as nuk patën shansin më të vogël edhe duke patur mbështetjen e perëndomit e sot ky përendim ku jetojmë ne mbështet jo neve por republiken e kontenierëve të bananeve të Ramës!

E për fund – të nderuar diasporistë – shqiptarët nuk kanë nevojë as për parti politike të diasporës që Rama në rastin më të mirë të ju japë dy tre vende në Parlament, as për njerëz apo organizata që janë dora e zgjatur e sektit rilindas por për ndihmë për të fuqizuar dhe reformuar opozitën ekzistuese në Shqipëri sepse ajo është mënyra e vetme për ta rikthyer sistemin pluralist në Shqipëri!

Unë i kam ndjekur qëndrimet tuaja politike inkonsistente dhe tejet të dyshimita që para zgjedhjeve të para 25 Prillit 2021 e kam shkruar edhe herë të tjera për to.

Personalisht e kam të pjekur qëndrimin se kujt i shërbeni e në mulli të kujt çon ujë narrativa juaj edhe sikur të jetë e sinqertë që në rastin më të mirë është naive por nuk mund të rri indiferent që ju ti fyeni inteligjencën shqiptarëve!
***
PS: Ju kërkoj ndjesë atyre aktivistëve të Diasporës për Shqipërinë e Lirë që ndihen të atakuar e kontribuojnë ndershëm me mish e me shpirt për çeshtjen shqiptare por ky shkrim nuk është shkruar për ata por për kupolën vendimarrëse të kësaj organizate.
©️ Milaim Nela
24 Maj 2023

Ajo që më parë konsiderohej e pamundur, e padëgjuar ose një pjellë perversioni apo edhe fantashkencë, tani mund të ndodhë. Siguritë zvogëlohen dhe mendimet e dyta shumohen ndërsa Chat GPT-ja tashmë e famshme bëhet më e shpejtë, më inteligjente dhe më e aftë në të menduarit kombinues duke shërbyer gënjeshtra në vërtetësi.

Në vetëm pesë muaj, makina e inteligjencës artificiale duket se ka pushtuar botën, duke habitur edhe vetë krijuesit e saj dhe duke ngritur dyshime edhe për gjëra që ne i konsideronim, nëse jo të sigurta, të paktën të vetëkuptueshme. Askush nuk mund të jetë më i sigurt për asgjë.

Dhe tani Chat GPT ose GPT4, siç quhet versioni i ri i përmirësuar i lëshuar më 14 mars, duket se është në gjendje të bëjë pothuajse gjithçka mirë. Ndër arritjet e tij më të rëndësishme janë dhënia e provimit të jurisprudencës në SHBA, diplomimi i tij në drejtësi nga Universiteti i Minesotës dhe sigurisht performanca mbresëlënëse edhe në testin e certifikimit sommelier. Ka shumë pak pyetje që GPT4 nuk mund t’u përgjigjet (ende). Është e habitshme, por një prej tyre është se ai nuk e ka idenë se kush është Mira Murati.

Shqiptarja Mira Murati është krijuesja e aplikacionit më të famshëm, më të nxehtë dhe sigurisht më të diskutueshëm të Inteligjencës Artificiale. E megjithatë, nëse dikush pyet GPT-në, përgjigja që merr është e kufizuar në një “nuk e di/nuk përgjigjem”.

Të paktën përgjigja e tij duket në përputhje me “nëna humbet fëmijën dhe fëmija humbet nënën”, një frazë që përmbledh atë që ka ndodhur në Silicon Valley, në kompanitë e teknologjisë, në universitete dhe shkolla, në lëvizjen e përditshme të internetit, që nga dita kur u shpik GPT – dhe pothuajse humbi honorarin. E lindur në vitin 1988 në Vlorë, Shqipëri, Murati u rrit dhe u edukua në skajin e dy botëve. Fëmijëria e saj ishte gjithçka tjetër veçse e lehtë dhe e shkujdesur.

Murati në intervistat e saj nuk flet shumë dhe e vërteta është se ajo nuk pyetet shpesh për fëmijërinë e saj – logjike, pasi ka një mori pyetjesh rreth ndryshimeve bërthamore që sjell inteligjenca artificiale në mënyrën se si ne e perceptojmë dhe përjetojmë botën. Ajo që ajo gjithmonë thekson është se streha e saj personale në vitet e fëmijërisë dhe adoleshencës ishte matematika. Problemi, tha ajo për ato vite, nuk ishte teoria, por praktika.

Që në moshën 16-vjeçare, kur familja e saj emigroi nga Shqipëria në Kanada, Murati filloi të lulëzonte në atë që është sot, më interesante, e kërkuar, por kryesisht e panjohur

Përkundrazi, në intervistat e saj ajo quhet shpesh Kryeshefja e Teknologjisë (për vitin e fundit ajo ka pasur atë titull) i OpenAI, kompania që krijoi GPT dhe softuerin e saj të krijimit të imazheve të motrës DALL-E.

Me Elon Musk

Në moshën 24-vjeçare, Murati kishte përfunduar studimet për Inxhinieri në Kolegjin Ivy League Dartmouth dhe tashmë kishte filluar t’i shihte në kufirin imagjinar të vendosur nga qielli. Ajo përfundoi praktikën e saj në Goldman Sachs, mori pagëzimin e saj profesional me zjarr në prodhuesin francez të hapësirës ajrore Zodiac Aerospace dhe tre vjet më vonë ishte gati të kalonte pragun e Teslës.

Në shoqërinë e Elon Musk, i cili sot së bashku me të tjerë shefa të teknologjisë si Steve Wozniak kërkon urgjentisht pezullimin e punës së OpenAI duke pasur parasysh se shumë shpejt inteligjenca artificiale e GPT4 do të sjellë “revolucion” dhe do të bëhet autonome nga krijuesit e saj.

Kjo nuk ishte kompania e teknologjisë më e kërkuar dhe as më e madhja, megjithëse sot 375 punonjësit e saj duken të pakët në krahasim me ndikimin dhe financimin që siguron – vetëm Microsoft investoi 10 miliardë dollarë në zhvillimin e saj të mëtejshëm, siç njoftoi në fund të janarit kompania. Brenda pesë viteve, Murati jo vetëm që rriti reputacionin dhe ndikimin e kompanisë, por krijoi diçka po aq novator dhe revolucionare sa iPhone, Bitcoin dhe Facebook së bashku.

E megjithatë, pavarësisht se ishte shpirti i padiskutueshëm i projektit, Murati bëri rezistencën më të madhe dhe kishte dyshimet më të forta nëse Chat GPT ishte gati për të nisur nëntorin e kaluar. Ajo dyshonte nëse bota ishte e përgatitur, e pjekur dhe e matur për të mirëpritur sistemin e inteligjencës artificiale më të sofistikuar, por edhe më të arritshme dhe më të kuptueshme për mendjen e zakonshme, në të cilën ju pyesni dhe ai ju përgjigjet.

Kundërshtimet e saj mund të jenë tejkaluar dhe konflikti i saj i brendshëm ka kaluar në një regjim të përkohshëm armëpushimi. Po, askush nuk mund të dyshojë se e bën për sytë e botës ose jo. Megjithatë, në ato pak intervista -në krahasim me madhësinë e viralitetit të saj- që ka dhënë, ajo kujdeset të vërë në dukje dilemat etike dhe filozofike që do të dalin, por edhe problemet praktike që do të lindin nga përdorimi dhe integrimi i inteligjencës artificiale, në jetën e përditshme.

Shqiptarja Mira Murati është krijuesja e aplikacionit më të famshëm dhe më të diskutueshëm të inteligjencës artificiale.

Askush nuk mund të përjashtojë që Murati ka rezervuar tashmë një vend në panteonin e Historisë, mes atyre personaliteteve që jo vetëm skalitën botën, por edhe e ndryshuan atë rrënjësisht. Pyetja është nëse ndryshimi do të jetë për mirë apo për keq. Kasandrat tashmë po parashikojnë fundin e fjalës së shkruar, pasi ajo do të zëvendësohet nga inteligjenca artificiale, përmbysja e sistemit akademik global – tashmë universitetet më të mëdha në botë në Evropë, SHBA dhe Azi po ndalojnë njëri pas tjetrit përdorimin e chatbots nga studentët, por edhe eliminimi i mijëra vendeve të punës në dekadat e ardhshme.

Në fakt, ata flasin për fundin e së vërtetës, gjykimit dhe vullnetit, botën siç e njohim ne dhe shfaqjen e një të reje në të cilën njeriu dhe inteligjenca artificiale do të shkëmbejnë rolet e sunduesit dhe të sunduarit. Dhe kjo për shkak të Muratit, shpikja e të cilës mund të rezultojë më vendimtare për njerëzimin se molla e kafshuar e Evës. Megjithatë, ajo zgjedh ta shohë situatën me gjakftohtësi dhe me në qendër njeriun dhe e përshkruan veten jo si një Mesia femër, por si një vajzë e magjepsur nga teknologjia e Stanley Kubrick – dhe habitet që filmi i saj i preferuar është “2001: Odisea e Hapësirës”.

(BalkanWeb)

Kryeministri Edi Rama është përballur me një incident gjatë vizitës së tij në Londër ku edhe u takua me kryeministrin britanik Rishi Sunak.

Një qytetar ka reaguar ashpër ndaj kryeministrit Rama, duke e quajtur atë një hajdut, ndërsa shton se duhet t’i vijë turp.

https://www.tiktok.com/music/original-sound-7213830515358419717?refer=embed

Pjesëtarët e një familje shqiptare janë nxjerrë të gjallë nga rrënojat pas tërmeteve të shënuara në Turqi. Lajmin e ka dhënë për Syri TV, kreu i Shoqatës së Shqiptarëve në Adana, Evjen Kaja.

Ndërkohë, kreu i “Vatrës” në Turqi, z. Bora Zukali si dhe z. Leonard Seferi, kanë folur mbi situatën aktuale si dhe vështirësitë e ekipeve të kërkim–shpëtimit jo vetëm për shkak të motit, por dhe të paslëkundjeve të forta.

Deputeti Enkelejd Alibeaj u fotografua në Londër, teksa feston me kolegët socialistë, por edhe me strukturat e të majtës në këtë qytet.

Në krah të Alibeajt ishte deputeti socialist, ish-kryeministri Pandeli Majko.

Po ashtu të pranishëm në tryezë ishin edhe deputeti tjetër i PS, Lavdrim Krashi, deputeti Kreshnik Çollaku dhe drejtues të PS në diasporë.

Duket se Alibeaj po festonte me socialistët vendimin e tij për të përjashtuar deputetët demokratë nga grupi parlamentar.

Ndërsa socialistët e mbajtën atë kryetar grupi vetëm falë procedurës.syri.net

Mediat britanike njoftojnë sot se numri i atyre që kanë kaluar me gomone përmes Kanalit Anglez i ka kapërcyer 45 mijë persona. Ky është një rekord i frikshëm për vitin 2022.

Më shumë se një e treta e tyre thuhet se janë shqiptarë. Për ironi të fatit, tre dekada më pas, shqiptarët janë rikthyer të jenë njerëz që largohen me gomone nga vendi i tyre.

Mediat angleze raportojnë masivisht se shkak për largimin e shqiptarëve është varfëria, korrupsioni dhe krimi. Por ndërkohë, fajtori kryesor për këtë shpopullim ekstrem, kryeministri Edi Rama, vazhdon të qeverisë i pashqetësuar për këtë eksod historik.

Për të portretizuar më së miri qeverisjen e kryeministrit Edi Rama në vitin 2022, mjeshtri Bujar Kapexhiu sjell karikaturën simbol: Gomone ‘Albania’. syri.net